Tumunoch anenefengen me Tanechepwak
Nupwen pochokunen ewe fonufan a napeno ne etiwa mi ngaw, sipwe achocho ne nukuchar won ewe aan mi emweniochu kich ngeni ach ewe Chon Amanau.
Fan ew ua kuna ew sain non ew sitowa a apasa, “Pwapwa, $15.00.” Ua fokkun chengen ai mochen sinei ifa ukukun pwapwa ua tongeni meni ren ukukun $15 iwe ua tonong pwe upwe katon. Met ua kuna pwe a chommong affout mi mokukkun me pisekin achem—ese wor ew mettoch ua kuna a tongeni awora ewe sokkun pwapwa minne ewe sain ita a affata! Non ekkei ier, ua ekiek fan chommong usun ena sain me ifa mecheresin ach mi tongeni kutta pwapwa non mettoch mi mokukkun ika mwoch fansour. Kich chon ewe Mwichefenin Jises Kraist ren Aramas mi Pin non Fansoun Soponon, sia feioch ach sinei ifa usun me ian ennetin pwapwa a pwa me ia. A pwa non ach tumunoch ne manaueni ewe kapas allim mi foruta me ren ach Samon me Chon Amanau, Jises Kraist, me non ach achocho ne winiti usun I.
Mi wor emon chiechiem achengicheng emon chon for trein. Non ew ran nupwen a uwei efoch trein won aanan we, a kuna efoch taraku mi kouno won ewe aan me mwan. A mwitir apareni pwe ewe taraku a mwoch me ese tufich an epwe sano epekin ewe aan. A mwitir emweta kasin ewe trein ngeni kinikinin weweita, minne pureikini ew me ew ekkewe sein ewe trein mi ettenitiw arap ngeni ew mwain (1.2 km) mwirin ewe mwesin, mi uwei ukukun 6,500 ton (5,900 metric tons). Ese tufich pwe ewe trein epwe tongeni kouno me mwen epwe purei ewe taraku, minne mi fis Mi murino pwe ekkewe aramas non ewe taraku, ir mi rong ourouren ewe trein mi tiik me ra tou seni ewe taraku mwen epwe purei. Nupwen ewe chon for trein a porous ngeni ewe ponis, emon fefin mi song a feito rer. A puchor pwe mi kuna unusen met a fis me a pwarata pwe ewe chon angangen trein ese mwo sotuni ne eriki seni ewe taraku!
Mi fat, ika ewe chon for trein mi tufichin eriki me suseni aanen ewe trein an esap fis ewe akseten, i me unusen ewe trein epwe tano me tufichin sopono an ewe trein epwe kouno. Mi murino ngeni, ekkewe mechan ewe aanen trein minne wan we trein mi sa won mi omochunuku taian kewe ne sano ngeni ian we epwe no ia inamo ika mi wor ewe eppet won aanan we. Mi murino ngeni kich, kich sia pwan nom won efoch aan, ew aanen pwon sia pwonei nupwen sia papatais pwe sipwe chon ewe Mwichefenin Jises Kraist ren Aramas mi Pin non Fansoun Soponon. Ina mwo sipwe weri ekkoch eppet won ewe aan, ei aan epwe uweikicheno ngeni ikewe sipwe no ia mi auchea feinfeino ika sipwe nukuchar ne nom won.
