Kōn Menin raar Kaenōm̧m̧an Mijak ko Aer

Jān Elder David A. Bednar

Jen Doulul eo an Jon̄oulruo Rijilōk ro

Jab āinwōt mijak ko an laļ in im rej kōm̧m̧an idin̄ im mijak, mijak Anij ej men eo ej letok aenōm̧m̧an, kam̧ool, im lōke.

Ij lukkuun kememejļo̧k juon en̄jake ekar waļo̧k n̄an n̄a ke ikar ļaddik jidikdik. Juon raan ke ikar ikkure ippān ro m̧ōtta, ilo jirilo̧k iaar rube juon wūntō ilo juon m̧ōn wia turin m̧weo im̧ōm. Ilo an kūlaaj ko ejepelōklōk im kar jan̄ ainikien security alarm ilo ellaaj, juon mijak ekar kōm̧m̧an aō n̄ak m̧akūtkūt ekar jelet eō im kōlmenļo̧kijeņ eo aō. Ikar m̧ōkaj im kile ke ikar aikuj in pād ilo jikin kalbuuj ilo aolepān raan in mour ko aō. Jinō im Jema rekar medek e eō bwe in itok jen ium̧win jikin kiki eo aō ijo ikar tileekek ie im jipan̄ eō bwe in kōm̧m̧an koņ ippān armej eo an m̧ōn wia eo. Men eo em̧m̧an, men eo ruō ekar jako.

Mijak eo ikar en̄jake raan eo ekar tōr jān jon̄an im lukkuun in m̧ool. Kom̧ ejeļo̧k kajjitok kake ke em̧ōj ami ioon kain jōkjōk rōt in eļapļo̧k an kamjak ālkin ami ron̄ kamijak eo ilo ājmour an juon armej, ron̄ ke juon uwaan baam̧le eo epen n̄an e ak kauwōtata, ak lale men ko rejjab em̧m̧an rej waļo̧k laļ in. Ilo kain jōkjōk rōt kein, en̄jake in inepata ko an mijak rej jarjar kōn kamijak an kauwōtata, jab jeļā, ak metak im kōn en̄jake ko me jab kōtmene kaki, jet iien jidimkij, im āinwōt rej kwaļo̧k juon uwaak eo ejjab em̧m̧an.

Ilo mour ko ad kajjojo raan, ejjab jem̧ļo̧k an itok ennaan in ro rej m̧anm̧an, n̄ūta, tariņae, jerbal nana, terrorism, ļapļo̧k in nana ilo mour in, nan̄inmej, im jorāān ko rej waļo̧k jen kajoor ko an laļ in make remaron̄ kōm̧m̧an bwe en waļo̧k mijak im leln̄o̧n̄. Em̧ool jej mour ilo juon tōre eo kar kanaan kake jen Irooj im bwe Aolepen laļin naaj tarpok, im bwe būruwōn armej naaj likjab jen er make (lale D&C 45:26).

Kōtōbar eo aō ej n̄an kōmleleik ewi wāween an mijak jako jen jeļā eo ejim̧we an tōmak ilo Irooj Jisōs Kraist. Ij jar bwe Jetōb Kwojarjar enaaj kōjeram̧m̧an kajjojo iaad ilo ad jim̧o̧r lōmņak kōn menin kōnono in eaorōk.

Mijak ko an Mour in Kanniōk

Ke ekar ron̄ ainikien Anij ālkin an kar bōk leen eo em̧ōj kamoiki, Adam im Eve erro make raar tileekek ilo Jikin Kallūb in Eden. Anij ekar kūr Adam im kajjitōk, “Ewi kwe? Im [Adam ekar uwaak], ikar ron̄ ainikiōm̧ ...  , im ikar mijak” (Jenesis 3:9–10). Jej aikuij in kar jeļā ke, juon iaan men kein renaaj kar bōk jikin ilo wōtļo̧k eo bwe Adam im Eve ren en̄jake mijak. En̄jake in ekajoor ej juon iaan m̧ōttan ko raorōk an mour in kanniōk in ad.

Juon waanjon̄ak jen Bok in Mormon eo ej pedped ioon kajoor eo epād ilo jeļā kōn Anij. (Lale 2 Piter 1:2–8; Alma 23:5–6) n̄an joļo̧k mijak im boktok aenōm̧m̧an jekdoon n̄e jej jelm̧ae jerata.

