Pagsumpay sa Duha ka Dagkong Sugo

Ni Elder Gary E. Stevenson

Sa Korum sa Napulog Duha ka Apostoles

Sa samang paagi, ang atong abilidad sa pagsunod ni Jesukristo mag-agad sa atong kalig-on ug gahom sa pagsunod sa una ug ikaduhang mga sugo nga magkabalanse ug parehas nga debosyon.

Pasiuna

Dihang ang akong asawa, si Lesa ug ako nagbiyahe alang sa buluhaton sa tibuok kalibotan, gikalipay namo ang pribilihiyo nga makahimamat kaninyo sa dagko ug gagmay nga mga kongregasyon. Ang inyong debosyon sa buhat sa Ginoo midasig kanamo ug nagbarog kini isip usa ka pagpamatuod sa ebanghelyo ni Jesukristo. Mamauli kami gikan sa matag biyahe nga maghunahuna kon ang nahatag ba kaha namo sama kadaghan sa among nadawat.

Kon magbiyahe, gamay ra kaayo kami og panahon sa pagsuroy-suroy [sightseeing]. Hinoon, kutob sa mahimo, mogahin ko og pipila ka gutlo sa partikular nga butang nga akong ganahan. Malingaw kaayo ko sa arkitektura ug desinyo ug ganahan kaayo sa madanihong mga taytayan. Ang dunay banting nga mga taytayan nakapatingala kanako. Mahimong ang Rainbow Bridge man sa Tokyo,, sa Tsing Ma Bridge sa Hong Kong, Tower Bridge sa London, o sa uban nga akong nakita, dili ko makapugong apan matingala sa katalagsaon sa engineering sa pagtukod nianang komplikadong mga estraktura. Ang mga taytayan modala kanato sa mga dapit nga kon wala kini dili nato maadto. (Sa dili pa ko mopadayon, akong nabantayan nga sukad sa pag-andam niini nga mensahe, nahitabo ang labihan ka makasubo nga aksidente sa taytayan sa Baltimore. Nagbangotan kita sa nakalas nga kinabuhi ug mihalad og mga pahasubo sa mga pamilya nga naapektohan.)

Usa ka Talagsaon nga Dunay Binantingan nga Taytayan

Bag-o lang, usa ka komperensiya midala kanako ngadto sa California diin gitabok nako og balik ang iconic nga Golden Gate Bridge nga nailhan isip makatingala nga engineering sa kalibotan. Kining labihan ka talagsaong estraktura mihiusa sa matahom nga porma, praktikal nga katuyoan, ug kabatid sa engineering. Usa kini ka klasika sa binantingan nga taytayan nga gisuportahan sa duha ka tag-as nga tower, nga gisuportahan og solido kaayong mga haligi. Ang higante, duha ka tower nga labihan kalig-on nga nagpas-an sa kabug-aton nga nagbuntaog ang gitas-on ibabaw sa dagat maoy unang mga elemento nga gitukod. Nagtambayayong kini sa pagsuporta sa tag-as kaayong dagko nga kasad-ayan sa ibanting nga kable ug sa pinatindog nga mga kable, nga gibanting sa mga karsada sa ubos. Ang dili ordinaryong kapasidad sa kalig-on, ang gahom sa tower, mao ang magic nga nagpaluyo sa engineering sa maong taytayan.

Ang nag-unang mga imahe sa pagtukod sa taytayan nagpamatuod sa baroganan sa engineering niini. Ang matag elemento sa matag taytayan nga makalahutay sa kabug-aton gisuportohan sa duha ka tower, nga ang duha katambayayong nga konektado sa usag usa.

Dihang nahuman ang taytayan, nga may duha ka tower nga lig-ong napahimutang ug ang mga haligi nga nakaangkla sa pundasyon sa solidong bato nga labihan kalig-on, usa kini ka imahe sa kalig-on ug katahom.

Karon dapiton ko kamo sa pagtan-aw niining madanihon nga taytayan, uban sa nagbuntaog nga duha ka tower niini nga gitukod sa lig-ong pundasyon—pinaagi sa lente sa ebanghelyo.

Dapit sa kataposan sa pagpangalagad ni Jesukristo, sa karon nga gitawag nato og Semana Santa, usa ka Pariseo nga usa ka abogado¹ nangutana sa Manluluwas diin nasayod siya nga imposibleng matubag:² “Magtutudlo, unsa man ang labing dakong sugo sa balaod?” Ang abogado, nga “nagtental kaniya” ug nagtinguha og legal nga tubag, uban sa ingon og malinglahon ngakatuyoan, nakadawat og tinuod, sagrado, balaan, nga tubag.

