![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F89%2Fd3%2F89d336ec8b5f478d569cf8ac066ea2f1119a7362%2F89d336ec8b5f478d569cf8ac066ea2f1119a7362.jpeg/full/!250,/0/default)
Tong mi Napanap ngeni Noun Samach
Tong ewe nikinikin me popun mi napanap non pekin ngun sia angei ach koko pwe sipwe apwounueta seni nouch soufos mi achengicheng.
Pwi me fefinei mi achengicheng, ei fansoun non uruo mi sokkono me auchea. Sia fokkun feioch pwe sipwe nom non ewe saingon kinikinin fansoun me mwen ewe Aruan Wareton ewe Chon Amanau. Nepoputan ei kinikinin fansoun non 1829, ewe ier me mwen atetenan ewe Mwichefen, ew pwarata mi achengicheng pwarata pwe ew “angang mi amwarar epwe fiseto.” Ei pwarata a afata pwe ekkewe mi mochen repwe angang ngeni Kot mi kofichin fiti ena angang ren nuku, apinukunuk, tong ennet me tong, fiti efou mes mi nenengeni chenin Kot.1 Tong ennet, “ina ewe nimenimochun tong an Kraist,”2 mi fiti an Kot tong ese much ngeni unusan Noun kewe.3
Ai popun non ei soran ina pwe upwe afata ewe popunapan ena sokkun tong non angangen misineri, angangen tempel me uruon famini, me soulengin famini mi nongonong won ewe imw ren aninisin ewe mwichefen. Ach tong ngeni ewe Chon Angasano me mwan me fefin meinisin4 ina ewe nikinikin me popun mi napanap minen ach iamwir me ekkewe popunen pekin ngun5 sia angei ach koko pwe sipwe apwounueta seni nouch soufos mi achengicheng, Preseten Russell M. Nelson, non ekkewe ekkesiwin mi esinesin non 2018.
Angangen Misineri ne Ochufengeni Israel mi Paraseno
Ngang ua kuna ewe chiechian angangen misineri me tong me nekukuni. Nupwen ngang 11 ieri, ua angei ai we efeiochun semenap seni emon semenap i pwan semei chinnap.6 Ew kinikinin ena effeioch a apasa, “Ua effeiochuk ren ew tong mi napanap ngeni aramas meinisin, pwe en kopwe angei om koko ne achoufetannei ewe kapas allim ngeni unusan fonufan … pwe kopwe winneni ngun ngeni Kraist.”7
Ua weweiti seni nekukuni pwe ewe achoufetannei ewe kapas allim mi nongonong won ew tong mi napanap ngeni noun Samach won Nang kewe.
Nupwen Meinap Unus mi angei wiser ne fori Preach My Gospel fan 15 ier a no, aua tipew pwe ewe nikinikin tong mi aucheanap ngeni ewe angangen misineri non ach kei ran, usun chok me nom. Sopun 6, a pworaus won Nikinik an Kraist, fiti tong ennet me tong, mi fokkun itefouno nein ekkewe sopun ngeni tepetep misineri.
Pun ir chon tupwuni ewe Chon Amanau, napangeni misineri meinisin mi mefi ei sokkun tong, me nupwen ra mefi, ar achocho mi feioch. Nupwen chon mwichefen mi manaueni ei sokkun tong, minne mi aucheanap non ach anisi ewe Samon non An popun, ewe angangen ewe Samon epwe pwonueta.
