Ang Tanan nga mga Butang alang sa Atong Kaayohan
Sa karon ug sa kahangtoran, ang katuyoan sa Paglalang ug ang kinaiya Mismo sa Dios mao ang paghiusa sa tanan nga mga butang alang sa atong kaayohan.
Karon Abril 6—ang anibersaryo sa pagpahiuli ni Jesukristo sa Iyang Simbahan sa ulahing mga adlaw—ug kabahin sa panahon sa Pasko sa Pagkabanhaw, diin kita malipayong nagpamatuod bahin sa hingpit nga kinabuhi, maulaong sakripisyo, ug mahimayaong Pagkabanhaw ni Jesukristo.
Usa ka Chinese nga istorya nagsugod sa dihang ang anak nga lalaki sa usa ka tawo nakakaplag og matahom nga kabayo.
“Pagkaswerte,” miingon ang mga silingan.
“Tan-awon nato,” miingon ang tawo.
Dayon ang anak nga lalaki nahulog sa kabayo ug permanente nga nabaldado.
“Pagkawalay swerte,” miingon ang mga silingan.
“Tan-awon nato,” miingon ang tawo.
Miabot ang nang-recruit og mga sundalo apan wala giapil ang nabaldado nga anak.
“Pagkaswerte,” miingon ang mga silingan.
“Tan-awon nato,” miingon ang tawo.
Niining dili matag-an nga kalibotan kanunayng natong bation nga giitsa-itsa sa mga unos, walay kaseguroan, usahay swerte, ug—kasagaran gayod—walay swerte. Apan, niining kalibotan nga puno sa kalisdanan,1 “nasayod kita nga diha sa tanang butang nagbuhat ang Dios alang sa kaayohan niadtong nahigugma kaniya.”2 Gani, kon kita maglakaw sa katarong ug hinumdoman ang atong mga pakigsaad, ang “tanan nga mga butang magkahiusa sa paglihok alang sa inyong kaayohan.”3
Ang tanan nga mga butang alang sa atong kaayohan.
Usa ka talagsaon nga saad! Makapahupay nga kaseguroan nga gikan sa Dios Mismo! Sa milagroso nga paagi, ang katuyoan sa Paglalang ug ang kinaiya sa Dios mao ang pagkasayod sa sinugdanan ug sa kataposan,4 sa pagpahinabo sa tanan nga alang sa atong kaayohan; ug sa pagtabang nato nga malimpyohan ug mabalaan pinaagi sa grasya ug Pag-ula ni Jesukristo.
Ang Pag-ula ni Jesukristo makaluwas ug makatubos kanato gikan sa sala. Apan si Jesukristo nakasabot gayod usab sa atong matag sakit, kasakit, balatian,5 kagul-anan, panagbulag. Sa karon ug sa kahangtoran, ang Iyang kadaogan ibabaw sa kamatayon ug sa impyerno makahimo sa tanang butang nga maayo.6 Siya motabang nga mamaayo ang nasakitan ug gipakaubos, mopahiuli sa nasuko ug wala nagkahiusa, mohupay sa nag-inusara ug nahimulag, modasig sa dili segurado ug dili hingpit, ug mopahinabo sa mga milagro nga mahimo lamang sa Dios.
Manganta kita og hallelujah ug mosinggit og hosanna! Uban sa mahangtorong gahom ug walay kinutoban nga kaayo, diha sa plano sa Dios alang sa kalipay, ang tanan nga mga butang magkahiusa sa paglihok alang sa atong kaayohan. Atong maatubang ang kinabuhi nga adunay pagsalig ug dili kahadlok.
Kon pasagdan kita, dili kita mahibalo sa atong kaugalingong kaayohan. Kon “ako mopili nako,” gipili usab nako ang akong kaugalingong mga limitasyon, mga kahuyang, mga kakulangan. Sa kataposan, aron mahimo ang labing maayo, kita kinahanglan nga mahimong maayo.7 Kay walay tawo nga maayo gawas sa Dios,8 kita magtinguha og kahingpitan diha kang Jesukristo.9 Kita mamahimo lamang nga labing tinuod, labing maayo sa atong kaugalingon kon atong isalikway ang kinaiyanhon nga lalaki o babaye ug mahimong anak sa Dios.
