Mas Labaw nga Kalipay
Hinaot nga kitang tanan magtinguha ug makakaplag sa mas labaw nga kalipay nga moabot pinaagi sa paghalad sa atong kinabuhi ngadto sa atong Langitnong Amahan ug sa Iyang pinalangga nga Anak.
Ako adunay talagsaong panalangin nga makapamulong sa kinatibuk-ang komperensiya sulod sa tulo na ka dekada karon. Nianang panahona, napangutan-an ko gikan sa daghang tawo sa tibuok kalibotan nga may kalabotan niini nga mga mensahe. Bag-o lang, usa ka partikular nga pangutana padayon sa pag-abot. Kasagaran ingon niini: “Elder Uchtdorf, naminaw ko og maayo sa kataposan nimong pakigpulong, apan … wala na ko makadungog bahin sa pagpalupad.”
Nan, human karong adlawa, tingali mataudtaoran nga dili na ko makadungog niana nga pangutana.
Diha sa “Masadyaong Pagkabungkag sa Panganod tungod sa Adlaw [the Tumbling Mirth of Sun-Split Clouds]”1
Lisod tuohan nga 120 ka tuig lamang ang milabay dihang si Wilbur ug Orville Wright unang mipalupad ibabaw sa kabalasan sa Kitty Hawk, North Carolina. Ang upat ka dug-ol nga mga paglupad nianang Disyembre miusab sa kalibotan ug miabli sa usa sa labing talagsaong mga imbensiyon sa kasaysayan sa kalibotan.
Peligro ang pagpalupad niadtong unang mga panahon. Ang managsoon nasayod niini. Ug mao usab ang ilang amahan, si Milton. Gani, nahadlok kaayo siya nga mawad-an sa iyang duha ka anak sa usa ka aksidente sa pagpalupad nga sila misaad kaniya nga dili na gayod sila magkuyog sa pagpalupad.
Ug wala na gayod—gawas sa usa ka eksepsiyon. Pito ka tuig human nianang makasaysayanon nga adlaw sa Kitty Hawk, si Milton Wright sa kataposan mitugot ug nagtan-aw samtang si Wilbur ug Orville nagkuyog sa pagpalupad sa unang higayon. Human makatugpa, gikumbinser ni Orville ang iyang papa nga mosulod sa labing una ug bugtong pagsakay aron makita niya mismo kon unsa didto.
Dihang mikawan gikan sa yuta ang eroplano, ang 82 anyos nga si Milton nadala sa kahinam sa paglupad nga ang tanang kahadlok nawala kaniya. Nalipay si Orville dihang ang iyang papa misinggit sa kamaya, “Ipataas pa, Orville, ipataas pa!”2
Ingon ana pod ako sama kaniya!
Tingali ang rason nganong usahay mamulong ako bahin sa pagpalupad kay duna akoy nasayran nga butang sama sa gibati sa mga Wright. Ako usab isip piloto “nalipay nga nabulag sa masupilong gapos sa Yuta ug nagmaya nga ang mga pako nga pilak misanag sa nagdan-ag nga kahayag.”3
Ang unang pagpalupad sa managsoong Wright, nga nahitabo 37 ka tuig sa wala pa ko matawo, miabli sa mga pultahan sa panimpalad, katingala, ug lun-say nga kalipay sa akong kinabuhi.
Ug gani, sama nianang makatingala nga kalipay, adunay mas labaw pa nga matang sa kalipay. Karon, sama sa singgit sa kalipay ni Milton Wright, “Pataas pa, Orville, pataas pa,” gusto nakong hisgotan ang mahitungod niining mas labaw nga kalipay—diin kini gikan, giunsa pagsulod niini sa atong kasingkasing, ug unsaon nga kita makasinati og mas labaw pa niini.
Ang Kinatibuk-ang Tumong sa Pag-anhi sa Tawo
Tingali tataw na daan bisan dili litokon nga ang tanan gustong magmalipayon.4 Bisan pa, tataw usab daan bisan dili litokon nga dili ang tanan magmalipayon. Subo lang, ingon og alang sa daghang katawhan, ang kalipay lisod pangitaon.5
Ngano kahang ingon niana? Kon ang kalipay mao ang atong labing gitinguha isip usa ka tawo, nganong dili man kaayo kita malamposon sa pagpangita niini? Kon lahion sa pagbasa ang country song, tingali nagpangita kita’g kalipay didto sa sayop nga mga dapit.6
Asa Diay Nato Makaplagi ang Kalipay?
