Taumada Vakararai, Qai Veiqaravi
Mai vei Linda K. Burton
Peresitedi Raraba ni iSoqosoqo ni Veivukei
Ni da vakatovotovotaka, sa rawa ni da yaco meda vaka na iVakabula ena noda qaravi ira na luvena na Kalou.
E dua na ivakadinadina levu duadua e tu vei keda ni o koya na noda parofita lomani, o Peresitedi Thomas S. Monson, sa ikoya na nona italai digitaki na Turaga sa ikoya ni sa vulica me dau muria na nona ivakaraitaki na i Vakabula—dau veiqaravi yadua, yadua ena dua na gauna. O keda eda sa papitaiso oti eda sa yalataka meda vakayacora vakakina. Eda sa yalataka meda “dau nanuma [na iVakabula] ka muria na vunau,”1 ka sa kaya o Koya, “Sa noqu vunau oqo, Mo dou veilomani, me vaka kau sa lomani kemudou.”2
Raica na kena oka ena malanivosa oqo nei Peresitedi Monson na veisureti vata oqori: “Eda vakavolivoliti tu mai vei ira era gadreva na noda kauwai, noda veivakayaloqaqataki, noda veitokoni, noda vakacegu, noda yalovinaka. … Eda ligana na Turaga e vuravura, ka sa noda ivakaro meda veiqaravi ka vukei ira na Luvena. O Koya sa vakanuinui tu vei keda yadua.”3
O sa rogoca beka—na veisureti meda veilomani? Vei ira eso, na veiqaravi se veiqaravi vakalotu yadua ena dua na gauna, ka muria na nona ivakaraitaki na i Vakabula, e sega ni ka rawarawa. Ia ni da vakatovotovotaka, sa rawa ni da yaco yadua meda vaka na iVakabula ena noda qaravi ira na luvena na Kalou. Me vukei keda meda veilomani vakavinaka cake, au vinakata meu vakatura e va na vosa meda nanuma tiko: “Taumada vakararai, qai veiqaravi.”
Ena voleka ni 40 na yabaki sa oti keirau a lako kei watiqu ki na valetabu ena neirau bogi ni gadi ena Vakaraubuka. Keirau se qai vakamau wale toka ga, kau lomaleqa ni oqo se qai ikarua ga ni noqu gauna ni oti noqu vakamau. A vakila beka e dua na marama ka dabe volekati au tiko. E kala mai ka vakasolokakana ena vakarokoroko, “Kua ni leqa. Au na vukei iko.” E ruru na noqu nuiqawaqawa, kau marautaka na vo ni soqoni ni valetabu o ya. A vakararai taumada, qai veiqaravi.
Eda sa sureti taucoko meda muria na nona ivakavuvuli kei na veiqaravi o Jisu vei ira na tani. E sega ni yaco walega vei ira na marama vaka na agilosi. Niu wasea e vica na ivakaraitaki e dau matau vei ira na lewenilotu ka ra sa vulica mera vakararai ka qai veiqaravi, vakarogoca na ivakavuvuli nei Jisu era vakaraitaka.
E kaya e dua na gone yabaki ono ena Lalai: “Niu digitaki meu dau veivuke ena kalasi, au rawa ni digitaka e dua na itokani me cakacaka vata kei au. Au digitaka [e dua na gonetagane ena noqu kalasi ka a vakasaurarataki au] baleta ni ra sega ni dau digitaki koya na kena vo. Au via vaka logavinaka taki koya.”4
Na cava a vakaraica na gone oqo? A raica ni sega ni dau digitaki na gone dau veivakasaurarataki ena kalasi. Na cava a cakava me veiqaravi kina? A digitaki koya me nona itokani ni dau veivukei ena kalasi. E vakavuvulitaka o Jisu, “Dou lomani ira na nomudou meca, vosa vinaka vei ira sa rukaki kemudou, caka vinaka vei ira sa cati kemudou.”5
Ena dua na tabanalevu, era a vakararai taumada na Matabete i Eroni ka ra qai veiqaravi ena dua na sala vakaibalebale. Ena veimacawa era dau yaco totolo mai na cauravou ka mai wawa tu e tautuba ni valenilotu ena tau ni uca, ucacevata, se ena katakata warumisa, era waraka tu na nodra yaco mai na lewenilotu qase ena nodra tabanalevu. Era laveta na idabedabe qiqi kei na ititoko yavaiva, mai na motoka, ka solia na ligadra kaukauwa mera tautauri kina, era qai tuberi ira yani na qase ulusika oqori ki valenilotu. Era sa vakayacora dina tiko na nodra itavi vua na Kalou. Ni ra vakararai ka qai veiqaravi, era sa bulataka tiko na ivakaraitaki ni nona ivakavuvuli na iVakabula: “Ni kemuni a cakava vua e dua sa lailai vei ira na wekaqu oqo, ni a cakava vei au.”6 Ni sa vakayagataki na lewenivuli vou ni itabagone, e sega ni vakatitiqataki ni na tadola na matadra na cauravou oqo ki na madigi vovou eso mera veiqaravi ena sala Vakarisito.
