Salig sa Ginoo
Ang atong relasyon ngadto sa Dios motubo lamang sumala sa atong kaandam nga mosalig Kaniya.
Sa among pamilya, magdula mi usahay og dula nga among gitawag og “Pagbansay sa Kuyaw Kaayo nga Pagsalig.” Basin nakadula na usab kamo niini. Duha ka tawo magbarog mga pipila ka pye ang gilay-on, ang usa ka tawo magtalikod sa kapares. Sa pagsinyas sa tawo nga anaa sa likod, ang tawo nga anaa sa atubangan mopatumba ngadto sa naghulat nga mga kamot sa iyang higala.
Ang pagsalig mao ang pundasyon sa tanang relasyon. Ang pangutana nga angayng tubagon sa bisan unsa nga relasyon mao nga “Makasalig ba ako sa laing tawo?” Ang relasyon mamugna lamang kon ang mga tawo andam nga mohatag sa ilang pagsalig sa usag usa. Walay relasyon kon ang usa ka tawo mosalig sa hingpit apan ang laing tawo dili.
Ang matag usa kanato hinigugmang espiritu nga anak nga lalaki o anak nga babaye sa mahigugmaong Langitnong Amahan.1 Apan, samtang kanang espirituwal nga linya sa kagikanan mohatag og pundasyon, dili kana igo nga makamugna og hingkod nga relasyon sa Dios. Ang usa ka relasyon matukod lamang kon pilion nato nga mosalig Kaniya.
Ang Langitnong Amahan nagtinguha sa pag-ugmad og lawom nga personal nga relasyon sa matag usa sa Iyang espiritu nga mga anak.2 Si Jesus mipadayag niana nga tinguha sa dihang nag-ampo Siya nga, “Aron silang tanan mausa ingon nga ikaw, Amahan, ania kanako ug ako anaa kanimo, aron sila usab maania kanato.”3 Ang relasyon nga gitinguha sa Dios sa matag espiritu nga anak mao ang labihang kasuod ug personal kaayo nga makahimo Siya sa pagpakigbahin sa tanan nga anaa Kaniya ug sa tanan Kaniya.4 Kana nga matang sa lawom, mahangtorong relasyon mapalambo lamang kon itukod kini diha sa hingpit, kompleto nga pagsalig.
Sa Iyang bahin, ang Langitnong Amahan naningkamot sukad pa sa sinugdanan aron sa pagpakita sa Iyang hingpit nga pagsalig sa diosnong potensiyal sa matag usa sa Iyang mga anak. Ang pagsalig mao ang basihanan sa plano nga Iyang gipresentar alang sa atong pagtubo ug pag-uswag sa wala pa kita moanhi sa yuta. Siya motudlo kanato og mahangtorong mga balaod, mohimo og kalibotan, mohatag kanato og mortal nga mga lawas, mohatag kanato sa gasa sa pagpili alang sa atong kaugalingon, ug motugot kanato sa pagkat-on ug pagtubo pinaagi sa paghimo sa atong kaugalingong mga pagpili. Nagtinguha Siya nga mopili kita sa pagsunod sa Iyang mga balaod ug mobalik aron makapahimulos sa kinabuhing dayon uban Kaniya ug sa Iyang Anak.
Kay nasayod nga dili kita sa kanunay makahimo og maayo nga mga pagpili, nag-andam usab Siya og paagi aron makalingkawas kita sa mga sangpotanan sa atong dili maayong mga pagpili. Mihatag Siya kanato og Manunubos—ang Iyang Anak, si Jesukristo—aron motubos sa atong mga sala ug mohimo kanato nga malimpyo pag-usab sa kondisyon nga kita maghinulsol.5 Siya nagdapit kanato nga mogamit sa bililhong gasa sa paghinulsol sa kanunay.6
Ang tanang ginikanan nasayod kon unsa kalisod nga mosalig sa anak sa paghimo sa iyang kaugalingong mga desisyon, ilabi na kon ang mga ginikanan nasayod nga ang anak lagmit makahimo og mga sayop ug mag-antos isip sangpotanan. Apan ang Langitnong Amahan motugot kanato sa paghimo og mga pagpili nga makatabang kanato sa pagkab-ot sa atong balaang potensiyal! Sama sa gitudlo ni Elder Dale G. Renlund, “Ang [Iyang] tumong sa pagkaginikanan dili ang [pagpabuhat] sa Iyang mga anak sa unsay matarong; [apan] ang [pagpapili] sa Iyang mga anak sa pagbuhat sa matarong ug sa kataposan mahimong sama Kaniya.”7
Bisan pa sa pagsalig sa Dios ngari kanato, ang atong relasyon ngadto Kaniya motubo lamang sumala sa atong kaandam nga mosalig Kaniya. Ang problema kay nagpuyo kita sa napukan nga kalibotan ug ang tanan nakasinati sa pagkawala sa pagsalig tungod sa pagkabakakon, pagmanipular, pagpamugos, o ubang mga sirkumstansiya. Human mabudhian, maglisod na kita sa pagsalig og usab. Kining negatibo nga mga kasinatian sa dili perpekto nga mga mortal makaapekto gani sa atong pagkaandam nga mosalig sa usa ka hingpit nga Langitnong Amahan.