“Si Jesus mitubag, Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.

“Kini ang labing una ug labing dako nga sugo.” Pagpatalinghog sa atong analohiya sa taytayan, ang unang tower!

“Ug ang ikaduha sulosama ra, Higugmaa ang imong silingan sama sa imong kaugalingon.” Kini ang ikaduhang tower!

“Nagsukad niining duha ka sugo ang tibuok nga balaod ug mga propeta.”³ Ang uban pang mga elemento sa taytayan!

Susihon nato ang matag usa sa duha ug labing dagko nga sugo, nga gipadayag ug gilitok sa pagtubag ni Jesukristo. Sa atong pagbuhat niini, himoa nga ang imahe sa talagsaon nga binantingan nga taytayan, inubanan sa madanihong mga tower nga nagbuntaog padulong sa langit, mopahunahuna kaayo kanimo.

Higugmaa ang Ginoo

Ang una, ang paghigugma sa Ginoo sa tibuok mong kasingkasing, kalag, ug hunahuna.

Niini nga tubag, gitingob ni Jesukristo ang kahulogan sa balaod nga gipauban niining sagrado nga mga pagtulun-an sa Daang Tugon. Ang paghigugma sa Ginoo nga magsentro og una sa inyong kasingkasing—sa inyo gyod nga kinaiyahan. Ang Ginoo naghangyo nga kamo mohigugma sa tibuok ninyong kalag⁴—sa tibuok ninyong pagkatawo—ug sa kataposan, sa paghigugma uban sa tibuok ninyong hunahuna—inyong kaalam ug salabotan. Ang paghigugma sa Dios dili limitado o may kataposan. Kini walay kataposan ug mahangtoron.

Alang nako, ang paggamit sa unang dako nga sugo usahay mabatyagan nga usa ka teyoriya lang, gani makalisang. Salamat na lang, samtang akong gikonsiderar ang mga pulong ni Jesus, kini nga sugo mas masabtan: “Kon nahigugma kamo kanako, tumana ninyo ang akong mga sugo.”⁵ Makahimo ako niini. Akong higugmaon ang Langitnong Amahan ug si Jesukristo, nga mosangpot sa pag-ampo, pagtuon sa kasulatan, ug pagsimba sa templo. Kita mohigugma sa Amahan ug sa anak pinaagi sa pagbayad sa mga ikapulo, pagbalaan sa Adlawng Igpapahulay, pagpakabuhi og mahiyason ug putli nga kinabuhi, ug kamasulondon.

Ang paghigugma sa Ginoo sa kasagaran masukod sa inadlaw-adlaw nga ginagmayng buhat, mga lakang padulong sa dalan sa pakigsaad: para sa mga batan-on, paggamit sa social media sa pagsuporta kay sa mosaway; pagbiya sa party, sa sine, o kalihokan diin mahagit ang mga sumbanan; pagpakita og balaang pagtahod alang sa mga butang nga sagrado.

Ikonsiderar kining malumo nga ehemplo. Dominggo kadto sa puasa dihang si Vance⁶ ug ako nanuktok sa pultahan sa gamay, ordinaryo nga balay. Kami og ubang mga deacon sa korum miadto nga nagpaabot sa mga pulong nga, “Palihog sulod,” nga mainitong molanog sa gahi nga punto sa German nga igo ang kalanog nga madungog lapos sa pultahan. Si Sister Muellar usa sa daghan nga biyuda sa ward. Dili siya makatubag sa may pultahan diha dayon, kay hanap na ang iyang panan-aw. Dihang mitikang kami sulod sa may awop nga kahayag sa panimalay, gitimbaya niya kami sa mabinationg mga pangutana, Unsay inyong mga ngalan? Kumusta man kamo? Gihigugma ba ninyo ang Ginoo? Mitubag kami ug miingon nga mianhi kami aron modawat sa iyang halad sa puasa. Bisan sa bata namong pangedaron, ang kalisod sa iyang kahimtang maklaro kaayo, ug ang iyang puno sa pagtuo nga tubag labihan ka makatandog “naa koy gibutang nga usa ka sensilyo diha sa may banggera ganinang buntag. Mapasalamaton kaayo ko sa akong halad sa puasa. Mahimo bang sa mabinationg paagi isulod ninyo kini sa sobre ug sulatan ang akong resibo sa halad sa puasa?” Ang iyang gugma sa Ginoo mibayaw sa among pagtuo sa matag higayon nga mobiya kami sa iyang panimalay.

