Mga Templo, Mga Balay sa Ginoo Gitukod sa Nagkadaiyang Dapit sa Kalibotan
Kon kamo takos ug mainampoon nga moadto sa Iyang balaan nga balay, kamo masangkapan sa Iyang gahom.
Dili ba mo ganahan sa matahom nga mga pulong nga bag-ohay lang nato gikanta? “Ako molig-on, motabang mosagang, pag-agak kanimo,… pinaagi sa kamot kong gamhanan.”1 Ang Ginoo naglig-on sa Iyang mga Santos sa tanang pangidaron samtang sila moabot ngadto sa Iyang balaan nga balay. Gikan sa Kinshasa ngadto sa Zollikofen ngadto sa Fukuoka ngadto sa Oakland, ang kabatan-onan, sa ilang kaugalingon nga inisyatiba, mipuno sa mga bunyaganan sa templo. Kaniadto, ang labing minahal nga mga ordinance worker mga tigulang na—apan dili na karon. Ang gitawag nga mga misyonaryo, pangserbisyo nga mga misyonaryo, ug nauli nga mga misyonaryo anaa diha sa daghang dapit sa templo. Sa tibuok kalibotan, adunay nagkadako nga pagbati nga nagpaduol kanato ngadto sa balay sa Ginoo.
Usa ka tuig lang ang milabay, usa ka minahal nga higala sa pamilya, 95 ang pangidaron, nagpuyo sa silangan nga baybayon sa Estados Unidos, kinsa gitudloan sa mga misyonaryo sulod sa 70 ka tuig, miingon ngadto sa iyang anak nga babaye, “Gusto ko moadto sa templo uban kanimo.”
Ang iyang anak nga babaye mitubag, “Kuan, Ma, una kinahanglan kang mabunyagan.”
“OK,” mitubag siya, “nan gusto kong mabunyagan.” Nabunyagan siya. Pipila ka adlaw ang milabay, may balaang pagtahod siya nga misulod sa bunyaganan sa templo. Ug kapin lang sa usa ka bulan ang milabay, nakadawat siya sa iyang kaugalingon nga pagtuga ug pagselyo. “Kahibalo, gahom sa Dios nagkadaghan; tabil sa yuta hapit na ablihan.”2
Naghunahuna ba kamo kon ngano nga ang Ginoo mosugo sa Iyang propeta sa pagtukod sa tibuok yuta karon og Iyang balaan nga mga templo?3 Nganong Siya, niining piho nga panahon mohatag sa gikinahanglan nga kabulahan ngadto sa Iyang katawhan sa pakigsaad nga pinaagi sa ilang sagrado nga mga ikapulo, gatosan ka balay sa Ginoo ang matukod?
Karong buntaga, si Presidente Dallin H. Oaks mipakita og matahom nga biswal sa mga templo nga gitukod sa tibuok kalibotan. Si Kathy ug ako bag-ohay lang didto sa Pilipinas. Hunahunaa kini nga milagro: Ang Manila Temple gipahinungod niadtong 1984. Milabay ang 26 pa ka tuig bag-o ang ikaduha nga templo, sa Dakbayan sa Cebu, nakompleto niadtong 2010. Karon, 14 ka tuig nang milabay, 11 ka templo ang gitukod, gidesinyo, o giandam alang sa pagpahinungod. Gikan sa amihanan ngadto sa habagatan: Laoag, Tuguegarao, Santiago, Urdaneta, Alabang, Naga, Tacloban City, Iloilo, Bacolod, Cagayan de Oro, ug Davao. Makapahingangha nga makakita sa katingalahan nga mga buhat sa Dios!
Sa tibuok kalibotan, ang mga balay sa Ginoo nagkaduol kanato. Nganong sa atong panahon?