Sa dili pa nato hisgotan kon unsaon sa pagkaplag og kalipay, tugoti ako sa pag-ila nga ang depresyon og ubang lisod nga mga hagit sa mental ug emosyonal tinuod gayod, ug ang tubag dili lang usa ka yano nga, “Paningkamot nga mas magmalipayon.” Ang akong tuyo karon dili ang pagpaminos o pagbaliwala sa mga isyu sa mental nga kahimsog. Kon nag-atubang kamo og ingon nianang mga hagit, nagsubo ako uban kaninyo, ug anaa ako uban kaninyo. Alang sa ubang mga tawo, ang pagkaplag og kalipay tingali naglakip sa pagpangita og tabang gikan sa mga binansay nga propesyonal sa kahimsog kinsa mihalad sa ilang kinabuhi sa pagbansay sa ilang labihan ka importante nga kahanas sa pagpanambal. Angay natong pasalamatan ang ingon niana nga tabang.
Ang kinabuhi dili usa ka walay kataposan nga kutay sa emosyon nga dili makontrola. “Kay gikinahanglan gayod, nga adunay kaatbang sa tanan nga butang.”7 Ug kon ang Dios Mismo mibakho, sama sa gipamatud-an sa kasulatan nga Siya mibakho,8 nan ikaw ug ako mobakho usab. Ang pagbati og kasubo dili timailhan sa kapakyasan. Niining kinabuhia, bisan pa man, ang kalipay ug ang kasubo dili magkabulag nga managkompanyon.9 Sama kaninyong tanan, aduna usab akoy mga gibati nga pagkasagmuyo, kasubo, kaguol, ug pagmahay.
Apan, nakasinati sab ako sa akong kaugalingon sa mahimayaong kaadlawon nga mipuno og kalipay sa kalag nga labihan kalisod ang pagpugong niini. Akong nadiskobrehan mismo nga kining malinawon nga kaseguroan naggikan sa pagsunod sa Manluluwas ug pagsubay sa Iyang Dalan.
Ang kalinaw nga iyang gihatag dili sama sa unsay gihatag sa kalibotan.10 Mas labaw kini. Mas labaw ug mas balaan. Miingon si Jesus, “Mianhi ako aron makabaton kamo og kinabuhi, ug mianhi ako aron makabaton kamo og kinabuhing madagayaon.”11
Ang ebanghelyo ni Jesukristo mao ang “maayong balita nga makalipay kaayo”!12 Mensahe kini mahitungod sa dili hitupngan nga paglaom! Usa ka mensahe mahitungod sa paggamit og yugo ug pagpas-an sa palas-anon.13 Sa pagpundok sa kahayag. Sa langitnong pag-uyon, mas taas nga panabot, mahangtoron nga seguridad, ug walay kataposang himaya!
Ang hingpit nga kalipay mao gayod ang katuyoan sa plano sa Dios alang sa Iyang mga anak. Mao kini nganong gilalang kita—“aron [kamo] makabaton og hingpit nga kalipay”!14 Gihimo kamo alang niini!
Wala itago sa atong Langitnong Amahan ang dalan sa kalipay. Dili kini usa ka sekreto. Magamit kini sa tanan!15
Gisaad kini ngadto sa tanan nga nagsubay sa dalan sa pagkadisipulo, nagsunod sa mga pagtulun-an ug ehemplo sa Manluluwas, nagtuman sa Iyang mga sugo, ug magatahod sa mga pakigsaad nga ilang gihimo ngadto sa Dios. Pagkatalagsaon nga saad!
Ang Dios Dunay Dugang Pa nga Ikatanyag
Tanan kita may nailhang mga tawo nga moingon nga wala sila magkinahanglan sa Dios aron magmalipayon, nga malipayon ra sila nga walay relihiyon.
