[Faatumauina] Pea le Faamagaloina o a Outou Agasala
Saunia e Elder David A. Bednar
O Le Korama a Aposetolo e Toasefululua
Ma e ala i le mana faapaiaina o le Agaga Paia e fai ma a tatou soa tumau, e mafai ai ona tatou faatumauina pea se faamagaloga o a tatou agasala.
O se fasifuaitau loloto sa faaaoga e le Tupu o Peniamina i ana aoaoga e uiga i le Faaola ma Lana Togiola ua avea pea ma se autu laualuga o a’u suesuega ma mafaufauga loloto mo le tele o tausaga.
I lana lauga faagaeetia faaleagaga na faamavae ai i tagata na ia auauna ma alofa i ai, sa faamatala ai e le Tupu o Peniamina le taua o le iloaina o le mamalu o le Atua ma le olioli i Lona alofa, o le mauaina o se faamagaloga o agasala, o le manatuaina pea o le silisili o le Atua, ma le tatalo i aso uma ma le tumau ma le le mafaagaeetia i le faatuatua. Na ia folafola atu foi o le faia o nei mea, “o le a outou olioli pea, ma faatumuina i le alofa o le Atua, ma [faatumauina] pea le faamagaloga o a outou agasala.”
O la’u savali e taulai atu i le mataupu faavae o le [faatumauina] pea o se faamagaloga o a tatou agasala. O le upumoni o loo faailoaina i lenei fasifuaitau e mafai ona faamalosia ai lo tatou faatuatua i le Alii o Iesu Keriso ma faalolotoina ai lo tatou avea ma soo. Ou te tatalo ina ia musuia i tatou ma faagaeetiaina e le Agaga Paia a o tatou iloiloina faatasi ia upumoni taua e faavavau.
Toefanauina Faaleagaga
I le olaga faaletino tatou te oo ai i aafiaga o le fanau mai faaletino ma le avanoa mo le toefanauina faaleagaga. Ua fautuaina i tatou e perofeta ma aposetolo ina ia [fagua] i le Atua, ia “toe fanauina,” ma avea ma tagata fou ia Keriso e ala i le mauaina i o tatou olaga o faamanuiaga ua mafai e ala mai i le Togiola a Iesu Keriso. O “galuega, alofa mutimutivale, ma le alofa tunoa o le Mesia Paia” e mafai ona fesoasoani ia i tatou e manumalo ai i lagona o le manatu faaloloto ma le manatu faapito o le tagata natura ma avea atili o se tagata le manatu faapito, agalelei ma tagata paia. Ua poloaiina i tatou ia ola faapena ina ia mafai ona tatou “tutu ma le le pona i luma [o le Alii] i le aso gataaga.”
O Le Agaga Paia ma Sauniga Faaleperisitua
Sa aoteleina e le Perofeta o Iosefa Samita le maoti o le taua o le matafaioi o sauniga faaleperisitua i le talalelei a Iesu Keriso: “O le toe fanauina e oo mai i le Agaga o le Atua e ala mai i sauniga.” O lenei faamatalaga ootia ua faamamafa ai matafaioi a le Agaga Paia ma sauniga paia i le faagasologa o le toefanauina faaleagaga.
O le Agaga Paia o le tagata lona tolu o le Aiga Atua. O Ia o se peresona o agaga, ma e molimau mai i upumoni uma. I tusitusiga paia o loo faasino atu ai i le Agaga Paia o Le Faamafanafana. se Faiaoga, ma se Talifaaaliga. Ma le isi, o le Agaga Paia o Le e Faapaia lea na te faamamaina ma susunuina mea le mama ma mea leaga mai agaga o tagata e peiseai o susunuina i se afi.
O sauniga paia e tutotonu i le talalelei a le Faaola ma i le faagasologa o le o mai ia te Ia ma le sailia o le toefanauina faaleagaga. O sauniga o faatinoga paia e i ai le faamoemoega faaleagaga, le taua e faavavau, ma e fesootai ma tulafono ma faatonuga a le Atua. O sauniga faaola uma ma le sauniga faamanatuga e tatau ona faatagaina e se tasi o loo umiaina ki tatau ai o le perisitua.