Ewe nemasepwin ewe iran manau a pwar ngeni kich ifa usun pungun tanechepwak a tongeni emwenikicheno seni ewe aanen pwon. Ekieki pwe ewe wokun mecha me ewe aan mi aukukkun me chokisikis, a emwen ngeni ewe iran manau, ikewe ekkewe feioch meinisin mi kawor me ren ach we Chon Amanau me An Achasefan ra tufich ngeni ekkewe mi tupwon. Mi pwan pwa non ewe nemasepwi ewe chonupunun konik mi wewengeni nimengawen ewe fonufan. Ekkewe pukefel ra awewei pwe ei chonupupu “mi pupuno” unukun ewe aan nge mi chok no “arap” ngeni ewe ira, esap ngeni. Ewe fonufan mi chou ren osukosuk mi tongeni otupano mwo ekkewe mi kefinita, me fori repwe tanechepwak non ar manaueni ar pwon mi pin—iwe a emwenir arap ngeni ewe ira, nge esap ngeni. Ika sise tumunoch non ach manaueni ach pwon mi pin ren wesewesan, ach achocho non tanechepwak epwe emwenikichenong non aan mi pin senikich ika ne choni ekkewe ra fen tonong non ewe watten me womongun imw. Ika sise sise tumunoch eni sipwe fen mwanum non anononun ew chonupupu mi nimengaw.1
Mi wor ew aan tumunoch me ew aan tanechepwak ren ach fori mettoch meinisin, pwan mwo ach manaueni ewe kapas allim. Nupwen sia ekieki ach nukuchar ngeni ewe Chon Amanau, kich mi tumunoch ika tanechepwak? Pokiten nonnomuch won fonufan, esap fan ekkoch sia kan apungu nonnomuch, me awewei ach foffor pwe ese fatafatoch ika achufengeni och ngeni mettoch ese kon och? Inet sia apasa, “nge inamo,” “tiwenon,” ika “nge” nupwen mi wewengeni ach tapweno mwirin aurouren nouch souemwen soufos ika manaueni ewe kapas allim non tumunoch, ennetin sia apasa, “Ena aurour ese wewengeniei.” Kich mi tongeni apungupung inet chok sia mochen, nge ennetin, ese wor ew aan mi pung ne fori mettoch mi muan!
Ewe itenapen serafo non 2019 a feito seniJohn 14:15, ikewe ewe Samon a aurour, “Ika ami mi tongei ei, iwe oupwe anneasochisi ai kewe annuk.” Ika sia tongei I usun kich mi apasa, sisap tongeni pwari ena tong ren ach pwan ekis tumunoch ne manaueni An annuk?
Ach tumunoch ne manaueni ewe kapas allim esap wewen pwe sia pung ika namanam tekia. Met a wewe ngeni pwe a murino non ach ekiek me nonnomuch pwe kich chon kunon Jises Kraist. Nupwen sia ekipwichi sokofesenin tumunoch me tanechepwak non ach manaueni ewe kapas allim, ikkei ekkoch ekiek sipwe nenengeni:
Kich mi tumunoch non ach fenin ewe Sabbath me non ach amwoneta ne angei ewe sakrament iteiten wik?
Kich mi tongeni sipwe kon tumunoch non ach iotek me kaeo pukefel ika angangoch non Feito, Tapweno Mwiri—Fan Iten Pwisin Emon me Famini?
Kich mi tumunoch non ach fenin tempel me kich mi tumunoch me afaniochu ach manaueni ekkewe pwon sia fori atun papatais me non ewe tempel? Kich mi tumunochu nikinikich me ufoufoch non ufach, akkaewin non neni me nonnomuch mi pin? Kich mi tumunochu ifa usun ach ufouf ekkewe ufoufen tempel mi pin? Are fouten ewe fonufan a nemenata ew nikinik mi tanechepwak?
Kich mi tumunochu ifa usun ach iamwir ngeni ekkoch me non ach apwonueta wisach non ewe Mwichefen, are sise pwan afani ika tanechepwak non ach koko ne angang?
Kich mi tumunoch ika tanechepwak non met sia anneani me met sia katon won tv me nouch kewe fon? Kich mi tumunoch non ach kapas? Ika kich mi chok tanechepwak ne etiwa tinochif me kapas me ngaw?
Ewe Ren ewe Pochokunen Serafo puk a masouweni nongonong pwe, nupwen sipwe tumunoch ne fori, repwe efeiochu me anisikich ne nom won ewe aanen pwon. Inamo a mak fan iten ekkewe serafo, nongonongun kewe rese kouno nupwen sia wes seni ekkewe prokramin Ekkewe Anuon me Ekkewe Fopun. Ra och ngeni kich meinisin, fansoun meinisin. Eni ach attona sefani ekkei nongonong repwe pesei ekkoch aanen ach sipwe kon tumunoch non ach manauen kapas allim.
