Ew Imw Ikewe ewe Ngunun ewe Samon a Nom Ie
Kopwe kuna ekkoch watten pwapwa non om achocho ngeni ne fori imwom ewe ew nenien nuku non ewe Samon Jises Kraist me ew neni mi masoweni tong.
Pwi me fefinei achengicheng, Ua pwapwa ren ai uwa koko ngeni ai upwe afanafan ngeni ami non ei 189 Mwichenapen Mwichefen ren Ewe Mwichefenin Jises Kraist ren Aramas mi Pin Non Fansoun Soponon. Non ei fansoun non 1830, Joseph Smith a forata ewe Mwichefen fan emwenien ewe Samon. A fis non imwen ewe faminien Whitmer non Fayette, New York. Mi wor onomon chon me arapakan nime ekkoch ra pwan pwapwaiti non ena fansoun.
Ina mo ika use sinei met ewe Soufos Joseph a apasa ika ifa ussun nikinikin nupwen a uta me mwen ewe kukkun mwich, ua sinei met ekana aramas fiti ar nuku non Jises Kraist ra mefi. Ra mefi ewe Ngun mi Fen, me ra mefi pwe ra nom non ew neni mi pin. Ra fokkun mefi pwe ra chufengen non ew.
Ena memef mi echipwor ina met kich meinisin sia mochen non imwach kewe. Ena memef a feitto seni ach sia, ussun Paul a awewei, “ekiek non pekin ngun.”
Ai auchean popun ikenai, pwe upwe afanafana met uwa sinei ussun ach sipwe tongeni tufich ngeni ena memef me kokorato an epwe nomotam non ach kewe famini. Ussun ami ouwa fen sinei, pwe ese mecheres ach sipwe fori. Anini, esikesik, me tipis epwe chok iseiseno. Ewe tong mi nimenimoch an Kraist epwe tonong non netipen ekana non ach famini.
Atam me Eve, Liai me Sariah, me ekkoch sam me in sia sinei seni ekkewe pukefen a pwa pwe epwe ew aweiresin angang. Iwe nge mi fen wor minen apiru mi pesepes ren neni non kewe famini me imw repwe pese ngenikich. Me ekkana minen appiru sipwe nengeni napanapen an epwe tongeni fis ngenikich me ach kewe famini. Oua chemeni ewe awewe seni 4 Nifai:
“Iwe non ewe fansoun pwe ese wor anini fengen me non ewe fonu, pokiten ewe tongen Kot minne a nonnom non netipen ekkewe aramas.
“Iwe ese wor nonowo, are anini, are fitikoko, are nisou, are chofona, are nii manau, are och sokkun mocheisou; iwe ennetin ese tongeni wor ew aramas mi kon pwapwa seni ir me nein ekkewe aramas meinisin ekkewe ra fen for me ren poun Kot.
“Iwe ese wor chon sona, are chon nii manau, ese pwan wor chon Leiman, are och sokofesenin kinikinin aramas; nge ra chok ew, ekkewe noun Kraist, me chon muuni ewe muun Kot.
“Iwe ifa watten feiochur! Pun ewe Samon a efeiochur non ar foffor meinisin; ewer, ra pwan mwo feioch me pisekisekino tori ipuku engon ier a wesino; iwe ewe aewin tappin aramas seni Kraist ra mano, iwe ese wor anini fengen non unusen ewe fonu.”
Iwe ka fen sinei, ena fansoun pwapwa ese nom tori feinfeino. Ewe awewe non 4 Nifai a awewei ewe esisinen apwangapwang non pekin ngun nein ew mwichen aramas mi murinno. Iei ew napanap a pwa non fansoun meinisin non mwichen aramas, non chon fiti mwich, me, met a kon attong, non ekkewe famini Ren ach kaeo ngeni ewe napanap, sia tongeni kuna ifa ussun sia tongeni epeti me fen pwan anapano ekkewe memmefin tong non ach famini.
Iei ewe napanapen apwangapwang a pwata mwirin 200 ierin nonnom non ewe unusochun kinamwe ewe kapas annim a watto:
Esikesik a anifenong.
Ekkewe aramas ra kouno ne aea fengen met a wor rer.
Ra poputa ne nenengeni pusin ir non nonomur asan ika fan emon me emon ir.
Ra poputa ne ekisano ar nuku non Jises Kraist.
Ra poputa ne koput.
Ra poputa ne fori sokopaten tipis.
