Matinud-anon hangtod sa Kataposan
Pinaagi sa Iyang kamot, kamo makapukan sa matag Goliat nga motunga sa inyong kinabuhi.
Minahal nga batan-ong mga higala, karon gusto nako nga direktang makig-istorya ninyo—ang kabatan-onan sa Simbahan.
Usa na ka tuig sukad nga gitawag ang Kinatibuk-ang Kapangulohan sa Young Women. Unsa kadaghan sa nahitabo niining miaging tuig!
Among nahimamat ang daghan ninyo ug dungan nga nagtuon sa mga pagtulon-an ni Kristo. Kami nanganta og mga awit, nakahimo og bag-ong mga higala, ug miserbisyo uban kaninyo sa atong mga komunidad. Kami nalig-on pinaagi sa pagpaminaw sa inyong mga pagpamatuod diha sa mga komperensiya sa kabatan-onan ug tibuok kalibotan nga mga kalihokan. Ug kami dungan nga nagsimba diha sa balay sa Ginoo.
Sa matag higayon, kami mipakigbahin og mensahe gikan sa atong Ginoo nga si Jesukristo. Karong gabhiona walay kalainan; ako adunay mensahe alang kaninyo, ang kabatan-onan sa Simbahan ni Jesukristo.
Ang Dako nga mga Pangutana
Naghunahuna ba kamo kon unsaon ninyo nga mahimong matinud-anon sa Dios samtang nagpuyo sa kalibotan sa sala? Diin ninyo gikuha ang kalig-on nga moabante ug magpadayon sa paghimo og maayo? Giunsa ninyo sa pagsinati ang tinuod nga kamaya?
Seguro ang kasinatian ni David ug Goliat1 makatabang.
David ug Goliat
Sa Daang Tugon, ang kasundalohang Filistihanon nakiggubat sa mga Israelita, ug kada buntag ug kada gabii, usa ka higanteng Filistihanon nga ginganlan og Goliat ang mihagit sa bisan kinsang Israelita nga makig-away kaniya.
Taliwala sa katawhang Israelita nagpuyo si David, usa ka batan-ong magbalantay nga mas gamay ni Goliat apan adunay higante nga pagtuo ni Jesukristo! Si David miboluntaryo nga makig-away. Bisan ang hari misulay sa pagpugong kaniya, apan si David mipili nga ibutang ang iyang pagsalig ni Jesukristo.
Sa miagi, si David nakig-away og liyon ug usa ka oso usab. Gikan sa iyang kaugalingong kasinatian, siya nakahibalo nga ang Dios mipanalipod kaniya ug mihimo niya nga magmadaogon. Alang ni David, ang kawsa sa Dios mao ang labing mahinungdanon nga kawsa. Mao nga, puno sa pagtuo diha sa usa ka Dios nga dili mobiya kaniya, siya nagtigom og lima ka hamis nga mga bato, midala sa iyang saplong, ug miadto aron atubangon ang higante.
Ang mga kasulatan misulti kanato nga ang unang bato nga gilabay ni David miigo sa agtang ni Goliat, mitapos sa iyang kinabuhi.2
Mangita alang sa Tubag
Samtang si David migamit og usa lamang ka bato aron patyon si Goliat, siya nag-andam og lima. Og lima! Kini nakapahunahuna nako mahitungod kon unsaon nako pag-andam ang akong kaugalingon sa pag-atubang sa kalibotan.
Unsa kaha kon ang matag bato ni David nagrepresentar og kalig-on nga atong gikinahanglan aron magmadaogon sa atong kinabuhi? Unsa kaha kadtong lima ka bato? Akong gihunahuna kini nga mga posibilidad:
-
Ang bato sa akong gugma alang sa Dios.
-
Ang bato sa akong hugot nga pagtuo sa atong Manluluwas, si Jesukristo.
-
Ang bato sa kahibalo sa akong tinuod nga pagkatawo.
-
Ang bato sa akong inadlaw-adlaw nga paghinulsol.
-
Ang bato sa akong pag-akses sa gahom sa Dios.
Atong hisgotan kon sa unsang paagi nga kita napanalanginan pinaagi niini nga mga kalig-on.