Akong giila ug gitahod kini nga mga pagbati. Ang atong hinigugma nga Amahan sa Langit gusto nga ang Iyang tanan nga anak makabaton og dakong kalipay kutob sa mahimo, mao nga kini nga kalibotan gipuno niya og matahom, limpyo nga kalingawan ug mga kahimuot, “pagpahimuot sa mata ug … pagmaya sa kasingkasing.”16 Alang nako, ang pagpalupad nagdala og talagsaong kalipay. Ang uban makakaplag niini diha sa musika, sa art, sa mga paboritong buhaton o sa kinaiyahan.
Pinaagi sa pagdapit sa tanan ug pagpaambit sa maayong balita sa Manluluwas sa hingpit nga kalipay, wala nato ibaliwala ang bisan unsa niining mga tinubdan sa kalipay. Nag-ingon lamang kita nga ang Dios dunay labaw pa nga ikahatag. Mas labaw ka taas ug mas tulukibong kalipay—usa ka kalipay nga molabaw sa bisan unsang ikatanyag sa kalibotan. Usa kini ka kalipay nga molahutay bisan sa kasagmuyo, mohangtod bisan sa kasubo, ug mopaminos sa kagul-anan.
Ang kalibotanong kalipay, sa sukwahi, dili mohangtod. Dili. Kinaiyahan lang sa tanang yutan-ong mga butang ang pagkatigulang, pagkadunot, pagkaguba, o pagkabahaw. Apan ang diosnong kalipay mahangtoron, tungod kay ang Dios mahangtoron. Si Jesukristo mianhi sa pagbayaw kanato gikan sa temporal ug pulihan ang pagkadunot ngadto sa pagkadili madunot. Siya lamang ang aduna niana nga gahom, ug ang Iyang kalipay lamang mao ang makanunayon.
Kon mibati kamo nga dunay mas labaw pa niini nga matang sa kalipay sa inyong kinabuhi, dapiton ko kamo nga sugdi ang panaw sa pagsunod ni Jesukristo ug sa Iyang Paagi. Tibuok kinabuhi kini nga panaw—ug lapas pa. Palihog tugoti ko nga mosugyot og pipila ka lakang niining takos nga panaw sa pagdiskobre og lunsay nga kalipay.
Paduol ngadto sa Dios17
Nahinumdoman ba ninyo ang babaye sa Daang Tugon nga nag-antos sa sakit nga pagdugo sulod sa 12 ka tuig?18 Nagasto niya ang tanan nga anaa kaniya sa pagpadoktor, apan misamot lamang ang tanan. Nakadungog siya mahitungod ni Jesus; ang Iyang gahom sa pagpang-ayo nailhan kaayo. Apan Siya ba makaayo kaniya? Ug unsaon kaha niya nga siya makapaduol Kaniya? Ang iyang sakit naghimo niya nga “hugaw” sigon sa balaod ni Moises, ug mao nga gikinahanglan nga mopalayo siya sa uban.19
Ang pagduol ngadto Kaniya sa dayag ug paghangyo nga ayohon ingon og dili na ikapangutana.
Sa gihapon naghunahuna siya, “Bisan ug mahikapan ko lamang ang iyang bisti, mamaayo gayod ako.”20
Sa kataposan, ang iyang hugot nga pagtuo mibuntog sa iyang kahadlok. Nangisog siya bisan sa pagbadlong sa uban ug midutdot ngadto sa Manluluwas.
Sa kataposan, naa na siya sa duol. Iyang gikawhat.
Ug naayo siya.
Kita aduna bay pagkasusama niining babayhana?
Tingali dunay daghang rason nga magpanuko kita sa pagpaduol ngadto sa Manluluwas. Tingali biaybiayon kita o panghimaraoton sa uban. Tungod sa atong garbo, posibling isalikway nato ang posibilidad sa pipila ka butang nga yano kaayo nga diay bililhon kaayo. Maghunahuna kita nga ang atong kahimtang basin dili mohatag kanato og kasarang sa pagkaayo gikan Kaniya—nga ang distansiya layo kaayo o ang atong mga sala daghan kaayo.
Sama niini nga babaye, nahibaloan nako nga kon mopaduol kita sa Dios ug mokab-ot sa paghikap Kaniya, makakaplag kita og kaayohan, kalinaw, ug kalipay.