Pipila ka tuig na ang milabay, ang duha nako ka higala, si Leonid ug si Valentina, mipakita og interes nga mahimong mga miyembro sa Simbahan. Samtang nagsugod si Leonid sa pagkat-on sa ebanghelyo, naglisod siya sa pag-ampo. Sa sayo nga bahin sa iyang kinabuhi, si Leonid nakasinati og pagmanipular ug pagkontrol sa mga taas og ranggo ug nawad-an og pagsalig sa awtoridad. Kini nga mga kasinatian nakaapekto sa iyang abilidad sa pag-abli sa iyang kasingkasing ug sa pagpadayag sa iyang personal nga mga pagbati ngadto sa Langitnong Amahan. Pinaagi sa paggahin og panahon sa pagtuon, si Leonid nakaangkon og mas maayong pagsabot bahin sa kinaiya sa Dios ug nakasinati og pagbati sa gugma sa Dios. Sa kataposan, ang pag-ampo nahimong natural niya nga paagi sa pagpadayag og pasalamat ug gugma nga iyang gibati alang sa Dios. Ang nagtubo niya nga pagsalig sa Dios migiya kaniya ug ni Valentina ngadto sa sagradong mga pakigsaad aron mapalig-on ang ilang relasyon sa Dios ug sa usag usa.
Kon ang kanhing pagkawala sa pagsalig nakapugong ninyo nga mosalig sa Dios, palihog sunda ang panig-ingnan ni Leonid. Padayon nga mapailobon sa pagkat-on pa og dugang mahitungod sa Langitnong Amahan, sa Iyang kinaiya, sa Iyang mga hiyas, ug sa Iyang mga katuyoan. Tinguhaa ug irekord ang mga kasinatian sa pagbati sa Iyang gugma ug gahom sa inyong kinabuhi. Ang atong buhing propeta, si Presidente Russell M. Nelson, nagtudlo kanato nga kon mas daghan ang atong makat-onan bahin sa Dios, mas mahimong sayon alang kanato nga mosalig Kaniya.8
Usahay ang labing maayo nga paagi sa pagkat-on nga mosalig sa Dios mao lamang ang pagsalig Kaniya. Sama sa “Pagbansay sa Kuyaw Kaayo nga Pagsalig,” usahay gikinahanglan lamang kita nga mopatumba ug tugotan Siya nga mosalo kanato. Ang atong mortal nga kinabuhi usa ka pagsulay. Ang mga hagit nga mopaugnat kanato labaw pa sa atong kaugalingong kapasidad kanunay nga moabot. Kon ang atong kaalam ug pagsabot magkulang, natural lang nga magtinguha kita og tabang gikan sa ubang mga tinubdan. Dinhi sa napuno sa impormasyon nga kalibotan, dili kita makulangan sa mga tinubdan nga mopasigarbo sa ilang mga solusyon sa atong mga kalisod. Hinuon, ang yano, tukma sa tanang panahon nga tambag diha sa Mga Panultihon naghatag kanato sa labing maayo nga tambag: “Salig sa Ginoo sa bug-os mong kasingkasing.”9 Mapakita nato ang atong pagsalig sa Dios pinaagi sa pagdangop og una ngadto Kaninya kon mag-atubang og mga hagit.
Sa pagkahuman sa akong pagtuon sa pamalaod sa Utah, ang among pamilya nag-atubang sa importanteng desisyon kon asa motrabaho ug mohimo sa among panimalay. Human sa pagpakigtambag sa usag-usa ug sa Ginoo, gibati namo nga gimandoan sa pagbalhin sa among pamilya ngadto sa amihanang bahin sa Estados Unidos, layo sa mga ginikanan ug mga igsoon. Sa pagsugod, maayo ra ang dagan sa kinabuhi, ug gibati namo ang kamasaligon sa among desisyon. Apan ang tanan nausab. Nanaktak og trabahente ang kompaniya sa pamalaod, ug nag-atubang ko sa sitwasyon nga posibleng mawad-an og trabaho o insurance sa panahon mismo nga ang among babayeng anak nga si Dora natawo nga adunay seryosong medikal nga mga problema ug taas og tagal nga espesyal nga mga panginahanglan. Samtang nag-atubang niini nga mga hagit, nakadawat ko og calling sa Simbahan nga nagkinahanglan og dakong panahon ug pasalig.
Wala pa ako sukad makaatubang og ingon niini nga hagit ug nabug-atan kaayo. Nagsugod ko sa pagduhaduha sa desisyon nga among gihimo ug sa nag-uban niini nga kompirmasyon. Misalig kami sa Ginoo, ug gilaoman nga masulbad ra ang tanan. Natumba ko, ug karon morag walay tawo nga mosalo nako.
