Sau, Mulimuli Mai ia te A’u
4 Nifae
Fiafia i le Lotogatasi
O se tasi o mataupu i le Tusi a Mamona o loo faaalia ai le ala e mafai ai ona tasi i tatou e ala ia Iesu Keriso ma Lana talalelei.
Na Latou Aumaia a Latou Fanau Laiti, saunia e Walter Rane
I le avea ai ma soo moni o Iesu Keriso, tatou te naunau mo le filemu i se lalolagi o le feeseesea’i ma finauga. Nai lo le nonofo ai i se nuu e tumu i le inoino ma le fefinauai, tatou te saili ma le naunautai e fausia se sosaiete e faavae i aoaoga a Iesu Keriso. Na Ia a’oa’o mai, “Ia tasi outou; ma afai tou te lē tasi e lē a aʼu outou” (Mataupu Faavae ma Feagaiga 38:27). E taua le lotogatasi i le Ekalesia moni a Iesu Keriso.
E faapefea ona tatou ausia le lotogatasi?
O se tasi o mataupu i le Tusi a Mamona e mafai ona fesoasoani ia i tatou. I le 4 Nifae tatou te a’oa’o ai i le ala na ola ai tagata ina ua uma ona asiasi atu le Faaola ia i latou, a’oa’o i latou, ma faatuina Lana Ekalesia ia i latou. O loo faaalia ai le ala na latou ausia ai se lotogatasi fiafia ma le toafilemu, ma ua aumaia ai ia i tatou se mamanu e mafai ona tatou mulimuli ai e maua ai mo i tatou lava le fiafia i le mauaina o lenei lava lotogatasi e tasi.
1. Liua
Muamua, ua tatou aoao “sa faatuina e soo o Iesu na faatuina se ekalesia a Keriso . … Ma o [tagata] na o mai ia te i latou, ma le salamo moni ia latou agasala” (4 Nifae 1:1).
A o e aoao e uiga ia Iesu Keriso, o Lana talalelei, ma Lana Ekalesia, e molimau mai le Agaga Paia i le upumoni i lou loto. Ona mafai lea ona e taliaina le valaaulia a le Faaola ia faatuatua ia te Ia ma mulimuli ia te Ia e ala i le salamo.
O lenei mea e amataina ai lau malaga o le liua—alu ese mai manaoga manatu faapito, ma le agasala ma agai atu i lo tatou Alii ma le Faaola, o Iesu Keriso. O Ia o le faavae o lo tatou faatuatuaga. Tatou te faatasia uma ia te Ia. A o tatou vaai atu ia te Ia i mafaufauga uma (tagai i le Mataupu Faavae ma Feagaiga 6:36), e avea o Ia ma se malosiaga autasi i o tatou olaga.
2. Feagaiga
O i latou o e na o mai i le Ekalesia ma salamo ia latou agasala “sa papatisoina i le suafa o Iesu; ma sa latou maua foi le Agaga Paia” (4 Nifae 1:1). Sa latou ulu atu i se feagaiga ma le Alii.
A e osia ma tausia feagaiga, e te tauaveina le suafa o le Alii i ou lava luga. O lenei sootaga faalefeagaiga e tuuina atu ai ia te oe se mafuaaga masani ma se faasinomaga masani faatasi ma isi o e ua noatia i latou lava i le Alii e ala i feagaiga. Ona fesoasoani lea o le Alii ia i tatou ia “fili faatasi o [tatou] loto i le lotogatasi ma le alofa o le tasi i le isi” (Mosaea 18:21).
3. Tulaga Amiotonu ma le Tutusa
Ua tatou aoao foi “sa leai ni finauga ma ni feteenaiga i totonu [i tagata], ma sa faamaoni tagata uma o le tasi i le isi i fealoaiga na latou fai.
“Ma sa latou tuutele mea uma i totonu ia te i latou; o lea sa leai se mauoa ma se matitiva, pologa ma se saoloto, ae sa tuusaoloto i latou uma, ma tofutofusia i le meaalofa mai le lagi”(4 Nifae 1:2–3.)
