Mga Gilis ug mga Bidlisiw sa Kahayag

Ni Elder Alexander Dushku

Sa Seventy

Kita usab makabaton sa atong kaugalingong gilis sa kahayag—usa ka bidlisiw sa usa ka higayon.

Ang akong mensahe alang niadtong nabalaka mahitungod sa ilang pagpamatuod tungod kay sila wala pa nakaangkon og makatandog nga espirituhanong mga kasinatian. Ako nag-ampo nga makahatag og pipila ka kalinaw ug kaseguroan.

Ang Pagpahiuli sa ebanghelyo ni Jesukristo gisugdan sa usa ka kalit nga pag-ulbo sa kahayag ug kamatuoran! Usa ka batan-ong lalaki didto sa upstate New York, uban sa ordinaryo kaayong ngalan nga Joseph Smith, misulod sa usa ka kakahoyan aron mag-ampo. Siya nabalaka mahitungod sa iyang kalag ug sa iyang kahimtang atubangan sa Dios. Nagtinguha siya og kapasayloan sa iyang mga sala. Ug siya naglibog kabahin kon hain nga simbahan ang apilan. Siya nagkinahanglan og katin-awan ug kalinaw—siya nagkinahanglan sa kahayag ug kahibalo.¹

Samtang nagluhod si Joseph aron mag-ampo ug “pagtugyan sa mga tinguha sa [iyang] kasingkasing ngadto sa Dios,” usa ka baga nga kangitngit ang mipalibot kaniya. Adunay butang nga daotan, malupigon, ug tinuod kaayo nga misulay sa pagpugong kaniya—sa pagpugong sa iyang dila aron siya dili makasulti. Ang mga puwersa sa kangitngit nagkakusog og maayo nga si Joseph nagtuo nga mamatay siya. Apan siya “[nang]limbasog sa tibuok [niyang] mga gahom sa pagtawag sa Dios aron pagluwas [kaniya] gikan sa gahom niini nga kaaway diin mibuntog [kaniya].” Ug dayon, “niana nga higayon sa diha nga [siya] andam na sa pag-unlod ngadto sa pagkawalay paglaom ug pagtugyan sa [iyang] kaugalingon ngadto sa kalaglagan,” sa dihang siya wala na masayod kon siya makaagwanta pa, usa ka mahimayaon nga kahayag milukop sa kakahoyan, mipaiway sa kangitngit ug sa kaaway sa iyang kalag.²

Usa ka “gilis sa kahayag” mas hayag pa sa adlaw nga nag-aman og paubos diha kaniya. Usa ka personahe ang mipakita, ug dayon aduna pay lahin.³ Ang ilang “kahayag ug himaya dili mahulagway.” Ang una, ang atong Langitnong Amahan, namulong sa iyang ngalan, “nagtudlo ngadto sa lain—[Joseph!] Kini mao ang Akong Hinigugmang Anak. Paminaw Kaniya!”⁴

Ug uban nianang makabuntog nga pagbuswak sa kahayag ug kamatuoran, ang Pagpahiuli misugod. Usa ka dakong pagsanap sa balaan nga pagpadayag ug mga panalangin ang mosunod: bag-ong kasulatan, gipahiuli nga awtoridad sa pagkapari, apostoles ug mga propeta, mga ordinansa ug mga pakigsaad, ug ang subling pagtukod sa tinuod ug buhi nga Simbahan sa Ginoo, nga sa ugma damlag molukop sa yuta uban sa kahayag ug pagsaksi ni Jesukristo ug sa Iyang gipahiuli nga ebanghelyo.

Kanang tanan, ug daghan pa, nagsugod sa usa ka desperado nga pag-ampo sa batang lalaki ug usa ka haligi sa kahayag.

