Mga Milagro, mga Anghel, ug Gahom sa Pagkapari
Kon nagtinguha kamo sa mga panalangin sa pagkapari, lakip na sa mga milagro ug sa pagpangalagad sa mga anghel, lakaw sa dalan sa mga pakigsaad nga giandam sa Dios.
Daghan karon ang nag-ingon nga ang mga milagro wala na, nga ang mga anghel mga sugilanon lamang nga dili tinuod, ug nga ang mga langit sirado na. Mopamatuod ko nga ang mga milagro wala mahunong, ang mga anghel anaa uban kanato, ug ang kalangitan tinuod nga abli.
Dihang ang Manluluwas, si Jesukristo, dinhi pa sa yuta, Iyang gihatag ang mga yawe sa pagkapari ngadto sa Iyang sinaligan nga Apostol, si Pedro.1 Pinaagi niini nga mga yawe, si Pedro ug ang ubang Apostoles nangulo sa Simbahan sa Manluluwas. Apan sa dihang nangamatay kadto nga Apostoles, ang mga yawe sa pagkapari gikuha gikan sa yuta.
Akong ipamatuod nga ang karaan nga mga yawe sa pagkapari gipahiuli na. Si Pedro, si Santiago, ug si Juan ug ang ubang karaang mga propeta nagpakita isip nabanhaw nga mga binuhat, nagtugyan ngadto kang Propeta Joseph Smith sa unsay gipasabot sa Ginoo nga “[ang] mga yawe sa akong gingharian, ug sa kapaigoan sa ebanghelyo.”2
Kanang sama nga mga yawe gipasa gikan sa usa ka propeta ngadto sa laing propeta hangtod karon. Ang 15 ka tawo nga atong gipaluyohan isip mga propeta, mga manalagna, ug mga tigpadayag naggamit niini aron sa pagpangulo sa Simbahan sa Manluluwas. Sama sa karaang mga panahon, adunay usa ka senior nga Apostol nga naggunit ug adunay awtoridad sa paggamit sa tanang yawe sa pagkapari. Siya mao si Presidente Russell M. Nelson, propeta ug Presidente sa gipahiuli nga Simbahan ni Kristo sa atong panahon: Ang Simbahan ni Jesukristo sa mga Santos sa Ulahing mga Adlaw.
Pinaagi sa Simbahan sa Manluluwas, makadawat kita og mga panalangin sa pagkapari—lakip na sa gahom sa Dios aron motabang kanato sa atong mga kinabuhi. Ubos sa awtorisado nga mga yawe sa pagkapari, mohimo kita og sagrado nga mga pakigsaad ngadto sa Dios ug modawat og sagrado nga mga ordinansa nga moandam kanato sa pagpuyo diha sa Iyang presensiya. Magsugod sa bunyag ug kompirmasyon ug dayon sa templo, magpadayon kita sa usa ka dalan sa mga pakigsaad nga mogiya kanato balik ngadto Kaniya.
Pinaagi sa mga kamot nga gipatong sa atong mga ulo, makadawat usab kita og mga panalangin sa pagkapari, lakip na sa direksiyon, kahupay, tambag, pagkaayo, ug sa gahom sa pagsunod kang Jesukristo. Sa tibuok nakong kinabuhi napanalanginan ko niining dakong gahom. Sama sa gipadayag diha sa kasulatan, gitawag nato kini nga gahom sa balaan nga Melchizedek nga Pagkapari.3
Sa akong pagkabatan-on nakaangkon ko og dakong pagtahod niini nga gahom, ilabi na nga gipakita kini diha sa mga panalangin sa pagkapari. Samtang nagserbisyo isip batan-ong misyonaryo sa Chile, ang akong kauban ug ako gidakop ug gibulag. Wala gayod kami sultihi kon ngano. Panahon kadto sa dakong kagubot sa politiko. Liboan ka tawo ang gitagoan sa mga sundalo nga kapolisan ug wala na gayod igdungog pa.