Ilo āneņ Hilam, armej ro an Alma rekar mijak jen jarin tariņae eo an Rilaman ro rekar itok ņae er.

“A Alma eaar ilo̧k im jutak ilubwilijier, im kōpran er bwe ren jab mijak, a bwe ren kememej Irooj aer Anij im Enaaj lo̧mo̧ren er.

“Kōn menin raar kaenōm̧m̧an mijak ko aer” (Mosaia 23: 27–28).

Kwoj ke kile ke Alma ekar jab kaenōm̧m̧an mijak ko an armej ro. Ijelokin, Alma ekar kapilōk rittōmak ro n̄an kememej Irooj im lomoren eo wōt E emaron̄ letok. (lale 2 Nipai 2:8). Im jeļā eo kōn kōjparok eo an Rilo̧mo̧o̧r eo ej kōm̧m̧an bwe armej ren kaenōm̧m̧an mijak ko aer make.

Jeļāļo̧kijeņ eo ejim̧we kōn tōmak ilo Irooj ej letok ad kajoor n̄an kaenōm̧m̧an mijak ko ad kōnke Jisōs Kraist ej un eo wōt n̄an aenem̧m̧an eo ejelok jemļo̧kin. Ekar ba, Katak kōn n̄a, im ron̄jake naan ko An. Jej aikuj etetal ilo ettā jān Jetōb eo An, im enaaj wōt ippād aenōm̧m̧an ilo E (lale D&C 19:23).

Maajta eo ekar bar kōmļeļeiki ro rej kōm̧m̧ani jerbal ko an mour jim̧we naaj bōk jinekjej eo aer: aenōm̧m̧an ilo mour in, im mour indeeo ilo mour eo ej itok (lale D&C 59:23).

Lōke im kōjardikdik ilo Kraist im wūjlepļo̧k ilo pedped ioon tello̧ke, im tiriamokake, im jouj rej tōllo̧k n̄an kōjatdikdik kōn Pinmuur ilo Jerkakpeje im mour indeeo (laleMoronai 7:41). Tōmak im kōjatdikdik kein rej karwaineneik n̄an mour kein ad aenem̧m̧an eo kōjwōj aolep jej pukote. Kajoor eo an pinmuur eo ej kōm̧m̧an bwe ukweļok en pidodo im kaenem̧m̧an jorāān ko rej waļo̧k jen jerawiwi; ej bar āinwōt kōkajoorļo̧k kōj n̄an lo, kōm̧m̧an, im erom em̧m̧anļo̧k ilo wāween ko jejjab maron̄ in kar kili ak kōm̧m̧ani kōn jon̄an kein jejjabwe kaki ilo mour in ad. Ilo m̧ool, juon iaan kōjerm̧m̧an an rijilōk ro rōtiljek ej “aenōm̧m̧an jān Anij, eo ej eļļā jān jeļā otemjej”(Pilippai 4:7).

Aenōm̧m̧an eo Kraist ej letok ej kōm̧m̧an bwe jen melele kōn mour in jen ad jeļā kōn mour indeeo im letok juon dim ilo mour in Jetōb (lale Kolosse 1:23) eo im ej jipan̄ kōj dāpij wōt kijejeto eo ad n̄an ijo jej jibadōke ilan̄. Kōn men in, jemaron̄ in jeram̧m̧an n̄an kaenōm̧m̧an mijak ko ad kōnke katak ko An rej letok kōtōpar im iaļ ilo aolepān wāween ilo mour kein ad. Katak ko im bujen ko an rej kapen im kaenōm̧m̧an ilo iien ko jim̧o̧r rem̧m̧an im nana. Im mālim eo an Priesthood eo An rej kapen ke men ko raorōktata remaron̄ pād n̄an kiō im indeeo.

Bōtaab jemaron̄ ke kaenōm̧m̧an mijak ko ad ilo an pidodo ad inepata ilo mour in jej pād ie? Uwaak eo an kajjitōk in ealikkar ej “aet.” Jilu pedped in katak ko rej ioļapļap in bōk kōjeram̧m̧an in ilo mour kein ad: (1)  reilo̧k n̄an Kraist, (2)  kalōk ioon pedped an Kraist, im (3) bun̄ m̧aanļo̧k kōn tōmak ilo Kraist.

