Gi-orden nang Daan nga Moserbisyo
Ang atong Langitnong Amahan nagtinguha sa pagpadayag kaninyo sa inyong personal nga pagka-orden nang daan, ug Siya mohimo niini samtang kamo magtinguha nga makakat-on ug mosunod sa Iyang kabubut-on.
Karong gabhiona, mamulong ko sa kabatan-onan sa Simbahan, ang bag-ong henerasyon sa mga batan-ong lalaki ug sa mga batan-ong babaye nga mao ang mga naghupot sa sumbanan alang sa sunod nga henerasyon.
Niadtong Oktubre 2013, ang atong minahal nga propeta, si Presidente Russell M. Nelson namahayag: “Nakaila ang inyong Langitnong Amahan kaninyo sa dugay nang panahon. Kamo, isip Iyang mga anak, gipili Niya nga moanhi sa kalibotan niining sakto nga panahon, nga mahimong lider sa Iyang importante nga buhat sa kalibotan.”1
Duha ka tuig ang milabay, si Presidente Nelson mipadayon:
“Karong adlawa ako kusganong mopanghimatuod og balik nga ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo sa misyon. Alang sa batan-ong kalalakin-an nga mga Santos sa Ulahing mga Adlaw, ang misyonaryo nga pagserbisyo usa ka responsibilidad sa pagkapari. Kamong mga batan-ong lalaki gitagana alang niini nga panahon diin ang gisaad nga pagpundok sa Israel mahitabo. …
“Alang kaninyo batan-on ug makahimo nga mga sister, ang usa ka misyon gamhanan usab, apan opsiyonal, nga oportunidad. … Pag-ampo aron masayod kon ang Ginoo buot ba nga moserbisyo kamo og misyon, ug ang Espiritu Santo motubag sa inyong kasingkasing ug hunahuna.”2
Ang mga gipasabot sa atong propeta nga ang Ginoo mitagana sa kabatan-onan sa atong panahon karon sa pagpundok sa Israel ug sa iyang pagdapit nga mag-ampo aron masayod kon unsa ang ipabuhat sa Ginoo kaninyo mao, sa kabahin, nagpasabot sa kinabuhi nga inyong gipuy-an ug sa mga panalangin nga inyong nadawat gikan sa Dios sa wala pa kamo matawo dinhi sa yuta.3 Kitang tanan nga natawo dinhi sa yuta nagpuyo una kauban sa atong Langitnong Amahan isip Iyang mga anak nga espiritu.4 Ang Ginoo namahayag ngadto ni Moises, “Ako, ang Ginoong Dios, milalang sa tanan nga mga butang … sa espirituhanon nga paagi, sa wala pa sila mahimo nga kinaiyanhon diha sa ibabaw sa yuta.”5
Sa dihang Siya milalang ninyo sa espirituhanong paagi, Siya nahigugma ninyo isip Iyang mga anak nga lalaki ug mga anak nga babaye ug gihimo kabahin sa matag usa ninyo ang diosnong kinaiya ug mahangtorong padulngan.6
Atol sa inyong kinabuhi sa wala pa dinhi sa yuta, inyong “napalambo ang [inyong] pagka-[kamo] ug mipadako sa [inyong] espirituhanong mga kapabilidad.”7 Kamo gipanalanginan og gasa sa kabubut-on, ang abilidad sa paghimo og mga pagpili alang sa inyong kaugalingon, ug mihimo kamo og importante nga mga desisyon, sama sa desisyon nga mosunod sa plano sa Langitnong Amahan alang sa kalipay, nga “makaangkon og pisikal nga lawas ug makaangkon og yutan-on nga kasinatian sa paglambo … ug sa kataposan makakab-ot sa [inyong] walay kataposan nga kapalaran ingon mga manununod sa kinabuhing dayon.”8 Kini nga desisyon nakaapekto sa inyong kinabuhi kaniadto, sa inyong kinabuhi sa wala pa dinhi sa yuta, ug padayon kini nga nakaapekto sa inyong kinabuhi karon.9 Isip anak sa Dios nga nagpuyo sa inyong kinabuhi sa wala pa dinhi sa yuta, kamo “mitubo sa salabotan ug nakakat-on sa paghigugma sa kamatuoran.”10
Sa wala pa kamo matawo, ang Dios mitudlo sa matag usa ninyo sa pagtuman sa piho nga mga misyon atol sa inyong mortal nga kinabuhi dinhi sa yuta.11 Kon kamo magpabiling takos, ang mga panalangin nianang kamandoan sa wala pa dinhi sa yuta makapahimo nga kamo makabaton sa tanang matang sa mga oportunidad niini nga kinabuhi, lakip na ang mga oportunidad sa pagserbisyo sa Simbahan ug sa pag-apil sa labing importante nga buhat nga nahitabo sa yuta karon: ang pagpundok sa Israel.12 Kadtong mga saad ug mga panalangin sa wala pa dinhi sa yuta gitawag nga inyong pagka-orden nang daan. “Ang doktrina sa pagka-orden nang daan gihatag sa tanang miyembro sa Simbahan.”13 Ang pagka-orden nang daan wala maggarantiya nga kamo makadawat og pihong mga tawag [calling] o mga responsibilidad. Kini nga mga panalangin ug mga oportunidad moabot dinhi niini nga kinabuhi isip resulta sa inyong matarong nga paggamit sa kabubut-on, ingon nga ang inyong pagka-orden nang daan didto sa kinabuhi sa wala pa dinhi sa yuta miabot isip resulta sa pagkamatarong.14 Samtang inyong pamatud-an ang inyong kaugalingon nga takos ug molambo subay sa dalan sa pakigsaad, makadawat kamo og mga oportunidad sa pagserbisyo diha sa inyong klase sa Young Women o sa korum sa pagkapari. Kamo mapanalanginan nga makaserbisyo sa templo, nga mahimong tigpangalagad nga igsoong lalaki o igsoong babaye, ug makaserbisyo og misyon isip disipulo ni Jesukristo.
