Mga Tingog sa Kabatan-onan

Pagpakigbahin ug Pagserbisyo

Pagbuhat og Maayo didto sa Ghana

Joshua M. (sa wala)

Dinhi sa Ghana, masinati nimo ang maayong kultura, maayong pagkaon, ug labaw sa tanan, maayong panaghigalaay sa ubang mga tawo. Daghan sa akong mga higala mga miyembro sa Ang Simbahan ni Jesukristo sa mga Santos sa Ulahing mga Adlaw, ug ang akong suod nga higalang babaye nabunyagan pipila lang ka tuig ang milabay. Ganahan siya nga mokomedya nako ug moingon, “Nganong wala man ko nimo sultihi nga mopasakop sa Simbahan sa sayo pa?” Ug sakto siya! Busa karon, mas daghan pa ang akong gibuhat aron madala ang mga tawo sa simbahan, tabangan sila nga makaapil sa mga kalihokan, ug tabangan sila nga makita kon unsa kini.

Sa akong klase sa eskwelahan, adunay laing duha lamang ka laing miyembro sa Simbahan. Ang atong gituohan ingon og bag-o para sa uban nakong mga klasmeyt. Kanunay silang mangutana namo bahin sa ebanghelyo, ug ang uban lisod tubagon. Kon dili mi kahibalo sa tubag sa usa ka pangutana, amo kining hisgotan og dungan ug mangayo og giya gikan sa among mga lider sa Simbahan. Kon mahibaloan na namo unsaon pagtubag, sultihan namo ang among mga klasmeyt mahitungod sa unsay among nahibaloan nga tinuod. Gidapit pa gani nako ang pipila kanila sa pag-adto ug sa pagtan-aw sa ilang kaugalingon mismo kon giunsa namo sa pagsimba, ug nakadawat sila og maayong mga pagbati mahitungod sa panagtigom alang sa sakramento.

Nakat-onan usab nako nga kon magsige kamo sa pagbuhat og maayo, mas duol ang Balaang Espiritu kaninyo. Kanunay akong motabang sa mga tawo sa kadalanan kon magdala sila og daghang mga butang. Bag-ohay lang, akong nakita kining babaye nga naglukdo og mga butang. Wala ko makaila sa babaye o bisan unsa mahitungod niya, apan miduol ko niya ug nangutana kon makatabang ba ko. Misugot siya, mao nga gikuha nako ang pipila ka mga butang nga iyang gidala.

Pag-abot namo sa iyang balay, nahibaw-an nako nga panadero diay siya. Niadtong higayona, wala koy trabaho, ug nagkinahanglan ko og paagi nga makatigom og dugang kwarta. Wala siya mahibalo nga nagkinahanglan ko og trabaho. Wala lang damha, gisultihan ko niya nga gusto niya nga dunay motabang niya sa pagluto og pan nga iyang kasuholan. Gitanyagan ko niya og piho nga mga oras nga haom kaayo sa akong bisi nga eskedyul. Sa akong hunahuna dili kadto sulagma kondili usa ka panalangin gikan sa Dios tungod sa pagtabang sa uban. Para nako, ang Langitnong Amahan kadto nga nag-ingon, “Akong anak, nakita nako ang maayo nimong gipangbuhat!”

Mopamatuod ko nga si Jesukristo mao ang tumong, ug Siya ang dalan. Kinahanglan moserbisyo kita Kaniya ug niadtong anaa sa atong palibot.

Joshua M., 17, Greater Accra Region, Ghana

Ganahan nga magbasa ug magdula og mga paugnat sa kusog, labi na sa football (soccer).

Usa ka Panalangin sa Bag-ong Tuig sa Argentina

Nag-imbitar ko og usa ka higala nga babaye sa usa ka salo-salo sa simbahan sa Bisperas sa Bag-ong Tuig. Dili siya miyembro sa Ang Simbahan ni Jesukristo sa mga Santos sa Ulahing mga Adlaw apan adunay maayo nga impresyon niini. Pag-abot niya, hubog siya. Nagsugod siya sa pagbati og dili kapugngan nga kahadlok ug mitug-an siya nako bahin sa mga kalisdanan nga giatubang niya ug sa iyang pamilya. Nasayod ko nga kinahanglan nako siyang tabangan.

Ako siyang gidala sa akong papa. Akong gipangutana si papa kon makahatag ba siya kaniya og panalangin sa pagkapari. Gisultihan nako siya og gamay mahitungod sa mga panalangin, ug miingon siya nga ganahan siya niini. Human sa panalangin, mihunong siya sa paghilak ug mipahiyom pa!

Human niini nga kasinatian, nangutana siya nako og pipila ka mga pangutana mahitungod sa pagkapari. Uban sa laing higala, akong gipakigbahin kon sa unsang paagi ang ebanghelyo nakapanalangin kanamo ug sa among mga pamilya.

Nindot ang akong gibati sa pagpakigbahin sa ebanghelyo ngadto sa akong higala. Para nako, ang usa ka disipulo ni Jesukristo maningkamot nga mahisama ni Jesukristo ug mobuhat sa mga butang nga Iyang gibuhat, ilabi na kon makakita kita og usa ka tawo nga nag-antos sa kalisdanan.

José J., 14, Buenos Aires, Argentina

Ganahan nga magpiyano, magbisikleta, mokanta, magluto, arte, ug musika.

Pag-ampo sa Presidente sa Klase

Bugnaw kadto nga adlaw sa Enero sa dihang gihangyo ako nga moserbisyo isip presidente sa klase sa Young Women. Unang tuig kadto nako sa programa sa Young Women, ug bisan og wala ko magdahom nga mahimong presidente sa klase, nalipay kaayo ko. Mipahiyom ko ug mitando.

Giingnan dayon ko nga magsugod sa pag-ampo kon kinsa ang akong mga magtatambag.

Ang akong kalipay kalit nga nahimong kabalaka. Nabalaka ko nga makapili ko og sayop nga mga tawo, o mas grabe pa, nga dili gyod ko makadesisyon!

Unya nianang pagkagabii, gisultihan nako akong mama nga nabalaka ko nga dili ko makahimo og desisyon. Iya kong giingnan nga moadto sa akong kwarto, mag-ampo, ug mobasa og pipila ka bersikulo gikan sa Basahon ni Mormon.

Miadto ko sa akong kwarto, nabalaka gihapon. Nag-ampo ko, mihangyo sa Langitnong Amahan nga tabangan ko sa paghimo og saktong desisyon. Dayon akong giablihan ang mga kasulatan sa pahina diin ko mihunong sa miaging pagbasa ug gibasa ang unang bersikulo nga akong nakita. Nagsulti kini: “Ug si Kristo miingon: Kon kamo adunay hugot nga pagtuo kanako kamo makabaton sa gahom sa pagbuhat sa bisan unsa nga butang nga maayo ngari kanako” (Moroni 7:33).

Sa dihang nabasa nako kana nga bersikulo, nasayod ko nga ang Langitnong Amahan mitubag sa akong pag-ampo. Nagtan-aw Siya kanako ug gusto nga motabang nako. Ang gikinahanglan nakong buhaton mao lamang ang pagbutang sa akong hugot nga pagtuo diha Kaniya, ug Siya motabang kanako nga makahibalo unsay buhaton.

Nasayod ko nga ang Ginoo nagtan-aw kanato ug gusto nga motabang kanato kon andam kita mobutang sa atong hugot nga pagtuo diha Kaniya.

Emmeline K., 14, Utah, USA

Ganahan sa pagsulat, sa arte, ug sa musika, lakip na sa pagsulat og mga awit alang sa piyano ug gitara.