E finagalo le Alii ia tatou tonu ma sa’o. A’o tatou tupu latalata atu ia te Ia, “o le a le i ai [ia tatou] se manatu e faamanu’a i le tasi, ae ia [tatou] nonofo i le filemu, ma faia i tagata taitoatasi e tusa ma le mea e tatau ai mo ia.” (Mosaea 4:13).
Ina ia lotogatasi ma le nuu o le Alii, e le gata ina tatau ona outou faia tutusa isi, ae e tatau foi ona outou vaai moni lava ia i latou i tulaga tutusa ma lagona i lou loto e tutusa tagata uma—tutusa i luma o le Atua, e tutusa le taua ma gafatia tutusa (tagai i le Mataupu Faavae ma Feagaiga 38:24–25).
4. Usiusitai
Ina ua mae’a ona aoao atu e le Alii i tagata Lana mataupu faavae, tuu atu ia i latou poloaiga, ma valaauina auauna e auauna atu ia te i latou, “sa latou savavali e tusa ma poloaiga na latou maua mai lo latou Alii ma lo latou Atua” (4 Nifae 1:12). O le usiusitai i aoaoga a le Alii ma Ana auauna e taua i le taumafai ai ia lotogatasi.
5. Feiloai Faatasi
O tagata i le 4 Nifae sa latou “[faaauau] i le anapogi ma le tatalo, ma i le potopoto soo faatasi e tatalo ma faalogologo i le afioga a le Alii” (4 Nifae 1:12).
O sauniga tapuai faalevaiaso o se avanoa taua lea mo i tatou e maua ai le malosi. E le gata ina tatou aai ma feinu i le faamanatuga, ae tatou te aoao foi, tatalo, ma pepese faatasi ma lagolago e le tasi le isi. O isi faatasiga e aumaia ai foi se lagona o le auai, faauo, ma le faamoemoega fefaasoaai.
6. Alofa
Ua tatou aoao i le 4 Nifae o le lotogatasi moni na ausia “ona o le alofa o le Atua sa mau i loto o tagata” (4 Nifae 1:15).
O le poloaiga muamua ma le sili o le alofa i le Atua—e sili atu nai lo se isi lava po o soo se mea. A o e atiina ae le alofa o le Atua ma Iesu Keriso, o le a faigofie ona mulimuli mai le alofa o le aiga ma tuaoi.
O le olioli silisili o le a e oo i ai o le taimi e faatumulia ai oe i le alofa mo le Atua ma mo Ana fanau uma.
O le alofa moni, le alofa mama o Keriso, o le uiga ‘autu lea o se soo moni o Iesu Keriso. Pe a e faamaualaloina oe lava i luma o le Atua ma tatalo ma le malosi atoa o lou loto, o le a tuuina mai e le Atua ia te oe le alofa mama (tagai i le Moronae 7:48).
A o e saili ia i ai le alofa o le Atua i lou loto, o le vavega o le lotogatasi o le a foliga mai o se mea masani ia te oe.
7. Faasinomaga Paia
O le isi faailoga o le lotogatasi e faapea “ sa leai ni … sa Lamanā, po o soo se ituaiga o -tagata; ae sa tasi i latou, o le fanau a Keriso, ma o suli i le malo o le Atua” (4 Nifae 1:17).
Nai lo le faaaogaina o igoa na vaevaeina ai i latou, sa vaai tagata ia i latou lava—ma tagata uma—e tusa ai ma lo latou sootaga ma le Tama Faalelagi ma Iesu Keriso. O i tatou uma o fanau a le Atua ma so’o o Iesu Keriso. E ui o tulaga eseese ma eseesega e mafai ona lelei ma taua, ae o ō tatou faasinomaga sili ona taua o mea na e fesootai i lo tatou faapogai ma faamoemoega paia.
Ia Tasi
Atonu tatou te eseese i a tatou aganuu, tulaga faaupufai, ituaiga, tofo, ma i le tele o isi auala. Ae a tatou lotogatasi ia Iesu Keriso, o na eseesega e mou atu i le taua ma tatou te taumafai ia tasi—ina ia avea ai i tatou ma Ana(fanau).
A o tatou ave i o tatou loto elemene o le lotogatasi o loo maua i tagata i le 4 Nifae, talosia ia faapea mai ia i tatou, e pei ona sa i ai ia i latou, “E moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua” (4 Nifae 1:16).