Kametip won ewe Kapasen Kraist
Ach kametip won ewe kapasen Kraist a tongeni fis esenifinifin fansoun me atun, ika pwe sia ammonata netipach.
Semach won Nang amen Tongei Kich. A ammonata eu unusochun kokot fan itach ren ach sipwe angei an kewe feioch. Non ei manau, kich meinisin sia ketiw ach sipwe feito ngeni Kraist me angei ewe kapas allimen Jises Kraist mi niwinsefanito ren paptais, angei ewe niffangen Ngun mi Fel, me nukuchar ne manaueni ewe kapas allim. Nifai a awewei usun ach kewe pwonen paptais ren ach sia tonong “non ewe aan mi aukukun me chokisikis,” me a achema ngeni kich sipwe sopweno ne “nikitu fiti tipepos non Kraist, …kametip won ewe Kapasen Kraist, me nikitu tori nesoponon,” ren ach sipwe angei unusen ekkewe feioch mine Semach won Nang a isoni fanitach (2 Nifai 31:19–20).
Nifai a sopweno ne achema ngeni kich pwe ika sia “kametip won ewe Kapasen Kraist,” repwe “aiti [kich] mettoch meinsin [sipwe] fori” (2 Nephi 32:3 me sipwe tongeni pochokun ne ungeni ekkewe “sokopaten sosot” (1 Nifai 15:24).
Met Wewen Kametip ?
Nekukuni we, ua kan ekieki pwe kametip sikan chok mongo eu watten mongo ren rais, susi, me soiu. Iei ua sinei usun ennetin kametip a nap seni apwapwan eu mongo mi ano. Pun eu fansoun pwapwa, apochokun, apwapwa chiechi fengen, atoura tong ngeni famini me ekkewe sia fokkun tongei, apasa ach kinisou ngeni Kot, me anapano ach sisinefengeni kich nupwen chufengen, mongo mi fokkun ano. Ua nuku pwe nupwen sia kametip won ewe Kapasen Kraist, sipwe pwan ekieki usun ekkei fansoun mi nono. Kametip won ekkewe pukfel esap chok ren aneani. Epwe pwan ngeni kich ewe ennetin pwapwa me anapano nefinach ngeni ewe Chon Amanau.
Ei mi fen afat me non ewe Puken Mormon Chechemeni usun an Liai we tan nupwen a kuna ewe ira “ewe foun ira [a] fokkun murino ngeni an epwe fori an emon epwe pwapwa.” Ei foun ira iei ewe tongen Kot, me nupwen Liai a neni ewe foun ira, “amen …ngarangar, nap seni meinisin foun ira [a] neni me akom.” A “uureno [ngunun] ren pwapwa chapur” me iei och mettoch a mochen epwe pwan ngeni an we famini (1 Nifai 8:10–12).
Nupwen sipwe kametip, sipwe pwan mefi pwe ewe koukun are sokkun mongo sia mongo ese namot ika ngunuch a ureno ren kinisou. An Liai famini ra manau ren futuk mi amaas me non ewe fonu pon, nge Nifai a awewei usun aweiresin ei sosot, a apasa, “ wachemuken ekkewe feioch an ewe Samon” pwe “punuwem kewe … ra pochokun” me ra nounou semirit “nge rese ngunungun” (1 Nifai 17:1–2).
Kametip fan ekkoch a wor sotuni me neni. Alma a poraus won efou foun ira mi och epwe fot non netipach Nupwen sia sotuni ewe angangen sossot, sipwe esinna pwe ewe foun ira mi “anno” (nengeni Alma 32:28–33).
Kametip won ewe Kapasen Kraist
Ekkewe feiochun kametip won ewe kapasen Kraist amen fokkun pochokun me ekesiwini manauach. Unungat metoch mi auchea ua mochen tungor ngonuk kopwe nounou non manauom.
Aewin, ewe kapasen Kraist a tongeni anisi kich “anapano manauen [ngunuch] ren ach sipwe angei pwarata” (Russell M. Nelson, “Revelation for the Church, Revelation for Our Lives,” Liahona, May 2018, 96) me emwenochu kich non unusen manauach. Mormon a aiti kich pwe ewe kapasen Kraist a wor “eu waten pochokun ne emweni aramas ar repwe fori mettoch [mi] auchea,” me a fokkun manaman nap seni meinisin “ewe ketinas” epwe tongeni fori (Alma 31:5). Nupwen ua kutta an Kot tipachem non ai ua fori mine au ani nipwakingaw, iteitan nupwen ua sotuni ewe “kapasen Kot mi murino,” (Alma 31:5), ua mefi ewe ngun mmi fel me tufich ai upwe fori met mi murino, pochokun ngeni sosot, me unusen feioch ren ai nuku mi napono non Kraist me tongei chon orii. Nouch soufos, Russell M. Nelson, a aitikich pwe “non ekkewe ran repwap feito, esap tufich ach sipwe mwanu non pekin ngun ika sise angei emwen, kinamwe, me pwarata seni ewe Ngun mi Fel fansoun meinisin” (“Revelation for the Church, Revelation for Our Lives,” 96). Saposaponan pwarata epwe wor nupwen sia sotuni ewe kapas mi murino,” me ena kapas epwe fokkun pochokun nap seni met sia fen sotuni ika ekieki.
