Mga Pulong nga Naggiya og Maayong Kinabuhi

Mas Labaw nga Kalipay

Ni Elder Dieter F. Uchtdorf

Sa Korum sa Napulog Duha ka Apostoles

Nasinati nako sa akong kaugalingon ang mahimayaong kaadlawon nga mipuno sa kalag og hingpit nga kalipay. Akong nadiskobrehan mismo nga kining malinawon nga kaseguroan naggikan sa pagsunod sa Manluluwas ug pagsubay sa Iyang Dalan.

Ang Dios mohatag og kalipay nga molabaw pa sa bisan unsa nga itanyag niini nga kalibotan. Usa kini ka kalipay nga molahutay bisan sa kasagmuyo, mohangtod bisan sa kasubo, ug mopaminos sa kagul-anan.

Samtang Magtinguha Ka og Kalipay, Hibaloi Nga:

• Ang mental ug emosyonal nga mga hagit tinuod. Alang sa pipila ka mga tawo, ang pagkaplag og kalipay mahimong maglakip sa pagtinguha og tabang gikan sa gibansay nga mga propesyonal sa kahimsog sa pangisip.

• Ang pagbati og kasubo dili timailhan sa kapakyasan. Niining kinabuhia, bisan pa man, ang kalipay ug ang kasubo manag-uban nga dili magkabulag.

Unsaon sa Pagpangita og Hingpit nga Kalipay

1. Paggahin og panahon sa sinsero, kinasingkasing nga paningkamot sa pagpaduol sa Dios.

2. Pangitaa kini. Pangita sa makugihong paagi sa inadlaw-adlawng mga panahon sa paglaom, kalinaw, ug kalipay.

3. Pagdala og kalipay ngadto sa uban sa inyong palibot. Mahimong nimong sulayan:

   • Pag-ampo alang sa usa ka tawo.

   • Paghatag og sinserong komplimento.

   • Tabangan ang usa ka tawo nga mobati nga giabi-abi ug gihigugma.

   • Pagpakigbahin og paboritong kasulatan ug unsay ipasabot niini nganha kanimo.

   • Paminaw.

Samtang ikaw modawat niini nga mga imbitasyon, ikaw makasinati sa “kalinaw sa Dios, nga molapaw sa tanang panabot,” gani sa taliwala sa mga kasubo.

Gipahiangay gikan sa usa ka pakigpulong sa Abril 2024 nga kinatibuk-ang komperensiya.