Bunga Nga Molungtad

Ni Elder Matthew L. Carpenter

Sa Seventy

Gikinahanglan ang pagselyo sa Espiritu Santo sa atong mga ordinansa kon gusto kita nga makabaton sa mga gisaad nga mga panalangin alang sa tanang kahangtoran.

Isip usa ka gamay nga batang lalaki, ganahan kaayo ko sa presko, hinog nga mga melokoton [peaches]. Hangtod niining adlawa, ang ideya sa pagpaak sa usa ka dugaon, hinog nga melokoton [peach] uban sa aslom-aslom nga lasa niini makapalaway sa akong baba. Kon pupoon ang guwang na kaayo nga mga melokoton, kini molungtad sa duha hangtod sa upat ka adlaw sa dili pa kini madaot. Ako adunay maanindot nga mga panumdoman sa pag-apil sa akong inahan ug sa akong mga igsoon diha sa among kusina samtang ipreserbar namo ang naani nga mga melokoton alang sa umaabot nga tingtugnaw pinaagi sa pagselyo niini diha sa mga garapon. Kon mapreserbar namo ang mga melokoton sa husto nga paagi, kining lamian nga prutas molungtad og pipila ka tuig, dili lang duha hangtod sa upat ka adlaw. Kon naandam ug giinit sa husto nga paagi, ang prutas mapreserbar hangtod maguba ang selyo.

Si Kristo midirekta kanato nga “manglakaw ug mamunga ug bunga, nga molungtad.”¹ Apan wala Siya namulong mahitungod sa mga melokoton. Naghisgot Siya mahitungod sa mga panalangin sa Dios ngadto sa Iyang mga anak. Kon kita mohimo ug motuman sa mga pakigsaad sa Dios, ang mga panalangin nga may kalabotan sa atong mga pakigsaad mahimong molungtad lapas niini nga kinabuhi ug maselyo dinhi kanato, o mapreserbar, sa kahangtoran, mamahimong ang bunga nga molungtad alang sa tanang kahangtoran.

Ang Espiritu Santo, sa Iyang balaanong tahas isip ang Balaan nga Espiritu sa Saad, moselyo sa matag ordinansa ngadto niadtong kinsa mga matinud-anon sa ilang mga pakigsaad aron nga kini mahimong balido human sa mortalidad.² Gikinahanglan ang pagselyo sa Espiritu Santo sa atong mga ordinansa kon gusto kita nga makabaton sa mga gisaad nga mga panalangin alang sa tanang kahangtoran, mamahimong ang bunga nga molungtad.

Kini importante gayod kon gusto kita nga mahimaya.³ Sama sa gitudlo ni Presidente Russell M. Nelson, kita kinahanglan “magsugod nga maghunahuna sa kataposan. … Sa pagkatinuod, alang sa matag usa kanato, ang ‘kataposan’ nga lagmit kaayo natong makab-ot mao ang pagpuyo sa kahangtoran uban sa atong mga pamilya diha sa usa ka gihimaya nga kahimtang diin kita maanaa sa presensiya sa Dios, atong Langitnong Amahan, ug sa Iyang Anak nga si Jesukristo.”⁴ Si Presidente Nelson misulti usab: “Ang celestial nga kaminyoon mao ang mahinungdanon nga bahin sa pagpangandam alang sa kinabuhing dayon. Nagkinahanglan kini sa usa ka tawo nga maminyo sa tukma nga tawo, sa tukmang dapit, pinaagi sa tukmang awtoridad, ug sa pagtuman niana nga sagradong pakigsaad sa matinud-anong paagi. Dayon, ang usa ka tawo mahimo nga giseguro sa kahimayaan didto sa celestial nga gingharian sa Dios.”⁵

