Ang mga Pulong Mahinungdanon
Ang mga pulong mopahiluna sa kinaiya. Mopagawas kini sa atong mga hunahuna, mga pagbati, ug mga kasinatian alang sa maayo o sa dili maayo.
Mga igsoong lalaki, mga babaye, ug mga higala sa tibuok kalibotan, akong dungog nga makapamulong niining daghan kaayo nga tigpaminaw, kadaghanan mga miyembro sa Simbahan ug kadaghanan mga higala ug bag-ong mga tigpaminaw niining sibya sa komperensiya. Welcome!
Ang mga mensahe nga gipakigbahin gikan niini nga pulpito gilitok pinaagi sa mga pulong. Gihatag kini gamit ang Iningles ug gihubad ngadto sa hapit 100 ka lain-laing pinulongan. Sa kanunay ang basehan parehas ra. Mga pulong. Ug ang mga pulong mahinungdanon kaayo. Sublion nako sa pagsulti kana. Ang mga pulong mahinungdanon!
Mao kini ang pundasyon unsaon nga makonektar kita; nagrepresentar kini sa atong mga gituohan, mga moral, ug mga panglantaw. Usahay kita ang mosulti, ug sa ubang higayon kita ang maminaw. Ang mga pulong mopahiluna sa kinaiya. Mopagawas kini sa atong mga hunahuna, mga pagbati, ug mga kasinatian alang sa maayo o sa dili maayo.
Subo lang, ang mga pulong pwedeng mahimo sa walay pag-amping, sa kinalit, ug makasakit. Kon malitok na, dili na nato kini mabawi. Makasamad kini, mosilot, mobugto, ug gani mosangpot sa makadaot nga mga lihok. Makapaguol kini kanato.
Sa laing bahin, ang mga pulong makahatag og kadaogan, kamalaomon ug kamadasigon. Makaaghat kini aron kita makahunahuna og balik, makasugod og balik, ug makatultol og balik sa atong dalan. Ang mga pulong makaabli sa atong mga panghunahuna sa kamatuoran.
Mao nga, una ug labaw sa tanan, ang mga pulong sa Ginoo mahinungdanon.
Sa Basahon ni Mormon, si propeta Alma ug ang iyang katawhan sa karaang Amerika nakasugat og walay kataposang gubat niadtong mibaliwala sa pulong sa Dios, mipatig-a sa ilang mga kasingkasing, ug miguba sa ilang kultura. Ang mga matinud-anon pwede ra gayod nga makigharong, apan si Alma mitambag, “Ug karon, kay ang pagsangyaw sa pulong adunay dako nga kalagmitan sa pagdala sa katawhan sa pagbuhat niana nga diin makiangayon—oo, kini adunay labaw nga gamhanan nga sangpotanan diha sa mga hunahuna sa katawhan kay sa espada, o sa bisan unsa pa, diin nahitabo ngadto kanila—busa si Alma naghunahuna nga kini angay nga sila kinahanglang mosulay sa hiyas sa pulong sa Dios.”1
Ang “pulong sa Dios” mopatigbabaw sa tanang uban pa nga mga pulong. Ingon na niini sukad pa sa Paglalang sa yuta sa dihang ang Ginoo namulong: “Motungha ang kahayag: ug mitungha ang kahayag.”2
Gikan sa Manluluwas miabot kining mga pasalig sa Daang Tugon: “Ang langit ug ang yuta mangahanaw, apan dili gayod mapakyas ang akong [mga pulong].”3
Ug kini: “Ang nahigugma kanako, magtuman sa akong [mga pulong]: higugmaon siya sa akong Amahan, ug ang akong Amahan ug ako moanha, ug magpuyo diha kaniya.”4
Ug gikan kang Maria, nga inahan ni Jesus miabot kining mapaubsanong pagpamatuod, “Sulugoon ako sa Ginoo; mahitabo unta kanako ang imong [pulong].”5
Ang pagtuo ug pagpatalinghog sa pulong sa Dios mopaduol kanato ngadto Kaniya. Si Presidente Russell M. Nelson misaad, “Kon kamo magtuon sa Iyang mga pulong, ang inyong abilidad nga mas mahisama Kaniya modako.”6
Dili ba kitang tanan gusto nga mahimo, sama sa giingon sa himno nga, “Dugang kabalaan—Sama, Kanimo”?7
Akong gilarawan ang batan-ong si Joseph Smith nga nagluhod, naminaw sa mga pulong sa Iyang Amahan sa Langit: “[Joseph,] Kini mao ang Akong Hinigugmang Anak. Paminaw Kaniya!”8
Kita “makapaminaw Kaniya” pinaagi sa mga pulong sa kasulatan, apan gigamit ba nato kining mga pulong sa kasulatan, o nakamatikod ba kita nga Siya namulong kanato? Mausab ba kita?