Reilo̧k n̄an Kraist

Kapilōk eo Alma ekar leļo̧k n̄an laddik eo nejin Hilamōn ej lukkun in bar jerbal n̄an kōj kajojo rainin: “Aet, lale bwe kwōn reilo̧k n̄an Anij im mour” (Alma 37:47). Jen reilo̧k n̄an im kōm̧m̧an bwe kijejeto eo ad bwe en dim ioon Rilo̧mo̧o̧r ien otemjej im ilo jikin otemjej.

Kememej wāween an Rijilōk ro an Irooj kar pād ioon wa eo, kar bun̄to bun̄tak ilometo. Jisōs ekar ilo̧k ippāer, etetal ioon dān; ak kar jab kile E, rekar lam̧ōjļo̧k ilo aer mijak.

“Ak e m̧ōkaj an Jisōs kōnono n̄an er im ba, Kom̧win peran; N̄a E; kom̧win jab abwinmake.

“Im Piter e uwaak E im ba, Irooj, eļan̄n̄e Kwe ņe, Kwōn jiron̄ eō bwe in iwōj n̄an Ippam̧ ioon lo̧jet.”

“Im Ej ba, Kwōn itok” (Matu 14:27–29).

Innām Piter ekar etal ioon dān ļo̧k n̄an Jisōs.

“A ke ej lo kōto, e mijak,” im ej jino an tuļo̧k, im e lam̧ōj im ba. “Irooj, Kwōn lo̧mo̧o̧ren eō.

Im e m̧ōkaj an Jisōs Jisōs erloke pein, im dāpij e im ba n̄an e, O kwe e dik am̧ tōmak, etke kwaar pere?”(Matu 14:30–31).

Ij lo uwaak eo an Piter ilo an ikdeelel im m̧ōkaj n̄an kūr eo an Rilo̧mo̧o̧r. Ilo an mejen erreilo̧k wōt n̄an Jisōs, ekar to jen wa eo im kōm̧m̧an bwe en etetal ioon dān ilo kabwilōn̄lōn̄. Ijelo̧kin wōt ke ekar m̧ad ippān kōto eo im ņo̧ ko ekar jino leln̄o̧n̄ im jino an timlaļ ļo̧k.

Jemaron̄ in jeram̧m̧an n̄an anjo ioon mijak ko ad im kōkajoorļo̧k tōmak ko ad ilo ad ļo̧o̧r naan in tōl eo an Irooj n̄an reilo̧k n̄an E ilo aolep ļōmņak, n̄an jab pere, im jab mijak (lale D&C 6:36).

Ekkal ioon Pedped eo an Kraist

Hilamōn eaar katakin laddik ro nejin Nipai im Liai, “Kememej, kememej, bwe ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami; bwe n̄e devil enaaj jilkintok kōto ko an rekajoor, aaet, mōdi ko an ilo aire, aaet, n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄”(Hilamōn 5:12).

Kain̄i ko im bujen ko rej ejm̧aan ko jej kōjerbali n̄an kalōk mour ko ad ioon pedped eo an Kraist im Pinmuur eo An. Jej ekkejel ilo ineem̧m̧an n̄an im ippān Rilo̧mo̧o̧r eo n̄e jej mour jim̧we ilo būk kain̄i im deļo̧n̄ ilo bujen ko, tiljek ilo kememej im kauteij kallim̧ur ko rekwojarjar, im kōm̧m̧ane ijo em̧m̧an tata ippād n̄an mour ekkar n̄an eddo ko jaar būki. Im bwe kōtaan eo ej un eo an kajoor ilo jetōb im dim eo ilo aolep jekjek ko an mour ko ad.

Jemaron̄ in jeram̧m̧an n̄an kaenōm̧m̧an mijak ko ad ilo ad dim ilo kalōk ikdeelel ko ad im jerbal ko ad ioon pedped em̧ool epen an Rilo̧mo̧o̧r kōn kain̄i ko im bujen ko.