Ang Kataposang mga Adlaw
Ang Ginoo nagpasidaan nga sa kataposang mga adlaw, adunay mahimong kalisod taliwala sa mga nasod,4 ang mga tawo “maghunahuna lamang sa ilang kaugalingon,”5 “ang tanan nga mga butang magkaguliyang,”6 ang kalibog magkadako,7 ug “ang mga kasingkasing sa mga tawo mopakyas kanila.”8 Nakita gayod nato ang mga kasingkasing sa mga lalaki ug mga babaye nga mipakyas kanila: ang mga pagdani sa kalibotan, ang pagbalda sa madanihon nga mga tingog, ang pagbaliwala sa espirituwal nga pag-alima, ang kakapoy gikan sa mga gikinahanglan sa pagkadisipulo.9 Tingali naguol kamo samtang nakita ninyo ang usa ka tawo nga inyong gimahal, kinsa sa usa ka higayon sinsero nga namulong sa iyang hugot nga pagtuo ni Jesukristo, mihatag og saksi sa Basahon ni Mormon, ug madasigon nga mitabang sa pagpalambo sa gingharian sa Dios, kalit nga mipalayo, seguro sa pagkakaron lang, gikan sa iyang mga tinuohan ug nahimong dili aktibo sa Simbahan. Ang akong tambag kaninyo mao ang ayaw pagpakawala sa paglaom! Maayo ra ang tanan. Kay uban sa Dios, walay imposible.10
Uban niining gipanagna nga kasamok ug kawalay pagtuo sa kalibotan, ang Ginoo misaad nga adunay mahimong usa ka katawhan sa pakigsaad, ug usa ka katawhan nga mahinamong nagpaabot sa Iyang pagbalik; usa ka katawhan kinsa mobarog diha sa balaan nga mga dapit ug dili matarog sa ilang dapit.11 Namulong siya sa usa ka matarong nga katawhan nga nagbatok sa mga panglingla sa kaaway, nagdisiplina sa ilang hugot nga pagtuo, naghunahuna sa celestial, ug hingpit nga nagsalig sa Manluluwas, si Jesukristo.
Nganong ang Ginoo nagdala karon sa liboan sa Iyang mga templo nga mas duol kanato? Usa ka rason mao nga taliwala sa kasamok ug mga tintasyon sa kalibotan, Siya misaad sa paglig-on ug pagpanalangin sa Iyang mga Santos sa pakigsaad, ug ang Iyang mga saad natuman!
Mga saad gikan sa Kirtland Temple
Sa unsang paagi kini nga balaan nga mga balay naglig-on, naghupay, ug nagpanalipod kanato? Makakaplag kita og tubag diha sa mga pangamuyo ni Propeta Joseph Smith diha sa pagpahinungod sa Kirtland Temple. Dinhi niini nga templo ang dapit diin ang mga Santos mikanta, “Awit, ug singgit uban sa kalangitan.”12 Ang Manluluwas Mismo mipakita, ug ang mga propeta sa karaan mibalik, mitugyan og dugang nga mga yawe sa pagkapari ngadto sa gipahiuli nga ebanghelyo.13
Nianang sagrado nga okasyon didto sa Kirtland Temple, ang propeta miampo nga diha sa balaan nga balay sa Ginoo, ang mga Santos masangkapan sa gahom sa Dios, nga ang ngalan ni Jesukristo maana diha kanila, nga ang Iyang mga anghel mobantay kanila, ug nga sila motubo diha sa Ginoo ug “makadawat og kahingpitan sa Espiritu Santo.”14 Kini nga sagrado nga mga pangamuyo matuman sa atong mga kinabuhi samtang kita matinud-anong mosimba diha sa balay sa Ginoo.
Gitugahan sa Gahom
Diha sa Iyang balay, kita literal nga tugahan og langitnong gahom.15 Ang atong hugot nga pagtuo diha kang Jesukristo ug ang atong gugma alang Kaniya makompirmar ug mapalig-on. Kita espirituwal nga maseguro sa atong tinuod nga pagkatawo ug sa mga katuyoan sa kinabuhi.16 Kon kita magmatinud-anon, kita mapanalanginan og proteksiyon gikan sa mga tintasyon ug mga makabalda. Mabati nato ang gugma sa atong Manluluwas samtang Siya mobayaw kanato gikan sa atong mga kalisod ug mga kasub-anan. Kita gisangkapan sa gahom sa Dios.
