Pagsalig sa Pakigsaad pinaagi ni Jesukristo
Kon mosulod kita sa balay sa Ginoo, magsugod kita sa usa ka sagrado nga panaw sa pagkat-on aron mahimong mas halangdon ug mas balaang mga disipulo ni Kristo.
Minahal nga mga kaigsoonan, mag-ampo ko nga mabag-o kita sa espirituhanong paagi sa dinasig nga mga mensahe nga atong madungog gikan sa atong mga lider niining hinapos sa semana ug magmaya sa gusto nakong tawagon nga “pagsalig sa pakigsaad pinaagi ni Jesukristo.” Kini nga pagsalig mao ang hilom apan segurado nga pasalig nga makadawat sa mga panalangin nga gisaad sa Dios alang niadtong nagtuman sa ilang mga pakigsaad ug gikinahanglan kaayo taliwala sa mahagitong mga sirkumstansiya sa atong panahon.
Ang pagtukod sa bag-ong mga balay sa Ginoo tabok sa kalibotan, ubos sa dinasig nga pagpangulo ni Presidente Russell M. Nelson, nakahatag og dakong kasadya sa mga sakop sa Simbahan ug nagsilbing importante nga simbolo sa pagpalapad sa gingharian sa Ginoo.
Naghunahuna sa akong makadasig kaayo nga kasinatian atol sa pagpahinungod sa Feather River California Temple sa miaging Oktubre, nakahunahuna ko kon usahay mahikalimot ba kita tungod sa kahinam nga adunay bag-ong mga templo sa atong mga siyudad ug mga komunidad ug mobaliwala sa mas balaang katuyoan sa sagradong mga ordinansa diha sa templo.
Gikulit diha sa matag templo ang ligdong nga pamahayag: “Pagkabalaan ngadto sa Ginoo.”1 Kining dinasig nga mga pulong maoy tin-aw nga pagdapit, nga kon mosulod kita sa balay sa Ginoo, magsugod kita sa usa ka sagrado nga panaw sa pagkat-on aron mahimong mas halangdon ug mas balaang mga disipulo ni Kristo. Samtang mohimo kita og mga pakigsaad sa balaanong paagi sa atubangan sa Dios ug mopasalig nga mosunod sa Manluluwas, atong madawat ang gahom sa pag-usab sa atong mga kasingkasing, pagbag-o sa atong mga espiritu, ug pagpalawom sa atong relasyon ngadto Kaniya. Ang ingon niana nga paningkamot magdala og kalimpyo sa atong mga kalag ug mougmad og sagradong kasuod ngadto sa Dios ug ni Jesukristo, kinsa misaad nga makapanunod kita sa gasa sa kinabuhing dayon.2 Ang resulta niining sagrado nga panaw mao nga makaangkon kita og mas balaan ug mas taas nga pagsalig sa atong inadlaw-adlaw nga kinabuhi sulod sa atong mga pakigsaad nga gihimo pinaagi ni Jesukristo.
Ang ingon niini nga pagsalig mao ang kinatumyan sa atong balaanong koneksiyon ngadto sa Dios ug makatabang kanato sa pagdugang sa atong debosyon ug pagpasalamat tungod kang Jesukristo ug sa Iyang maulaong sakripisyo. Kini mopalig-on sa atong abilidad sa paghigugma ug pagserbisyo sa uban, ug mopalig-on sa atong kalag aron mabuhi dinhi sa dili balaan nga kalibotan nga nag-anam og kangitngit ug makapawala sa kadasig. Makahatag kini kanato og gahom sa pagbuntog sa mga binhi sa pagduda ug kasagmuyo, kahadlok ug kalaay, kasakit ug kawalay paglaom nga sulayan sa kaaway sa tanang kamatuoran sa pagtanom sa atong kasingkasing, ilabi na kon lisod ang kinabuhi, taas ang mga pagsulay, o malisod ang mga sirkumstansiya. Ang usa ka biblikanhon nga bersikulo naghatag og maayo nga tambag sa matag usa kanato samtang mag-atubang kita sa makusog nga hangin sa kalibotanong mga hagit karon: “Busa ayaw wagtanga ang inyong pagsalig.”3
Minahal nga mga kaigsoonan, kadto sila nga nakaangkon og tiunay nga pagsalig sa mga pakigsaad nga gihimo diha sa balay sa Ginoo pinaagi ni Jesukristo naghupot nianang usa sa labing gamhanan nga mga kusog nga atong makuha niini nga kinabuhi.