Si Hari Benjamin misaad og talagsaong gahom ngadto niadtong mosunod sa unang dako nga sugo. “Nagtinguha ako nga hunahunaon ninyo ang bulahan ug ang malipayon nga kahimtang niadtong nagsunod sa mga sugo sa Dios. … Bulahan sila sa tanan nga butang, sa temporal ug sa espirituwal; ug kon magpabilin silang matinud-anon hangtod sa kataposan dawaton sila sa langit … sa kahimtang nga walay kataposang kalipay.”⁷

Ang paghigugma sa Ginoo mosangpot sa mahangtoron nga kalipay!

Higugmaa ang Imong Silingan

Si Jesus dayon miingon, “Ug ang ikaduha susama ra niini, Higugmaa ang imong silingan sama sa imong kaugalingon.”⁸ Mao kini ang ikaduhang tower sa taytayan.

Dinhi gisumpay ni Jesus ang atong pagtutok sa langit, sa paghigugma sa Ginoo, uban sa atong yutan-ong pagtutok sa gawas, sa paghigugma sa atong isigkatawo. Ang usa katambayayong sa laing usa. Ang paghigugma sa Ginoo dili kompleto kon pasagdan nato ang atong mga silingan. Kining paghigugma sa uban naglakip sa tanang anak sa Dios sa walay pagtagad kon lalaki o babaye, sosyal nga kahimtang, kaliwat, sekswalidad, kinitaan, edad, o kostumbre. Pangitaon nato kadtong nasakitan ug nahugno, ang mga nagkalisod, kay ang “tanan managsama ngadto sa Dios.”⁹ Kita “motabang sa maluyahon, mopataas sa mga kamot sa nawad-an og paglaom, ug molig-on sa mga tuhod nga mahuyang.”¹⁰

Ikonsiderar kini nga ehemplo: Si Brother Evans¹¹ nasurprisa dihang giaghat siya nga ihunong ang sakyanan ug manuktok sa wala mailhi nga pultahan sa wala mailhi nga pamilya. Dihang ang nabiyuda nga inahan nga may sobra sa 10 ka anak mitubag sa may pultahan, ang ilang lisod nga mga kahimtang ug labihan nga panginahanglan makita dayon diha kaniya. Ang una nga maoy dali, pintal alang sa ilang balay gisundan sa daghang tuig nga temporal ug espirituwal nga pagpangalagad.

Kining mapasalamatong inahan sa wala madugay misulat ngadto sa pinadala sa langit niyang higala: “Imong gigahin ang imong kinabuhi sa pagtabang sa labing ubos kanamo. Pagkadako sa akong tinguha nga makadungog sa mga butang nga isulti unya sa Ginoo kanimo kon ipahayag na unya Niya ang Iyang pasalamat alang sa maayo nga imong nahimo sa pinansiyal ug sa espirituwal nga paagi ngadto sa mga tawo nga ikaw ug Siya lamang ang nahibalo. Salamat sa imong pagpanalangin kanamo sa daghang mga paagi, … sa mga misyonaryo nga imong gihatag. … Kanunay kong maghunahuna kon ikaw ba eksklusibong gipili sa Ginoo o kon ikaw lang ba ang naminaw.”

Ang paghigugma sa inyong silingan naglakip sa Kristohanong mga buhat sa pagkamabination ug pagserbisyo. Mabaliwala ba ninyo ang mga pagdumot, makapasaylo sa mga kaaway, makapasulod ug makapangalagad sa inyong mga silingan, ug makatabang sa mga tigulang? Kamong tanan madasig samtang magtukod kamo og tower sa gugma alang sa silingan.

Si Presidente Russel M. Nelson mitudlo: “Ang pagtabang sa uban—ang paghimo og makahuluganong paningkamot sa daghan o labaw pa kay sa pag-atiman sa atong kaugalingon—maoy atong kalipay. Ilabi na … kon dili sayon ug kon gikinahanglan nga mobuhat kita og dili kasagarang butang. Ang pagsunod nianang dako nga ikaduhang sugo mao ang yawe sa pagkahimong tinuod nga disipulo ni Jesukristo.”¹²

Ang Pagtambayayong

Si Jesus midugang sa pagtudlo, “Nagsukad niining duha ka sugo ug ang mga pagtulun-an sa mga propeta.”¹³ Makatabang kaayo kini. Adunay mahinungdanong pagtambayayong tali sa paghigugma sa Ginoo ug paghigumaay sa usag usa. Aron ang Golden Gate Bridge makapahigayon sa gidisenyo nga katuyoan niini, ang duha ka tower parehas ang kalig-on ug parehas og gipas-an nga gibug-aton sa mga kable nga gibanting, sa agianan, ug sa mga sakyanan nga molabang sa taytayan. Kon wala kining lig-on nga desinyo sa engineering, posibleng makompromiso ang taytayan, gani ngadto sa pagkahagsa. Aron matuman ang tuyo sa lig-ong mga kable sa taytayan, ang matag tower kinahanglan nga pareho gayod ang pagtambayayong. Sa samang paagi, ang atong abilidad sa pagsunod ni Jesukristo mag-agad sa atong kalig-on ug gahom sa pagsunod sa una ug ikaduhang mga sugo nga magkabalanse ug parehas nga debosyon.