Human sa pagsukitsukit, naglingkod ko nga nag-inusara didto sa selda sa prisohan, wala masayod kon makita pa nako og usab ang akong mga minahal sa kinabuhi. Midangop ko sa akong Langitnong Amahan, kinasingkasing nga mihangyo: “Amahan kanunay akong gitudloan nga Ikaw nagbantay sa Imong mga misyonaryo. Palihog, Amahan, dili ko espesyal, apan kanunay kong nagmasulundon ug nagkinahanglan ko sa Imong tabang karong gabhiona.”
Ang mga binhi sa Iyang tabang natanom nang daan sa daghang katuigan nga milabay. Human sa akong bunyag, gikompirmahan ko nga usa ka miyembro sa Simbahan ug gihatagan sa gasa sa Espiritu Santo. Samtang nag-ampo ko, nag-inusara, likod sa mga rehas, ang Espiritu Santo daling miduol kanako ug mihupay kanako. Iyang gipahinumdom nako ang usa ka espesyal kaayo nga saysay gikan sa akong patriyarkal nga mga panalangin, nga maoy laing panalangin sa pagkapari. Diha niana, ang Dios misaad kanako nga pinaagi sa akong pagkamatinud-anon maselyo ko diha sa templo alang sa karon ug sa kahangtoran ngadto sa usa ka babaye nga puno sa katahom ug hiyas ug gugma, nga mamahimo kaming mga ginikanan sa bililhong mga anak nga lalaki ug mga anak nga babaye, ug nga ako mapanalanginan ug mapalambo isip amahan sa Israel.
Kadtong dinasig nga mga pulong mahitungod sa akong kaugmaon mipuno og kalinaw sa akong kalag. Nasayod ko nga nagagikan kadto sa akong mahigugmaon nga Langitnong Amahan, kinsa kanunay nga motuman sa Iyang mga gisaad.4 Niadtong higayona, akong naangkon ang kasiguroan nga makagawas ko ug mabuhi aron makakita sa katumanan niadto nga mga pakigsaad.
Mga usa ka tuig human niadto, ang Langitnong Amahan mipanalangin gayod kanako og asawa nga puno sa katahom ug hiyas ug gugma. Si Lynette ug ako naselyo didto sa templo. Napanalanginan mi og tulo ka bililhong mga anak nga lalaki ug upat ka bililhong mga anak nga babaye. Nahimo ko nga usa ka amahan, tanan sumala sa mga saad sa Dios diha sa patriyarkal nga panalangin nga akong nadawat isip 17 anyos nga batang lalaki.
“Busa, akong hinigugma nga mga kaigsoonan, nahunong ba ang mga milagro tungod sa pagkayab ni Kristo ngadto sa langit? …
“… Wala; ni ang mga anghel mihunong sa pagpangalagad ngadto sa mga katawhan.”5
Akong ipamatuod nga ang mga milagro ug mga pagpangalagad padayon nga nanghitabo sa atong mga kinabuhi, sa kasagaran isip direkta nga resulta sa gahom sa pagkapari. Ang ubang mga panalangin sa pagkapari matuman dayon, sa mga paagi nga atong makita ug masabot. Ang uban hinay-hinay nga mahitabo ug dili hingpit nga matuman niini nga kinabuhi. Apan ang Dios motuman sa tanan Niya nga mga saad, sa kanunay, sama sa gipakita niini nga asoy gikan sa among kasaysayan sa pamilya:
Ang akong lolo sa habig sa amahan, si Grant Reese Bowen, usa ka tawo nga adunay dakong pagtuo. Tataw pa nakong nahinumdoman nga nakadungog kaniya nga nagsaysay kon giunsa niya sa pagkadawat sa iyang kaugalingong patriyarkal nga panalangin. Sa iyang journal, iyang gisulat: “Ang patriyarka misaad kanako sa gasa sa pag-ayo. Siya miingon, ‘Ang masakiton mamaayo. Oo, ang patay mabuhi ubos sa imong mga kamot.’”
Mga tuig ang milabay, si Lolo naghapnig og dagami sa dihang gibati niya ang pag-aghat nga mopauli sa balay. Gisugat siya sa iyang amahan nga nagpadulong kaniya. “Grant, ang imong mama bag-ohay lang namatay,” miingon ang iyang amahan.