Unsa ang mga panalangin sa kahimayaan? Kini naglakip sa magkauban nga magpuyo diha sa presensiya sa Dios alang sa kahangtoran isip bana ug asawa, makapanunod sa “mga trono, mga gingharian, mga kayutaan, ug mga kagamhanan, … ug pagpadayon sa mga binhi hangtod sa hangtod,”⁶ makadawat sa tanan nga anaa sa Dios nga Amahan.⁷

Ang Ginoo mipadayag pinaagi ni Joseph Smith:

“Sa celestial nga himaya adunay tulo ka mga langit o mga ang-ang;

“Ug aron makabaton sa labing taas, ang tawo kinahanglan mosulod ngadto niini nga kapunongan sa pagkapari [ang gipasabot mao ang bag-o ug walay kataposan nga pakigsaad sa kaminyoon];

“Ug kon dili siya mosulod, siya dili makabaton niini.

“Siya mahimo nga mosulod ngadto sa lain, apan mao na kana ang kataposan sa iyang gingharian; dili siya makabaton og mga anak.”⁸

Atong makat-onan dinhi nga ang usa ka tawo mahimong maanaa sa celestial nga gingharian, o magpuyo sa presensiya sa Dios, ug mahimong dili minyo. Apan aron mahimaya sa labing taas nga ang-ang sa celestial nga gingharian, ang usa ka tawo kinahanglang mosulod sa kaminyoon pinaagi sa husto nga awtoridad ug dayon mahimong matinuoron ngadto sa mga pakigsaad nga gihimo niana nga kaminyoon. Kon magmatinud-anon kita ngadto niini nga mga pakigsaad, ang Balaan nga Espiritu sa Saad mahimong moselyo sa atong pakigsaad sa kaminyoon.⁹ Ang ingon nga naselyo nga mga panalangin mamahimong ang bunga nga molungtad.

Unsa ang gikinahanglan aron matinud-anong motuman sa bag-o ug walay kataposan nga pakigsaad sa kaminyoon?

Si Presidente Russell M. Nelson mitudlo nga adunay duha ka matang sa mga kasabotan kon kita mosulod ngadto niini nga pakigsaad sa mahangtorong kaminyoon: usa ka patas nga kasabotan tali sa bana ug asawa, ug usa ka mas taas nga kasabotan ngadto sa Dios.¹⁰ Aron makabaton sa mga panalangin sa kahimayaan nga maselyo kanato ug magpabilin human niini nga kinabuhi, kinahanglan nga kita nga magmatinuoron ngadto sa patas ug mas taas nga mga kasabotan sa pakigsaad.

Aron sa pagtuman sa patas nga kasabotan ngadto sa inyong kapikas, ang Dios mitambag kanato nga “higugmaa ang inyong asawa [o bana] sa inyong tibuok nga kasingkasing, ug unong ngadto kaniya ug wala nay lain.”¹¹ Alang niadtong kinsa minyo, ang pag-unong ngadto kaniya ug wala nay lain nagpasabot nga kamo magtinambagay sa usag usa sa gugma, kamo mohigugma ug moatiman alang sa usag usa, kamo mohatag og prayoridad sa panahon uban sa inyong kapikas labaw sa panggawas nga mga interes, ug kamo motawag sa Dios sa pagtabang kaninyo sa pagbuntog sa inyong mga kahuyang.¹² Kini usab nagpasabot nga walay emosyonal nga kasuod o sekswal nga mga relasyon sa bisan unsang matang gawas sa inyong kaminyoon, lakip sa pag-ibid-ibid o pagpakigdate, ug walay pornograpiya, nga makamugna og kahigal.¹³

Aron sa pagtuman sa patas nga kasabotan sa pakigsaad, ang matag kauban kinahanglang motinguha nga maanaa diha sa kaminyoon. Si Presidente Dallin H. Oaks bag-ohay lang mitudlo: “Kita usab nasayod nga Siya [ang Dios] dili mopugos ni bisan kinsa ngadto sa usa ka giselyohan nga relasyon nga supak sa iyang kabubut-on. Ang mga panalangin sa usa ka giselyohan nga relasyon giseguro alang sa tanan kinsa motuman sa ilang mga pakigsaad apan dili gayod pinaagi sa pagpugos og usa ka giselyohan nga relasyon ngadto sa laing tawo kinsa dili takos o dili andam.”¹⁴

Unsa man ang mas taas nga kasabotan nga gipasabot ni Presidente Nelson? Ang mas taas nga kasabotan mao ang kasabotan nga atong gihimo ngadto sa Dios.

