Ang Pagpangalagad Makahimo og Kalainan
Si Amelia dili segurado kon bation ba niya nga siya nahisakop kon moadto siya sa simbahan. Nalipay kaayo siya nga daghang tawo ang miduol kaniya.
Mga litrato pinaagi ni Daniel Scott
Si Amelia, usa ka batan-ong babaye sa New Zealand, wala na makasimba sulod sa pito ka tuig.
Atol sa pagdiborsyo sa iyang mga ginikanan, ang pamilya ni Amelia nahimutang sa malisod nga sitwasyon, ug nakahukom sila nga mohunong sa pagsimba. “Wala mi makadawat ug suporta ni bisan kinsa,” nahinumdom si Amelia.
Apan usa ka Dominggo, pito ka tuig ang milabay, ang mama ni Amelia nakahukom nga sulayan na usab ang pagtambong sa simbahan. Maayo ang iyang kasinatian ug midapit sa iyang mga anak nga babaye sa pagbalik sa simbahan uban kaniya. Naghunahuna si Amelia, “Unsa may mawala nako?”
“Malipayon Kaayo Ko nga Ania Ka!”
“Medyo nakulbaan ko sa una,” miingon si Amelia. “Wala koy positibo kaayo nga asosasyon sa Simbahan.”
Apan nakahukom siya nga dawaton ang imbitasyon sa iyang inahan, ug wala siya magbasol niini. “Sa dihang misulod ko sa simbahan, ang mga tawo miingon kanako, ‘Wala pa ko kakita nimo dinhi kaniadto’ ug ‘Welcome sa among simbahan’ ug ‘Nalipay kaayo ko nga ania ka!’” Nahinumdom si Amelia.
“Walay nagpahilayo nako. Ang tanan maabiabihon gayod ug buotan.”
Apan samtang nagtan-aw si Amelia sa palibot atol sa pagsimba, nagsugod siya sa paghunahuna nga tingali wala gayod siya mahisakop. “Dili nako malikayan nga ibulag ang akong kaugalingon sa mga tawo tungod kay nagsugod ko sa pagtandi sa akong kaugalingon kon unsay nahibaloan sa ubang mga bata ug kinsa ang ilang kaila,” miingon si Amelia. “Daghang bata sa akong ward managpamilya o suod nga managhigala sukad pa sa ilang pagkabata, mao nga daw nakaila sila pag-ayo sa usag usa,” miingon siya.
Human sa panagtigom alang sa sakramento ang bishop miduol ni Amelia ug miingon, “Hi, ako si Bishop Watts. Ganahan ko nga mosulti ka og hi sa tanan.” Iyang gidala siya ngadto sa klasrom sa Young Women ug gipaila-ila siya sa ubang mga babaye. “Importante kaayo kadto nga inter-aksyon tungod kay naghatag kadto kanako niining kalit nga pagbati sa paglaom nga ako makaugmad og maayo relasyon kon asa ako,” mipasabot si Amelia.
Ug kana nakapadasig kaniya sa pagbalik sa simbahan sa sunod nga Dominggo.
Usa ka Leksiyon sa Pagkamabination
Pagkasunod semana, nahimamat ni Amelia si India, ang babayeng anak sa bishop. Miingon siya, “Hi, nakakita ko nimo sa miaging adlaw. Ang akong ngalan si India. Nindot kaayo nga makaila nimo.”
Nianang adlawa, ang klase naghisgot bahin sa usa ka butang nga wala pa makat-oni ni Amelia. Midap-ig si India ug nangutana, “Nakasabot ka ba niini?” Miingon si Amelia, “Wala.” Mao nga gitabangan siya ni India nga makasabot sa leksiyon.
“Dili na nako mahinumduman ang leksiyon karon, pero nahinumdom ko kon giunsa niya pagkabantay nga nagkinahanglan ko og tabang,” miingon si Amelia. “Ang iyang pagkamabination ngari kanako mao ang labing importante nga leksiyon nga akong nakat-onan niadtong adlawa.”