Usa ka adlaw ang mga pulong “Ayaw pangutana kon ngano, pangutana kon unsay akong gusto nga makat-onan nimo” makusganong miabot sa akong hunahuna ug kasingkasing. Karon mas naglibog hinuon ko. Sa takna mismo nga naglibog ko sa akong unang desisyon, ang Dios midapit kanako nga mas mosalig pa Kaniya. Sa paghinumdom, usa kadto ka kritikal nga punto sa akong kinabuhi—mao kadto ang takna nga naamgohan nako nga ang labing maayong paagi sa pagkat-on nga mosalig sa Dios mao ang pagsalig lamang Kaniya. Sa misunod nga mga semana, nagtan-aw ko sa katingala samtang milagrosong gipakita sa Ginoo ang Iyang plano sa pagpanalangin sa among pamilya.
Ang maayong mga magtutudlo ug mga tigbansay nasayod nga ang intelektuwal nga paglambo ug ang pisikal nga kalig-on mahitabo lamang kon mapaugnat ang hunahuna ug ang mga kaunoran. Sa samang paagi, ang Dios nagdapit kanato nga motubo pinaagi sa pagsalig sa Iyang espirituhanong pagtudlo pinaagi sa makapaugnat sa kalag nga mga kasinatian. Busa, makaseguro kita nga bisan unsa nga pagsalig ang atong napakita sa Dios kaniadto, aduna pay naghulat nga makapaugnat sa pagsalig nga mga kasinatian nga nagpaabot sa unahan. Ang Dios nakatutok sa atong pagtubo ug paglambo. Siya mao ang Batid nga Magtutudlo, ang hingpit nga tigbansay nga kanunay nga nagpaugnat kanato aron mas makaamgo pa og dugang sa atong balaanong potensiyal. Kana sa kanunay maglakip sa umaabot nga pagdapit nga mas mosalig pa Kaniya.
Ang Basahon ni Mormon nagtudlo sa sundanan nga gigamit sa Dios sa pagpaugnat kanato aron makaugmad og lig-on nga mga relasyon ngari kanato. Diha sa Dali, Sunod Kanako, bag-ohay lang kita nga nagtuon kon sa unsang paagi nga ang pagsalig ni Nephi sa Dios gisulayan sa dihang siya ug ang iyang mga igsoong lalaki gisugo nga mobalik sa Jerusalem aron sa pagkuha sa mga palid nga tumbaga. Human napakyas ang ilang unang pagsulay, ang iyang mga igsoon miundang ug andam na nga mopauli nga walay dalang mga palid. Apan gipili ni Nephi ang pagbutang sa iyang hingpit nga pagsalig ngadto sa Ginoo ug nagmalamposon sa pagkuha sa mga palid.10 Kana nga kasinatian lagmit nakapalig-on sa pagsalig ni Nephi sa Dios sa dihang nabali ang iyang gapasan ug ang pamilya nag-atubang og kagutom didto sa kamingawan. Sa gihapon, gipili ni Nephi nga mosalig sa Dios, ug ang pamilya naluwas.11 Kining nagsunod-sunod nga mga kasinatian nakahatag ni Nephi og mas lig-on nga pagsalig sa Dios alang sa dako kaayo, makapaugnat sa pagsalig nga buluhaton sa paghimo og barko.12
Pinaagi sa nagsunod-sunod nga mga kasinatian, gipalig-on ni Nephi ang iyang relasyon sa Dios pinaagi sa kanunay ug padayon nga pagsalig Kaniya. Ang Dios mogamit sa samang sundanan ngari kanato. Iyang gipaabot kanato ang personal nga mga pagdapit sa pagpalig-on ug pagpalawom sa atong pagsalig Kaniya.13 Sa matag higayon nga modawat ug molihok kita niana nga pagdapit, ang atong pagsalig sa Dios motubo. Kon atong ibaliwala o balibaran ang pagdapit, ang atong paglambo muhonong hangtod nga kita andam na nga molihok sa bag-ong pagdapit.
Ang maayong balita mao nga bisan unsa pa ang pagsalig nga atong gipili o wala gipili nga ibutang ngadto sa Dios kaniadto, makapili kita nga mosalig sa Dios karon ug sa matag adlaw sukad karon. Akong isaad nga sa matag higayon nga ato kining buhaton, anaa ang Dios aron mosalo kanato, ug ang atong relasyon sa pagsalig mosamot og kalig-on hangtod sa adlaw nga mahiusa kita Kaniya ug sa Iyang Anak. Dayon kita makapahayag sama ni Nephi, “O Ginoo, misalig ako kanimo, ug mosalig ako kanimo hangtod sa hangtod.”14 Sa ngalan ni Jesukristo, amen.