Pinaagi sa atong pagsalig ug hugot nga pagtuo diha sa Dios, ang mga pagsulay ug mga kasakitan mahimong ipahinungod alang sa atong kaayohan. Si Jose, gibaligya sa pagkaulipon didto sa Ehipto, sa kaulahian miluwas sa iyang pamilya ug katawhan. Ang pagkabilanggo ni Propeta Joseph Smith didto sa Liberty Jail mitudlo niya nga “kini nga mga butang makahatag kanimo og kasinatian, ug alang sa imong kaayohan.”10 Kon puy-an nga adunay hugot nga pagtuo, ang mga pagsulay ug mga sakripisyo nga dili gayod nato pilion makapanalangin nato ug sa uban sa mga paagi nga wala gayod nato mahunahuna.11
Atong mapalambo ang atong pagtuo ug pagsalig sa Ginoo nga ang tanan nga mga butang magkahiusa sa paglihok alang sa atong kaayohan samtang makabaton kita og mahangtorong panglantaw;12 makasabot nga ang atong mga pagsulay “alang lamang sa mubo nga panahon”;13 moila nga ang kasakitan mahimong ipahinungod alang sa atong kaayohan;14 moila nga ang mga aksidente, wala sa panahon nga kamatayon, makapaluya nga balatian, ug sakit kay mga kabahin sa pagka-mortal; ug mosalig nga ang atong mahigugmaong Langitnong Amahan wala maghatag og mga pagsulay aron mosilot o mohukom. Dili Siya mohatag og bato ngadto sa usa ka tawo nga nangayo og pan ni bitin ngadto sa tawo nga nangayo og isda.15
Kon ang mga pagsulay moabot, kasagaran ang atong labing ganahan mao nga ang usa ka tawo maminaw ug maanaa uban nato.16 Niana nga panahon, ang gihunahuna nga sinsero nga mga tubag dili makatabang, bisan ang tumong niini mao ang paghupay. Usahay mangandoy kita og usa ka tawo nga magbangotan, mobati sa kasakit, ug mohilak uban nato; motugot nga kita mopahayag sa kasakit, kasagmuyo, usahay gani sa kasuko; ug moila uban nato nga adunay mga butang nga kita wala mahibalo.
Kon kita mosalig sa Dios ug sa Iyang gugma alang nato, bisan ang atong hilabihan nga mga kasakit, sa kataposan, magkahiusa sa paglihok alang sa atong kaayohan.
Nahinumdoman nako ang adlaw nga nakadawat ko og balita bahin sa grabe nga aksidente sa sakyanan nga naglakip niadtong akong mga minahal. Sa ingon nianang mga higayona, sa kaguol ug sa hugot nga pagtuo, kita makasulti lamang uban ni Job, “Ang Ginoo maoy naghatag, ug siya usab ang nagbawi. Dalaygon ang iyang ngalan!”17
Sa Simbahan sa tibuok kalibotan, pipila sa 3,500 ka stake ug mga district ug pipila sa 30,000 ka ward ug mga branch nagsangkap og kadangpan ug kahilwasan.18 Apan sa sulod sa atong mga stake ug mga ward, daghang matinud-anon nga mga pamilya ug mga indibidwal ang nag-atubang og lisod nga mga hagit, bisan og nahibalo (wala pa mahibalo kon unsaon) nga ang mga butang magkahiusa sa paglihok alang sa atong kaayohan.
Didto sa Huddersfield, England, si Brother Samuel Bridgstock nadayagnos og stage-four nga kanser sa wala pa siya matawag nga bag-ong presidente sa stake. Nahibalo sa iyang grabe nga dayagnosis, nangutana siya sa iyang asawa, si Anna, kon nganong moadto pa man siya aron interbiyohon.
“Tungod kay,” si Sister Bridgstock miingon, “tawagon ka isip presidente sa stake.”