Samtang nagtuon kita sa Basahon ni Mormon diha sa Dali, Sunod Kanako niining tuiga, atong nasaksihan nga sa maanindot nga paagi gipakita ni Nephi ang gahom niining matang sa pagsalig sa pakigsaad pinaagi sa pagkamatinud-anon sa dihang nag-atubang siya og mga kapakyasan ug mga hagit sa pagkuha sa mga palid ingon nga gisugo sa Ginoo. Si Nephi, bisan pa sa labihang pagkamagul-anon tungod sa kahadlok ug kakulang sa pagtuo ni Laman ug ni Lemuel, nagpabiling masaligon nga ang Ginoo motugyan sa mga palid ngadto kanila. Iyang gisultihan ang iyang mga igsoong lalaki: “Sama kasegurado nga ang Ginoo buhi, ug samtang kita buhi, dili kita molugsong ngadto sa atong amahan didto sa kamingawan hangtod nga atong matuman ang butang nga gisugo sa Ginoo kanato.”4 Tungod sa pagsalig ni Nephi sa mga saad sa Ginoo, nakahimo siya sa pagtuman sa gisugo nga iyang buhaton.5 Sa kadugayan, diha sa iyang panan-awon, nakita ni Nephi ang impluwensya niining matang sa pagsalig, nagsulat nga “Ako, si Nephi, nakakita sa gahom sa Kordero sa Dios, nga kini mikunsad diha sa mga santos sa simbahan sa Kordero, ug diha sa katawhan sa pakigsaad sa Ginoo, … ug sila gisangkapan sa pagkamatarong ug sa gahom sa Dios sa dako nga himaya.”6
Ako nakakita mismo sa mahigugmaong mga saad ug gahom sa Ginoo nga midagayday ngadto sa mga kinabuhi sa mga anak sa Dios, nga nagpalig-on kanila sa pag-atubang sa mga sirkumstansiya sa kinabuhi. Sa miaging adlaw ang akong asawa miabot sa balay human sa iyang pagsimba didto sa templo ug misulti kanako nga natandog kaayo siya sa unsay iyang nasinati didto. Sa iyang pagsulod sa balay sa Ginoo, nakita niya ang usa ka tawo nga nag-wheelchair nga hinay kaayong miaginod ug ang usa ka babaye nga naglakaw nga naglisod kaayo gamit ang sungkod, silang duha maisogon nga miadto aron sa pagsimba sa Ginoo sa Iyang balay. Samtang ang akong asawa misulod sa dapit alang sa initiatory, nakita niya ang usa ka buotan nga sister nga usa ra ang kamot—ug ang pikas nga kamot nga dili kompleto— mao ang mipahigayon sa matahom ug celetial nga paagi sa mga buluhaton nga gihatag kaniya.
Samtang ang akong asawa ug ako naghisgot mahitungod niana nga kasinatian, among napamatud-an nga ang putli ug kinasingkasing lamang nga pagsalig sa mahangtorong mga saad nga gihatag sa Dios pinaagi sa balaanong mga pakigsaad nga gihimo uban Kaniya diha sa Iyang balay ang makapahimo nianang talagsaong mga disipulo ni Kristo sa pagbiya sa ilang mga panilamay niadtong mabugnaw kaayo nga adlaw, bisan pa sa ilang personal nga mga sirkumstansiya sa kinabuhi.
