Dali, Sunod Kanako
Gusto nga “Mapanalanginan ug Malipayon”?
Ang katawhan diha sa 4 Nephi nagpuyo nga malipayon ug nahiusa sulod sa hapit 200 ka tuig. Unsay nakaingon sa ilang malipayon nga kahimtang? Makasinati ba usab kita niini?
Hunahunaa ang usa ka komunidad sa katawhan kinsa wala makig-away sa usag usa. Sila sa hingpit malipayon, ug walay ni bisan usa ang nakahimo og krimen. Dili sila masina sa usag usa, ni mobulag sa ilang kaugalingon pinaagi sa mga paghingalan o mga grupo. Kay, sila nagkahiusa diha ni Jesukristo, ug sila naghupot sa Iyang mga sugo.
Usa ka grupo sa mga tawo nga sama niini gihulagway sa 4 Nephi diha sa Basahon ni Mormon. Ug ingon niana sila nagpakabuhi sulod sa hapit 200 ka tuig!
Diha sa mga pahina 2–5 niini nga magasin, si Presidente Russell M. Nelson mipasabot nga ang 4 Nephi naghatag kanato og sundanan alang sa pagpuyo diha sa kalinaw ug malipayon nga panaghiusa. Apan unsay nahitabo nga nakatabang sa mga Nephita sa pagpuyo nga malipayon sulod sa dugayng panahon? Makahimo ba usab kita niini karon?
Ang Ilang Kasinatian uban ni Kristo
Basaha pagbalik ang panahon sa sayo pa sa 3 Nephi, ug makakaplag kamo sa rason nga ang mga Nephita nagmalipayon kaayo ug nagkahiusa diha ni Kristo.
Ang katawhan nabisitahan sa Manluluwas human sa Iyang Pagkabanhaw. Panahon sa Iyang pagbisita, si Jesukristo miayo niadtong masakiton ug may balatian. Iyang gipanalanginan ang mga tawo tagsa-tagsa ug nag-ampo ngadto sa Langitnong Amahan alang kanila (tan-awa sa 3 Nephi 17). Nagtudlo si Jesus sa kasugoan. Gisugo Niya ang katawhan nga maghinulsol, magpabunyag, ug modawat sa Espiritu Santo (tan-awa sa 3 Nephi 27).
Si Jesus midapit sa katawhan sa pagduol ngadto Kaniya, tagsa-tagsa, aron mobati sa mga marka sa Iyang mga kamot, mga tiil, ug kilid. Tagsa-tagsa silang miduol ni Jesus “hangtod silang tanan nakaduol, ug nakakita uban sa ilang mga mata ug mibati uban sa ilang mga kamot, ug nasayod sa pagkatinuod” nga Siya mao ang gipanagna nga Manluluwas (tan-awa sa 3 Nephi 11:15).
Human sa pagbisita sa Manluluwas ngadto sa mga Nephita, “ang tanan nga mga katawhan nakabig ngadto sa Ginoo” (4 Nephi 1:2). Sa ingon, unsaon nato pagsinati niini nga pagkakabig nga wala makakita ug makahikap ni Kristo?
Kasinatian sa usa ka Apostol uban ni Kristo
Si Elder Bruce R. McConkie (1915–1985) sa Korum sa Napulog Duha ka Apostoles mipamatuod nga usa ka adlaw siya makakita ni Jesukristo ug makahikap sa mga marka sa Iyang mga kamot ug mga tiil. Siya usab mipamatuod, “Dili unya nako mahibaloan og mas maayo kaysa akong nahibaloan karon nga si [Kristo] mao ang Makagagahom nga Anak sa Dios, nga Siya ang atong Manluluwas ug Manunubos.” Wala siya magkinahanglan nga makakita ni Jesukristo aron makaila Kaniya ug makasinati og pagkakabig.
Ang tinuod nga pagkakabig “nagkinahanglan kanato sa pagbuhat ug sa pagkahimo.” Ang Manluluwas misulti sa mga Nephita sa pagsunod sa Iyang kasugoan ug mahimong sama Kaniya (tan-awa sa 3 Nephi 27). Samtang nagsunod sila Kaniya, nagpabilin silang nakabig ngadto ni Kristo ug napanalanginan sa hilabihan tungod niini (tan-awa diha sa 4 Nephi 1:18).
Ang Inyong Kasinatian uban ni Kristo
Dili pa kamo makahikap sa mga kamot ug mga tiil sa Manluluwas sama sa gibuhat sa mga Nephita, apan makasunod kamo sa Iyang mga buhat (tan-awa diha sa 3 Nephi 27:21). Si Jesukristo buhi, ug Siya nagdapit kaninyo sa pag-angkon og personal nga mga kasinatian uban Kaniya.
Mahimo kamong makaila kang Kristo pinaagi sa paghupot sa Iyang kasugoan ug sa pagbuhat sa unsay Iyang gibuhat. Mahimo kamong makabati sa gahom sa Iyang Pag-ula pinaagi sa paghinulsol matag adlaw. Siya mopanalangin kaninyo, moayo kaninyo, ug mohangyo sa Amahan alang kaninyo, sama sa Iyang gibuhat sa mga Nephita. Samtang makaila kamo sa Manluluwas ug mobuhat paingon sa personal nga pagkakabig, ang inyong kinabuhi mahimong mas mahisama niadtong katawhan sa 4 Nephi—malipayon, malinawon, napanalanginan, ug napuno sa gugma sa Dios.