Sisap ekisatiw ach nongonong an epwe fich ngeni ika fori an emon epwe mefi kinamwe. Kich chon kunon Jises Kraist, me kich sipwe etekia ekkoch, seikireta ngeni ew neni mi tekia me pin, ikewe repwe pwan angei feioch watte.
Ua tingorei emon me emon kich ne kutta emwenien ewe Ngun mi Fel ach sipwe sinei met ekkesiwin mi auchea sipwe fori non manauach ach sipwe kon tumunoch ne wenengeni ach kewe pwon. Ua pwan sio ngeni kemi pwe ousap esita ekkoch mi pwan fori ei sai. “Kapung ina wisei, anon ewe Samon.”2 Kich meinisin sia nom non angangen marita me siwin.
Ewe porous mi nom non ewe Puken Mormon usun ekkewe chon Amlici mi rikino mi amwarar ngeniei. Non napanapen ar pwarano ngeni ekkoch pwe rese chiwen chiechi ngeni Jises Kraist me An Mwichefen, ra wata wor ew esisin mi par won chamwer pwe meinisin repwe kuna.3 Non ew aanen ungeni me usun chon kunon Jises Kraist, ifa usun sia esisinna kich? Mi mecheres ngeni ekkoch repwe kuna Nikinikin non nikinikinich me sinei ion sia tupuni ren napanapen ach tumunochu mwokutukutun manauach?
Ren kich aramas pwon, sisap ita nofit ngeni unusen ewe fonufan. Sia fen iteni “aramas mi sokkono”4—a ew mettoch mi och! Nupwen pochokunen ewe fonufan a napeno ne etiwa mi ngaw, sipwe achocho ne nukuchar won ewe aan mi emweniochu kich ngeni ach ewe Chon Amanau, a awatteno nefinen ach manauen pwon me pochokunen fonufan.
Nupwen ua ekiek won ai upwe angei pwapwa ese much, ua apareni pwe fan ekkoch sia kuna pwe sia nom nefinan. Toputopun rochopwak repwe fis nupwen sia sai won ewe aanen pwon. Sossot me tanechepwak mi tongeni efisi kich sipwe siwini aanach ngeni rochopwaken fonufan me seni ewe aanen pwon. Non ewe fansoun ei epwe fis, nouch we soufos achengicheng, Preseten Russell M. Nelson, a pesei kich sefan ngeni ewe aanen pwon me sipwe mwitir fori. Ua men kinisou ren ewe niffangen aier me ren manamanen an ach we Chon Amanau Achasefan.
Ese tufich ach sipwe manaueni ew manau mi unusoch. Emon chok mwan a tufich ne manau unusoch nupwen a nom won ei fonufanen telestial. Ina I Jises Kraist. Ina mwo sisap unusoch, mwongei me pwii kana, sia tongeni nimenimoch: nimenimoch ne angei ewe sakrament, nimenimoch ren feiochun tempel, me nimenimoch ne angei ach pwisin pwarata.
King Benjamin a pwarata usun ewe feioch me pwapwa a fis ngeni ekkewe mi tapweiochu ewe Chon Amanau: “Iwe soposopono, ua mochen pwe oupwe ekieki usun ewe feioch me pwapwan nikinikin ekkewe ra anneasochisi annukun Kot. Pun nengeni, ra feioch non mettoch meinisin, ren pekin inis me pekin ngun; iwe ika ir mi achocho ne nikitu ngeni nesoponon repwe mumuta ne tonong non nang, ren ewe popun pwe repwe tongeni nonnom ren Kot non ew nikinikin pwapwa ese tongeni much.”5
Pwapwa mi tongeni mo ren $15? Apw, ese tongeni. Pwapwa mi anonnon me fochofoch a fis ren ach finata me tumunoch ne manaueni ewe kapas allimen Jises Kraist. Non iten Jises Kraist, amen.