Minahal nga mga higala, kon aduna may usa ka butang nga atong maangkon—ug usa ka butang nga atong mabilin ngadto sa atong mga anak ug mga apo nga makatabang sa matag usa kanila sa umaabot nga mga pagsukod ug mga pagsulay—kana mao ang pagsalig sa mga pakigsaad nga gihimo pinaagi ni Jesukristo. Ang pag-angkon sa ingon ka balaanong kabtangan makatabang nila nga magpakabuhi sama sa gisaad sa Ginoo ngadto sa iyang matinud-anong mga sumusunod: “Ang akong mga tinun-an magbarog sa balaan nga mga dapit, ug dili mabalhin.”7
Unsaon nato pag-angkon nianang maong pagsalig pinaagi ni Jesukristo? Moabot kini pinaagi sa pagpaubos, sa pagsentro sa atong mga kinabuhi diha sa Manluluwas, pagpuyo sumala sa mga baroganan sa ebanghelyo ni Jesukristo, pagdawat sa mga ordinansa sa kaluwasan ug kahimayaan, ug pagtahod sa mga pakigsaad nga atong gihimo uban sa Dios diha sa Iyang balaan nga balay.
Sa iyang panapos nga pakigpulong niadtong Oktubre 2019 nga kinatibuk-ang komperensiya, ang atong minahal nga propeta mipahinumdom kanato mahitungod sa importante nga lakang sa pagkab-ot og pagsalig sa pakigsaad, nga nag-ingon: “Ang indibidwal nga katakos aron makasulod sa balay sa Ginoo nagkinahanglan og dakong indibidwal nga espirituhanong pagpangandam. … Ang indibidwal nga katakos nagkinahanglan og hingpit nga pagkakabig sa hunahuna ug kasingkasing aron mahimong mas sama sa Ginoo, mahimong matinuoron nga lumulupyo, mahimong mas maayo nga ehemplo, ug mahimong mas balaan nga tawo.”8 Busa, kon atong usbon ang atong pagpangandam sa pagsulod sa templo, atong mausab ang atong kasinatian sa templo, nga maoy mousab sa atong kinabuhi sa gawas sa templo. “Unya ang imong pagsalig mosamot pagkalig-on diha sa atubangan sa Dios; ug ang doktrina sa pagkapari motuhop diha sa imong kalag ingon sa mga yamog nga gikan sa langit.”9
Usa ka bishop nga akong kaila mitawag sa kinamagulangan nga klase sa Primary dili isip klase sa “Primary” apan isip “pagpangandam alang sa templo” nga klase. Inig ka Enero paadtoon sa bishop sa iyang opisina ang mga sakop sa klase ug ang ilang mga magtutudlo, diin maghisgot sila kon unsaon nila paggahin ang tibuok tuig sa pagpangandam aron makasulod sa templo. Ang bishop maggahin og panahon sa pagbasa sa mga pangutana sa interbiyo alang sa rekomend sa templo, diin sa pagkahuman iapil sa ilang mga leksiyon sa Primary. Magdapit siya sa mga bata nga mahimong andam aron kon moadto na sila sa opisina sa bishop human sa usa ka tuig, sila masaligon, masaligon sa pakigsaad, andam nga modawat og rekomend sa templo ug mosuold sa balay sa Ginoo. Karong tuiga ang bishop adunay upat ka batan-ong mga babaye nga mahinamon kaayo, andam, ug masaligon nga moadto sa templo nga gani gusto nila nga iprinta sa bishop ang ilang mga rekomend sa Adlaw sa Bag-ong Tuig sa 12:01 a.m. sa kaadlawon.