Akong kutloon pag-usab gikan sa jounal ni Lolo: “Wala ko mohunong apan nagdali sa pag-adto sa balay ug ngadto sa atubangan nga kayda diin siya naghigda sa katre. Ako siyang gitan-aw ug nakita nga walay timailhan sa kinabuhi nga nahabilin kaniya. Nakahinumdom ko sa akong patriyarkal nga panalangin ug sa saad nga kon magmatinud-anon ko, pinaagi sa akong pagtuo ang masakiton maayo, ug ang patay mabuhi. Akong gipatong ang akong mga kamot sa iyang ulo, ug akong gisultihan ang Ginoo nga kon ang saad nga Iyang gihatag kanako pinaagi sa patriyarkal nga panalangin tinuod, ipakita niining higayona ug mabuhi og balik ang akong inahan. Misaad ko Kaniya nga kon Iya kining buhaton, dili gayod ako magduhaduha sa pagbuhat sa tanan kutob sa akong mahimo alang sa pagtukod sa Iyang gingharian. Samtang nag-ampo ko, gibuka niya ang iyang mga mata ug miingon, ‘Grant, bangona ko. Didto na ko gikan sa kalibotan sa mga espiritu, apan imo kong gipabalik. Tugoti kini nga sa kanunay mahimong usa ka pagpamatuod nganha kanimo ug ngadto sa tanang sakop sa akong pamilya.’”
Si Presidente Russell M. Nelson nagtudlo kanato sa pagpangita ug paghulat og mga milagro.6 Ako mopamatuod nga tungod kay napahiuli ang pagkapari, ang gahom ug awtoridad sa Dios anaa sa kalibotan. Pinaagi sa mga calling ug mga konseho, ang mga lalaki ug mga babaye, batan-on ug tigulang, makaapil sa buhat sa pagkapari. Buhat kini sa mga milagro, nga tambongan sa mga anghel. Buhat kini sa langit, ug kini mopanalangin sa tanang anak sa Dios.
Niadtong 1989, ang among pamilya nga adunay pito ka sakop mipauli gikan sa ward outing. Gabii na kadto. Si Lynette manganakay sa among ikaunom nga anak. Mibati siya og kusog nga pag-aghat nga itaod ang seat belt, nga nakalimtan niya sa pagtaod. Sa wala madugay human niana miliko mi sa eskina; may sakyanan nga milapas sa linya padulong sa among lane. Nagdagan sa gikusgon nga 112 km kada oras, miliko ko aron dili mabangga sa kasugat nga sakyanan. Naligid ang among van, nabagnos sa highway ug midailos paggawas sa dalan ug sa kataposan mihunong, nahigda nga ang kilid dapit sa pasahero maoy naplastar sa yuta.
Ang sunod nako nga nahinumdoman mao ang tingog ni Lynette: “Shayne, kinahanglan ta nga mogawas diha sa imong pultahan.” Nagbitay ko nga nakahigot sa akong seat belt. Mikabat og pipila ka segundo aron mabalik sa saktong pangisip. Gisugdan namo ang pag-alsa sa matag bata pagawas sa van agi sa bintana, nga karon mao na ang kesame sa van. Naghilak sila, nahibulong kon unsay nahitabo.
Nabantayan dayon namo nga ang among 10 anyos nga anak nga babaye, si Emily, nawala. Among gisinggit ang iyang ngalan, apan walay tubag. Ang mga sakop sa ward, kinsa nagbiyahe usab aron mopauli, didto sa nahitaboan nalisang sa pagpangita niya. Ngitngit kaayo kadto. Akong gilili pag-usab sa van gamit ang flaslight ug, sa akong kalisang, nakita ang gamayng lawas ni Emily nga natanggong sa ilawom sa van. Desperado ko nga nangayo og tabang, “Kinahanglan atong alsahon ang van gikan ni Emily.” Akong gigunitan ang atop ug gibira. Dunay gamay ra nga nag-alsa, apan ang van milagrosong mibarog og balik, mipabantang sa walay kinabuhi nga lawas ni Emily.