Ua feioch pwe mei wor ai tuffich mi kukkun ne fiti ew angang mi appiruni ei sokkun tong. Nupwen ngang ewe Presetenin ewe Pacific Islands Area, Preseten R. Wayne Schute a kokoriei won fon. Nupwen i emon anuan a misineri non Samoa. Mwirin, i a niwiniti Samoa pun i ewe presetenin misineri.8 Nupwen I a kokoriei, i ewe presetenin ewe Tempel non Apia Samoa. Emon noun kewe misineri, nupwen i ewe presetenin misineri, i Elder O. Vincent Haleck, i ewe Presetenin ewe Pacific Islands Area. Preseten Shute a men tongei me sufoniti Vince me unusan ewe famini Haleck. Napangeni unusan ewe famini ir chon ewe Mwichefen, nge saman Vince, Otto Haleck, ewe semenapan ewe famini (hafkas Germany me Samoa), esap i pwan emon chon ewe Mwichefen. Preseten Shute mi sinei pwe ngang mi fiti ew Mwichenapen Steik me pwan ekkoch mwich non American Samoa, me i a eisiniei ika pwe use mochen upwe nom non imwan Otto Haleck pwe naman upwe tongeni apworausa ngeni ewe kapas allim.
Am me punuei, Mary, aua nom ren Otto me punuanewe, Dorothy, non imwer mi ningoch. Non am mongon nessosor ua ani ew kukunun afanafan usun ewe kapas allim o tingor ika Otto esap churi ekkewe misineri. A men fairo, nge pechekun, non an ese etiwa ai tingor. A apasa pwe a pwapwa pwe chommong chon an famini ir Aramas mi Pin non Fansoun Soponon. Nge i a wenewen non an apasa pwe ekkoch chon an inan we fin Samoa kewe newo ir meinapen namanamen nuku non Kraist non Samoa seni nom, me i a men sufoniti an epwe nomofoch non erenien ar we namanen.9 Ikamwo, aua no fesen non chiechioch.
Mwirin, nupwen Preseten Gordon B. Hinckley a ammonata an epwe epini ewe Tempel non Suva Fiji, i a ereni noun we chon aninnis, Brother Don H. Staheli,10 an epwe kokoriei me non New Zealand pwe upwe akota an we sai. Preseten Hinckley a mochen epwe sai seni Fiji ngeni American Samoa an epwe churi ekkewe Souleng. A ereniei ita epwe pwan nom non ew hotel a nom non akkomw. Ua eisini ika ngang ua tongeni ekkesiwini ewe kokkot. Brother Staheli a apasa, “En ewe Presetenin Area; iwe en chok.”
Iwe ua mwitir ne kokori Preseten Shute me ereni ika esap kofich pwe aupwe achocho sefan ne efeiochu chienem we Otto Haleck. Nge non ei fansoun Preseten Gordon B. Hinckley epwe wisan misineri. Ua eis ika pwe esap namanamtekia aupwe tingorei ika pwe ekkewe chon Haleck repwe kofichin anneniakem meinisin mi fiti Preseten Hinckley.11 Preseten me Sister Hinckley, nour we nengin Jane, me Elter me Sister Jeffrey R. Holland mi pwan fiti ekkewe chon sai. Preseten Shute, ren aninis me ewe ewe famini, mi ammonata ewe kokkot.12
Nupwen aua war me Fiji mwirin ewe epinipinen tempel, ra etiwakeminong non kinamwe.13 Aua afanafan non ena pwinen ngeni fitu ngeru chon ewe Mwichefen chon Samoa me mwirin aua feinno ngeni nenian ewe famini Haleck. Nupwen aua chufengen ren mongon nessosor, Preseten Hinckley me Otto Haleck ra fen chiechioch. Ua mairu pwe ar we poporaus mi nennechok ren am me Otto we poporous non ewe ier. Nupwen Otto a apasa an mwar ren ach Mwichefen nge a afatasefanito an we tipepwos non an we mwichefen, Preseten Hinckley a isetiw pounwe won afaran Otto o apasa, “Otto,ese nafoch ena; kopwe fen choni ewe Mwichefen. Iei an ewe Samon we Mwichefen.” Usun ka tongeni pwisin kuna ewe mechan maun mi turutiw seni Otto ren an etiwa kapasen Preseten Hinckley.
