Kaatbang sa Tanang Butang

Ni Elder Mathias Held

Sa Seventy

Aron makagamit kita sa atong kabubut-on, gikinahanglan kita nga adunay ikonsiderar nga magkaatbang nga mga opsiyon.

Bag-ohay lang, samtang nagdrayb didto sa usa ka siyudad nga dili mi suheto, nasayop ko sa pagliko, nga midala nako ug sa akong asawa ngadto sa express highway sa walay kahumanan nga mga milya nga dili na kami mahimong mobalik sa among agi. Nakadawat mi og mabinationg imbitasyon ngadto sa balay sa usa ka higala ug nabalaka nga malangan og maayo ang among pag-abot kay sa gilaoman.

Samtang anaa pa sa highway ug desperado na kaayo nga makakita og agianan aron makagawas, akong gibasol ang akong kaugalingon tungod sa kakulang sa pagpakabana sa sistema sa pagnabigar. Kini nga kasinatian nakapahunahuna nako nga sa atong kinabuhi usahay makahimo kita og sayop nga mga desisyon ug sa ingon mag-antos kita sa mga sangpotanan sa mapainubsanon ug mapailobong paagi hangtod nga makahimo na usab kita sa pag-usab sa atong direksiyon.

Ang mahinungdanon sa kinabuhi mao ang paghimo og mga pagpili. Ang atong Langitnong Amahan mihatag kanato sa balaanong gasa sa kabubut-on sa tukmang paagi aron kita makakat-on gikan sa atong mga pagpili—gikan sa mga saktong pagpili ug usab gikan sa mga sayop. Atong makorehian ang sayop nga mga pagpili kon kita maghinulsol. Dinhi niini mahitabo ang pagtubo. Ang plano sa Langitnong Amahan alang kanatong tanan kay mahitungod sa pagkat-on, paglambo, ug pag-uswag ngadto sa kinabuhing dayon.

Sukad nga ang akong asawa ug ako natudloan sa mga misyonaryo ug mipasakop sa Simbahan sa milabay nga daghang katuigan, kanunay ko nga nakadayeg sa makahuloganong mga pagtulon-an nga gihatag ni Lehi ngadto sa iyang anak nga si Jacob diha sa Basahon ni Mormon. Siya mitudlo kaniya nga “ang Ginoong Dios mihatag sa tawo sa abilidad aron siya makalihok sa iyang kaugalingon”¹ ug nga “gikinahanglan gayod, nga adunay kaatbang sa tanang butang.”² Aron makagamit kita sa atong kabubut-on, gikinahanglan kita nga adunay ikonsiderar nga magkaatbang nga mga opsiyon. Sa pagbuhat niini, ang Basahon ni Mormon nagpahinumdom usab kanato nga kita “gitudloan sa igo”³ ug nga “ang Espiritu ni Kristo”⁴ gihatag sa matag usa kanato aron “mahibalo sa maayo gikan sa daotan.”⁵

Sa kinabuhi, kanunay kitang mag-atubang og daghang importante nga mga pagpili. Sama pananglit:

Magpili kon mosunod ba kita o dili sa mga sugo sa Dios.
Magpili nga magbaton og pagtuo ug magpasalamat kon ang mga milagro mahitabo o madudahong maghulat nga adunay mahitabo sa dili pa mopili nga motuo.
Pagpili sa pag-ugmad og pagsalig sa Dios o mahadlokong magpaabot og lain pang hagit sa sunod adlaw.

Sama sa akong paghimo og sayop nga pagliko niadto nga highway, ang pag-antos sa mga sangpotanan sa atong kaugalingong dili maayo nga mga desisyon sa kasagaran labihan kasakit kay ang ato rang kaugalingon ang mabasol. Bisan pa niana, kanunay kita nga makapili sa pagdawat og kahupayan pinaagi sa balaanong proseso sa paghinulsol, sa pagtarong sa sayop nga mga butang, ug sa pagbuhat niini makakat-on og mga pagtulon-an nga makapausab sa kinabuhi.

Usahay makasinati usab kita og mga pagbatok ug mga pagsulay gikan sa mga butang nga dili nato makontrol, sama sa:

Mga panahon sa kahimsog ug mga panahon sa sakit.
Mga panahon sa kalinaw ug mga panahon sa gubat.
Mga oras sa adlaw ug gabii ug mga panahon sa ting-init ug tingtugnaw.
Mga oras sa pagtrabaho sundan sa mga oras sa pagpahulay.