Kita usab adunay atong kaugalingong desperadong mga panginahanglan. Kita usab nagkinahanglan og kagawasan gikan sa espirituhanong pagkalibog ug sa kalibotanong kangitngit. Kita usab nagkinahanglan nga makahibalo sa atong kaugalingon mismo.⁵ Mao kana ang usa ka rason nga si Presidente Russell M. Nelson midapit kanato nga “Isubsob ang [atong kaugalingon] sa mahimayaong kahayag sa Pagpahiuli.”⁶

Usa sa dagkong mga kamatuoran sa Pagpahiuli mao nga bukas ang kalangitan —nga kita usab makadawat og kahayag ug kahibalo gikan sa kahitas-an. Ako mopamatuod nga kana tinuod.

Apan kita kinahanglan gayod nga magbantay sa usa ka espirituhanong laang. Usahay ang matinud-anon nga mga miyembro sa Simbahan mahimong mawad-an og kadasig ug gani mahilayo tungod kay sila wala pay makapatandog nga espirituhanong mga kasinatian—tungod kay sila wala nakasinati sa ilang kaugalingong gilis sa kahayag. Si President Spencer W. Kimball mipasidaan, “Sa kanunayng pagdahom og katingalahan, daghan ang dili makaalinggat sa kinatibuk-an nga makanunayong pagdagayday sa gipadayag nga komunikasyon.”⁷

Si Presidente Joseph F. Smith mihinumdom nga “Apan ang Ginoo mipugong sa mga katingalahang butang gikan kanako [sa dihang ako batan-on pa], ug mipakita kanako sa kamatuoran, pagtulun-an human sa usa ka pagtulun-an, sugo human sa usa ka sugo, diyotay dinhi ug diyotay didto.”⁸

Kana mao ang tipikal nga sundanan sa Ginoo, mga kaigsoonan. Imbis magpadala kanato og usa ka gilis sa kahayag, ang Ginoo mopadala kanato og usa ka bidlisiw sa kahayag, ug dayon lain pang kahayag, ug lain pa.

Kadto nga mga bidlisiw sa kahayag padayon nga gibubo ngari kanato. Ang mga kasulatan nagtudlo nga si Jesukristo mao ang “kahayag ug … kinabuhi sa kalibotan,”⁹ nga ang Iyang “Espiritu naghatag og kahayag ngadto sa matag tawo [ug kababayen-an] nga mianhi sa kalibotan,”¹⁰ ug kanang Iyang kahayag “mopuno sa walay kataposan nga kawanangan,” maghatag og “kinabuhi sa tanan nga mga butang.”¹¹ Ang Kahayag ni Kristo anaa gayod sa tanan natong palibot.

Kon kita nakadawat sa gasa sa Espiritu Santo ug nanglimbasog sa pagpakita og hugot nga pagtuo, sa paghinulsol, ug sa pagpasidungog sa atong mga pakigsaad, nan kita takos sa pagdawat niining balaan nga mga bidlisiw sa kanunay. Sa halandomon nga mga pulong ni Elder David A. Bednar, “kita ‘nagpuyo diha sa pagpadayag.’”¹²

Ug gani, ang matag usa kanato managlahi. Walay duha ka tawo nga makasinati sa kahayag ug kamatuoran sa Dios sa eksakto nga managsamang paagi. Paggahin og panahon sa paghunahuna kabahin kon giunsa ninyo sa pagsinati ang kahayag ug ang Espiritu sa Ginoo.

Mahimong nakasinati kamo niining mga pagbuswak sa kahayag ug pagpamatuod isip “kalinaw [nga gisulti] nganha sa imong hunahuna mahitungod [sa usa ka] butang” nga nakapabalaka kanimo.¹³

O usa ka impresyon—usa ka hinay hinagawhaw nga tingog—nga mopabilin “diha sa imong hunahuna ug sa imong kasingkasing”¹⁴ ug miaghat kaninyo sa pagbuhat og butang nga maayo, sama sa pagtabang sa usa ka tawo.