Iei ewe nepoputan ewe sopwenon afanafanen misineri me tipetekisionun ngun mi etufichi Otto Haleck an epwe paptais me apungano mi fis ew ier mwirin. Pwan ew ier mwirin ena, ewe Haleck Famini a riri fengen pwe ew famini ese much non ewe tempel.14
Nge minne a kuu netipei non ei fetanin amairu ina ewe amwararan ewe tongen iamwir seni Preseten Wayne Shute ngeni noun we misineri, Elder Vince Haleck, me an tipe ngeni an epwe kuna unusan ewe famini Haleck ar repwe ririfengen pwe ew famni ese much.15
Fiti itenapan ach ochufengeni Israel, sipwe awenawena netipach ren ei sokun tong me atowauakicheno seni mefian chok pwe wisach16 are niemam ngeni mefian tong me fitioch non ewe chiechi mi pin ren ach apworausa an ewe Chon Amanau we pworaus, iamwir, me wisan ngeni fonufan.17
Pwe kich chon ewe mwichefen sia tongeni pwari ach tong ngeni ewe Chon Amanau me pwich me fefinach won unusan fonufan ren ach sia chok tingoren etiwer. Ewe minafon tetenin mwichen Raninifel mi esinesin ngenikich chon ewe Mwichefen ew tufich mi amwarar pwe sipwe tongeni tingorei chienach non tong ar repwe eto me kuna me mefi mokutukutun ewe Mwichefen.18 Eu mwichen sakrament mi uren ewe Ngun mi Fel, amo mi pin usun met Elter Jeffrey R. Holland a awewe nanaeu, epwe tapweno mwirin eu mwich ukukun 50 minich mi poraus won ewe Testamen Sofo me ewe Chon Amanau are porausen mwichenapen mwichefen mi pwan poraus won ewe Chon Amanau me An kewe nongonong.
Ekkoch fefin chon Fin Anisi mi pwan eis pwata ra pwan angei ewe wisan “ionifengen” usun chok ekkewe chon mwichen pristut. Mei wor popun ei, me Preseten Nelson a afata chommong neir non ewe mwichenapen Mwichefen. A osupwano, “Sise tongeni iofengeni Israel ika ouse anisikich.”19 Non ach ei ran sia feioch pwe napangeni 30 ne 100 nouch kewe misineri ir sister. Ei a pwan awora namwotan me auchean Fin Anisi repwe pwan afanafanei ewe kapas allim non tong. Met mi mi namwot pwe epwe wor etipew non tong, umoumoch me pwan non pekin ngun seni kich meinisin—mwan, fefin, serafo, semerit—pwe sipwe afanafanfetannei ewe kapas allimen Jises Kraist. Ika sia pwari tong, umoumoch, me tipetekison, chommong repwe etiwa ach tingor. Ekkewe rese etiwa ach tingor repwe chiwen chok chienach.
Angangen Tempel me Uruon Famini ne Achufengeni Israel
Tong mi pwan nom nukanapan ach angangen tempel me uruon famini pwe sipwe ochufengeni Israel won pwan epekin ewe mangak. Nupwen sia kaeo usun ekkewe weires me osukosuk ach kewe newo mi weri, ach tong me kinisou ngenir epwe wateieno. Ach angangen tempel me uruon famini mi kan pechekunuta ren ekkewe ekkesiwinin non ewe tetenin mwichen Raninifel me fefeitan ekkewe serafo non ar kewe kinikin me mwich. Ekkei ekeksiwin mi awora ewe tufich pwe epwe amwitiri me apechekuna ach aucheani ach kaeo usun ach newo me ochufengeni Israel won pwan epekin ewe mangak. Ir me ru angangen tempel me uruon famini mi apechekun ren ei.