Bisan tuod og dili kita kasagaran makapili tali niini nga mga matang sa sitwasyon tungod kay mahitabo lang kini, gawasnon gihapon kita nga mopili kon unsaon sa pagtubag niini. Makahimo kita niini pinaagi sa positibo o sa negatibo nga kinaiya. Mahimo kita nga magtinguha sa pagkat-on gikan sa kasinatian ug mangayo og tabang ug suporta sa atong Ginoo, o mahimo kitang maghunahuna nga nag-inusara kita niini nga pagsulay ug nga kita angay nga mag-antos niini nga kita lamang. Mahimo natong “ipahiuyon ang atong mga layag” ngadto sa bag-ong kahimtang, o mahimo kitang modesider nga dili mohimo og bisan unsang kausaban. Sa mangitngit nga kagabhion, atong mapasiga ang atong mga suga. Sa katugnaw sa tingtugnaw, angay natong pilion ang pagsul-ob og mainit nga mga sinina. Sa mga panahon sa sakit, makapangayo kita og medikal ug espirituhanon nga tabang. Makapili kita kon unsay atong reaksiyon niini nga mga kahimtang.

Ang mopahiuyon, magkat-on, mangita, mopili pulos aksiyon nga mga pulong. Hinumdomi nga mga tinugyanan kita og dili mga butang. Dili nato hikalimtan nga si Jesus misaad nga “siya moantos sa mga sakit ug mga balatian sa iyang katawhan… aron siya …[motabang]” kanato samtang modangop kita Kaniya.⁶ Makapili kita sa pagtukod sa atong pundasyon diha sa bato nga mao si Jesukristo, aron sa higayon nga moabot ang mga alimpulos “kini walay gahom ibabaw [kanato].”⁷ Siya misaad nga “ug kinsa kadto nga moduol [ngadto Kaniya], [Iyang dawaton]; ug bulahan kadtong kinsa moduol [Kaniya].”⁸

Karon, adunay usa pa ka baroganan nga labing importante. Si Lehi miingon nga “gikinahanglan gayod nga … adunay kaatbang sa tanang butang.”⁹ Nagpasabot kini nga ang mga magkaatbang dili magkalagyo sa usag-usa. Makahimo gani kini sa paghingpit sa usag-usa. Dili kita makaila sa kamaya gawas kon nakasinati usab kita og kasub-anan sa ubang higayon. Ang pagbati og kagutom usahay makatabang kanato nga mamahimong labing mapasalamaton sa higayon nga aduna kitay igong makaon. Dili kita makahimo sa pag-ila sa kamatuoran gawas kon nakakita usab kita og mga bakak dinhi ug didto.

Kini nga magkaatbang sama ra sa duha ka habig sa usa ka sensilyo. Ang duha ka habig kanunay nga anaa. Si Charles Dickens mihatag og sanglitanan niini nga ideya sa dihang misulat siya nga “Mao kadto ang labing maayo nga panahon, mao kadto ang labing ngil-ad nga panahon.”¹⁰

Mohatag ko og sanglitanan gikan sa among kaugalingong kinabuhi. Ang pagminyo, pagmugna og pamilya, ug pag-angkon og mga anak nakahatag kanamo sa labing talagsaong mga panahon sa kamaya nga among nasinati sa among kinabuhi, apan usab sa labing lawom nga panahon sa kasakit, kaguol, ug kasub-anan sa higayon adunay nahitabo ni bisan kinsa kanamo. Ang walay hunong nga kamaya ug himaya uban sa among mga anak usahay usab pagasundan sa balik-balik nga mga panahon sa mga sakit, pagka-ospital, ug walay tulog nga mga gabii nga puno sa kahasol, ug ingon man pagkaplag og kahupayan pinaagi sa mga pag-ampo ug mga panalangin sa pagkapari. Kining magkalahi nga mga kasinatian nagtudlo kanamo nga wala gayod kita mag-inusara sa mga gutlo sa pag-antos, ug nagpakita usab kini kanamo kon unsa ka dako ang atong mapas-an pinaagi sa pag-agak ug pagtabang sa Ginoo. Kini nga mga kasinatian nakatabang sa paghulma kanamo sa maanindot kaayong mga paagi, ug kining tanan takos kaayo nga kasinatian. Dili ba mao man kini ang atong gianhi?