E na so na gauna ena gadrevi vakalevu na igu ena vakararai qai veiqaravi. A raica o Alexandria e dua na goneyalewa vakauqeti, ni na sega ni rawa ni vakaotia o Madison na tavalena na veika e gadrevi ena nona Torocake Yadudua baleta ni tauvi koya sara tu vakaca na lomawele. A vakauqeti ira na goneyalewa ena nona tabanalevu o Alexandria, taro ivakasala vei ira na iliuliu, ka lomana me cakava e dua na ka ena vukui Maddy, e dua na ka e sega ni rawa ni cakava o koya. Era cakava na goneyalewa yadua ena vukuna e dua na tiki ni itaviqaravi kei na cakacaka ni Torocake Yadudua me rawa kina ni ciqoma o Maddy na nona metali.7
Era na toso yani vakavinaka na goneyalewa oqori ki na itavi vakatina kei na veitacini marama ena iSoqosoqo ni Veivukei baleta ni ra sa vulica tiko me ra vakararai ka qai veiqaravi ena veisala ni yalololoma eso.
E vakananuma vei keda o Peresitedi Monson ni “Sa vu mai vei Karisito na loloma sa uasivi sara”8—se ena dua tale na kena vosa, na vakararai qai veiqaravi—“e dau vakavotui ni nanumi e dua na kena marama yada qase ka kau yani ki na soqo ni tabanalevu” vakakina “ni sureti na marama ka dabe duadua toka ena iSoqosoqo ni Veivukei, ‘Lako mai—mai dabe vata kei keitou.’”9 E yaga eke na lawa koula: “Ia na ka vakayadua ga dou sa vinakata mera kitaka vei kemudou na tamata, dou kitaka vakatalega kina vei ira.”10
A veiqaravi e dua na tagane vakawati ena rua na sala bibi sara. E kaya kina:
“Au a vukea tiko na watiqu ena dua na Sigatabu ena nona kalasi ni Lalai ka ra sinai tu ena gone waribariba yabaki vitu. Ni tekivu na gauna ni veiwasei ena Lalai, au raica e dua na lewe ni kalasi ni lokini toka ena nona idabedabe ka kena irairai ni sega ni bula vinaka. A vakasolokakana vei au na Yalotabu ni gadreva me vakacegui, au mani dabe e yasana ka taroga vakamalua se cava na leqa. E sega ni sauma … , au sa mani tekivu lagasere vakamalua vua.
“Era vulica tiko na Lalai e dua na sere vou, ni keimami lagata, ‘Kevaka au vakarorogo e yaloqu au na rogoca na domona na iVakabula,’ Sa tekivu meu vakila na rarama vakasakiti duadua ka raragi na yaloqu. … Au ciqoma e dua na noqu ivakadinadina me baleta na nona loloma na iVakabula ena vukuna …kei au. … Au vulica ni o keda na ligana [na iVakabula] ena noda qarava e dua.”11
A sega walega ni raica na turaga bula Vakarisito oqo ni gadrevi me vukea na watina ena dua na kalasi ka sinai tu ena gone yabaki vitu waribariba; a qarava talega e dua na gone e vakaleqai tu. A muria na i Vakabula, ka a vakavuvulitaka, “Ia na ka kecega dou sa raica niu sa kitaka mo dou kitaka talega.”12
Ena dua na gauna lekaleka sa oti a dolava e dua na waluvu na madigi vei ira na tisaipeli nei Jisu Karisito mera vakararai taumada ka qai veiqaravi. Era raica na tagane, marama, itabagone kei ira na gone ni sa vakarusai na bisinisi kei na veitikotiko ka ra biuta tu na veika kece mera veivuke me vakasavasavataki ka vakavinakataki na veika sa vakacacani. Eso era raica na gagadre ni veivuke ena cakacaka vakaitamera ni savasava. Eso tale era qusi itaba, na itukutuku vakalawa, ivola, kei na pepa bibi tale eso, ka ra qai vakaliliga yani vakamatau mera mamaca ka maroroi na veika e rawa. Na vakararai qai veiqaravi e sega ni dau rawarawa ka sega talega ni dau curu vakavinaka ena noda ituvatuva.
