Pag-ampo Lang
Ako modapit kaninyo sa pag-ampo aron makahibalo kamo nga ang Langitnong Amahan anaa, pag-ampo aron molambo kamo nga mahimong sama Kaniya, ug pag-ampo aron mapakita ninyo ang Iyang gugma ngadto sa uban.
Mga kaigsoonan, ako mibati og kamaya samtang ako mitubag sa usa ka impresyon nga makig-istorya sa mga bata!
Mga batang babaye ug lalaki, bisan asa man kamo sa kalibotan, gusto ko nga mopakigbahin og usa ka butang diha kaninyo.
Ang atong Langitnong Amahan nahigugma kaninyo! Kamo Iyang anak. Siya nakaila kaninyo. Siya gustong mopanalangin kaninyo. Ako nag-ampo sa tibuok nakong kasingkasing nga kamo mobati sa Iyang gugma.
Gusto ba ninyo nga makadawat og mga gasa? Ako ganahan nga makig-istorya kaninyo mahitungod sa usa ka espesyal kaayo nga gasa nga gihatag sa Langitnong Amahan kaninyo aron sa pagtabang kaninyo. Kini mao ang gasa sa pag-ampo. Pagkadakong panalangin ang pag-ampo! Kita makaistorya sa Langitnong Amahan bisan kanus-a, bisan asa.
Sa dihang si Jesus dinhi pa sa yuta, Siya nagtudlo kanato nga mag-ampo. Siya miingon, “Pangayo, ug kamo makadawat.”1
Unsa nga mga gasa ang inyong mahimong iampo? Adunay daghan, apan karon gusto ko nga mopakigbahin og tulo:
-
Pag-ampo aron makahibalo kamo.
-
Pag-ampo aron molambo kamo.
-
Pag-ampo aron mapakita ninyo.
Atong hisgotan ang matag usa.
Una, Pag-ampo aron Makahibalo Kamo
Unsay kinahanglan ninyong mahibaloan?
Adunay awit mahitungod sa pag-ampo nga gikanta sa mga batang Primary sa tibuok kalibotan. Kini nagsugod sa usa ka pangutana. Nahibalo ba kamo unsa kini nga awit? Kon ako isog pa lang gayod, ako kining kantahon nganha kaninyo!
“Amahan namo, naa ba gyod ka? Sa pag-ampo sa bata naminaw ka ba?”2
Unsaon ninyo sa pagkahibalo nga ang Langitnong Amahan anaa gayod, bisan kon dili kamo makakita Kaniya?
Si Presidente Russell M. Nelson midapit kaninyo nga “ibubo ang inyong kasingkasing ngadto sa inyong Langitnong Amahan. … Ug dayon maminaw!”3 Paminaw sa unsay inyong gibati diha sa inyong kasingkasing ug sa mga hunahuna nga kalit nga moabot.4
Ang Langitnong Amahan adunay nahimaya nga lawas sa unod ug bukog ug mao ang Amahan sa inyong espiritu. Tungod kay ang Langitnong Amahan aduna sa tanang gahom ug nakahibalo sa tanang butang, Siya makakita sa tanan Niyang anak5 ug Siya makadungog ug makatubag sa matag pag-ampo. Kamo makahimo sa pagkahibalo alang sa inyong kaugalingon nga Siya anaa ug nga Siya nahigugma kaninyo.