Iyang Ngalan diha Kanato
Diha sa Iyang balaan nga balay, mas hingpit natong madala ang Iyang ngalan dinhi kanato. Sa dihang kita mabunyagan, atong ipahayag ang atong pagtuo diha Kaniya ug ang atong kaandam sa pagtuman sa Iyang mga sugo. Diha sa templo, kita sagradong mosaad, pinaagi sa atong mga pakigsaad nga mosunod Kaniya sa kahangtoran.
Ang kabatan-onan niini nga Simbahan talagsaon. Sa usa ka malisod nga kalibotan, gidala nila sa ilang kaugalingon ang ngalan ni Kristo. Sa Dakbayan sa Heber, Utah, usa ka miting sa publiko ang gipahigayon aron sa paghisgot sa mga detalye sa usa ka templo nga giplanohan nga tukoron. Tulo ka libo ka kabatan-onan ang mipuno sa kasikbit nga parke aron sa pagpakita sa ilang suporta alang sa gisugyot nga templo. Usa ka batan-ong lalaki, namulong ngadto sa mga lider sa gobyerno diha sa usa ka open forum, maisogong mipasabot, “Naglaom kong maminyo dinhi niini nga templo. [Ang templo motabang] kanako sa pagpabilin sa akong kaugalingon nga limpyo ug putli.” Laing batan-ong lalaki mihulagway sa templo isip usa ka simbolo sa kahayag ug paglaom. Ang batan-ong mga lalaki ug mga babaye sa Simbahan sa tibuok kalibotan naghangop sa ngalan ni Jesukristo.17
Mga Anghel taliwala Kanato
Didto sa Kirtland Temple, si Propeta Joseph nag-ampo nga “mga anghel mobantay [sa Iyang mga Santos].”18 Ang makanunayon nga paghimo sa mga ordinansa alang sa atong mga katigulangan diha sa templo magdala og usa ka tam-is ug segurado nga kompirmasyon nga ang kinabuhi magpadayon latas sa tabil.
Bisan og daghan sa atong mga kasinatian diha sa balay sa Ginoo sagrado kaayo aron ipakigbahin sa publiko, ang uban mahimo natong ipakigbahin. Kuwarenta ka tuig kaniadto, samtang nagpuyo sa Florida, si Kathy ug ako mibiyahe ngadto sa templo didto sa Atlanta, Georgia. Sa gabii sa Miyerkules, Mayo 9, 1984, samtang nakompleto namo ang usa ka sesyon sa templo, usa ka ordinance worker miduol kanako ug nangutana kon ako aduna pay panahon sa paghimo og usa lang ka pagpangandam nga initiatory nga ordinansa. Ang ngalan sa tawo nga akong girepresentar dili kasagaran. Ang iyang ngalan mao is Eleazer Cercy.
Pagkasunod adlaw, ang templo napuno sa mga Santos. Samtang nangandam ko sa pagpahigayon sa akong ikaduhang pagtuga sa adlaw, gihatagan ko sa ngalan sa tawo nga akong irepresentar. Makapasorpresa, ang ngalan mao ang samang indibidwal gikan sa miaging gabii, si Eleazer Cercy. Nabati nako ang Espiritu sa Ginoo samtang nakompleto ang pagtuga. Sa ulahing bahin sa kahaponon, anaa gihapon sa templo, si Kathy nakakita og usa ka tigulang nga higala sa pamilya, si Sister Dolly Fernandez, kinsa karon nagpuyo sa Atlanta. Tungod kay walay lalaki nga mga sakop sa iyang pamilya uban kaniya, mihangyo siya kon posible ba akong makaabag sa pagselyo sa iyang amahan ngadto sa mga ginikanan sa iyang amahan. Siyempre dungog kini kanako.