Na vanua cava tale beka e vinaka me caka kina na vakararai qai veiqaravi me vaka na noda vale? E dua na ivakaraitaki mai na bula nei Elder Richard G. Scott e tukuni kina:
“Ena dua na bogi a yadra tagitagi mai o Richard na luvei keirau tagane lailai ka leqa tiko na nona uto. … E kena ivakarau me dau duri na watiqu me raica na gone ni tagi, ia ena gauna oqo au kaya, ‘Au na raici koya.’
“Ena vuku ni leqa e tiko vua, ni sa tekivu tagi, ena tatuki vakatotolo sara na utona. Ena lua ka vakaduka na iubi ni mocemoce. Ena bogi o ya au a roqoti koya vakavoleka sara me vakamalumutaka na tatuki ni utona ka vakadulai koya ena noqu veisautaka na nona isulu ka veisautaka na iubi ni mocemoce. Au roqoti koya toka me yacova ni sa moce. Au a sega ni kila ena gauna ko ya ni na oti ga e vica na vula sa na takali yani. Au na dau nanuma tiko ga na noqu roqoti koya toka ena loma ni bogi ko ya.”13
E kaya ko Jisu, “Ia me nomudou tamata ga ko koya yadua vei kemudou sa viavialevu.” 14
Ena so na gauna eda na temaki meda veiqaravi ena ivakarau e vinaka vei keda ka sega ena ivakarau e gadrevi ena gauna o ya. Ni vakavuvulitaka o Elder Robert D. Hales na ivakavuvuli ni bula manini, a wasea e dua na ivakaraitaki ni nona volia e dua na iloloma vei watina. Qai taroga o watina, “O volia oqo me baleti au se baleti iko?”15 Kevaka eda moica na taro oqori vei keda ni da veiqaravi ka tarogi keda, “Au cakava tiko oqo ena vukuna na iVakabula, seu cakava tiko me baleti au ga?” Na noda veiqaravi ena yaco me tautauvata kei na nona veiqaravi vakalotu na iVakabula. A taroga na iVakabula, ka dodonu vakakina vei keda, “A cava drau sa vinakata meu cakava vei kemudrau?”16
Ena vica na macawa sa oti, au a vakusakusa ka oca sara vakalevu, ka levu na ka me caka ena noqu ituvatuva ni cakacaka. Au nuitaka meu lako ki na valetabu ena siga ko ya kau vakila niu sa rui osooso vakalevu. Ena gauna e votu kina ena noqu vakasama niu sa rui osooso ka sega ni rawa na lai veiqaravi ena valetabu, e vakayadrati au sara ga ena cava au gadreva vakalevu duadua meu cakava. Au biuta na noqu valenivolavola ka taubale yani ki na Valetabu e Salt Lake, ka vakataroga voli se sala cava meu na toboka tale kina na gauna sa lako oqo. Au vakavinavinakataka, ni sa rui dau vosota vakadede ka dau loloma na Turaga ka vakavulica vei au ena siga ko ya e dua na lesoni totoka.
Niu dabe sobu ena rumu ni soqoni, a dolele mai e dua na marama gone ka vakasolokakana ena vakarokoroko, “Au lomaleqa. Se qai ikarua ni noqu lako mai ki na valetabu. E rawa beka ni o vukei au?” E kila rawa beka vakacava ni sa ikoya sara ga oqori na malanivosa au via rogoca? E sega ni kila o koya, ia e kila na Tamada Vakalomalagi. A vakaraica toka na noqu gagadre levu duadua. Au gadreva meu veiqaravi. A vakauqeta na marama gone oqo me qaravi au ena nona sureti au meu qaravi koya. Au vakadeitaka vei kemuni ni a yaga vakalevu cake vei au.
Au vakaraitaka ena vakavinavinaka levu na levu ni tamata Vakarisito na nodra bula ka ra a veiqaravi ena vuku ni neitou matavuvale ena loma ni veiyabaki. Au vakaraitaka na noqu vakavinavinaka mai vu ni yaloqu vua na watiqu lomani kei na matavuvale, era veiqaravi ena nodra guilecavi ira vakaiira ka vakakina ena loloma levu.
Meda segata taucoko meda vakararai mada, ka qai veiqaravi. Ni da vakayacora vakakina, eda sa rokova tiko na noda veiyalayalati, ia na noda veiqaravi, me vakataki Peresitedi Monson, ena ivakadinadina ni noda bula vakatisaipeli. Au kila ni bula tiko na iVakabula. Na Nona Veisorovaki ena rawa kina vei keda meda bulataka na Nona ivakavuvuli. Au kila ni noda parofita nikua o Peresitedi Monson. Ena yaca i Jisu Karisito, emeni.