Nganong importante man ang pagtinguha nga masayod ug makasabot sa inyong pagka-orden nang daan? Sa panahon karon nga daghan kaayo og mga pangutana, nga daghan kaayo ang nagtinguha nga masayod sa ilang tinuod nga pagkatawo, ang kamatuoran nga ang Dios nasayod ug mipanalangin sa matag usa kanato sa tagsa-tagsa sa wala pa kita matawo dinhi sa yuta og “mahinungdanon nga [mga] kinaiya sa … wala pa dinhi sa yuta, sa pagkamortal, ug sa walay kataposan nga pag-ila ug katuyoan” nakahatag og kalinaw ug kaseguroan sa atong hunahuna ug kasingkasing.15 Ang pagkasayod kon kinsa kamo magsugod sa pagsabot sa gi-orden nang daan nga mga panalangin sa Dios nga gitugyan kaninyo sa wala pa kamo matawo dinhi sa yuta. Ang atong Langitnong Amahan nagtinguha sa pagpadayag kaninyo sa inyong personal nga pagka-orden nang daan, ug Siya mohimo niini samtang kamo magtinguha nga makakat-on ug mosunod sa Iyang kabubut-on.16
Ganahan kong mobasa sa mga post ni Presidente Nelson sa Instagram. Usa sa akong mga paborito mao kadtong sa Hulyo 20, 2022. Misulat siya:
“Nagtuo ako nga kon ang Ginoo direktang mamulong kaninyo, ang unang butang nga Iyang segurohon nga inyong masabtan mao ang inyong tinuod nga pagkatawo. Minahal kong mga higala, kamo literal nga espiritu nga mga anak sa Dios. …
“… Ayaw og kasayop niini: Balaanon ang inyong potensiyal. Uban sa inyong makugihon nga pagtinguha, ang Dios mohatag kaninyo og mga daklit nga panglantaw kon kinsa kamo sa umaabot.”17
Tugoti ko nga mopakigbahin ninyo kon giunsa sa akong yutan-ong amahan sa pagtudlo nako aron madiskobrihan ang akong pagkatawo ug ang plano sa Dios sa akong kinabuhi?
Usa ka buntag sa Sabado sa dihang 13 anyos pa ko, nag-mower ko sa mga sagbot isip kabahin sa akong sinemana nga buluhaton. Pagkahuman nako, nadungog nako ang pultahan nga gisira sa luyo sa among balay ug nakita ang akong amahan nga nanawag nako nga mouban niya. Milakaw ko ngadto sa luyo nga balkon, ug gidapit ko niya nga molingkod uban niya sa may hagdanan. Matahom kadto nga kabuntagon. Nakahinumdom pa ko niya nga naglingkod duol kaayo nako nga nag-abot ang among mga abaga. Misugod siya pinaagi sa pagsulti ngari nako nga gihigugma ko niya. Gipangutana ko niya kon unsa ang akong mga tumong sa kinabuhi. Naghunahuna ko, “Aw, sayon ra kana.” Segurado gyod nga nahibalo ko og duha ka butang: gusto ko nga mas motaas, ug ganahan ko nga mas kanunay nga magkamping. Yano ra ko nga tawo. Mipahiyom siya, mihunong og kadali, ug miingon: “Steve, ganahan ko nga mopakigbahin og usa ka butang nimo nga importante kaayo nako. Nag-ampo ko nga ang atong Langitnong Amahan mosilsil gayod sa unsay akong isulti karon diha sa imong hunahuna ug sa imong kalag aron dili gayod nimo malimtan.”
Naminaw ko og maayo sa akong amahan nianang higayona. Milingi siya ug mitan-aw sa akong mga mata ug miingon, “Anak, panalipdi ang pribado nga mga panahon sa imong kinabuhi.” Adunay taas nga kahilom samtang gitugotan niya nga ang kahulogan motuhop og maayo sa akong kasingkasing.