In me sam mi tipachem repwe anafa ar repwe kuna ekana esisin nupwen ra pwa nein chochon ar kewe famini. Ewer, repwe fokkun oureki. Nge repwe sinei pwe ewe popun ekkei ren emwenien ewe Setan a sotuni ne emweni ekkewe aramas mi murinno ngeni ewe an ngeni tipis me ar repwe poutano emwenien ewe Ngun mi Fen. Nge ekkewe sam me in mi tipachem repwe kuna pwe tufich mi nom non emwenin emon semirit, me pusin ir, ar repwe ounusa ne etiwa ewe kokko an ewe Samon ar repwe feitto ngeni I.
Oupwe fen ita okukunono tufichin ami oupwe ureni emon semirit an epwe aier seni esikesik, ren awewe. Meni kopwe sotuni ne pesei semirit ar repwe aea fengeni met a wor rer ngeni pwan ekkoch. Oua tongeni urenir pwe repwe kouno ne mefi pwe ir ra murinno seni pwan emon non ewe famini. Nge mwirin ka kuna ewe esisin mi affat “Ra poputa ne ekisano ar nuku non Jises Kraist.”
A wor ewe kien ami oupwe emweni ami famini ar repwe pwata ngeni ena neni non pekin ngun ouwa mochen fan iter—me pwan fan itom om kopwe nom rer. Nupwen ka anisir ne marita non nuku pwe Jises Kraist I ar Chon Angaseno, repwe ne mefi ew mochen ar repwe aier. Nupwen repwe fori, kirekiroch epwene poputa an epwe ekesiwin esikesik. Nupwen ra poputa ne mefi met ewe Samon a fen ngenir, repwene mochen ne aea fengen ngeni ekkoch non kirekiroch. Okkokuf ren itefouno ika sineno epwene kukkununo. Tong epwe osuono koput. Iwe soponon, ussun an a fori fan iten kewe aramas ra winino meren King Benjamin, ewe mochen ar repwe fori mi murinno epwe apochokuner seni sosotur ar repwe tipis. Noun King Benjamin kewe aramas ra pwarata pwe “ese chiwen wor ekiekin ar repwe fori mi ngaw.”
Nge forata nuku non Jises Kraist mi ewe poputan ekesiwinin apwangapwang non pekin ngun non ami famini me non imwemi. Ena nuku epwe wato aier nap seni om afanafan ngeni ew me ew esisinen apwangapwang non pekin ngun.
A auchea om kopwe emwen ren nenien apiru. Chon famini me ekkoch repwe fokkun kuna om ka marita non om pusin nuku non Jises Kraist me non An ewe kapas annim. Ka chok fen karan awora wachimuken aninis. In me sam non ewe Mwichefen ra fen efeioch ngeni ew sokkun minen osukun ren kewe famini me emon me emon aramas. Nupwen ouwa nounou, oupwe forata ami nuku me ewe nuku an noumi kewe semirit non ewe Samon Jises Kraist.
Marita non Nuku
Om nuku non ewe Chon Amanau a fen marino nupwen ka aponueta an Preseten Russell M. Nelson ewe memmef pwe kopwe anneasefan ewe Puken Mormon. Ka esisinna porous me kapas ra porous ussun ewe Chon Amanau. Om nuku non Jises Kraist a marino. Nge ussun efoch minefon ira, ren nuku non Jises Kraist epwe apwangapwangeno me nukun chok ika kopwe sopweno ne eteneki me iotek an epwe anapano.
Om nenien apiru ren marita non nuku meni meinisin chon om ewe famini resap aponueta iei. Nge wanong non netipom met ewe a fis ngeni Alma ewe nau. Non an ewe ennetin mochen epwe aier me omusano, a chemeni an saman ewe nuku non Jises Kraist. Noumi kewe repwe chemeni ami nuku non ewe Chon Amanau non ew fansoun nupwen ra wesewesen mochen ar repwe aier. Alma a apasa ren ew fansoun:
“Iwe non ewe fansoun pwe nupwen ua riaffou ren metek, nupwen ua riaffou ren chechemenien ai kewe chommong tipis, nengeni, ua pwan chechemeni pwe ua fen rongorong semei we an osini ngeni ekkewe aramas usun ewe wareton emon Jises Kraist, emon Noun Kot, pwe epwe achasefani ekkewe tipisin fonufan.
“Iei, nupwen ai ekiek a komochuno ei ekiek, ua sio non netipei: O Jises, en Noun Kot, kopwe umoumoch woi, ngang ewe ua nom non ewe kipwinin riaffou, me ua rokopwanino me ren ekkewe senimechan mano feinfeino chok.