Ang nagkadaghan nga panagbingkil sa kalibotan nagsugyot, nga kita usahay mapakyas sa pagkakita o paghinumdom niini. Ang uban nakatutok kaayo sa pagtuman sa mga sugo nga dili na sila makahatag og gamayng pagsabot sa dili kaayo matarong. Ang uban nakakita nga lisod ang paghigugma niadtong mga nagpili nga magpakabuhi lapas sa pakigsaad o gani palayo gikan sa bisan unsang relihiyosong partisipasyon.

Sa laing bahin, adunay mga tawo nga magtutok lang sa kaimportante sa paghigugma sa uban sa walay pag-ila nga kitang tanan may tulubagon sa Dios. Ang uban hingpit nga modumili sa ideya nga dunay butang sama sa hingpit nga kamatuoran o husto ug sayop ug nagtuo nga ang bugtong butang nga gikinahanglan gikan kanato mao ang hingpit nga pag-uyon ug pagdawat sa mga pagpili sa uban. Bisan asa niining mga pagkadili balanse makahimo sa inyong espirituwal nga taytayan sa pagbahirig o gani sa pagkahagsa.

Si Presidente Dallin H. Oaks mihulagway niini dihang miingon siya: “Kita gimandoan sa paghigugma sa tanan, tungod kay ang sambingay ni Jesus sa maayo nga Samarianhon nagtudlo nga ang tanan atong silingan. Apan ang atong kadasig sa pagsunod niining ikaduha nga sugo kinahanglan dili mopakalimot kanato sa una, ang paghigugma sa Dios sa tibuok natong kasingkasing, kalag, ug salabotan.”¹⁴

Panapos

Busa ang pangutana alang sa matag usa kanato mao, unsaon nato sa pagtukod og kaugalingon natong taytayan sa pagtuo ug debosyon—sa pagtukod og tag-as nga tower sa taytayan sa paghigugma sa Dios ug paghigugma sa atong mga silingan? Ah, sugdan lang nato. Ang una natong mga paningkamot tingali parehas ra tan-awon sa plano nga gisulat sa hapin o sa unang ang-ang sa paghimo sa plano sa taytayan nga gilaoman natong tukoron. Tingali maglakip kini sa pipila ka tinud-anay nga mga tumong sa dugang nga pagsabot sa ebanghelyo sa Ginoo o sa pagsaad nga minosan ang pagpanghukom sa uban. Walay usa nga bata pa kaayo o gulang na kaayo sa pagsugod.

Paglabay sa panahon, pinaagi sa mainampoon ug mahunahunaong pagplano, ang dili hapsay nga mga ideya mahapsay ra. Ang bag-ong mga buhat mahimong usa ka naandan nga buhat. Ang sinugdanan sa mga plano mahimong hinapsay nga mga plano. Matukod nato ang atong espirituwal nga mga taytayan gamit ang mga kasingkasing ug mga hunahuna nga gipahinungod ngadto sa Langitnong Amahan ug sa Iyang Bugtong Anak ingon man ngadto sa atong mga kaigsoonan nga atong kauban sa trabaho, pagdula, ug pagpuyo.

Sa mga adlawng moabot, kon moagi kamo subay sa matahom nga binantingan nga taytayan o gani kon makakita kamo og litrato, nga dunay nagbuntaog nga mga tower, modapit ko nga hinumdomi ninyo ang duha ka dagkong sugo, nga gihulagway ni Jesukristo diha sa Bag-ong Tugon. Hinaot nga ang mga instruksiyon sa Ginoo modasig kanato. Hinaot nga ang atong mga kasingkasing ug mga hunahuna mabayaw pataas sa paghigugma sa Ginoo ug molugway sa paghigugma sa atong isigkatawo.

Hinaot nga kini molig-on sa atong pagtuo kang Jesukristo ug sa Iyang Pag-ula diin ako mopamatuod, sa ngalan ni Jesukristo, amen.