Unya mipadayon siya: “Kahibalo ka, kadto nga mga panahon nga nag-inusara ka ug walay laing tawo nga nasayod sa unsay imong gibuhat? Kadto nga mga panahon nga naghunahuna ka, ‘Bisan unsay akong buhaton karon walay laing tawo nga maapektohan, ako lang’?”
Dayon miingon siya, “Labaw pa sa bisan unsang panahon sa imong kinabuhi, kon unsay imong gibuhat atol sa pribado nga mga panahon sa imong kinabuhi adunay dako kaayo nga epekto kon unsaon nimo sa pagsugakod sa mga hagit ug kasakit nga imong atubangon; ug kon unsay imong gibuhat atol sa pribado nga mga panahon sa imong kinabuhi adunay mas dakong epekto usab kon unsaon nimo pagsagubang ang mga kalamposan ug kalipay nga imong masinati kaysa bisan unsang panahon sa imong kinabuhi.”
Nadawat sa akong amahan ang gipangandoy sa iyang kasingkasing. Ang tono ug ritmo sa iyang tingog, ug ang gugma nga akong gibati diha sa iyang mga pulong, nasilsil gayod sa akong hunahuna ug sa akong kalag nianang adlawa.
Akong nakat-onan paglabay sa panahon nga ang labing mahinungdanong milagro nianang adlawa diha sa hagdanan sa akong panimalay sa batan-on pa ko mao nga, sa pribado nga mga panahon sa akong kinabuhi, makaduol ko sa Dios pinaagi sa pag-ampo aron makadawat og pagpadayag. Ang akong amahan mitudlo nako kon unsaon nako sa pagkahibalo sa gi-orden nang daan nga mga panalangin sa Dios. Niadtong pribado nga mga panahon, akong nahibaloan nga ang Basahon ni Mormon pulong sa Dios. Akong nahibaloan nga ang Dios mi-orden nang daan nako nga moserbisyo og misyon. Akong nahibaloan nga ang Dios nakaila nako ug maminaw ug motubag sa akong mga pag-ampo. Akong nahibaloan nga si Jesus mao ang Kristo, ang atong Manluluwas ug Manunubos.
Bisan og nakahimo ko og daghang sayop sukad nianang halandomon nga adlaw kauban sa akong amahan, ang pagpaningkamot nga mapanalipdan ang pribado nga mga panahon sa akong kinabuhi nagpabiling usa ka angkla taliwala sa mga unos sa kinabuhi ug nakapahimo nako sa pagtinguha og luwas nga kadangpan ug sa makapaayo, makapalig-on nga mga panalangin sa gugma ug maulaong sakripisyo sa atong Manluluwas.
Akong mga batan-ong kaigsoonan, kon inyong panalipdan ang pribado nga mga panahon sa inyong kinabuhi pinaagi sa makaayo nga paglingaw-lingaw; pagpaminaw sa makapabayaw nga musika; pagbasa sa mga kasulatan; pagbaton og makanunayon, makahuloganon nga pag-ampo; ug paghimo og mga paningkamot nga makadawat ug mamalandong sa inyong patriyarkal nga panalangin, kamo makadawat og pagpadayag. Sa mga pulong ni Presidente Nelson, ang inyong mga mata mahimong “bukas gayod sa kamatuoran nga kini nga kinabuhi mao gayod ang panahon nga makahimo kamo og desisyon kon unsa nga matang sa kinabuhi ang inyong gusto nga puy-an sa kahangtoran.”18
Ang atong Amahan sa Langit motubag sa inyong mga pag-ampo, ilabi na sa inyong mga pag-ampo nga gihalad atol sa pribado nga mga panahon sa inyong kinabuhi. Siya mopadayag ninyo sa inyong gi-orden nang daan nga mga gasa ug mga talento, ug inyong bation ang Iyang gugma nga molukop kaninyo, kon kamo sinsero ug tinuoray nga nagtinguha nga mahibalo. Kon panalipdan ninyo ang pribado nga mga panahon sa inyong kinabuhi, ang inyong partisipasyon sa mga ordinansa ug mga pakigsaad sa ebanghelyo mahimong mas makahuloganon. Kamo mas hingpit nga mabugkos ngadto sa Dios pinaagi sa mga pakigsaad nga inyong gihimo ngadto Kaniya, ug kamo pagabayawon nga makabaton og mas dakong paglaom, pagtuo, ug kaseguroan sa mga saad nga Iyang gihimo nganha ninyo. Gusto ba kamo nga mahibalo sa plano sa Dios alang ninyo? Ako mopamatuod nga Siya gusto nga kamo mahibalo, ug Siya midasig sa Iyang propeta ngadto sa kalibotan sa pagdasig sa matag usa kanato sa pag-ampo ug sa pagdawat niining makapabuka sa mata nga kasinatian alang sa atong kaugalingon.19 Ako mopamatuod sa katinuod ug sa gahom sa maulaong sakripisyo sa atong Manluluwas nga nakapahimong posible nga matuman ug matagamtaman ang tanang gi-orden nang daan sa Dios nga mga panalangin, sa ngalan ni Jesukristo, amen.