“Iwe iei, nengeni, nupwen ua ekieki ei, use tongeni chiwen chechemeni ai kewe metek; ewer, use chiwen riaffou me ren achechemenien ai kewe tipis.”
Iotek fiti Tong
Pwan soposopun om minen apiru ren marita non nuku, ami iotek fengen ussun ew famini a tongeni ew ki ne fori ewe imw ew neni mi pin. Emon aramas a kan finita ussun ew mongungu ne iotek fan iten ewe famini. Nupwen ewe iotek a fatafatoch ngeni Kot fan iten ekkewe aramas ra fotopuku me rongorong, nuku a marita non ir meinisin. Ra tongeni mefi ewe memefin tong fan iten Semach won Nang me fan iten ewe Chon Amanau. Me nupwen ewe aramas e iotek a founi ekkana ra fotopuku non ena kukumosun famini ekkewe ra mochen, meinisin repwe tongeni mefi tong fan iter me seni emon me emon chon ewe famini.
Nupwen mwo chon ewe famini rese nom non ewe imw, iotek a tongeni forata pwonen tong. Iotek non ewe famini a tongeni tori unusen fonufan. Nap seni fan fite ua sinei pwe emon chon ewe famini a nom towaw a iotek pwan non chok ena fansoun fan iten chok pwan ewe ew popun ussun pwan ngang. Me rei, ewe fosun nom “Ewe famini ra iotek fengen ra nom fengen” a tongeni pwan chouno ngeni “Ewe famini ra iotek fengen ra nom fengen, pwan mo nupwen ir mi towaw fesen.”
Osukuna Aier Mwitir
Pokiten ese wor emon me neich a unusoch me memef ra mwitir metek, kewe famini ra tongeni winiti nenien emwicheich mi pin nupwen sia ennetin mwitir aier. In me sam ra tongeni forata ew minen apiru. Kapas pochokun ika kirikiringawen ekiek ra tongeni mwitir me ennetin aier. Ew chok mecheresin “Omusano ai tipis” a tongeni echikara ekkewe kinas me korato musono me tong.
Ewe Soufos Joseph Smith I emon minen apiru ngenikich nupwen a tori osukosuken chon fiu ngeni me chon afangama i. A mwitir ne omusano ina mo ika a sinei ekkewe chon efeiengawa repwe pwan efeiengawa sefani. A tingor ren omusomus, iwe a awora ese fiti kamo.
Efesira ewe Ngunun Angangen Afanafan
Ekkewe ruemon at noun Mosaia ra ekiekin ar repwe awora ngeni meinisin ewe kapas annim. Ei mochen a feitto seni ar pusin sinei ussun aier. Rese tongeni kinamwe ren ekiekin ese pwan nifinifin a riaffouni ewe osukosuken tipis ra ani. Iwe ra mesengeni chommong ierin weires, ar rese ketiw me feiengawen ar repwe awora ewe kapas annimen Jises Kraist ngeni ekkewe chon u ngenir. Non ewe angang, ra kuna pwapwa non chommong ekkewe ra aier me sinei ewe pwapwan omusano me ren ewe Achasefan an Jises Kraist.
Chon ach famini ra tongeni marita non ach mochen ar repwe aporousa ewe kapas annim nupwen ra mefi ewe pwapwan omusano. Ena a tongeni fis pwan mo nupwen ra asofo sefani ar kewe pwon nupwen ra angei ewe sakramen. Ewe ngunun angangen afanafan epwe marino non imwach kewe nupwen semirit me in me sam ra mefi ewe pwapwan omusano non ewe angangen sakramen. Ren ar minen apiru ren sufonoch, sam me in me nour kewe ra tongeni anisi fengenir ar repwe mefi ena pwapwa. Ena pwapwa a tongeni afatanano non an epwe siwini imwach kewe an epwe nenien osukunen angangen afanafan. Meni meinisin resap fori angangen afanafan, nge meinisin repwe mefi ena mochen ne afanafana ewe kapas annim, minne ewe a fen fori ar repwe mefi omusano me kinamwe. Me ika re karan fori angangen afanafan ren 2 ier ika rese mo, meinisin ra tongeni mefi pwapwa non awora ewe kapas annim ngeni ekkoch.
