Alang sa Kalig-on sa mga Kabatan-onan
Pagkahimong Kabahin sa Kinabuhi sa Usa ka Tawo
Oktubre 2024

Mga Sukaranan sa Ebanghelyo

Pagkahimong Kabahin sa Kinabuhi sa Usa ka Tawo

Ni Kate Stewart

Mga Magasin sa Simbahan

Sunda ang ehemplo ni Kristo sa pagpangalagad inubanan sa gugma.

mga tawo nga naggunit og mga piraso sa puzzle

Unsa ang pagpangalagad, ug unsa ang tinuod nga kasinatian niini? Aw, usa ka paagi sa paghunahuna sa pagpangalagad mao nga inyong gisunod ang ehemplo ni Kristo sa paghigugma, pagbayaw, ug pagserbisyo sa uban. Ang pagpangalagad sama kaayo sa kasinatian nga mahimong kabahin sa kinabuhi sa laing tawo!

Isip mga disipulo ni Jesukristo, kita adunay pribilihiyo ug oportunidad sa pagsunod sa Iyang ehemplo. Atol sa Iyang mortal nga pangalagad, ang Manluluwas, sa mainampoong paagi, indibidwal, ug hilabihan ka mahinuklogon mipanalangin sa kinabuhi sa liboan. Sa samang paagi, sa atong panahon, ang mga buluhaton sa pagpangalagad motugot kanato sa pagpanalangin niadtong naglibot kanato, kasagaran sa tagsa-tagsa, sama sa Iyang gibuhat. Ang pagpangalagad makatabang nato nga mas makakonektar sa uban ug kang Jesukristo.

OK ra kon mobati kamo og kakulba, pagduhaduha, o kalibog kon unsaon ninyo sa pagpangalagad sa usa ka tawo. Si Kristo mopadako sa inyong mga paningkamot. Nagkinahanglan og mga sugyot kon asa magsugod? Susiha kini nga lista.

Nagkinahanglan og mga sugyot? Ania ang 10 ka yano nga mga butang nga inyong mahimo sa pagpangalagad sa uban:

  1. Mag-ampo alang kanila.

  2. Magpadala og mahigalaon nga mensahe.

  3. Mangutana bahin sa ilang mga kalingawan ug mga interes.

  4. Magsulat og kard o sulat.

  5. Motawag aron mangumusta bahin sa ilang adlaw.

  6. Magdapit kanila sa pagtambong og kalihokan uban kanimo.

  7. Modala ngadto nila sa ilang paborito nga pagkaon.

  8. Mopakigbahin og makapadasig o makapabayaw nga musika.

  9. Motupad ug makigsulti nila sa eskwelahan o sa simbahan.

  10. Mangita og mga oportunidad sa pagserbisyo kanila ug sa ilang pamilya.

Sa paglabay sa panahon, inyong makita nga ang paghigugma, pagdasig, ug pagserbisyo sa uban makatabang gayod ninyo nga mahimong kabahin sa ilang kinabuhi!