O sauniga o le faaolataga ma le faaeaga o loo faatautaia i le Ekalesia toefuataiina a le Alii e matua sili atu lava i lo sauniga po o faatinoga faafaatusa. Ae, latou te faia ni auala faatagaina ia e mafai ai e faamanuiaga ma mana o le lagi ona tafe mai i o tatou olaga taitoatasi.
“Ma o le perisitua tele lea e pulea le talalelei ma umia le ki o mealilo o le malo, o le ki lava lea o le malamalama e uiga i le Atua.
“O lea, o ona sauniga, ua faaalia ai le mana o le faale-atua.
“Ma a aunoa ma ona sauniga, ma le pule o le perisitua, e le faaalia mai le mana o le faale-atua i tagata i la le tino.”
O sauniga e mauaina ma faamamaluina i le amiosa’o e taua i le mauaina o le mana o le faaleatua ma faamanuiaga uma ua avanoa e ala mai i le Togiola a le Faaola.
Mauaina ma le Faatumauina o se Faamagaloga o Agasala e Auala mai i Sauniga
Ina ia malamalama atoatoa atili i le faagasologa lea e mafai ona tatou maua ai ma faatumauina i taimi uma se faamagaloga o a tatou agasala, e manaomia ai ona tatou malamalama muamua i le sootaga le mavavaeeseina i sauniga paia e tolu lea e maua ai le avanoa i mana o le lagi: papatisoga e ala i le faatofu, faaee o lima mo le meaalofa o le Agaga Paia, ma le faamanatuga.
O le papatisoga e ala i le faatofuina mo le faamagaloina o agasala “o le sauniga amata lea o le talalelei” a Iesu Keriso ma e tatau ona muamua ai le faatuatua i le Faaola ma le salamo faamaoni. O lenei sauniga “o se faailoga ma o se poloaiga ua faatulagaina e le Atua mo [Lana fanau] ina ia ulufale atu ai i Lona malo.” O le papatisoga e faatautaia i le pule o le Perisitua Arona i le faagasologa o le o mai i le Faaola ma le toefanauina faaleagaga, ua maua i le papatisoga se uluai faamamaaga e tatau ai mo o tatou agaga mai le agasala.
O le feagaiga o le papatisoga ua aofia ai tautinoga faavae e tolu: (1) ia loto ina ave i o tatou luga le suafa o Iesu Keriso, (2) ia manatua pea o Ia, ma le (3) ia tausi i Ana poloaiga. O le faamanuiaga folafolaina mo le faamamaluina o lenei feagaiga o le, “ia [tatou] maua pea lona Agaga e faatasi ma i [tatou].” O le mea lea, o le papatisoga o le sauniuniga taua lea e maua ai le avanoa faatagaina mo le mafutaga faifai pea a le tagata lona tolu o le Aiga Atua.
“O le papatisoga [i le] vai … e tatau ona sosoo ai ma le papatisoga a le Agaga ina ia atoatoa ai.” E pei ona aoao atu e le Faaola ia Nikotemo, “Afai e le fanau se tasi i le vai ma le Agaga, e le mafai ona sao o ia i le malo o le Atua.”
O faamatalaga e tolu a le Perofeta o Iosefa Samita ua faamamafa ai le sootaga taua i le va o sauniga o le papatisoga e ala i le faatofuina mo le faamagaloina o agasala ma le faaee atu o lima mo le meaalofa o le Agaga Paia.
Faamatalaga 1: “O le papatisoga o se sauniga paia lea e sauniuni ai mo le mauaina o le Agaga Paia; o se auala lea ma le ki o le a auauna mai ai le Agaga Paia.”
Faamatalaga 2: “E sili ai lou papatisoina o se taga oneone i lo le tagata, pe a le faia e tusa ma le faamagaloga o agasala ma le mauaina o le Agaga Paia. O le papatisoga i le vai ua na o le afa o le papatisoga, ma e leai ma sona lelei e aunoa ma le isi afa—o lona uiga, o le papatisoga a le Agaga Paia.”