Churi ewe Tempel
Fan iten in me sam me nour kewe, ewe tempel ina ewe murinon me nein tufichin ach sipwe angei ew memef ren me ew tongen ekkewe neni ussun nang. Akaewin ena mi ennet nupwen ekkewe semirit ir mi chok kukkun. Semirit ra uputiw fiti ewe Saramen Kraist. Pwan mwo kewe monukon ra pwan tongeni mefi pwe ew tempel mi pin. Pokiten sam me in ra tongei nour kewe kukkun semirit, ewe tempel a awora ngenir ewe epinukunuk pwe repwe tongeni nouni nour kewe ar repwe tong non ar famini—fochofoch.
Ekkoch me neimi a wor noumi sasingin ekkewe tempel non imwemi. Nupwen kewe tempel ra kapacheta won unusen fonufan, a tufich ngeni chommong sam me in ar repwe no ren ekkewe nenien tempel fiti ar kewe famini. Ekkoch meni repwe fen tufichin fiti sukun ekkewe tempel ra kouta. Sam me in ra tongeni eisini nour kewe ifa ussun ar mefi ar ra nom kan ngeni ika non ew tempel.
Meinisin sam me in ra tongeni apasata ar kapasen pwarata ussun met ew tempel a wewe ngeni atewe ika neminewe. Preseten Ezra Taft Benson, ewe a tongei kewe tempel, a poraus fan chommong ussun an kan katon inan ewe an a aineochu ufan ufoufen non tempel. I a porous ussun an achechemen atun an a emon at a kan katon an ewe famini nupwen ra kan no seni imwan ewe ar repwe no non tempel.
Nupwen I ewe a Presetenin ewe Mwichefen, a pwan nono non tempel non chok ewe pwan ewe ran ew me ew wik. Iteitan a kan chok fori angangen non tempel ren emon an neuo. A feitto seni ewe minen apiru an saman me inan kewe.
Ai Kapasen Pwarata
Kopwe kuna ekkoch watten pwapwa non om achocho ngeni ne fori imwom ewe ew nenien nuku non ewe Samon Jises Kraist me ew neni mi masoweni tong. Ewe Niwinsefaniton ewe kapas annim a poputa ren ew kapas eis mi tekisoson a wor ekiekin me non ew imw mi tekisoson, me a tongeni soposopono non ew me ew imwach kewe nupwen sia sopweno ne forata me amokutu ekkewe nongonongun ewe kapas annim ikana. Iei met uwa kan epinukunuku me anononun ai mochen seni chok ewe fansoun ngang emon chok kukkun at. Ouwa fen nennengeni ekkewe imw. Chommong me neimi, ouwa fen, ren an ewe Samon aninis, ne forireta.
Ekkoch ra fen sotuni fiti unusen netip ren ena feioch, nge ese ponueta. Ai pwon ngeni ami pwe emon a chon ewe mwichen kekkwe Engon me Ruemon Aposel a fen fisi ngeniei. Uwa fen apasa ngeni pokiten ren ach mochen ekkoch non ach ekkewe ekkoch famini a fen foruta, use nuku pwe sipwe tongeni nom fengen non ewe fonufan epwe etto. Atewe a apasa, seni ai uwa tongeni chemeni, “En ka oureki ussun ewe osukosuk mi mwan. Ka fen manau nimenimoch ren ewe muun celestial, me ewe ototen famini epwe fen murinno nap seni om kopwe tongeni ekieki.”
Ua achifouwa pwe epwe anapano ena pwapwa epinukunuk ngeni ese nifinifin neich non ach manau ion a fen fori meinisin met sia tongeni ach sipwe otufichi inisich me chon ach famini ren manau ese much. Ua sinei pwe ewe kokkot an Samach non Nang ew kokotun pwapwa. Ua pwarata pwe an kokkot a fori tufichin emon me emon neich afen achocho fori met mi auchea sia tongeni ren ach sipwe riri non ew famini feinfeino.
Ua sinei pwe ekkewe kien pristut a niwinsefanito meren Joseph Smith a tetenino won ew nain ese tongeni epwe ta ngeni Preseten Russell M. Nelson. Ekkei ki ra fori tufichin ewe riri an ekkewe famini ikenai. Ua sinei pwe Samach won Nang a tongei kich, Noun kewe semirit non pekin ngun, ren ew tong mi unusoch. Ua sinei pwe pokiten ewe Achasefan an Jises Kraist, sia tongeni aier, nimenimochuno, me winiti nimenimoch ach sipwe nom non famini mi tong famini fochofoch ren Samach won Nang me pwan ren noun ewe Achengicheng, Jises Kraist. Ua pwarata non itan Jises Kraist, amen.