Una, ang bato sa akong gugma alang sa Dios. Ang paghigugma sa Dios mao ang unang dako nga sugo.3 Ang Alang sa Kalig-on sa mga Kabatan-onan nga giya nagtudlo kanato: “Ang Dios nahigugma kaninyo. Siya ang inyong Amahan. Ang iyang hingpit nga gugma makadasig kaninyo sa paghigugma Kaniya. Kon ang inyong gugma alang sa Langitnong Amahan mao ang labing importante nga impluwensiya sa inyong kinabuhi, daghang desisyon ang mahimong mas sayon.”4
Ang atong gugma alang sa Dios ug ang atong suod nga relasyon Kaniya maghatag kanato sa kalig-on nga atong gikinahanglan aron mausab ang atong mga pagbati ug mga tinguha ug mas sayon nga mabuntog ang atong mga hagit.
Ikaduha, ang bato sa akong hugot nga pagtuo sa atong Manluluwas, si Jesukristo. Sa dihang si Jesukristo mianhi sa kalibotan, Siya nag-antos alang sa atong mga sala,5 ug Siya midala diha sa Iyang Kaugalingon sa atong mga kasubo, atong mga kasakit, atong mga kahuyang, ug atong mga pisikal ug mental nga mga sakit. Mao nga nakahibalo Siya unsaon sa pagtabang kanato. Ang pagkaadunay hugot nga pagtuo ni Jesukristo nagpasabot nga hingpit nga mosalig sa Iyang kaalam, Iyang tayming, Iyang gugma, ug Iyang gahom sa pag-ula alang sa atong mga sala. Ang bato sa hugot nga pagtuo diha ni Jesukristo mobuntog sa bisan unsang “higante” sa atong kinabuhi.6 Kita makabuntog niining napukan nga kalibotan tungod kay Siya una nga mibuntog niini.7
Ikatulo, ang bato sa kahibalo sa akong tinuod nga pagkatawo. Ang atong pinalanggang propeta, si Presidente Russell M. Nelson, nagtudlo kanato nga ang atong labing mahinungdanon nga pagkatawo mao ang isip mga anak sa Dios, mga anak sa pakigsaad, ug mga disipulo ni Jesukristo.8
Ang tanan mausab kon ako makahibalo kon kinsa gayod ako.9 Kon ako magduda sa akong mga abilidad, kanunay nakong balik-balikon sa akong kaugalingon diha sa akong hunahuna o kusgon, “Ako anak nga babaye sa Dios, ako anak nga babaye sa Dios,” sa makadaghang higayon nga akong gikinahanglan hangtod nga ako mobati na usab og pagsalig nga magpadayon.
Ikaupat, ang bato sa akong inadlaw-adlaw nga paghinulsol. Diha sa Alang sa Kalig-on sa mga Kabatan-onan nga giya, atong mabasa: “Ang paghinulsol dili silot sa sala; kini ang paagi sa Manluluwas sa pagpalingkawas kanato gikan sa sala. Ang paghinulsol nagpasabot sa pag-usab—sa pagtalikod gikan sa sala ug moadto sa Dios. Kini nagpasabot sa paglambo ug pagdawat og kapasayloan. Kini nga matang sa kausaban dili kausa ra nga panghitabo; kini usa ka nagpadayon nga proseso.”10
Walay lain nga makapalingkawas kay sa pagbati sa kapasayloan sa Dios ug pagkahibalo nga kita limpyo ug napahiuli Niya. Ang kapasayloan posible alang sa tanan.