Kita “makapaminaw Kaniya” pinaagi sa personal nga pagpadayag ug mga pag-aghat gikan sa Espiritu Santo, sa mga tubag sa pag-ampo, ug sa mga panahon nga si Jesukristo lamang, pinaagi sa gahom sa Iyang Pag-ula, ang makapas-an sa atong mga palas-anon, mohatag kanato og kapasayloan ug kalinaw, ug mogakos kanato “sa mga bukton sa iyang gugma.”9
Ikaduha, ang mga pulong sa mga propeta mahinungdanon.
Ang mga propeta nagpamatuod sa kabalaan ni Jesukristo. Nagtudlo sila sa Iyang ebanghelyo ug nagpakita sa Iyang gugma alang sa tanan.10 Mosaksi ako nga ang atong buhi nga Propeta, si Presidente Russell M. Nelson, makadungog ug mamulong sa pulong sa Ginoo.
Si Presidente Nelson hanas sa paggamit og mga pulong. Miingon siya, “Padayon sa dalan sa pakigsaad,”11 “Pundoka ang Israel,”12 “Ipatigbabaw ang Dios labaw sa tanan,”13 “Paghimo og taytayan alang sa pagsinabtanay,”14 “Magpasalamat,”15 “Mopalambo sa inyong pagtuo kang Jesukristo,”16 “Moangkon sa responsibilidad sa inyong pagpamatuod,”17 ug “[Mamahimong] tigpasiugda og kalinaw.”18
Labing bag-o, gihangyo niya kita sa “Paghunahuna og celestial.” “Kon kamo mag-atubang og problema,” miingon siya “paghunahuna og celestial! Kon gisulayan pinaagi sa tentasyon, paghunahuna og celestial! Kon ang kinabuhi o mga minahal mopahugno kaninyo, paghunahuna og celestial! Kon adunay namatay nga dili pa panahon, paghunahuna og celestial. …Kon ang mga pagpamugos sa kinabuhi nag-abot diha kaninyo, paghunahuna og celestial! … Samtang kamo maghunahuna og celestial, ang inyong kasingkasing hinayhinay nga mausab, … inyong tan-awon ang mga pagsulay ug oposisyon pinaagi sa bag-o nga kahayag, … [ug] ang inyong pagtuo molambo.”19
Kon maghunahuna kita og celestial, atong makita “ang mga butang kon unsa gayod ang ilang tinuod nga kinaiyahan.”20 Niini nga kalibotan nga nagpas-an og kalibog ug panagbingkil, kitang tanan nagkinahanglan niana nga panglantaw.
Si Elder George Albert Smith, sa wala pa siya mahimong Presidente sa Simbahan, namulong mahitungod sa pagpaluyo sa propeta ug pagpatalinghog sa iyang mga pulong. Miingon siya: “Ang obligasyon nga atong gihimo dihang mipataas kita sa atong mga kamot … maoy labing sagrado nga butang. … Kini nagpasabot … nga mosuporta kita kaniya; kita mag-ampo alang kaniya; … ug kita maningkamot sa pagtuman sa iyang mga panudlo ingon nga ang Ginoo momando.”21 Sa laing pagkasulti, magmakugihon kita sa pagbuhat sa mga ipamulong sa propeta.