Samtang miluhod ko sa tumoy sa altar alang niining sagrado nga ordinansa, nadunggan nako pag-usab ang ngalan nga karon nakasilsil na sa akong hunahuna, ang iyang amahan, si Eleazer Cercy. Ako hingpit nga nagtuo nga human niini nga kinabuhi, mahimamat nako ug mahangop ang usa ka lalaki nga nailhan dinhi sa iyang mortal nga kinabuhi isip si Eleazer Cercy.
Kadaghanan sa atong mga kasinatian diha sa balay sa Ginoo nagdala og malipayon nga kalinaw ug hilom nga pagpadayag kay sa dramatikanhon nga pagpanginlabot. Apan segurado: ang mga anghel nagbantay kanato!
Usa ka kahingpitan sa Espiritu Santo
Ang gasa sa Espiritu Santo gihatag kanato samtang kita gikompirmahan isip usa ka miyembro sa Simbahan. Matag semana samtang kita takos nga moambit sa pan ug tubig agi og handomanan sa atong Manluluwas, kita gisaaran nga ang Iyang Espiritu kanunay nga mouban kanato.19 Samtang kita moabot uban sa andam nga mga kasingkasing ngadto sa balay sa Ginoo, ang labing balaan nga dapit sa yuta, kita motubo diha sa Ginoo ug mahimong “modawat sa usa ka kahingpitan sa Espiritu Santo.”20 Pinaagi sa gahom sa Espiritu Santo, kita mapuno sa kalinaw ug hingpit nga kalipay ug dili matukib nga paglaom.21 Makadawat kita sa kalig-on nga magpabilin nga Iyang mga disipulo kon makaplagan nato ang atong kaugalingon nga anaa sa gawas sa balaan nga mga dapit.
Si Presidente Russell M. Nelson mipahayag: “Ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat karon ug sa higayon nga Siya mobalik na pag-usab. Makakita kita og milagrosong timailhan nga ang Dios Amahan ug … si Jesukristo, magdumala niini nga Simbahan sa kahalangdon ug himaya.”22 Ang pagtukod sa tibuok kalibotan og mga balay sa Ginoo usa ka gamhanan nga buhat ug milagroso nga timailhan.23
Akong hinigugma nga mga higala, kon kita makahimo ug wala pa midugang sa atong pagtambong sa templo, buhaton nato nga makanunayong mangita og dugang nga panahon sa pagsimba diha sa balay sa Ginoo. Mag-ampo kita alang sa mga templo nga napahibalo, nga mapalit ang mga yuta, nga moaprobar ang mga gobyerno sa mga plano, nga makita sa talentado nga mga mamumuo nga mapadako ang ilang mga gasa, ug nga ang sagrado nga mga pagpahinungod magdala sa pagtugot sa langit ug sa pagbisita sa mga anghel.
Mga Saad
Ang templo mao gayod ang balay sa Ginoo. Ako mosaad kaninyo nga kon kamo takos ug mainampoon nga moadto sa Iyang balaan nga balay, kamo masangkapan sa Iyang gahom, ang Iyang ngalan maanaa diha kaninyo, ang Iyang mga anghel magbantay kaninyo, ug kamo molambo diha sa panalangin sa Espiritu Santo.
Ang Ginoo misaad, “Ang matag kalag kinsa mobiya sa iyang mga sala ug moduol ngari kanako, ug motawag sa akong ngalan, ug mosunod sa akong tingog, ug mohupot sa akong mga sugo, makakita sa akong panagway ug masayod nga Ako mao.”24 Adunay daghang lainlain nga mga paagi sa pagkakita sa panagway ni Kristo, ug walay mas maayong dapit kaysa diha sa Iyang balaan nga balay.25
Niini nga adlaw sa kalibog ug kasamok, ako mopamatuod nga ang templo mao ang Iyang balaan nga balay ug motabang sa pagpreserbar kanato, pagpanalipod kanato, ug pag-andam kanato alang sa mahimayaon nga adlaw sa dihang, uban sa Iyang tanan nga balaan nga mga anghel, ang atong Manluluwas mobalik sa kahalangdon, gahom, ug dakong himaya. Sa ngalan ni Jesukristo, amen.