Bun̄ M̧aanļo̧k kōn Tōmak ilo Kraist

Nipai ekar ba: “Kōn menin, kom̧ aikuij bun̄ m̧aanļo̧k kōn dim ilo Kriast, Kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin, n̄e kom̧ naj bun̄ m̧aanļo̧k, kwojkwoj ioon naan an Kraist, im niknik n̄an jem̧ļo̧kin, lo, āindein Jemān ej ba. Kom̧ naaj bōk mour indeeo”(2  Nipai 31:20)

Niknik ilo kiel kar kōmleleik ilo eoon in ej uwaak in meļeļe in ilo jetōb im bōklōkōt, kijin̄en̄e, kijenmej, im jouj an Anij. Kaminene kōjerbal tōmak ilo im kōn āt eo ekwojarjar etan Jisōs Kraist, m̧ōņōņō in wūjlepļo̧k n̄an kōņaan ko An im iien ko An ilo mour kein ad, im kile ilo ettā jipan̄ eo An ilo aolep men rej tōlļo̧k n̄an men ko raenem̧m̧an an aelōn̄ in kiin̄ eo an Anij im rej boktok lan̄lōn̄ im mour indeeo (lale D&C 42:61). Jekdoon n̄e jenaaj jelm̧ae men ko reppen im mejek men ko jejjab jeļā ilju im jakļaj, jemaron̄ m̧ōņōņō ilo kepooj kōj im mour juon “mour eo eanem̧m̧an im obrak kōn mour ko rem̧m̧an im m̧ool” (1  Timote 2:2).

Jemaron̄ jeram̧m̧an n̄an kaenōm̧m̧an mijak ko ad ilo ad bōk kajoor eo im ej itok jen ekkatak im mour kōn pedped in katak ko an gospel in im kōn juon kōlmenļo̧kjen epen ñan bun̄ m̧aanļo̧k n̄an iaļ eo an bujen eo.

Mijak Irooj

Oktak jen ak ej āinwōt mijak ko jej aolep ien iooni ej ta eo jeje ko rekwojarjar rej kōmleleiki āinwōt “mijak anij” (Hibru 12:28) ak “Mijak eo n̄an Anij” (Job 28:28, Jabōn Kenaan 16:6; Aiseia 11:2–3). Ejjan āinwōt mijak eo im ej boktok ikkūm̧kūm̧ im leln̄o̧n̄, mijak anij ej kabwe aenem̧man, jokne, im kōjatdikdik.

Ak ewi wāween an jabdewōt men kar koba ippān mijak erom kōketak ak jipan̄ ilo jetōb?

Mijak ilo jim̧we ij kajjieon̄ kōmeļeļeik ekitbuuj juon en̄jake em̧wilaļ an kautiej, jeļā ņae, im kūle n̄an Irooj Jisōs Kraist (lale Sam ko 33:8; 96:4), pokake kien ko An (lale Duteronomi 5:29; 8:6; 10:12; 13:4; Sam ko 112:1), im lem̧ōņōņō eo kōn iien ekajet eo āliktata im kien tūriam̧o̧ ilo E. Kōn menin, mijak anij ej jebar jen melele eo ejim̧we an lukkun paaktokin im mijen eo an Irooj Jisōs Kraist, juon kōņaan n̄an ajeļo̧k kōtōpar ko ad n̄an kōtōpar eo An, im juon jeļā ke aolep em̧m̧an im kōrā renaaj eddoik bōd ko an make ilo Raan in Ekajet eo (lale D&C 101:78; Laajrak in Tōmak ko 1:2).

Ilo an jeje ko rekwojarjar kapen, mijak Jeova jinoin jelālokjen ((Jabōn Kōnnnan Ko 1:7), “naan in katak an meletlet” (Jabōn kennan ko 15:33), juon lōke ekajoor (Jabōn Kōnnnan Ko 14:26), im “juon unin mour” (Jabōn Kōnnan Ko 14:27).

Jouj im melele bwe mijak ilo anij ej ekkeijelļo̧k wōt ippen melele kōn Ekajet eo Āliktata im eddo eo ad make n̄an ikdeelel ko ad, lōmņak ko, im naan ko, im m̧akūtkūt ko (lale Mosaia 4:30). Mijak Irooj ejjab melele in m̧ akoko in itok n̄an im̧aan Mejen n̄an ekajet. Ijjab tōmak jenaaj mijak E n̄an jidik. Bōtaab, ej jōkjōk eo im̧aan mejen n̄an jelm̧ae men ko einwōt aer kar waļo̧k n̄an kōj make im wōr juon “juon jeļāļo̧kijeņ e weppen” ((2 Nipai 9:14; bar lale Alma 11:43) bōd ko jekar kōm̧m̧ani, jab m̧ool ko, im riap e kōj make. Āliktata, jenaaj iļo̧k ilo ejjeļo̧k jōkpen kake.

