Ni sa kidavaki ki na Koniferedi

Mai vei Peresitedi Thomas S. Monson

Meda qai vakarorogo sara vakamatua ki na veitukutuku …, me rawa ni da vakila na Yalotabu ni Turaga ka rawata na kila-ka e gadreva o Koya me baleti keda.

Au raica ni sa tawa kece sara ga na idabedabe—vakavo ga e vica ka toka oya mai muri. Oya na vanua me na vakavinakataki. Qo ena veivuke vei ira ka ra na bera toka mai vakalailai, baleta na osooso ni gaunisala, me na tiko e dua na nodra idabedabe ni ra yaco mai.

Nikua e dua na siga talei—siga ni koniferedi. Rogo vinaka dina na nodra lagasere na matasere. Na veigauna au rogoca kina na matasere se rogoca na oqani se rogoca na piano, au dau nanumi tinaqu ni dau kaya, “au taleitaka na veika kece o sa rawata rawa, na koroi ni vuku kece o sa rawata, kei na veika o sa qarava oti mai. Na ka ga e mositi au ni o sega ni toka vata kei na piano.” Vinaka, Nau. Au gadreva sara ga meu a cakava.

Sa totoka dina, oi kemuni na taciqu kei na ganequ, meu kidavaki kemuni ki na ika 182 ni Koniferedi Raraba Vakayabaki ni Lotu i Jisu Karisito ni Yalododonu Edaidai.

Mai na noda sota taumada ena ono na vula sa oti, e tolu na valetabu vou era sa mai vakatabui, ka dua na valetabu a vakatabui tale. Ena Me e a noqu madigi meu vakatabuya na Kansas City Missouri Temple totoka ka tiko talega ena veivakamarautaki vakaitaukei ka salavata kaya. Au na qai vakamacalataka vakamatata na veivakamarautaki oya ena noqu vosa ni mataka.

Ena June, a vakatabuya kina o Peresitedi Uchtdorf na valetabu e Manaus, Brazil ka a waraki tu mai vakabalavu, ka vakakina ena Sepiteba, a vakatabuya tale o Peresitedi Henry B. Eyring na valetabu ka vakavoutaki e Buenos Aires, Argentina, na valetabu kau a vakatabuya taumada ni rauta e 27 na yabaki sa oti. Ena rua ga na macawa sa oti, a vakatabuya kina o Peresitedi Boyd K. Packer na Brigham City Temple ena tauni vakaitikotiko e a sucu ka susugi kina.

Me vaka au sa vakamacalataka eliu, e sega na iyauqaqa e ta-ra na Lotu me uasivita e dua na valetabu, ka keitou marautaka ni sa vakayagataki tiko e 139 na valetabu e vuravura raraba, ka 27 tale sa vakatakilai oti se tara tiko. Eda vakamuduo ki na veiyauqaqa tabu vakaoqo kei na veivakalougatataki era kauta mai ki na noda bula.

Au marau meu vakaraitaka ena mataka nikua ni na tara tiko e rua tale na valetabu, ka na tara tiko ena vica na vula kei na yabaki sa roro mai ena veivanua oqo: Tucson, Arizona, kei Arequipa, mai Peru. Na matailalai ni veika me baleti rau na valetabu oqo e na qai vakaraitaki yani vakamalua ni sa tauri na kena veivakadonui me tara.

Taciqu kei na ganequ, meu toki tale mada ki na dua na ulutaga—itavi ni kaulotu.

Ena so na gauna sa oti yani eratou a vakatara kina na Mataveiliutaki Taumada kei ira na Kuoramu ni iApositolo Le Tinikarua mera laki kaulotu na cauravou mai na so na vanua era sa yabaki 18 ka ra sa buladodonu, rawata, sa vakacavara nodra vuli ena koronivuli torocake, ka vakaraitaka na nodra gagadre dina mera na kaulotu. Oqo esa ivakarau tudei tu mai ki na so ga na vanua vakatabakidua ka sa vakatara e udolu na cauravou mera kaulotu ka qarava talega na nodra itavi vakamataivalu kei na sasagataki ni vuli.

Sa totoka sara tu ga mai na nodra veiqaravi na yabaki 18 qoka. Era vakaraitaka mai na nodra peresitedi ni kaulotu ni ra yalodina, dau vakabauta, matua, ka dau veiqaravi ena yalodina me vakataki ira na daukaulotu qasecake ka ra veiqaravi vata voli. Na nodra yalodina, talairawarawa, kei na yalomatua sa vakavuna na neitou gadreva na ivakarau ni kaulotu vakaoya mera taurivaka taucoko na cauravou, veitalia ga se matanitu cava era cavutu mai kina.

Au marau meu vakaraitaka ni tekivu sara ga oqo, o ira kece na cauravou e rawata ka buladodonu, sa tauri ivola oti mai na koronivuli torocake se dua na kena e tauvata kaya, se evei ga era vakaitikotiko kina, sa na nodra na lewa me ra vakadonui ki na buturara ni kaulotu vakatekivu ni ra yabaki 18 ka sega ena yabaki 19. Au sega ni vakatututaka tiko mera veiqaravi—se dodonu mera veiqaravi—taucoko na cauravou ena yabaki lailai oqo. Ia, me vakatau ga ena kedra ituvaki yadudua kei na nodra vakatulewa na iliuliu ni matabete, ka ni sa vakadonui na lewa oqo.

Ena neitou a vakasamataka vakatitobu ena masumasu se gauna cava e dodonu mera na kaulotu kina na cauravou, keitou sa vakadikeva tale tikoga na yabaki ni bula me na veiqaravi kina e dua na goneyalewa. Nikua, au marau meu vakaraitaka ni o ira kece na goneyalewa e rawata, buladodonu, ka tiko vua na gagadre me veiqaravi sa rawa ni ra vakadonui ki na buturara ni kaulotu vakatekivu ni ra yabaki 19 ka sega ena yabaki 21.

Keitou vakadeitaka ni cakacaka ni kaulotu e itavi ni matabete—ka keitou sa vakauqeti ira kece na cauravou era sa buladodonu tu, ka bulabula vinaka, ka tuvaki vinaka tu na nodra vakasama mera sa na tu vakarau ki na kaci ni veiqaravi. Levu talega na goneyalewa era sa veiqaravi tiko, ia era sega ni vauci ena veidinadinati sa tu oqo vei ira na cauravou. Keitou vakadinati ira na goneyalewa ena Lotu, ena veivuke vakaitamera era sa vakaitavitaki ira kina va-kaulotu ka da vakavinavinakataka na nodra veiqaravi.

Keitou tomana na gadrevi tiko ni so tale na mataveiwatini matua. Kevaka e rawa, ka sa gauna donu ni nomuni vakacegu, ka vakina ke se tudonu tu na ituvaki ni nomuni bula, au sa veivakauqeti vei kemuni mo ni soli kemuni ki na veiqaravi vakadaukaulotu tudei. Erau na rawata ruarua na veiwatini na marau levu ena nodrau qaravi ira na luvei Tamada.

Oqo kemuni na taciqu kei na ganequ, meda qai vakarorogo sara vakamatua ki na veitukutuku ka na kaburaki ena loma ni rua na siga mai oqo, me rawa ni da vakila na Yalotabu ni Turaga ka rawata na kila-ka e gadreva o Koya me baleti keda. Me yaco dina kina vei keda vakaoya, sa noqu masu, ena yaca i Jisu Karisito, emeni.