Alang sa Kalig-on sa mga Kabatan-onan
Mga Batan-ong Lalaki ug mga Babaye: Mag-ila-ila sa Usag Usa
Oktubre 2024

Si Jesukristo Mao ang Inyong Kalig-on

Mga Batan-ong Lalaki ug mga Babaye: Mag-ila-ila sa Usag Usa

Ni David Dickson ug David A. Edwards

Mga Magasin sa Simbahan

Kamo ba nalibog sa lahi nga sekso? Naintriga? Nahadlok? Malaomong nagmatngon nga makab-ot ra ang normal nga relasyon? Pagbasa pa.

mga batan-ong babaye ug mga lalaki

Mga Paghulagway pinaagi ni Katy Dockrill

Sa sinugdanan, gibuhat sa Dios ang lalaki ug babaye sa yuta (tan-awa sa Genesis 1:27). Ug sukad niadto, kini nahimong … nakapainteres.

Alang sa batan-ong mga tawo, ang pag-ila-ila og mga miyembro sa lahi nga sekso mahimong usahay mobati og kalibog, kahadlok, kakulbahinam, misteryoso, makalingaw, makahulga, makalipay—tingali ang tanan dihadiha dayon. Mao na kana ang kanunayng nahitabo. Apan adunay ubang sosyal nga mga lagda sa kalibotan karon nga nakapahimo niini nga mas labaw pa nga bakikaw.

Padayon sa Unahan, Dili Magbakikaw

Nangutana kami sa kabatan-onan sa tibuok kalibotan kon unsaon sa mga batan-ong lalaki ug mga babaye pag-ila-ila sa usag usa, ingon man usab sa mga problema nga ilang giatubang. Tan-awa kon kini nga komentaryo gikan sa usa ka batan-ong babaye sa South Africa pamilyar ba:

“Sa karong panahona ingon og dili na ikaw makahimo og panaghigalaay sa mga tawo. Kon ang batan-ong lalaki ug babaye magkauban, ang mga tawo dayon magtuo nga adunay mas lawom pa nga relasyon. Makalagot nga maninguha nga magpabilin ang panaghigalaay sa dihang ang mga tawo kanunay nga moawhag ninyo sa paghimo niini nga mas labaw pa.”

Laing batan-on miingon niining paagiha:

“Kon ang usa ka batan-ong lalaki ug babaye nagsultihanay, ang mga tawo magtuo na dayon nga nag-date na sila.”

Makahatag pa kita og dugang nga mga ehemplo (daghan pa kaayo) gikan sa kabatan-onan sa tibuok kalibotan niining sama nga kabalaka. Apan dili lang kana ang babag nga nahitabo. Pananglitan:

  • Ang digital nga teknolohiya ug social media nakapahimo sa komunikasyon nga mas sayon sa ubang paagi apan nakapahimo sa tinud-anay nga paghigalaay nga mas lisod sa ubang paagi.

  • Ang nagkawala nga pagsalig sa tibuok katilingban nakapahimo sa mga tawo nga mabinantayon sa uban ug sa ilang mga intensiyon. Pananglitan, ang mga batan-ong lalaki kasagaran mosulti nato nga lisod para nila ang magpakita og bisan makig-amigo lang sa usa ka babaye nga dili maghunahuna nga lainon kini og sabot ug ingnon dayon sila nga “naghimo og dili maayo nga sekswal nga linihokan.”

Kining tanan makahimo sa bisan unsang pagsulay sa pakig-amigo sa mga sakop sa lahi nga sekso nga bakikaw. Ug sa tinuod lang—bakikaw na gyod kaayo ni sa pagsugod pa lang.

Alang sa daghang batan-on, ang mas sayon nga paagi tingali mao ang paglikay sa tanang lahi nga sekso hangtod sa ulahing bahin sa kinabuhi. Nga diin mahimo nang trahedya. Kon inyong ibulag ang inyong kaugalingon gikan sa lahi nga sekso, mawad-ang kamo og oportunidad nga makaangkon og bililhong panaghigalaay. Ug sila usab dili makaila kaninyo.

Si Tamara W. Runia, Unang Magtatambag sa Kinatibuk-ang Kapangulohan sa Young Women, miingon, “Ang pagkonektar importante gayod. Padayon lang og lahutay niadtong bakikaw nga mga pagbati ug pakigsulti sa daghang tawo (lakip niadtong lahi nga sekso!). Pahiyom og una ug sulti og hi.”