Faamatalaga 3: “O le papatisoga i le vai, e aunoa ma le papatisoga i le afi ma le i ai o le Agaga Paia, e leai se aoga; e tatau ma e le mavavaeina lo la fesootaiga.”
O le fesootaiga faifai pea i mataupu faavae o le salamo, sauniga o le papatisoga ma le mauaina o le meaalofa o le Agaga Paia, ma le faamanuiaga mamalu o le faamagaloga o agasala o loo faamamafaina pea lava pea i tusitusiga paia.
Sa tautino mai Nifae, “Aua o le faitotoa e tatau ona outou ulu atu ai o le salamo ma le papatisoga i le vai; ona oo mai ai lea o se faamagaloga o a outou agasala i le afi ma i le Agaga Paia.”
Na folafola mai e le Faaola Lava Ia, “O lenei o le poloaiga lenei: Ia salamo outou tuluiga uma o le lalolagi, ma o mai ia te au ma ia papatiso i lou igoa. ina ia faapaiaina outou i le taliaina o le Agaga Paia, ina ia outou tutu ma le le pona i ou luma i le aso gataaga.”
O le faaeeina o lima mo le meaalofa o le Agaga Paia o se sauniga e faatautaia i le pule o le Perisitua Mekisateko. I le faagasologa o le o mai i le Faaola ma le toefanauina faaleagaga, mauaina o le mana faaleagaga o le Agaga Paia i o tatou olaga e fatuina ai le avanoa o se faamamaaga faifai pea o o tatou agaga mai le agasala. O lenei faamanuiaga olioli e taua ona “e leai se mea e le mama e mafai ona nofo faatasi ma le Atua.”
I le avea ai ma tagata o le Ekalesia toefuataiina a le Alii, ua faamanuiaina ai i tatou uma e ala i lo tatou uluai faamamaina mai le agasala e fesootai ma le papatisoga ma e ala i le gafatia mo se faamamaaga faifai pea mai le agasala lea ua mafai e ala i le mafutaga ma le mana o le Agaga Paia—le tagata lona tolu o le Aiga Atua.
Mafaufau i le auala e faalagolago ai se faifaatoaga i le mamanu lē māsuia o le totoina ma le seleseleina. O le malamalama i le fesootaiga i le va o le luluina ma le seleseleina o se puna faifai pea o le faamoemoega ma faatosina ai faaiuga uma ma faatinoga a se faifaatoaga e faia i vaitau uma o le tausaga. I se tulaga faapea, o le fesootaiga lemavavaeeseina i le va o sauniga o le papatisoga e ala i le faatofuina mo le faamagaloga o agasala ma le faaeeina o lima mo le meaalofa o le Agaga Paia e tatau ona aafia ai vaaiga uma o le avea o i tatou ma soo i vaitausaga uma o o tatou olaga.
O le faamanatuga o le sauniga lona tolu e taua e maua ai le avanoa i le mana o le faaleatua. Ina ia mafai ona tatou tausia atoatoa atili tatou ia le pisia mai le lalolagi, ua poloaiina ai i tatou ia o atu i le fale tatalo ma ofo atu a tatou faamanatuga i le aso paia o le Alii. Faamolemole mafaufau i faatusa o le tino ma le toto o le Alii, le areto ma le vai, ua faamanuiaina uma ma faapaiaina. “Le Atua e, le Tama Faavavau, matou te ole atu i le suafa o lou Alo o Iesu Keriso, ia faamanuia ma faapaia lenei areto [po o lenei] vai i agaga o i latou uma o e e fetagofi [pe feinu] ai.” O le faapaiaina o le faia lea ia mama ma paia. O faatusa o le faamanatuga ua faapaiaina e manatua ai le mama o Keriso, lo tatou faalagolago atoa i Lana Togiola, atoa ai ma lo tatou tiutetauave ina ia faamamalu ai a tatou sauniga ma feagaiga ina ia mafai ai ona tatou “tutu ma le le pona i [Ona] luma i le aso gataaga.”