Diha sa mga kasulatan makakaplag usab kita og makadani nga mga sanglitanan:

Si Lehi mitudlo sa iyang anak nga si Jacob nga ang mga kasakit nga iyang giantos didto sa kamingawan nakatabang kaniya nga mahibalo sa kahalangdon sa Dios ug nga ang “[Dios] mopahinungod sa [iyang] mga kasakit alang sa [iyang] kaayohan.”¹¹
Atol sa mapintas nga pagkapriso ni Joseph Smith didto sa Liberty Jail, ang Ginoo misulti kaniya nga “kining tanan nga mga butang makahatag [kaniya] og kasinatian, ug alang sa [iyang] kaayohan.”¹²
Sa kataposan, ang walay kataposan nga sakripisyo ni Jesukristo mao gayod ang labing dako nga ehemplo sa kasakit ug pag-antos nga sukad nakita, apan nagdala usab kini og maanindot kaayong mga panalangin sa Iyang Pag-ula ngadto sa tanang anak sa Dios.

Kon asa ang kahayag sa adlaw, ang mga anino anaa usab didto. Ang mga baha magdala og kadaot, apan kini sa kasagaran magdala usab og kinabuhi. Ang mga luha sa kasub-anan sa kasagaran mahimong mga luha sa kahupayan ug kalipay. Ang mga pagbati sa kaguol kon mobiya ang mga minahal sa kinabuhi sa kadugayan mabugtian og kamaya sa paghimamat og usab. Sa mga panahon sa gubat ug mga kadaot, daghang ginagmay nga mga buhat sa pagkamabination ug gugma nanghitabo usab alang niadtong adunay “mga mata nga makakita, ug mga dalunggan nga makadungog”¹³

Ang atong kalibotan karon sa kasagaran gihulagway pinaagi sa kahadlok ug kabalaka—kahadlok sa unsay anaa sa umaabot alang kanato. Apan si Jesus nagtudlo kanato sa pagsalig ug sa “paghunahuna [Kaniya], sa matag hunahuna; ayaw pagduha-duha, ayaw kahadlok.”¹⁴

Magmakanunayon kita sa paghimo og mahunahunaon kaayo nga paningkamot nga makakita sa duha ka habig sa matag sensilyo nga gigahin ngari kanato sa atong kinabuhi. Bisan tuod kon ang duha ka habig usahay dili dayon nato makita, makasalig kita nga kanunay kini nga anaa.

Makasalig kita nga ang atong mga kalisdanan, mga kagul-anan, mga pag-antos, ug mga kasakit dili maoy sukdanan sa atong pagkatawo; kondili ang atong pamaagi sa pagsagubang niini mao ang makatabang kanato nga molambo ug mas mapaduol sa Dios. Ang atong mga kinaiya ug mga pagpili mao ang mas maayo nga sukdanan sa atong pagkatawo kay sa atong mga hagit.

Kon anaa sa kahimsog, panggaa ug pasalamati kini sa matag gutlo. Kon anaa sa balatian, tinguhaa sa mapailobong paagi ang pagkat-on gikan niini ug sayri nga masubli na usab kini sumala sa kabubut-on sa Dios. Kon ana sa kasubo, salig nga ang kalipay anaa ra sa unahan, sa kasagaran dili pa lamang nato kini makita. Tuyoa ang pag-usab sa inyong tumong ug ipataas ang inyong mga hunahuna ngadto sa positibo nga mga aspeto sa inyong mga hagit, kay kini sila sa walay pagduhaduha kanunay gayod nga anaa! Ayaw gayod kalimti ang magmapasalamaton. Pilia nga motuo. Pilia ang pagbaton og pagtuo ni Jesukristo. Pilia nga kanunayng mosalig sa Dios. Pilia ang “paghunahuna og celestial,” sama sa gitudlo ni Presidente Russell M. Nelson kanato bag-ohay lang!¹⁵

Magmanggihunahunaon kita kanunay sa maanindot nga plano sa atong Langitnong Amahan alang kanato. Siya nahigugma kanato ug mipadala sa Iyang Hinigugmang Anak aron motabang kanato sa atong mga pagsulay ug moabli alang kanato sa pultahan aron makabalik ngadto Kaniya. Si Jesukristo buhi ug anaa nagbarog sa tanang higayon, naghulat kanato nga mopili sa pagtawag Kaniya aron mohatag og tabang, kalig-on, ug kaluwasan. Niini nga mga butang ako magpamatuod sa ngalan ni Jesukristo, amen.