Gihatagan og paunang tagal nga mabuhi og usa o duha ka tuig, si Presidente Bridgstock (nga ania karon dinhi) anaa na karon sa iyang ikaupat ka tuig sa pagserbisyo. Siya adunay maayo ug lisod nga mga adlaw. Ang iyang stake nagkahiusa nga adunay naglambo nga pagtuo, pagserbisyo, ug pagkamabination. Dili kini sayon, apan ang iyang asawa ug pamilya nagpuyo nga adunay hugot nga pagtuo, kamapasalamaton, ug sa masabtan nga kasubo sila misalig nga magmalipayon sa kahangtoran pinaagi sa makapahiuli nga Pag-ula ni Jesukristo.19
Kon kita kalma, bukas, ug may balaang pagtahod, atong mabati ang katahom, katuyoan, ug kalinaw nga mahisakop sa pakigsaad nga gitanyag sa Ginoo. Sa sagrado nga mga panahon, hinaot nga Siya motugot kanato nga motan-aw og daklit sa mas dako nga mahangtorong kamatuoran diin ang atong inadlaw nga mga kinabuhi adunay kabahin, diin ang gagmay ug yano nga mga butang magkahiusa sa paglihok alang sa atong kaayohan sa mga naghatag ug sa mga nakadawat.
Si Rebekah, ang anak nga babaye sa akong unang presidente sa misyon, mipakigbahin kon giunsa sa Ginoo pagtubag ang iyang pag-ampo alang sa kahupayan pinaagi sa wala damha nga oportunidad sa pagtubag sa pag-ampo sa laing tawo.
Usa ka gabii na kaayo, si Rebekah, nagbangotan sa bag-o lang nga pagkamatay sa iyang inahan, adunay klaro nga pagbati nga molakaw ug mopalit og gasolina sa iyang sakyanan. Sa dihang miabot siya sa gasolinahan, nahimamat niya ang tigulang nga babaye nga naglisod pagginhawa gamit ang dakong tangke sa oxygen. Unya, gihatag ni Rebekah sa babaye ang portable oxygen machine sa iyang inahan. Kini nga sister mapasalamaton nga miingon, “Gihatagan ko nimo pag-usab sa akong kagawasan.” Ang mga butang magkahiusa sa paglihok alang sa kaayohan kon kita mangalagad sama sa buhaton ni Jesukristo.
Ang usa ka amahan nga gisangonan uban sa iyang anak nga lalaki nga sakop sa korum sa mga teacher isip managkompanyon sa pagpangalagad mipasabot, “Ang pagpangalagad mao ang pagkahimong gikan sa tigdala og mga cookie nga mga silingan ngadto sa masaligan nga mga higala, unang tigresponde sa espirituhanong butang.” Ang pagkahisakop sa pakigsaad diha ni Jesukristo makahupay, makapasuod, makapahinungod.
Bisan diha sa trahedya, ang espirituhanong pagpangandam mopahinumdom nato nga ang Langitnong Amahan nasayod kon kanus-a kita mibati nga nasakitan ug nag-inusara gayod. Pananglitan, ang usa ka pamilya nga ang anak gidala sa ospital sa kaulahian nakakaplag og kahupayan pinaagi sa paghinumdom nga ang Espiritu Santo mihunghong nang daan kon unsay angay nga dahoman.
Usahay ang mas dako nga mahangtorong kamatuoran nga itugot sa Ginoo nga atong bation naglakip sa pamilya sa pikas tabil. Usa ka sister nakakaplag og kalipay sa pagkakabig sa gipahiuli nga ebanghelyo ni Jesukristo. Apan duha ka truma ang nakaapekto gayod sa iyang kinabuhi—nakakita og aksidente sa barko ug ang makalilisang nga pagkawala sa iyang inahan, kinsa mikutlo sa iyang kaugalingong kinabuhi.
Apan kini nga sister nakabuntog sa iyang kahadlok sa tubig igo nga magpabunyag pinaagi sa pagpaunlod sa tubig. Ug nianang nahimong labing malipayon nga adlaw, siya nakasaksi sa usa ka tawo, nga mi-proxy sa iyang namatay nga inahan, nga mabunyagan didto sa templo. “Ang bunyag didto sa templo miayo sa akong inahan, ug kini mihimo nakong gawasnon,” miingon ang sister. “Mao kadto ang unang higayon nga mibati ko og kalinaw sukad nga namatay ang akong inahan.”
Ang atong sagradong musika mipalanog sa Iyang kaseguroan nga ang tanan nga mga butang magkahiusa sa paglihok alang sa atong kaayohan.
Akong kalag magmalinawon ka
Dios mogiya sa kaugmaon ta.
Ayaw ipatarog paglaom mo;
Nagpadayag tanang misteryo.20
Mga Santos, dali ug lihok na;
Paglakaw, magmaya.