Gitudloan ni India si Amelia kutob sa iyang nahibaloan mahitungod sa simbahan, ug gitabangan niya si Amelia nga makakita og mga tubag sa iyang mga pangutana. Niadtong unang mga semana ug mga bulan nahimo siyang sama sa usa ka giya ni Amelia. “Kanunay siyang nahibalo kon unsay eksaktong isulti,” nahinumdom si Amelia. “Kadto ang labing espirituwal nga butang nga akong nasinati sa daghang katuigan.”
Samtang naningkamot si Amelia nga makig-angay sa bag-ong mga tawo, gipasaligan siya ni India nga walay tawo nga mohukom niya sa iyang pagkabag-o pa sa simbahan. “Gipabati niya nako nga makomportable sa akong pagkabag-o,” miingon si Amelia.
Gipahibalo ni Amelia si India og gamay mahitungod sa iyang mga pakigbisog sa sitwasyon sa iyang pamilya, lakip na ang pagpuyo uban sa usa ka abusadong amahan sa wala pa ang diborsyo sa iyang mga ginikanan. “Si India mao ang unang tawo nga akong gisaligan niana nga palibot,” miingon si Amelia. “Nasayod ko nga ang Langitnong Amahan nagbuhat og mga milagro, tungod kay sa matag higayon nga makigsulti ko ni India, kanunay siyang mosulti og butang nga makatabang. Gipaneguro niya nga dili gyod ko mobati nga nag-inusara.”
Si Amelia miingon nga si India mihatag kaniya og kaseguroan nga makabalik siya sa saktong direksiyon sa unsay gusto sa Langitnong Amahan alang kaniya. “Sa akong hunahuna dili ko makabalik sa simbahan kon wala pa si India o si Bishop Watts,” miingon si Amelia.
Si India (sa wala) mitabang kang Amelia nga mobati nga giabi-abi pagbalik sa simbahan.
Mahitungod kini sa Pagpaningkamot sa Pag-impluwensya sa Ubang Tawo
Ang panaghigalaay nila ni Amelia ug India nakatabang ni Amelia nga mas masuod sa Manluluwas. “Sa dihang mibalik ko sa simbahan, wala ko makaseguro kon unsaon nga makabaton og relasyon kang Jesukristo. Gitabangan ko ni India nga makasabot nga bisan og dili nako makita ang Manluluwas, mabati gihapon nako ang Iyang gugma, impluwensya, ug mga milagro sa akong kinabuhi,” mipasabot si Amelia. “Gipakita niya nako ang Kristohanong gugma. Karon, gusto ko nga mahimong si India para sa laing tawo. Gusto ko nga anaa alang sa usa ka tawo kon magkinahanglan siya nako.”
Nagtuo si Amelia nga ang pagpangalagad mas labaw pa og kahulogan kay sa pagdawat og buluhaton—mahitungod kini pagpaningkamot sa pag-impluwensya sa ubang tawo. “Kini mao ang pagtan-aw sa usa ka tawo nga anaa sa malisod nga sitwasyon ug, imbis nga maghulat nga mangayo siya og tabang, anaa ka sa panahon nga ang laing tawo makabenepisyo niini,” miingon si Amelia. “Si India ug si Bishop Watts nangalagad nako sa dihang nabalaka ko nga walay mga tawo nga makahatag og suporta. Karon nga anaa na, nalipay kaayo ko nga adunay tawo nga mitabang.”
Gusto ni Amelia nga ang ubang mga batan-on makahibalo nga ang Langitnong Amahan ug si Jesukristo nahigugma kanila, bisan kon gibati nila nga wala sila mahisakop. “Kon gibati ninyo nga dili pa igo ang inyong pagkamaayo, o nga wala kamo mahisakop niini nga Simbahan, hinumdomi nga inyo usab kini nga dapit,” miingon siya.
“Ug kamo mahimong mobalik kanunay.”