Si Bradley R. Wilcox, Unang Magtatambag sa Kinatibuk-ang Kapangulohan sa Young Men, miuyon. “Ayaw kaayo og kabalaka kon unsay hunahunaon sa ubang mga tawo,” miingon siya. “Ang labing maayong paagi nga malipay ug makighigala mao ang paglihok. Ayaw paghulat og tawo nga moingon og hi ug mosugod sa panag-istoryahanay. Ang inyong pagsalig molambo samtang inyong ilisan ang inyong kahadlok kon unsay isulti sa ubang mga tawo og hugot nga pagtuo kon unsay hunahuna sa Dios.”

Unsay Gisulti sa Giya?

Swerte kamo, ang giya Alang sa Kalig-on sa mga Kabatan-onan naglangkob niining dinasig nga tambag:

tinuod nga panaghigalaay

Ang tinuod nga mga panaghigalaay (uban sa mga batan-ong babaye ug mga lalaki) maayo ug magantihon. Gibase kini sa tinud-anay nga pagkagusto sa usa ka tawo, ingon man usab sa kamatinud-anon, kamasaligon, ug respeto. Kini usab dili mahitabo sa usa ka gabii. Ang tinuod nga mga pakighigalaay mahimo—usa ka lakang matag higayon.

daghang tawo

Dili kinahanglan nga daghan kamo og higala, apan dili ninyo limitahan ang inyong kaugalingon kon kang kinsa kamo makighigala. Si Presidente Russell M. Nelson mitudlo, “Matag adlaw sa inyong kinabuhi, paningkamot sa pagpalambo sa gidaghanon sa inyong mga higala.” Usab—mahimo nga kini mga batan-ong lalaki ug mga babaye.

maayo nga grupo nga mga kalihokan

Sa daghang dapit sa kalibotan, usa ka grupo sa mga batan-ong lalaki ug mga babaye mahimong magpundok aron maglingaw-lingaw magbuhat og mga butang nga makalingaw sa tanan ug dili peligro sa pisikal ug espirituwal nga paagi. Mahimo kining maayo nga paagi aron mag-ila-ila og daghang lain-laing mga tawo. Ang kabatan-onan sa tibuok kalibotan miingon nga ang mga kalihokan sa Simbahan, ma-Dominggo ug atol sa semana, mao ang nindot kaayo nga mga paagi aron makasugod.

usa-usa nga mga kalihokan

Usa ka batan-ong lalaki ug usa ka babaye nag-areglo nga mag-pares alang sa usa ka kalihokan nagkinahanglan og may pagka-hamtong na. Mas maayo mohulat hangtod ma-16, sama sa giingon sa giya.

eksklusibo nga mga relasyon

Bisan unsa pay imong tawag ani, usa ka eksklusibo nga romantiko nga relasyon alang lamang niadtong naa sa posisyon sa paghunahuna og kaminyoon. Sa dili pa ani, dili gyod angay ug nagdapit lang ni og emosyonal ug espirituwal nga risgo. Himoa ang inyong pagkatin-edyer nga makalingaw, dili puno sa drama ug tentasyon.

paggahin og oras

Ang pakig-uban og mga tawo ug makig-abin nila sa personal bililhon ug maayo (tan-awa sa Alang sa Kalig-on sa mga Kabatan-onan: Usa ka Giya alang sa Paghimo og mga Pagpili, 19).

kadtong motabang ninyo sa paghupot sa inyong pasalig ngadto ni Jesukristo

Mao kini nga mga tawo kinsa mahimo nga o dili mga miyembro sa Simbahan ug kinsa nagrespeto ninyo ug sa inyong mga tinuohan ug mga sumbanan. Mao kini ang mga tawo kinsa dili modani o mamugos ninyo sa pagbuhat og mga butang nga sayop.

Aduna Ka Bay Tambag?

Ang pag-ila-ila og mga miyembro sa lahi nga sekso mahimong makahahadlok, mahimo kining bakikaw, apan bililhon ang matag paningkamot niini. Aniay pipila ka kataposan nga mga hunahuna ug mga sugyot gikan sa kabatan-onan sa tibuok kalibotan.

  • “Kinahanglan dili ta mahadlok makig-ila-ila sa usag usa.”

  • “Mahimo akong makighigala ug higugmaon sila nga dili higugmaon sa romantikong paagi. Kini nga mga relasyon makatabang usab kanato nga adunay sinaligan nga amiga/amigo o usa ka tawo nga madangpan sa panahon sa panginahanglan.”

  • “Usa ka butang nga ingon og makatabang mao ang pag-adto og mga kalihokan gawas sa atong mga panimalay diin makahimamat ug makaila-ila kita sa usag usa og maayo.”

  • “Nagtuo ko nga ang pagpaninguha nga makakonek diha sa simbahan, eskwelahan, o diha sa pamilya tingali mas sayon tungod kay nagkaila-ila naman ta.”

  • “Nakaplagan nako ang hingpit nga kalipay kon magbaton og pareha nga interes sa lahi og sekso.”