O le sauniga o le faamanatuga o se valaaulia paia ma fai soo ia salamo faamaoni ma ia faafouina faaleagaga. O le faatinoga o le taumamafa i le faamanatuga, na o le faamanatuga lava, e le faamagaloina ai ni agasala. Ae a o tatou saunia ma le mafaufau loloto i ai ma auai i lenei sauniga paia faatasi ma se loto momomo ma le agaga salamo, ona maua lea o le folafolaga o le a mafai ona tatou maua pea le Agaga o le Alii e faatasi ma i tatou. Ma e ala i le mana faapaiaina o le Agaga Paia e fai ma a tatou soa tumau, e mafai ai ona tatou faatumauina pea se faamagaloga o a tatou agasala.
Ua faamanuiaina moni lava i tatou i vaiaso taitasi e ala i le avanoa e toe iloilo ai o tatou olaga e ala i le sauniga o le faamanatuga, ia toefaafou ai a tatou feagaiga, ma ia maua ai lenei folafolaga o le feagaiga.
Toe Papatisoina
O nisi taimi e faailoa ai e le Au Paia o Aso e Gata Ai le moomooga ina ia mafai ona toe papatisoina—ma o lea e oo ai ina mama ma agavaa e pei o le aso na latou mauaina ai lo latou sauniga faaola muamua o le talalelei. E mafai ona ou fautua atu ma le faaaloalo e le o faamoemoe lo tatou Tama Faalelagi ma Lona Alo Pele mo i tatou ia oo i na lagona o le faafouga faaleagaga,
O sauniga o le papatisoga e ala i le faatofuina, o le faaeeina o lima mo le meaalofa o le Agaga Paia, ma le faamanatuga e le o ni mea tutupu e mavaevae ma tuueseeseina; ae, o i latou o ni elemene i se mamanu fesootai ma tuufaatasia o le alualu i luma i le faaaogaina o le togiola. O sauniga taitasi e sosoo ai e siitiaina ma faalauteleina lo tatou faamoemoega faaleagaga, manaoga, ma faatinoga. O le fuafuaga a le Tama, le Togiola a le Faaola, ma sauniga o le talalelei e maua ai le alofatunoa tatou te manaomia e fetaomi ai i luma ma alualu ai i luma i lea laina ma lea laina ma lea mataupu ma le mataupu e agai atu i lo tatou taunuuga e faavavau.
Folafolaga ma le Molimau
O tatou o tagata soifua le atoatoa o loo tauivi e ola i le ola mama e tusa ma le fuafuaga atoatoa a le Tama Faalelagi o le alualu i luma e faavavau. O mea e manaomia o Lana fuafuaga e mamalu, alofa mutimutivale, ma malosi. Atonu e i ai taimi e faatumulia ai i tatou i le naunautaiga ma o nisi taimi e lagonaina ai le le agavaa atoatoa. Atonu tatou te tuufesili pe o tatou mafaia faaleagaga ona faataunuu le poloaiga o le tutu ma le le pona i Ona luma i le aso gataaga.
Faatasi ai ma le fesoasoani a le Alii ma e ala i le mana o Lona Agaga e “aoao [tatou] i mea uma,” o le mea moni e mafai ona faamanuiaina i tatou ia iloa o tatou gafatia faaleagaga. E valaaulia e sauniga ia faamoemoega faaleagaga ma le mana i o tatou olaga a o tatou taumafai ia toe fanauina ma avea ma ni alii ma ni tamaitai o Keriso. E mafai ona faamalosia o tatou vaivaiga, ma o tatou tapulaa e mafai ona faatoilaloina.
E ui e leai ma se tasi o i tatou e mafai ona ausia le atoatoa i lenei olaga, ae mafai ona faateleina lo tatou agavaa ma le le pisia pe a “faamamaina i tatou e le toto o le Tamai Mamoe.” Ou te folafola atu ma molimau atu o le a faamanuiaina i tatou i le faateleina o le faatuatua i le Faaola ma le faateleina o le faamautinoaga faaleagaga pe a tatou saili atu pea i le faatumauina o se faamagaloga o a tatou agasala, ia i’u ai, i le tutu ma le le pona i luma o le Alii i le aso gataaga. Ou te molimau atu ai i le suafa paia o Iesu Keriso, amene.