Tingali kamo diha sa usa ka klase sa simbahan—o atol sa usa ka youth camp—ug gibati ang kusog nga tinguha sa pagsunod ni Jesukristo ug magpabilin nga matinud-anon.¹⁵ Tingali kamo gani mibarog ug mipakigbahin og usa ka pagpamatuod nga inyong gilaoman nga tinuod ug dayon mibati nga tinuod kadto.

O tingali kamo nag-ampo ug mibati og usa ka malipayon nga kasiguroan nga ang Dios nahigugma kaninyo.¹⁶

Mahimong nakadungog na kamo og tawo nga mipamatuod ni Jesukristo ug kini nakatandog sa inyong kasingkasing ug mipuno kaninyo og paglaom.¹⁷

Tingali kamo nakabasa diha sa Basahon ni Mormon ug usa ka bersikulo nga namulong ngadto sa inyong kalag, nga daw ang Dios ang nagbutang niini diha alang gyod kaninyo—ug dayon nakaamgo kamo nga gibuhat Niya kana.¹⁸

Mahimong mibati kamo sa gugma sa Dios alang sa uban samtang kamo miserbisyo kanila.¹⁹

O tingali nanglimbasog kamo sa pagbati sa Espiritu tungod sa depresyon o tumang kabalaka apan nakabaton og gasa sa paghandom sa nangagi ug miila sa nanglabay nga “malumo nga mga kaluoy sa Ginoo.”²⁰

Ang akong punto mao nga adunay daghang paagi sa pagdawat og langitnong mga bidlisiw sa pagpamatuod. Kini mao ang pipila lang, siyempre. Kini mahimong dili talandogon, apan ang tanan niini moporma og kabahin sa atong mga pagpamatuod.

Mga kaigsoonan, ako wala nakakita og gilis sa kahayag, apan, sama ninyo ako nakasinati og daghang balaan nga mga bidlisiw. Sa milabay nga katuigan, naningkamot ko sa pagbahandi sa maong mga kasinatian. Akong makit-an kon akong buhaton, akong mailhan ug mahinumdoman gani ang daghan pa niini. Ania ang pipila ka mga ehemplo gikan sa akong kaugalingong kinabuhi. Mahimong dili kaayo kini impresibo sa uban, apan kini bililhon ngari kanako.

Akong mahinumdoman ang pagkabadlongon nga ten-edyer atol sa usa ka bunyag. Samtang ang miting hapit nang magsugod, mibati ko sa Espiritu nga nag-aghat kanako sa paglingkod ug magmatinahoron. Milingkod ko ug nagpabilin nga hilom sa tibuok miting.

Sa wala pa akong misyon, nahadlok ko nga ang akong pagpamatuod dili igo ang kalig-on. Walay usa sa akong pamilya nakaserbisyo og misyon sukad, ug wala ko makahibalo kon makahimo ba ako niini. Nahinumdom ko nga desperadong nagtuon ug nag-ampo aron makadawat og usa ka mas piho nga pagsaksi ni Jesukristo. Dayon usa ka adlaw, samtang nangamuyo ko sa Langitnong Amahan, mibati ko og usa ka gamhanan kaayo nga pagbati sa kahayag ug kainit. Ug ako nasayod. Ako nasayod lang gayod.

Nakahinumdom ko nga nakamata usa ka gabii tungod sa usa ka pagbati sa “lunsay nga kaalam” nga nagsulti kanako nga ako matawag aron moserbisyo diha sa elders korum.²¹ Paglabay sa duha ka semana, ako natawag.

Nahinumdom ko sa usa ka kinatibuk-ang komperensiya diin usa ka minahal nga sakop sa Korum sa Napulog Duha ka Apostoles namulong sa eksaktong mga pulong sa pagpamatuod nga akong nasulti sa usa ka higala nga ako nanghinaot nga madungog.

