Dali, Sunod Kanako
4 Nephi
Kalipay diha sa Panaghiusa
Usa ka kapitulo sa Basahon ni Mormon nagpakita kon sa unsang paagi kita mahiusa pinaagi kang Jesukristo ug sa Iyang ebanghelyo.
They Brought Their Little Children [Sila Midala sa Ilang Gagmayng mga Bata], ni Walter Rane
Isip tinuod nga mga sumusunod ni Jesukristo, nangandoy kita og kalinaw diha sa kalibotan nga may panagsumpaki ug panaglalis. Imbis nga magpuyo sa usa ka komunidad nga puno sa pagbiaybiay ug panagbingkil, mangita gayod kita nga makatukod og katilingban nga pinasikad sa mga pagtulun-an ni Jesukristo. Siya mitudlo, “Paghiusa; ug kon kamo dili magkahiusa kamo dili ako” (Doktrina ug mga Pakigsaad 38:27). Ang paghiusa mahinungdanon diha sa tinuod nga Simbahan ni Jesukristo.
Unsaon nato pagkab-ot ang panaghiusa?
Usa ka kapitulo diha sa Basahon ni Mormon makatabang kanato. Diha sa 4 Nephi atong makat-onan kon sa unsang paagi ang katawhan nagpuyo human mibisita kanila ang Manluluwas, mitudlo kanila, ug mitukod sa Iyang Simbahan tali kanila. Nagpakita kini kon giunsa nila pagkab-ot ang usa ka malipayon ug malinawon nga panaghiusa, ug naghatag kini kanato og sundanan nga atong masunod aron makakita og kalipay sa pagkab-ot niining samang panaghiusa sa atong kaugalingon.
1. Pagkakabig
Una, atong makat-onan nga “ang mga tinun-an ni Jesus mitukod og usa ka simbahan ni Kristo. … Ug ang [mga tawo] miduol ngadto kanila, ug matinud-anon nga mihinulsol sa ilang mga sala” (4 Nephi 1:1).
Samtang magkat-on kamo mahitungod ni Jesukristo, sa Iyang ebanghelyo, ug sa Iyang Simbahan, ang Espiritu Santo mosaksi sa kamatuoran nganha sa inyong kasingkasing. Makadawat kamo dayon sa pagdapit sa Manluluwas nga magbaton og hugot nga pagtuo diha Kaniya ug mosunod Kaniya pinaagi sa paghinulsol.
Kini magsugod sa inyong panaw sa pagkakabig—layo gikan sa hinakog, makasasala nga mga tinguha ug padulong sa atong Ginoo ug Manluluwas, si Jesukristo. Siya ang pundasyon sa atong pagtuo. Maghiusa kita libot Kaniya. Samtang motan-aw kita Kaniya sa matag hunahuna (tan-awa sa Doktrina ug mga Pakigsaad 6:36), Siya mahimong usa ka nahiusang pwersa sa atong kinabuhi.
2. Mga pakigsaad
Kadtong miadto sa Simbahan ug mihinulsol sa ilang mga sala “nabunyagan sa ngalan ni Jesus; ug sila usab nakadawat sa Espiritu Santo” (4 Nephi 1:1). Misulod sila sa usa ka pakigsaad ngadto sa Ginoo.
Kon mohimo ka ug mohupot sa mga pakigsaad, imong gidala diha sa imong kaugalingon ang ngalan sa Ginoo. Kini nga relasyon sa pakigsaad naghatag kanimo og komon nga kawsa ug komon nga pag-ila sa uban kinsa nakigbugkos sa ilang kaugalingon ngadto sa Ginoo pinaagi sa mga pakigsaad. Ang Ginoo dayon motabang kanato sa paghimo sa atong “mga kasingkasing nga mabugkos sa pagkahiusa ug sa gugma sa usag usa” (Mosiah 18:21).
3. Kaangayan ug Pagkaparehas
Ato usab nga nakat-onan nga “walay mga panagbingkil ug mga panaglalis diha [sa katawhan], ug matag tawo mitagad nga makiangayon sa usag usa.
“Ug sila aduna sa tanan nga mga butang nga alang kanilang tanan; busa walay adunahan ug kabus, ulipon ug gawasnon, apan silang tanan gihimo nga mga gawasnon, ug nag-ambit sa langitnon nga gasa” (4 Nephi 1:2–3).
Ang Ginoo gusto nga kita magmakataronganon ug magmanggiangayon. Samtang magpaduol kita ngadto Kaniya, “dili [kita] maghunahuna nga pasakitan ang usag usa, apan magpakabuhi nga malinawon, ug mohatag sa matag tawo sumala sa iyang gikinahanglan.” (Mosiah 4:13).