Isip usa sa 15 ka mga propeta, mga manalagna, ug mga tigpadayag nga gipaluyohan kagahapon sa atong tibuok kalibotan nga Simbahan, gusto kong mopakigbahin kaninyo og usa sa akong mga kasinatian sa pagpaluyo sa propeta ug paghangop sa iyang mga pulong. Kadto para nako sama kaayo ni propeta Jacob, kinsa miasoy nga, “nakadungog ako sa tingog sa Ginoo nga namulong kanako sa mao gayod nga pulong.”22
Sa milabayng Oktubre ang akong asawa, si Melanie, ug ako didto sa Bangkok, Thailand, samtang nangandam ko sa pagpahinungod sa umaabot nga ika-185 nga templo sa Simbahan.23 Para nako, ang buluhaton labihan ka lahi ug katahom. Una kini nga templo sa Habagatang Kasadpan sa peninsula sa Asya.24 Usa kadto ka binatid kaayo nga pagkadesinyo—nga unom ka andana, may siyam ka tore nga estraktura, “haom kaayong pagkatukod”25 nga mahimong balay sa Ginoo. Sulod sa mga bulan akong gipamalandongan ang pagpahinungod. Unsay naamgohan sa akong kalag ug hunahuna mao nga ang maong nasod ug ang templo gisapnay sa mga kamot sa mga propeta ug apostoles. Si Presidente Thomas S. Monson ang mipahibalo bahin sa templo26 ug si Presidente Nelson sa pagpahinungod.27
Giandam nako daan ang pag-ampo sa pagpahinungod mga bulan sa wala pa ang pagpahinungod. Kadto nga sagradong mga pulong gihubad ngadto sa 12 ka pinulongan. Andam na kami. O mao usab ako sa akong hunahuna.
Sa gabii sa wala pa ang pagpahinungod, nahigmata ko gikan sa akong pagkatulog tungod sa dili segurado, dihadiha nga pagbati mahitungod sa pagpahinungod nga pag-ampo. Gisulayan nako sa pagbaliwala ang pag-aghat, naghunahuna nga ang pag-ampo hapsay ra. Apan wala mobiya kanako ang Espiritu. Mibati ko nga dunay kulang nga piho nga mga pulong, ug pinaagi sa balaan nga plano miabot kini kanako pinaagi sa pagpadayag, ug gisukip ko kini nga mga pulong sa pag-ampo dapit sa kataposan: “Unta maghunahuna kita og celestial, magtugot nga ang Imong Espiritu mopatigbabaw sa among kinabuhi, ug maningkamot nga mahimong mga tigpasiugda og kalinaw sa kanunay.”28 Ang Ginoo nagpahinumdom kanako sa pagpatalinghog sa mga pulong sa atong buhi nga propeta: “Paghunahuna og celestial,” “itugot nga ang Espiritu mopatigbabaw,” “paningkamot nga mahimong mga tigpasiugda og kalinaw.” Ang mga pulong sa propeta mahinungdanon sa Ginoo ug kanato.
Ikatulo, ug labihan ka importante, mao ang kaugalingon natong mga pulong. Tuohi ko, sa atong kalibotan nga puro naggamit og emoji29, ang atong mga pulong mahinungdanon.
Ang atong mga pulong pwede nga pulong sa pagsuporta o kasuko, makalipay o dili maayo, manggiluy-on o dili matagad. Sa panahon sa kahasol, ang mga pulong dunay dako nga epekto sa kalag—ug kini magpabilin. Ang atong mga pulong diha sa internet, pag-text, social media, o mga pag-tweet pwedeng nalahi sa pagsabot kay sa atong gitinguha. Mao nga pagmatngon unsay inyong isulti ug unsaon ninyo kini sa pagsulti. Sa atong mga pamilya, ilabi na sa mga bana, mga asawa, ug mga anak, ang atong mga pulong makahiusa kanato o makabulag-bulag kanato.
Mosugyot ko og tulo ka yanong hugpong sa mga pulong nga pwede natong magamit sa pagtangtang sa kahapdos sa mga kalisdanan ug mga panaglahi, mobayaw, ug mopaneguro sa usag usa:
“Salamat.”