Kon kamo nakahibalo nga ang Langitnong Amahan tinuod ug nga Siya nahigugma kaninyo, kamo makapuyo nga may kaisog ug paglaom! “Pag-ampo lang, maminaw Siya.”6
Nasinati na ba ninyo nga nag-inusara? Usa ka adlaw sa dihang ang akong apo nga babaye nga si Ashley unom pa lang ka tuig, siya lang ang nag-inusara nga walay higala nga kadula sa dulaanan sa eskwelahan. Samtang nagbarog siya didto, mibati nga dili importante ug wala makita, usa ka piho nga ideya ang miabot sa iyang hunahuna: “Kadiyot lang! Wala ako mag-inusara! Anaa nako si Kristo!” Si Ashley miluhod diha gayod sa tunga sa dulaanan, gikyugpos ang iyang mga bukton, ug nag-ampo sa Langitnong Amahan. Sa higayon nga iyang gibuka ang iyang mga mata, usa ka batang babaye nga kaedad niya ang nagbarog didto ug nangutana kon gusto niya nga makigdula. Si Ashley nakat-on, “Kita importante sa Ginoo, ug kita wala gayod mag-inusara.”
Usahay kamo tingali gusto nga makahibalo ngano nga ang usa ka lisod nga butang nahitabo sa inyong kinabuhi o ngano nga wala ninyo nadawat ang panalangin nga inyong giampo. Kasagaran ang labing maayo nga ipangutana sa Langitnong Amahan dili ngano apan unsa.
Nakahinumdom ba kamo sa dihang si Nephi ug ang iyang pamilya gigutom samtang sila nagpanaw sa kamingawan? Sa dihang si Nephi ug ang iyang mga igsoong lalaki milakaw aron sa pagpangita og pagkaon, nabali ni Nephi ang iyang paná. Apan siya wala mangutana og ngano.
Si Nephi naghimo og bag-ong paná ug nangutana sa iyang amahan, si Lehi, kon asa siya moadto aron makakuha og pagkaon. Si Lehi nag-ampo, ug ang Ginoo mipakita kanila asa pwedeng moadto si Nephi.7 Ang Langitnong Amahan mogiya kaninyo kon kamo mangutana Kaniya unsa ang inyong mahimo ug unsa ang inyong makat-onan.
Ikaduha, Pag-ampo aron Molambo Kamo
Ang Langitnong Amahan gustong motabang kaninyo nga molambo! Siya nahigugma kaayo kanato nga Siya mipadala sa Iyang Anak, si Jesukristo, aron sa pagpakita kanato sa paagi kon unsaon pagpakabuhi.8 Si Jesus nag-antos, namatay, ug nabanhaw aron nga kita mapasaylo sa atong mga sala ug molambo aron mahimong mas mahisama Kaniya.
Gusto ba kamo nga molambo sa pasensiya ug sa kamatinuoron? Gusto ba kamo nga molambo sa usa ka kahanas? Tingali maulawon kamo ug gusto nga molambo sa kaisog. “Pag-ampo lang”!9 Pinaagi sa Iyang Espiritu, ang inyong kasingkasing mausab, ug kamo makadawat og kalig-on.
Ang akong bag-o nga higala nga si Jonah nagsulat: “Ako kanunay nga kulbaan sa akong pagpaingon sa eskwelahan igka buntag. Ako nabalaka sa daghang butang sama sa pagkaulahi, pagkalimot og usa ka butang, ug pagkuha og mga eksamin. Sa dihang 10 anyos pa ko, nagsugod ko sa paglitok og mga pag-ampo samtang nagbiyahe padulong sa eskwelahan kauban sa akong mama. Ako nangayo sa tabang nga akong gikinahanglan, ug nag-ampo usab ko alang sa akong pamilya. Ako naghunahuna usab sa mga butang nga akong gipasalamatan. [Ang pag-ampo ngadto sa Langitnong Amahan] nakatabang nako. Usahay dili nako bation ang kahupayan diha dayon sa akong pagkanaog sa sakyanan, apan sa higayon nga naa na ko sa klasrom, akong bation ang kalinaw.”10
Ang pagtuo ni Jonah nagtubo samtang siya nag-ampo kada adlaw ug nagpadayon sa unahan.