Aron mahiusa uban sa katawhan sa Ginoo, dili lamang nimo sila tagdon ang uban isip magkaparehas, apan kinahanglang tinud-anay nimo usab silang tan-awon nga parehas ug mobati diha sa imong kasingkasing nga ang tanan parehas lang—parehas sa atubangan sa Dios, parehas og bili ug parehas og potensiyal (tan-awa sa Doktrina ug mga Pakigsaad 38:24–25).
4. Pagkamasulundon
Human ang Ginoo mitudlo sa katawhan sa Iyang doktrina, mihatag kanila og mga kasugoan, ug mitawag og mga sulugoon aron mangalagad kanila, “sila nagsunod subay sa mga sugo diin sila midawat gikan sa ilang Ginoo ug sa ilang Dios” (4 Nephi 1:12). Ang pagsunod sa mga pagtulun-an sa Ginoo ug sa Iyang mga sulugoon mahinungdanon aron magkahiusa.
5. Nagtigom Kanunay
Ang katawhan diha sa 4 Nephi “[mipadayon] sa pagpuasa ug pag-ampo, ug nagtigom kanunay sa pag-ampo ug pagpamati sa pulong sa Ginoo” (4 Nephi 1:12).
Ang sinemana nga mga miting sa pagsimba mahinungdanon nga oportunidad alang kanato sa pagkaplag og kalig-on. Dili lamang kita moambit sa sakramento, apan kita usab magkat-on, mag-ampo, ug manganta og dungan ug mosuporta sa usag usa. Ang ubang panagpundok makatabang usab sa pag-awhag sa pagpalambo og panaghigalaay, ug gipakigbahin nga katuyoan.
6. Gugma
Atong makat-onan diha sa 4 Nephi nga ang tinuod nga panaghiusa nakab-ot “tungod sa gugma sa Dios nga anaa sa mga kasingkasing sa mga katawhan” (4 Nephi 1:15).
Ang una ug dakong sugo mao ang paghigugma sa Dios—labaw ni bisan kinsa o bisan unsa. Samtang ikaw mopalambo og gugma sa Dios ug ni Jesukristo, ang gugma sa pamilya ug sa silingan natural nga mosunod.
Ang labing dakong kalipay nga inyong masinati kon kamo malukop sa gugma alang sa Dios ug alang sa tanan Niyang mga anak.
Ang gugma nga putli, ang tiunay nga gugma ni Kristo, mao ang nag-unang kinaiya sa tinuod nga sumusunod ni Jesukristo. Kon kamo mopaubos sa inyong kaugalingon sa atubangan sa Dios ug mag-ampo uban sa tibuok kusog sa inyong kasingkasing, ang Dios mohatag kaninyo og gugma nga putli (tan-awa sa Moroni 7:48).
Samtang kamo magtinguha nga ang gugma sa Dios motuhop sa inyong kasingkasing, ang milagro sa panaghiusa ingon og hingpit nga natural diha kaninyo.
7. Balaanong Pagkatawo
Ang lain nga timailhan sa panaghiusa mao kadtong “wala nay … mga Lamanita, ni bisan unsa nga matang sa pundok sa mga katawhan; apan sila nagkahiusa, mga anak ni Kristo, ug manununod sa gingharian sa Dios” (4 Nephi 1:17).
Imbis maggamit og mga paghingalan nga sa makausa mibahin kanila, ang mga tawo mitan-aw sa ilang kaugalingon—ug sa tanan—sumala sa ilang relasyon ngadto sa Langitnong Amahan ug ni Jesukristo. Kitang tanan mga anak sa Dios ug mga disipulo ni Jesukristo. Samtang ang pagkadaiya ug mga kalainan mahimong maayo ug mahinungdanon, ang atong labing importante nga pagkatawo mao kadtong may kalabotan sa atong balaanong gigikanan ug katuyoan.
Maghiusa
Mahimong managlahi kita sa atong mga kultura, mga politika, mga kaliwat, mga ganahan, ug sa daghang ubang mga paagi. Apan samtang mahiusa kita diha ni Jesukristo, ang mao nga mga kalahian dili na kaayo importante ug maningkamot kita nga mahiusa—aron kita mahimong Iya.
Samtang atong seryosohon sa paghunahuna ug paggamit ang mga elemento sa panaghiusa nga makita sa mga katawhan diha sa 4 Nephi, masulti unta kini ngari kanato, ingon man ngadto kanila, “Sa pagkamatuod wala nay mga katawhan nga labaw pa ka malipayon sa tanan nga mga katawhan nga gilalang sa kamot sa Dios” (4 Nephi 1:16).