Ang pagpangandam dili lang alang niadtong moadto sa templo sa unang higayon. Kitang tanan kinahanglan nga kanunay nga mangandam sa pag-adto sa balay sa Ginoo. Usa ka stake nga akong nailhan misagop niini nga motto “Nakasentro sa panimalay, gisuportahan sa Simbahan, ug templo ang tumong.” Ang tumong10 usa ka makapa-interes nga pulong diin kini nagpasabot nga nakapukos sa usa ka direksiyon, apan nagpasabot usab kini nga nakahigot o giseguro, nakahukom na, ug determinado, segurado. Mao nga ang pagtumong sa templo moseguro nato ngadto sa Manluluwas, mohatag kanato og tukma nga direksiyon ug kalig-on samtang magseguro nga kita adunay pagsalig sa pakigsaad pinaagi ni Jesukristo. Busa, kitang tanan kinahanglan nga adunay intensiyon sa pagpalambo sa maong pagtumong pinaagi sa pag-eskedyul sa atong sunod nga appointment ngadto sa Ginoo diha sa Iyang balaan nga balay, maduol man ang templo o layo kaayo.11
Ang atong minahal nga propeta, si Presidente Russell M. Nelson, mipahinumdom kanato niining mahinungdanong mga baroganan pinaagi sa pag-ingon nga: “Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga kanato sa Iyang makaayo, makapalig-on nga gahom. Ug oh, [pagkadako] sa atong panginahanglan sa Iyang gahom sa mga adlaw nga umaabot.”12
Ang Manluluwas nagtinguha nga mamahimo kitang andam sa pagsabot, sa labing tin-aw nga paagi, kon unsaon gayod sa paglihok samtang mohimo kita og mga pakigsaad sa atong Langitnong Amahan pinaagi sa Iyang ngalan. Gusto siya nga maandam kita sa pagsinati sa atong mga kahigayonan, mga saad, ug mga katungdanan; nga mahimong andam aron makabaton sa espirituwal nga mga panabot ug mga pahigmata nga atong gikinahanglan niining kinabuhia. Nasayod ko nga kon ang Ginoo makakita bisan og gamay lang nga tipik sa tinguha o gamay nga kidlap sa matarong nga paningkamot pinaagi sa atong pagkaandam nga mosentro sa atong mga kinabuhi ngadto Kaniya ug sa mga ordinansa ug mga pakigsaad nga atong gihimo diha sa Iyang balay, mopanalangin Siya kanato, sa Iyang hingpit nga paagi, og mga milagro ug malumo nga mga kaluoy nga atong gikinahanglan.
Ang balay sa Ginoo mao ang dapit diin kita mausab sa mas taas ug mas balaan nga mga paagi. Busa, kon mogawas na kita sa templo, nga nausab pinaagi sa atong paglaom sa mga saad sa mga pakigsaad, gisul-oban sa gahom gikan sa kahitas-an, atong gidala ang templo ngadto sa atong mga panimaly ug mga kinabuhi. Akong ipaneguro kaninyo nga ang pag-angkon sa espiritu diha sa balay sa Ginoo ngari kanato makausab kanato, sa hingpit.
Nahibaloan usab nato gikan sa templo nga kon gusto kita nga ang Espiritu sa Ginoo dili mapugngan sa atong mga kinabuhi, dili gayod mahimo nga aduna kitay dili maayong mga pagbati ngadto ni bisan kinsa. Ang paggahin og luna alang sa dili mabinationg mga pagbati o mga hunahuna diha sa atong mga kasingkasing o mga hunahuna makapagawas og masakit nga mga pulong ug mga lihok, pinaagi man sa social media o diha sa atong mga panimalay, nga makapalayo sa Espiritu sa Ginoo gikan sa atong mga kasingkasing. Busa, palihog ayaw isalikway ang inyong pagsalig, apan hinuon, himoa ang inyong pagsalig nga mosamot sa pagkalig-on.
Ang nagpadayon ug nagkadaghan nga pagtukod og mga templo magpadayon sa pagpahinam, pagdasig, ug pagpanalangin kanato. Apan ang mas importante, samtang atong usbon ang atong pagpangandam sa pagsulod sa templo, atong mausab ang atong kasinatian diha sa templo, nga maoy mousab sa atong kinabuhi sa gawas sa templo. Hinaot nga kining kausaban mopuno kanato og pagsalig sa atong balaanong mga pakigsaad nga gihimo uban sa Dios pinaagi ni Jesukristo. Buhi ang Dios, Si Jesukristo mao ang atong Manluluwas, ug kini mao ang Iyang gipahiuli nga Simbahan dinhi sa yuta. Ako ligdong nga mopahayag niini nga mga kamatuoran sa sagrado nga ngalan sa atong Manluluwas, si Jesukristo, amen.