Wala na magginhawa si Emily. Ang kolor sa iyang nawong lagom na kaayo. Miingon ko, “Kinahanglang hatagan nato siya og panalangin.” Usa ka minahal nga higala ug miyembro sa ward miluhod sa akong tapad, ug pinaagi sa awtoridad sa Melchizedek nga Pagkapari, sa ngalan ni Jesukristo, amo siyang gimandoan nga mabuhi. Niana nga gutlo, si Emily miginhawa og taas nga karat nga ginhawa.
Human sa daw pipila ka oras, miabot ra gayod ang ambulansiya. Gidali dayon si Emily sa ospital. Nalusno ang iyang baga ug adunay nadaot nga lutahan sa iyang tuhod. Gikabalak-an nga adunay pagkadaot sa utok tungod sa kadugay nga wala siyay oxygen. Walay panimuot si Emily sulod sa usag tunga ka adlaw. Nagpadayon kami sa pag-ampo ug sa pagpuasa alang kaniya. Napanalanginan siya og hingpit nga pagkaayo. Karon, si Emily ug ang iyang bana, si Kevin, mga ginikanan na sa unom ka anak nga babaye.
Sa milagrosong paagi, ang uban nakalingkawas ra. Ang batang gimabdos ni Lynette mao si Tyson. Siya usab naluwas sa peligro ug natawo sa pagka-Pebrero. Walo ka bulan human niadto, human makadawat sa iyang yutan-on nga lawas, si Tyson mipauli ngadto sa Langitnong Amahan. Siya ang among anak nga anghel nga magbalantay. Nabati namo ang iyang impluwensya sa among pamilya ug nagpaabot nga mahiusa uban kaniya pag-usab.7
Kadtong mialsa sa van gikan kang Emily nakabantay nga ang van morag walay gibug-aton. Nasayod ko nga ang langitnong mga anghel mitabang sa yutan-ong mga anghel aron alsahon ang sakyanan gikan sa lawas ni Emily. Nasayod usab ako nga si Emily nabuhi pag-usab pinaagi sa gahom sa balaang pagkapari.
Ang Ginoo mipadayag niini nga kamatuoran ngadto sa Iyang mga sulugoon: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo.”8
Akong ipamatuod nga “ang Balaan nga Pagkapari subay sa Kapunongan sa Anak sa Dios”9—ang Melchizedek nga Pagkapari—uban sa mga yawe, awtoridad, ug gahom niini napahiuli sa yuta niining, ulahing mga adlaw. Nasayod ko nga samtang dili ang tanang sirkumstansiya moresulta sama sa atong gilaoman ug giampo, ang mga milagro sa Dios kanunay nga moabot sumala sa Iyang kabubut-on, sa Iyang tukmang panahon, ug sa Iyang plano alang kanato.
Kon kamo magtinguha sa mga panalangin sa pagkapari, lakip na sa mga milagro ug sa pagpangalagad sa mga anghel, dapiton ko kamo sa paglakaw subay sa dalan sa mga pakigsaad nga gihimo sa Dios nga maangkon sa matag usa kanato. Ang mga sakop ug mga lider sa Simbahan nga nahigugma kaninyo motabang kaninyo sa sunod nga lakang.
Ako mopamatuod nga si Jesukristo, ang Anak sa Dios, buhi ug nangulo sa Iyang Simbahan pinaagi sa buhing mga propeta kinsa naghupot ug naggamit sa mga yawe sa pagkapari. Ang Espiritu Santo tinuod nga anaa. Ang Manunubos mihatag sa Iyang kinabuhi aron sa pag-ayo kanato, sa pag-angkon og balik kanato, ug sa pagdala kanato og balik pauli.
Mopamatuod ko nga ang mga milagro wala mahunong, ang mga anghel anaa uban kanato, ug ang mga kalangitan abli. Ug, o, abli kaayo kini! Sa ngalan ni Jesukristo, amen.