Ikatulo, Pag-ampo aron Mapakita Ninyo
Kamo makaampo alang sa tabang nga mapakita ninyo ang gugma sa Langitnong Amahan ngadto sa uban.11 Pinaagi sa Iyang Espiritu, ang Langitnong Amahan motabang ninyo nga mabantayan ang usa ka tawo nga magul-anon aron inyo silang mahupay. Siya makatabang nga mapakita ninyo ang Iyang gugma pinaagi sa pagpasaylo sa usa ka tawo. Siya makahatag ninyo og kaisog sa pagserbisyo sa usa ka tawo ug mopaambit kanila nga sila anak sa Dios. Kamo makatabang sa uban nga makaila ug mahigugma ni Jesus ug sa Langitnong Amahan sama kaninyo.12
Sa akong tibuok kinabuhi akong giampo nga ang akong amahan mahimong miyembro sa Ang Simbahan ni Jesukristo sa mga Santos sa Ulahing mga Adlaw. Bisan usa pa ka gamay nga batang babaye, ako nakahibalo kon unsa kadaghan ang mga panalangin nga iyang madawat. Ang among pamilya makadawat sa mga panalangin nga maselyo alang sa kahangtoran. Ang akong pamilya, mga higala, ug ako kanunay nga nag-ampo alang kaniya, apan wala siya mopasakop sa Simbahan. Ang Langitnong Amahan dili mopugos ni bisan kinsa sa paghimo og pagpili.13 Siya makapadala kanato og mga tubag sa atong mga pag-ampo sa ubang mga paagi.
Sa dihang insakto na ang akong pangedaron, nadawat nako ang akong patriyarkal nga panalangin. Diha sa panalangin, ang patriyarka misulti kanako nga ang labing maayo nga butang nga akong mahimo aron matabangan ang akong pamilya nga mag-uban sa langit mao ang pagkahimong ehemplo sa ebanghelyo ni Jesukristo. Mao kana ang akong mahimo!
Ang akong amahan nabuhi hangtod 86. Lima ka adlaw human siya mamatay, ako nakadawat og sagrado nga pagbati sa kamaya. Ang Langitnong Amahan mipahibalo kanako pinaagi sa Iyang Espiritu nga ang akong amahan gusto nga makadawat sa mga panalangin sa ebanghelyo ni Jesukristo! Dili gayod nako makalimtan ang adlaw nga miluhod ako libot sa altar sa templo uban sa akong igsoong babaye ug mga igsoong lalaki aron maselyo sa akong mga ginikanan. Ako nagsugod sa pag-ampo alang niini nga panalangin sa dihang anaa pa ko sa Primary, ug nadawat nako kini sa dihang usa na ako ka lola.
Tingali kamo nag-ampo sa mga panalangin alang sa inyong pamilya ug sa uban nga inyong gihigugma. Ayaw pag-undang! Ang Langitnong Amahan mopakita kaninyo kon unsay inyong mahimo.
Ipakigbahin ngadto sa Langitnong Amahan kon unsa ang anaa sa inyong kasingkasing.14 Samtang kamo kinasingkasing nga mangayo sa Iyang tabang, kamo makadawat sa Iyang Espiritu aron mogiya kaninyo.15 Ang pag-ampo kada adlaw mopuno kaninyo og gugma alang sa Langitnong Amahan ug ni Jesukristo. Makatabang kini nga gusto ninyong sundon Sila sa inyong tibuok kinabuhi!
Hunahunaa kon unsa ang mahitabo kon ang tanang bata sa Aprika, Habagatang Amerika, Asya, Europa, Amihanang Amerika, ug Australia mag-ampo kada adlaw. Ang tibuok kalibotan mapanalanginan og dugang sa gugma sa Dios!
Ako modapit kaninyo sa pag-ampo aron makahibalo kamo nga ang Langitnong Amahan anaa, pag-ampo aron molambo kamo nga mahimong sama Kaniya, ug pag-ampo aron mapakita ninyo ang Iyang gugma ngadto sa uban. Nahibalo ako nga Siya buhi ug nahigugma kaninyo. “Pag-ampo lang.” Sa sagradong ngalan ni Jesukristo, amen.