Aron sa pagtuman sa mas taas nga kasabotan ngadto sa Dios, matinuoron kita ngadto sa mga pakigsaad sa templo nga atong gihimo kabahin sa mga balaod sa pagkamasulundon, sakripisyo, sa ebanghelyo, kaputli, ug pagpahinungod. Kita usab makigsaad ngadto sa Dios sa pagdawat sa atong mahangtorong kompanyon ug mahimong usa ka matarong nga kapikas ug ginikanan. Samtang tumanon nato ang mas taas nga kasabotan, mosarang kita alang sa mga panalangin sa pagkahimong kabahin sa pamilya sa Dios pinaagi sa pakigsaad kang Abraham, lakip sa mga panalangin sa kaliwatan, sa ebanghelyo, ug sa pagkapari.¹⁵ Kini nga mga panalangin mao usab ang bunga nga molungtad.

Samtang naglaom kita nga ang tanan kinsa mosulod ngadto sa bag-o ug walay kataposan nga pakigsaad magpabilin nga matinuoron ug makabaton sa mga panalangin nga giselyo diha kanila alang sa tanang kahangtoran, usahay kana nga mithi ingon og dili nato makab-ot. Sa tibuok nakong pangalagad nakasugat ko og mga miyembro nga naghimo ug nagtuman sa mga pakigsaad samtang ang ilang kapikas dili. Adunay uban usab nga dili minyo, nga wala gayod makabaton sa kahigayonan nga maminyo sa mortalidad. Ug adunay uban kinsa dili matinud-anon sa ilang mga pakigsaad sa kaminyoon. Unsay mahitabo sa mga indibidwal sa matag usa niini nga mga kahigayonan?

Kon magpabilin kamo nga matinud-anon ngadto sa mga pakigsaad nga inyong gihimo sa dihang kamo gitugahan, makadawat kamo sa personal nga mga panalangin nga gisaad kaninyo diha sa pagtuga bisan kon ang inyong kapikas milapas sa iyang mga pakigsaad o mibiya sa kaminyoon. Kon kamo naselyo ug sa wala madugay nadiborsiyo, ug kon ang inyong pagselyo wala makanselar, ang personal nga mga panalangin niana nga pagselyo magpabiling epektibo alang kaninyo kon kamo magpabilin nga matinud-anon.¹⁶

Usahay, tungod sa mga pagbati sa pagluib ug sa tinuod kaayo nga kasakit, ang usa ka matinud-anon nga kapikas mahimong gusto nga ipakanselar ang ilang pagselyo ngadto sa ilang dili matinud-anon nga kapikas aron makapalayo gayod kutob sa mahimo gikan kanila, dinhi sa yuta ug alang sa kahangtoran. Kon kamo nabalaka nga kamo mahigot ngadto sa usa ka dili mahinulsulon nga kanhi kapikas, hinumdomi, kamo dili! Ang Dios dili magkinahanglan ni bisan kinsa nga magpabilin diha sa usa ka selyado nga relasyon sa tibuok kahangtoran nga supak sa iyang kabubut-on. Ang Langitnong Amahan moseguro nga kita makadawat sa matag panalangin nga itugot sa atong mga tinguha ug mga pagpili.¹⁷