Pangitaa kini
Si Jesus mitudlo nga, “Pangita, ug kamo makakaplag.”21
Nagtuo ako nga dili lamang espirituhanong saad kini nga pulong, usa kini ka pulong sa kamatuoran.
Kon mangita kita og mga rason aron masuko, magduhaduha, magmasuk-anon o mag-inusara, ato kining makit-an.
Apan, kon mangita kita og hingpit nga kalipay—kon mangita kita og mga rason aron maglipay ug malipayong mosunod sa Manluluwas, ato kining makit-an.
Talagsa ra natong makit-an ang butang nga wala nato pangitaa.
Nagpangita ba kamo og kalipay?
Pangita ug kamo makakaplag.
Pas-ana ang mga Alantoson sa Usag Usa22
Si Jesus mitudlo, “Labi pang bulahan ang paghatag kay sa pagdawat.”23
Puwede ba nga, sa atong pagpangita og hingpit nga kalipay, ang labing maayong paagi sa pagkakita niini mao ang paglipay sa uban?
Mga kaigsoonan, nasayod kamo ug nasayod ako nga kini tinuod! Ang hingpit nga kalipay sama sa usa ka barel sa harina o garapon sa lana nga dili gayod mahubsan.24 Ang tinuod nga hingpit nga kalipay modaghan kon kini ipakigbahin.
Wala kini magkinahanglan og butang nga dako o komplikado.
Makahimo kita og yanong mga butang.
Sama sa pag-ampo alang sa usa ka tawo sa tibuok natong kasingkasing.
Sa paghatag og sinserong komplimento.
Sa pagtabang og tawo aron mobati nga gihangop, gitahod, gipakabili, ug gihigugma.
Sa pagpakigbahin og paboritong kasulatan ug unsay ipasabot niini ngari kanato.
O bisan lang sa pagpaminaw.
“Kon kamo anaa sa pag-alagad sa inyong isigka-tawo kamo anaa lamang sa pag-alagad sa inyong Dios,”25 ug ulian kamo sa Dios sa inyong kabuotan sa madagayaon gayod.26 Ang hingpit nga kalipay nga inyong gihatag sa uban mobalik ra kaninyo sa “takos nga pinaugdo, dinasok ug tinantan, ug magaawas.”27
Nan, Unsay Atong Buhaton?28
Sa umaabot nga mga adlaw, mga semana, ug mga bulan, mahimo bang dapiton ko kamo sa:
-
Paggahin og sinsero, kinasingkasing nga paningkamot sa pagpaduol sa Dios.
-
Pangita sa makugihong paagi sa inadlaw-adlawng mga panahon sa paglaom, kalinaw, ug kalipay.
-
Pagdala og kalipay sa uban sa inyong palibot.
Minahal kong kaigsoonan, minahal nga mga higala, kon magsiksik kamo sa pulong sa Dios alang sa mas lawom nga panabot sa mahangtorong plano sa Dios, dawata kining mga pagdapit, ug maningkamot sa pagsubay sa Iyang dalan, masinati ninyo “ang kalinaw sa Dios nga dili matugkad sa tawo,”29 bisan sa taliwala sa mga kasub-anan. Bation ninyo ang mas dakong sukod sa dili matugkad nga gugma sa Dios nga motubo sulod sa inyong kasingkasing. Ang kabuntagon sa celestial nga kahayag manuhotsuhot sa mga anino sa inyong mga pagsulay, ug masugdan ninyo ang pagsinati sa dili mahulagway nga mga himaya ug mga katingalahan sa dili makita, hingpit, langitnong ginsakopan. Bation ninyo ang inyong espiritu nga mobayaw kaninyo palayo gikan sa gibug-aton niini nga kalibotan.
Ug sama sa buotang si Milton Wright, tingali ipataas ninyo ang inyong tingog sa pagmaya ug pagsinggit, “Mas taas pa, Amahan, mas taas pa!”
Hinaot nga kitang tanan magtinguha ug makakaplag sa mas labaw nga kalipay nga moabot pinaagi sa paghalad sa atong kinabuhi ngadto sa atong Langitnong Amahan ug sa Iyang pinalangga nga Anak. Kini ang akong tinuoray nga pag-ampo sa ngalan ni Jesukristo, amen.