Bisan mag-antos niining panaw,
Grasya matag adlaw. …
Kon mamatay tas atong pagpanaw,
Malipayong adlaw! Maayo rang tanan!21
Ang Basahon ni Mormon mao ang ebidensiya nga atong mahuptan nga si Jesus mao ang Kristo ug ang Dios motuman sa Iyang mga panagna. Gisulat sa dinasig nga mga propeta nga nakakita sa atong panahon karon, ang Basahon ni Mormon nagsugod sa orihinal nga sugilanon—usa ka pamilya nga nag-atubang og grabe nga mga panagbangi. Apan, kon atong tun-an ug pamalandongan ang 1 Nephi 1 hangtod sa Moroni 10, mapaduol kita ngadto kang Jesukristo nga adunay lig-on nga pagpamatuod nga ang unsay nahitabo didto ug kaniadto makapanalangin kanato dinhi ug karon.
Samtang ang Ginoo, pinaagi sa Iyang buhi nga propeta, nagdala sa mas daghang balay sa Ginoo paduol diha sa daghang dapit, ang mga panalangin sa templo nagkahiusa sa paglihok alang sa atong kaayohan. Kita moduol pinaagi sa pakigsaad ug ordinansa ngadto sa Dios ang atong Amahan ug ni Jesukristo ug makabaton og mahangtorong panglantaw bahin sa pagka-mortal. Sa tinagsa-tagsa, sa indibidwal nga paagi, kita nagtanyag sa minahal nga mga sakop sa pamilya—mga katigulangan—og sagrado nga mga ordinansa ug mga panalangin sa pakigsaad pinaagi sa sundanan sa Ginoo bahin sa mga manluluwas diha sa Bukid sa Zion.22
Samtang ang mga templo nagkaduol kanato sa daghang dapit, ang sakripisyo alang sa templo nga atong mahalad mao ang pagtinguha og pagkabalaan diha sa balay sa Ginoo sa mas makanunayon nga paagi. Sulod sa daghang katuigan, kita nagtigom, nagplano, ug nagsakripisyo aron makaadto sa templo. Karon, kutob sa itugot sa kahigayonan, palihog mas kanunay nga moadto sa Ginoo diha sa Iyang balaan nga balay. Tugoti nga ang kanunay nga pagsimba ug pagserbisyo diha sa templo mopanalangin, mopanalipod, ug modasig ninyo ug sa inyong pamilya—ang pamilya nga aduna kamo karon o ang pamilya nga inyo unyang mabatonan ug mamahimo sa umaabot.
Usab, kon itugot sa inyong mga kahigayonan, palihog ikonsiderar ang panalangin sa pagpanag-iya og inyong kaugalingong mga sinina alang sa templo.23 Ang usa ka lola gikan sa kabos nga pamilya naghisgot nga sa tanang butang sa kalibotan, ang iyang labing gikinahanglan mao ang iyang kaugalingong mga sinina alang sa templo. Ang iyang apo nga lalaki miingon, “Si lola mihunghong, ‘Moserbisyo ko nga magsul-ob sa akong kaugalingong mga sinina alang sa templo, ug kon mamatay ko, ilubong ko nga magsul-ob niini.’” Ug sa dihang miabot ang panahon, nagsul-ob siya niini.
Sama sa gitudlo ni Presidente Russell M. Nelson, “Ang tanan natong gituohan ug ang tanan nga saad nga gihimo sa Dios ngadto sa Iyang mga anak sa pakigsaad anaa sa templo.”24
Sa karon ug sa kahangtoran, ang katuyoan sa Paglalang ug ang kinaiya Mismo sa Dios mao ang paghiusa sa tanan nga mga butang alang sa atong kaayohan.
Mao kini ang mahangtorong katuyoan sa Ginoo. Kini ang Iyang mahangtorong panglantaw. Kini ang Iyang mahangtorong saad.
Kon ang kinabuhi gubot ug ang katuyoan dili klaro, kon kamo gusto og mas maayo nga pagpuyo apan wala kahibalo kon unsaon, palihog duol ngadto sa Dios ang atong Amahan ug ni Jesukristo. Salig nga Sila buhi, nahigugma ninyo, ug nagtinguha sa tanang butang alang sa inyong kaayohan. Ako mopamatuod nga Sila mohimo, sa walay kinutoban ug sa mahangtorong paagi, diha sa sagrado ug balaan nga ngalan ni Jesukristo, amen.