Apan, kon gitinguha ang usa ka pagkanselar sa pagselyo, gitahod ang kabubut-on. Mahimong sundon ang piho nga mga pamaagi. Apan kini kinahanglang dili himoon sa kaswal nga paagi! Ang Unang Kapangulohan naghupot sa mga yawe sa pagbugkos dinhi sa yuta ug sa langit. Sa higayon nga ang usa ka pagkanselar sa pagselyo gitugot sa Unang Kapangulohan, ang mga panalangin kalabot niana nga pagselyo wala nay epekto; kini gikanselar sa patas nga paagi ug sa mas taas nga paagi. Importante nga makasabot nga aron makadawat sa mga panalangin sa kahimayaan, kinahanglan natong ipakita nga kita andam nga mosulod ngadto ug magmatinud-anon nga motuman niining bag-o ug walay kataposan nga pakigsaad, niini nga kinabuhi o sa sunod.
Alang niadtong kinsa dili minyo nga mga miyembro sa Simbahan, palihog hinumdomi nga “sa kaugalingong paagi ug panahon sa Ginoo, walay mga panalangin nga ihikaw gikan sa Iyang matinud-anon nga mga Santos. Ang Ginoo mohukom ug moganti sa matag indibidwal sumala sa kinasingkasing [nga mga tinguha] maingon man usab sa atong mga binuhatan.”¹⁸
Kon kamo wala nagpabilin nga matinud-anon sa mga pakigsaad sa templo, aduna bay paglaom? Oo! Ang ebanghelyo ni Jesukristo usa ka ebanghelyo sa paglaom. Kana nga paglaom moabot pinaagi ni Jesukristo uban sa sinsero nga paghinulsol ug masulundon nga mosunod sa mga pagtulon-an ni Kristo. Nakakita ko og mga indibidwal nga nakahimo og grabe nga kasaypanan, milapas sa sagrado nga mga pakigsaad. Sa makanunayon nga paagi, nakita nako kadtong kinsa sinsero nga naghinulsol, gipasaylo, ug mibalik ngadto sa dalan sa pakigsaad. Kon nakalapas kamo sa inyong mga pakigsaad sa templo, ako moawhag kaninyo sa pagdangop ngadto kang Jesukristo, pakigtambag sa inyong bishop, paghinulsol, ug ablihi ang inyong kalag ngadto sa gamhanan nga makaayo nga gahom nga anaa tungod sa Pag-ula ni Jesukristo.

Mga kaigsoonan, ang atong mahigugmaong Langitnong Amahan mihatag kanato og mga pakigsaad aron nga kita mahimong makagamit sa tanang gitagana Niya alang kanato. Kini nga sagrado nga mga panalangin gikan sa Dios mas lamian kaysa bisan unsang yutan-ong bunga. Kini mahimong mapreserbar alang kanato sa kahangtoran, mamahimong ang bunga nga molungtad, samtang matinud-anon kita ngadto sa atong mga pakigsaad sa templo.

Ako mopamatuod nga gipahiuli sa Dios ang awtoridad sa pagbugkos dinhi sa yuta ug didto sa langit. Kana nga awtoridad makita sa Ang Simbahan ni Jesukristo sa mga Santos sa Ulahing mga Adlaw. Gihuptan kini sa Unang Kapangulohan ug sa Korum sa Napulog Duha ka Apostoles ug gigamit ubos sa direksiyon ni Presidente Russell M. Nelson. Kadto kinsa mosulod ngadto sa bag-o ug walay kataposan nga pakigsaad sa kaminyoon ug motuman niana nga pakigsaad mamahimong hingpit ug sa kataposan makadawat sa kahingpitan sa himaya sa Amahan, dili igsapayan sa mga kahimtang nga lapas sa ilang kontrol.¹⁹

Kining gisaad nga mga panalangin nga kabahin sa atong mga pakigsaad mamahimong maselyo kanato pinaagi sa Balaan nga Espiritu sa Saad ug mamahimong ang bunga nga molungtad hangtod sa kahangtoran. Ako mopamatuod gayod niini sa ngalan ni Jesukristo, amen.