Nahinumdom ko nga nagluhod uban sa gatosan ka kaigsoonan aron mag-ampo alang sa usa ka minahal nga higala kinsa naghigda nga walay panimuot diha sa usa ka ventilator nga gamay, layo nga ospital human ang iyang kasingkasing mihunong. Samtang gihiusa namo ang among mga kasingkasing sa pagpangamuyo alang sa iyang kinabuhi, siya mimata ug miibot sa ventilator gikan sa iyang tutunlan. Siya karon nagserbisyo isip usa ka presidente sa stake.

Ug nahinumdom ko nga mimata nga adunay kusog nga espirituhanong mga pagbati human sa klaro kaayo nga damgo bahin sa usa ka minahal nga higala ug magtutudlo kinsa sayo ra kaayo namatay, nagbiya og dako kaayong kahaw-ang sa akong kinabuhi. Siya nagpahiyom ug malipayon. Ako nasayod nga maayo ra siya.

Kini ang pipila sa akong mga bidlisiw. Kamo adunay inyong kaugalingong mga kasinatian—inyong kaugalingong mga pagbuswak sa kahayag sa pagpamatuod. Sa atong pag-ila, paghinumdom, ug pagpundok niining mga bidlisiw nga “hiusahon,”²² adunay butang nga maanindot nga mosugod sa pagkahitabo. “Ang kahayag mounong ngadto sa kahayag”—“ang kamatuoran mogakos sa kamatuoran.”²³ Ang reyalidad ug gahom sa usa ka bidlisiw sa pagpamatuod mopalig-on ug mohiusa sa uban, ug dayon sa uban, ug sa uban pa. Pagtulun-an human sa usa ka pagtulun-an, sugo human sa usa ka sugo, bidlisiw dinhi ug bidlisiw didto—usa ka gamay, gibahandi nga espirituhanong gutlo sa usa ka higayon—adunay motubo diha kanato nga usa ka kinauyokan nga puno sa kahayag, mga espirituhanong kasinatian. Tingali walay usa ka bidlisiw nga igo ang kakusgon o kahayag nga magpasiugda og usa ka hingpit nga pagpamatuod, apan sa katingbanan kini mahimong usa ka kahayag nga ang kangitngit sa pagduhaduha dili makabuntog.

“O unya, dili ba kini tinuod?” Pangutana ni Alma. “Sultihan ko kamo, Oo, tungod kay kini mao ang kahayag.”²⁴

“Kana nga gikan sa Dios mao ang kahayag,” ang Ginoo nagtudlo kanato “ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtod sa hingpit nga adlaw.”²⁵

Mga kaigsoonan, sa panahon ug pinaagi sa “dakong kakugi,”²⁶ kita usab makabaton sa atong kaugalingong gilis sa kahayag—usa ka bidlisiw sa usa kahigayon. Ug sa taliwala niana nga gilis, kita usab makakaplag sa usa ka mahigugmaong Langitnong Amahan, nagtawag kanato pinaagi sa ngalan, nagtudlo kanato ngadto sa atong Manluluwas si Jesukristo, ug magdapit kanato sa “Pagpaminaw Kaniya!”

Ako mohatag sa akong pagsaksi ni Jesukristo, nga Siya mao ang kahayag ug kinabuhi sa tibuok kalibotan—ug sa inyong personal nga kalibotan ug sa akoa.

Ako mopamatuod nga Siya mao ang tinuod ug buhi nga Anak sa tinuod ug buhi nga Dios, ug nga Siya nagbarog diha sa ulohan niining tinuod ug buhi nga Simbahan, gigiyahan ug gidumala sa Iyang tinuod ug buhi nga mga propeta ug apostoles.

Hinaot atong maila ug madawat ang Iyang mahimayaon nga kahayag ug dayon mopili Kaniya batok sa kangitngit sa kalibotan—sa kanunay ug hangtod sa kahangtoran. Sa ngalan ni Jesukristo, amen.