Oruan, nupwen sia weires ren pusin kokotun manauach me nonomun manauch, ewe “kapas mi apwapwa an Kot” (Jacob 2:8) non ekkewe pukfel a aiti kich ach sipwe sinei ika kich wesewesen ion me ngeni kich ach pochokun. Esina manauei pwe ngang emon noun Kot semirit eu mettoch mi fokkun murino ngeni ei non manauei. Ne anuwoni we, use sinei och mettoch usun ewe Chon Amanau. Nupwen ua aewin aneani ewe Testament Sofo, ewe kapasen Kraist a fokkun ennetin echikara nguni mi tatakis. Ua mefi pwe use akanaemon me ngang emon noun Kot. Nupwen ua sinei usun nonomwi me mwen Kot, Ua sinei usun ennetin aucheai ren ewe Achasefan an Kraist.
Usun chok Enos an aiti kich usun met mi fis ngeni ren ewe saram mi tori nupwen an nonongeniusun ewe Kapasen Kraist. Nupwen Enos a mutngeni usun ekkewe kapas seman we a aiti ren ewe “manau ese much, me ewe pwapwan ekkewe souneng, a [ureno] non [netipan],” ngunun a “echik; me [a] fotopwukutiw me mwen ewe a fori [i] … non pochokunen iotek” (Enos 1:3–4). Non na iotek a poputa ne sinei ewe Chon Amanau me a kaeo pwe sia fokkun auchea, me tong me sia tongeni museno seni ach kewe tipis me kich wesewesen noun Kot.
Aunungatin, sia tongeni komochuta manauen ekkoch ren ewe kapasen Kraist. Usun chok Enos non pusin an fansoun me neni nupwen ewe kapasen Kraist a angang non netipan, ewe Samon epwe fori pwan pusin wisan ne atapa netipen ekkewe mine sia ekieki pwe sipwe kaeo ngenir ewe kapas allim. Napengeni kich sipwe netipengaw nupwen sia sotuni ne anisi me tingorei ekkoch ne rongorong ewe kapas allim pokiten ese kuu met ewe sia mochen. Ikamo met a fen fis, ewe Samon a tungorei kich sipwe suki awach me aea ngeni ekkoch ewe kapas allim.
Ruu ier ano, ewe Samon a atapa netipen inei we achengicheng, a anisi ne finata an epwe angei ewe anukun paptais. Ua utiwit ngeni na fansoun non arapakan 35 ier. Ren epwe anisi ne finata an epwe paptais, chommong sounengin ewe Mwichefen rakan ennetin iamwiri usun chok met Kraist a fori. Eu Raninfel, a mefi an epwe feino ngeni fan. A rongorong ngeni ewe memef. Nupwen a momot won ewe sea mwan utiwit ngeni ewe fenin sakrament epwe poputa, emon at ruanu ierin a uta mwen mesan me nengeni. A emwenimwen ngeni. Ewe kukun at a suseni nenian we me niwiniti ian newe a momot ian, won ekkewe sea epek chok ikewe ie inei we e momot ia. Ei kukun at a angei och mettoch me won an we sea me niwiniti ineiwea eiti ngeni eu puken kon me pwan fetansefaniti an we sea. Inei we a tumunu pwe eu me eu ekkewe sea non ewe imwen fan mi wor puken kon won. Mi chok tongeni mecheresin angei eu me won ewe sea unukun. Ngo, a fokkun mwar ren kirekirochun ewe kukun at, mine a kaeo me non imw me non ewe imwen fan. Amen fokkun unusen auchea ngeni I non ena fansoun. A fokkun mefi pwe Kot a etiwa an epwe feito me tapweno mwirin ewe Chon Amanau. A mefi pwe epwe paptais. Ei kukun at ese fori ei an epwe esineno ren met a fori, nge a achocho ngeni an epwe aponueta ewe kapasen Kot me tongei chon oruun. An kirekiroch a fokkun auchea me ekesiwini netipen inei we.
Ewe kapsen Kraist mi fokkun anonon an ekesiwini netip me suki mesen ekkewe rese mwo awen kuna Ii. Won ewe aan ngeni Emmaus, ruemon chon kuno ra fiti Jises ne fetan. Ra fokkun netipengaw me rese weweiti pwe ewe Chon Amanau a win nei mano. Non ar netipengaw, rese esina pwe ewe Kraist mi manau a fitir ne fetan. Ina mwo Jises mi “awewei ngenir non meinisin ekkewe pukfel usun porausen ii,” rese tongeni ar repwe esina pwe Ii ewe Chon Amanau a manau sefan tori otun ra motiw me mongo fengen pinewa. Iwe “meser” a suk. Nupwen kich —ika chiechiach, choo, me chon oruuch—kametip me mongo pinewa Ngeni, masach epwe suk. Nupwen ekkewe chon kuno me Emmaus ra ekieki usun ar kewe fansoun fengen ren ewe Chon Amanau mi manausefanita, ra apasa pwe netiper a fokkun pwichikar nupwen A suk ngenir ekkewe pukfel ( Luke 24:27–32). Ei mi fokkun ennet ren kich meinisin.
Nesoponon
Mwen upwe awesi ai afanafan , ua pwarata pwe kametip won ewe kapasen Kraist a tongeni fis esenifinifin fansoun me atun ika pwe sia ammonata netipach ach sipwe angei. Kametip won ewe kapasen kraist epwe wato manau-etiwetiwen pwarata, apochokuna manauach me aucheach me mwen Kot usun kich Noun, me emweni chiechiach ngeni Kraist me manau ese much. Mut ngeni ei upwe asopwano ren ewe tingor an Nifai nupwen a apasa: “Oupwe nikitu fiti tipepos non Kraist, epwe wor ami unusochun saramen apinikunuk, me ewe tongen Kot me aramas unus. Iei minne, are oupwe feino mwemi, o kametip won ewe kapasen Kraist, o achocho tori nesoponon, nengeni, iei usun anon ewe Sam; oupwe manaueni ewe manau ese much” (2 Nifai 31:20). Non iten Jises Kraist, amen.