“Pasayloa ko.”
Ug “gihigugma ko ikaw.”
Ayaw ireserba kining mapaubsanong mga pulong alang sa espesyal nga hitabo o kalisdanan. Gamita kini sa kanunay ug sa sinserong paagi, kay magpakita kini og pagtahod sa uban. Ang mga pulong sa mga tawo nagkaanam og kawalay hinungdan; ayaw sunda kini nga paagi.
Pwede ra kitang moingon og “salamat” kon naa sa elevator, sa parkinganan, sa merkado, sa opisina, sa naglinyang mga tawo, o sa atong mga silingan o mga higala. Pwede ra kitang moingon og “pasayloa ko” kon masayop kita, dili makatambong og miting, makalimot og birthday, o makakita og tawo nga anaa sa kasakit. Mahimo rang moingon kita og “gihigugma ko ikaw,” ug kana nga mga pulong magdala sa mensahe nga “naghunahuna ko nimo,” “nagpangga ko nimo,” “ania ako para kanimo,” o “ikaw importante kaayo kanako.”
Tugoti ko nga mopakigbahin og personal nga ehemplo. Mga bana, paminaw. Mga sister, makatabang usab kini kaninyo. Sa wala pa ang akong full-time nga buluhaton sa Simbahan, mobiyahe ko og lagyo alang sa akong kompaniya. Mibiyahe ko og igo-igong panahon ngadto layong mga dapit sa kalibotan. Sa kataposan sa akong adlaw, bisan asa ako, kanunay kong manawag sa balay. Kon ang akong asawa, si Melanie, mopunit na sa telepono ug ako mo-report, ang among pagsultihanay kanunay nga mosangpot sa pag-ingon og “gihigugma ko ikaw.” Matag adlaw, kadto nga mga pulong nahimo nga angkla sa akong kinabuhi ug sa akong kinaiya; mga panalipod kadto kanako gikan sa daotang mga plano. Ang “Melanie, gihigugma ko ikaw” namulong sa among bililhon nga pagsinaligay sa usag usa.
Si Presidente Thomas S. Monson kanunayng moingon, “Adunay mga tiil nga patindogon, mga kamot nga gunitan, mga hunahuna nga awhagon, mga kasingkasing nga dasigon, ug mga kalag nga luwason.”30 Ang pag-ingon og “salamat,” “pasayloa ko,” “gihigugma ko ikaw” maoy makahimo niana.
Mga kaigsoonan, ang mga pulong mahinungdanon.
Mosaad ko nga kon kita “magbusog sa mga pulong ni Kristo”31 nga modala ngadto sa kaluwasan, ang mga pulong sa atong propeta nga naggiya ug nag-awhag kanato, ug ang kaugalingon natong mga pulong nga namulong kon si kinsa kita ug unsay gihuptan nato nga mahinungdanon kaayo kanato, ang mga gahom sa langit modagayday ngari kanato. “Ang mga pulong ni Kristo motug-an kaninyo sa tanang butang sa unsay inyong angay nga buhaton.”32 Mga anak kita sa Langitnong Amahan ug Siya ang atong Dios, ug naglaom Siya nga kita makapamulong pinaagi “sa pinulongan sa mga anghel”33 pinaagi sa gahom sa Espiritu Santo.34
Akong gimahal ang Ginoo nga si Jesukristo. Siya, sa mga pulong ni Isaias sa Daang Tugon mao ang, “Kahibulongan, Magtatambag, Dios nga Makagagahom, Amahan nga walay Kataposan, Prinsipe sa Pakigdait.”35 Ug sama sa giklaro ni Apostol Juan, si Jesukristo Mismo mao ang “Pulong.”36
Niini ako mopamatuod isip Apostol nga gitawag ngadto sa balaanong pagserbisyo sa Ginoo—sa pagsangyaw sa Iyang pulong—ug gitawag nga mobarog isip espesyal nga saksi Kaniya. Sa ngalan ni Ginoong Jesukristo, amen.