“Jān Likjab n̄an Anjo̧,” N̄an Kōkajoorļo̧k Jodikdik Ro, Juļae 2024.
Jān Likjab n̄an Anjo̧
Kwojjab aikuj in ebbweer, men̄e kwoj likjab. Tōmak eō.
Pija jān 2023 Toyota USATF Outdoor Championships ilo Juļae 8, 2023, jān USATF
Ilo 2022 eo ikar ettōr 3,000-mitōr steeplechase ilo United States national championships. Iakwōj eo enan̄in jiljilimjuon im jimettan ļāāb peļaakin jikin ettōr eo, im ewōr ļalem aļaļ in bōbrae ko ijo ilo kajjojo ļāāb me kwoj aikuj in kālōn̄ļo̧k ioer.
Ikar pād ilo ruo ļāāb ilowaan iakwōj eo ke em̧m̧aan eo im̧aaō ekar tipbok, im ibaj tubare wōt jidik. Ekar kājone kein bōbrae eo, ak ikar jab—ikar tipbok.
Ikar jidikdik jutak lōn̄tak kōnke ikar en̄jake an m̧aat kitwō. Ikar ļōmņak, “Ij ke aikuj bōjrak im etal jān jikin ettōr in?” Ak ikar pojak. Ikar pepe m̧okta bwe inaaj aikuj in etal wōt eļan̄n̄e inaaj tipbok, innām ikar bar jino ettōr. Ikar aikuj wōt in kōm̧aatļo̧k aolep men ewōr ippa men̄e iban wiin.
Ekar bōk ruo aō ļāāb m̧okta jān aō tōparļo̧k turin em̧m̧aan eo iļo̧kan rittōr ro repād im̧aan. Ejjab etto jilu ļāāb ko bwe en dedeļo̧k innām ruo ļāāb im m̧ōj. Ikar jino ļōmņak bwe imaron̄ kōm̧m̧an bwe in pād kein kajilu im̧aantata. Ak ikar kanooj m̧ōk, im ruo em̧m̧aan rekar ettōr tok im ļe jān n̄a im m̧ōttan wōt jimettan ļāāb. Ikar pād ilo kein kemān, innām ekar em̧m̧an aō kelo̧k ioon dān eo. Im ikar ļōmņak, “Eoļā, imaron̄ in wiini menin.”
Ke ij kam̧ōje 50 mita eo āliktata, ikar kile ke inaaj wiin. Ekar lukkuun in kabwilōn̄lōn̄. Ikar ļōmņak, “Wow, ilukkuun in wiini menin kiiō?” Im ikar. Ikar wiini iakwōj eo ālkin aō kar tipbok.
Tokālik, ikar kile bwe ewōr jet katak ko jemaron̄ ekkatak jān ta eo ekar waļo̧k.
1. Kijenmej Ippem Make
Ke ikar wōtlo̧k, ikar kōņaan bwe en m̧ōkaj aō tōpar ro m̧aan jon̄an wōt aō maron̄. Ak ikar aikuj kajim̧we n̄a make bwe in jab kam̧ōk eō. Ewōr juon eoon ej ba, “Jen ettōr kōn kijenmej ettōr eo ej pād im̧aad” (Hibru 12:1). Ilo mour, kwojjab aikuj in tōprak kiiō wōt. Jet iien ebōk iien.
2. Etal Wōt
Ekkā en̄jake menin n̄e kwoj kōņaan in ebbweer jet iien. Ke ikar wōtlo̧k, ikar jab ļōmņak imaron̄ kar wiin, ak ikar pepe in etal wōt. Aolep iien ewōr kōjatdikdik n̄e kwoj wōtlo̧k—kwoj aikuj in jutak im bar kajjieon̄. Rilo̧mo̧o̧r eo enaaj jipan̄ eok jelm̧ae apan̄ ko am̧. Dābdeb kōn ta eo kwojeļā ej m̧ool, im pukotļo̧k im kajjitōk ippān ro jet kōn jipan̄. Men ko renaaj em̧m̧anļo̧k.
3. Pedped ioon Jisōs Kraist
Ikar jab kōtmāne n̄an wiini ettōr eo ālkin aō kar tipbok. Ak n̄e jej tipbok ilo gospel in, n̄e jej kōm̧m̧an bōd ak jerawiwi, jemaron̄ aolep iien itok n̄an Kraist, m̧ool in ukweļo̧k, im maron̄ jeorļo̧k ad bōd. Enaaj jipan̄ eok lelōn̄tak eok. Ewōr ad jibadbad ko reļļap—jibadbad eo n̄an erom̧ em̧m̧anļo̧k, n̄an kōm̧m̧an em̧m̧anļo̧k. Aaet eļan̄n̄e jej wōtlo̧k bar juon alen, eļan̄n̄e jej bar ukweļo̧k im kajjieon̄ ļoore Rilo̧mo̧o̧r eo, innām An kallim̧ur jemaron̄ wiini ettōr an mour in.