Ang ikalima nga bato mao ang bato sa akong pag-akses sa gahom sa Dios. Ang mga pakigsaad nga atong gihimo uban sa Dios, sama niadtong atong gihimo diha sa ordinansa sa bunyag, maghatag nato og akses sa diosnon nga gahom.11 Ang gahom sa Dios usa ka tinuod nga gahom nga motabang nato sa pag-atubang sa mga hagit, mohimo og maayo nga mga desisyon, ug mopadako sa atong kapasidad sa paglahutay sa lisod nga mga sitwasyon. Kini usa ka gahom diin kita molambo diha sa piho nga mga abilidad nga atong gikinahanglan.12
Ang Alang sa Kalig-on sa mga Kabatan-onan nga giya nagpasabot: “Ang mga pakigsaad mokonektar kaninyo ngadto sa Langitnong Amahan ug sa Manluluwas. Kini mopadako sa gahom sa Dios diha sa inyong kinabuhi.”13
Atong hisgotan kana nga koneksiyon. Nakahinumdom ba kamo sa dihang si Kristo nagtudlo sa kalainan tali sa balay nga gitukod diha sa bato ug ang usa diha sa balas?14 Si Elder Dieter F. Uchtdorf mipasabot: “Ang usa ka balay dili lang maluwas sa unos tungod kay lig-on ang balay. Kini dili lang usab maluwas tungod lang kay lig-on ang bato. Ang balay maluwas sa unos tungod kay kini hugot nga nakakonektar ngadto nianang lig-on nga bato. Ang mahinungdanon mao ang kalig-on sa koneksiyon ngadto sa bato.”15
Ang atong personal nga koneksiyon ngadto ni Jesukristo maghatag kanato sa kaisog ug pagsalig nga mopadayon taliwala sa mga tawo nga wala motahod sa atong mga gituohan o kinsa nagbugalbugal kanato. Si Kristo midapit kanato sa pagbutang Kaniya sa atong mga hunahuna kanunay; Siya misulti kanato, “Paghunahuna ngari kanako sa matag hunahuna.”16 Ang paghunahuna mahitungod sa Manluluwas maghatag kanato og katin-aw sa hunahuna sa paghimo og mga desisyon, sa paglihok nga walay kahadlok, ug sa pagsulti og dili sa unsay supak sa mga pagtulon-an sa Dios.17 Kon lisod ang akong adlaw ug mobati ko nga mura og dili na nako makaya, ang paghunahuna mahitungod ni Kristo nagdala kanako og kalinaw ug naghatag kanako og paglaom.
Unsaon nato pagtinguha niini nga gahom ni Jesukristo? Ang pagsunod sa atong mga pakigsaad ug pagpadako sa atong pagtuo ni Jesukristo mao ang yawe.
Ako sa pagkatinuod nangandoy nga si David maadunay usa pa ka dugang nga bato; ug kana mao ang bato sa akong pagpamatuod. Ang atong pagpamatuod gitukod pinaagi sa personal nga espirituhanong mga kasinatian diin atong nailhan ang balaanong impluwensiya diha sa atong mga kinabuhi.18 Walay tawo nga makakuha niana nga kahibalo gikan kanato. Ang pagkahibalo sa unsay atong nahibaloan gikan sa pagpuyo sa atong espirituhanong mga kasinatian dili gayod mabayran. Ang pagkamatinud-anon niana nga kahibalo maghatag kanato og kagawasan. Maghatag kini kanato og kamaya! Kon kita nahigugma sa kamatuoran, ato kining pangitaon, ug sa higayon nga ato kining makaplagan, ato kining panalipdan.19
Usa ka Pagdapit
Sama nga ako mipili sa ikaunom nga bato, ako modapit kaninyo sa pagpakigkita sa inyong klase, korum, o pamilya ug hunahunaa kon unsa ang mga kalig-on nga kinahanglan ninyong batonan aron magpabilin nga matinud-anon sa Dios, ug busa, mabuntog ang kalibotan.
Usa ka Saad
Minahal nga mga higala, si Kristo nagmatinguhaon sa pag-uban kanato sa panaw sa atong kinabuhi. Ako mosaad kaninyo, samtang kamo padayong magkupot sa gunitanan nga puthaw, kamo maglakaw nga nagkinuptanay og kamot ni Jesukristo.20 Siya mogiya kaninyo, ug Siya magtudlo kaninyo.21 Pinaagi sa Iyang kamot, kamo makapukan sa matag Goliat nga motunga sa inyong kinabuhi.
Pagpamatuod
Ako mopamatuod nga adunay kamaya sa pag-ampo kada adlaw, sa pagbasa sa Basahon ni Mormon kada adlaw, sa pag-ambit sa sakramento kada Dominggo, ug sa pag-adto sa seminary—bisan sa sayo sa kabuntagon! Adunay hingpit nga kamaya diha sa pagbuhat sa maayo.
Adunay kamaya sa pagkamatinud-anon sa Dios sa uniberso, ang Manluluwas sa kalibotan, ang Hari sa mga hari. Adunay kamaya sa pagkahimong disipulo ni Jesukristo.
Ang Dios mao ang atong Amahan. Siya nasayod sa mga tinguha sa inyong kasingkasing ug sa inyong mga posibilidad, ug Siya misalig ninyo.
Pinalanggang kabatan-onan, si Jesukristo motabang kaninyo nga magmatinud-anon hangtod sa kataposan. Niini nga mga kamatuoran ako mohatag sa akong pagpamatuod sa ngalan ni Jesukristo, amen.