Aolep armej ro rekar mour ak renaaj mour ioon laļin “naaj bōkļo̧k n̄an im̧aan jikin ekajet an Anij, n̄an ekajet er ekkar n̄an jerbal ko aer n̄e raar em̧m̧an ak n̄e raar nana” (Mosaia 16:10). Elan̄e ikdeelel ko ad renaaj kar em̧m̧an im jerbal ko ad rem̧m̧an, innem jikin ekajet eo enaaj kam̧ōņōņō (lale Jekab 6:13; Enos 1:27; Moronai 10:34). Im ilo raan eo āliktata jenaaj “leļok n̄an e jinekjej n̄an weppān” (Alma 41:6).

Bōtaab, elan̄e ikdeelel ko ad rekar n̄an men ko renana im jerbal ko ad rekar nana, innām jikin ekajet eo enaaj menin kaamjak. “Jej jamin maron̄ reilōn̄ļo̧k n̄an mejān ad Anij; im jenaaj m̧ōņōņōļo̧k elan̄n̄e je maron̄ kar jiron̄ dekā ko im to̧ļ ko n̄an noj kōj jān im̧aan mejān” (Alma 12:14). Im ilo raan eo āliktata “bōk jinekjej in nana [eo ad]” (Alma 41:5).

Einwōt an kwaļo̧k ilo Ekklisiastis:

“Mijak Anij im pokake kien ko An: bwe en̄in ej eddo eo an armij ro.

“Bwe Anij e naj bōktok jerbal otemjej ilo ekajet, im jabdewōt eo emwij noje, elan̄e em̧m̧an ak nana” (Ekklisiastis 12:13–14).

Ro jeiu im jatū jitōnboro, mijak ilo Anij ej joļo̧k mijak ko an mour in. Ej kadikļo̧k inepata eo ekalokjak bwe jejjab maron̄ em̧m̧an n̄an tōpar im jāmin tōpar jon̄ak ko Irooj ej aikuji im kōtmeni jen kōj. Ilo m̧ool, jejjab maron̄ in tōpar em̧m̧an eo ak jon̄ak ko ilōn̄ kōn kōj make im kōm̧m̧an ko ad. Jerbal ko ad im ikdeelel ko ad make rejjab lomoren kōj. “Ālkin aolep ijo jemaron̄ kōm̧m̧an” ((2  Nipai 25:23), jej erreo jen tūriam̧o̧ im jouj ko rej itok jen pinmuur eo indeeo im ejeļo̧k jem̧ļo̧kin an Rilomoor eo (lale Alma 34:10, 14). Ilo ejeļo̧k pere, “Kimij tōmak bwe kin En̄tan eo an Kraist, aolep armmij renaj bōk lomor, Kin bokake kien ko im kain̄ ko ilo Gospel eo” (Laajrak in Tōmak Ko 1:3).

Mijak ilo Anij ej iakwe im lōke ilo E. Ilo ad ļapļo̧k ad mijak Anij, eļapļo̧k ad weppen ad iakwe E. Im “iakwe eweppān ej joļo̧k mijak otemjeļo̧k” (Moronai 8:16). Ij kallim̧ur ke kōjatdikdik eo an mijak Anij enaaj ubakeļo̧k men ko renana rej waļo̧k jen mijak ko ad ilo mour in (laleD&C 50:25) ilo ad reilo̧k n̄an Rilomoor eo, ekkal ioon āinwōt pedped eo ad, im bun̄ m̧aanļo̧k ilo ial in bujen eo An kōn kallim̧ur ko jej ajiļo̧k.

Naan in kam̧ool im Kallim̧ur

Ij iakwe im katutiej Irooj. Kajoor im ine em̧m̧an eo an rej m̧ool. E ej ad Ripinmuur, im ij kam̧ool E emour. Im kōn E, būruwō ejamin inepata ak mijak (lale Jon 14:27), im jenaaj jeram̧m̧an n̄an kaenōm̧m̧an mijak ko ad. Ij lukkun kam̧ool ilo āt eo ekwojarjar etan Jisōs Kraist, amen.