Ewe internet ina ew pisekin angang mi men pechekun; iwe imwach ir ach aewin nenian uruon famini. Nouch kewe serafo ra men nipwakoch non pekin kuta uruon famini me ir mi kan tipengeni non ngunur repwe fori paptais fanasengesin ar kewe newo, minne ir mi kaeo ar repwe tongei me afanni. Seni ach ekisatiw ierin tonong pwe ekkewe serafo mi engon me eu ierir mi tongnei papatais fan iten ekkewe mi mano, ekkewe prestenin tempel won unusan fonufan mi apworausa pwe mi tepetepeno chon tonong. Emon presetenin tempel a esine ngenikem pwe “mi fokkun chommongono chon eto fori papatais … me ewe etiwan ekkewe mi chok 11 ierir mi pwan achommongono ekkewe famini. … Ikamwo pwe ir chok [kukkun], mi fen usun ra weweiti ar sufon me popun ewe angang mi pin ra fori. A men ningoch upwe katon!”20
Ua sinei pwe nouch kewe chon emwenin Kinter me serafo ir mi aucheani o repwe sopwei ne aucheani angangen uruon famini me tempel. Fin anisi me pristut ra tongeni aninnis non tong ren ar apwonueta pwisin wiser non tempel me uruon famini me auroura semerit me serafo ar repwe ochufengeni Israel won pwan epekkin ewe mangak. Ei mi kan auchea non ewe imw pwan non ewe Sabbath. Ua pwon pwe ach fori angang mi pin ren tong fan asengesin ach newo epwe apechekuna me tumunu nouch kewe serafo me ach kewe famini non ew fonufan mi rochopwakeno. Ua pwan pwisin pwarata pwe Preseten Russell M. Nelson a angei pwarata mi kan ennetin auchea usun tempel me angangen famini.
Ammonata Famini Esemuch me Aramas Ar Repwe Nom ren Kot
Ewe minafon auchean ngeni ewe stati me manau mi nongonong won ewe imw me ekkewe minen aninis ewe Mwichefen mi awora ir mi tufich mi murinno pwe sipwe ammonata famini ese much me aramas pwisin non tong pwe sipwe churi me nom ren Kot.21
Nupwen emon mwan me emon fefin ra ririfengen non tempel, ra tonong non ewe mwichen pupunu mi pin non ewe pwon mi pin a minafo me esemuch, ew mwichen ewe pristut.22 Ra angeifengenni ekkewe feiochun me manamanen pristut ne emweni mokutukutun ar famini. Fefin me mwan mi wor pwisin wiser usun mi akafat non “Ewe Famini: Eu Esinesin Ngeni ewe Fonufan,”23 nge mi nennechok nemenier non ar pechekun me auchea.24 Mi nennechok ar manaman ar repwe angei pwarata fanasengesin ar famini. Nupwen ra angang fengen non tong me pungoch, finier mi feioch me nang.
Ekkewe mi kutta netipan ewe Samon ngeniir pwisin pwan ngeni ar famini repwe kan achocho ne weri pung, tipetekision, umoumoch, me tong. Tipetekisoin me tong ir ekkewe foun pwaratan ekkewe mi kuta netipan ewe Samon, ina kan usun ekkwe ra fori fanitan ar famini.
Ach pwisin tumunukich, ach atufichikich pwe sipwe angei feiochun angang mi pin, me ach ammonata ach sipwe churi Kot ir wisach pwisin. Mi namwot sipwe pwisin pennikich me tiniken non ach fori imwach pwe ir noomw seni ekkwe ewuniar mi pwennikich25 pwan “nenien tumunun nuku.”26 Wisan sam me in pwe repwe aiti nour kewe non tong. Imw mi ur ren tong ir pwapwa, murinno, me wesen nang won fonufan.27
Inei a kan sani ewe kon mi pin “Ningoch Ekkis Meinisin.”28 Nupwen a rong ekkewe aewin kapas, “Ningoch ekkis meinisin ren ach tong fengen,” a kan kuu netipan usun an epwe kechiw. Nupwen am chok semerit aua esinna pwe aua nom non ena sokkun imw; ina ew an sekening mi napanap.29
Kapach ngeni ach anenia tong non imwach, Preseten Nelson a pwan pesei kich pwe sipwe ekisatiw aean pekin katon mi osukosuka wisach kewe mi auchea.30 Ew ekkesiwin epwe efeiochu napangeni famini meinisin ina pwe sipwe nemeni internet, chiechi won internet, me tifi pwe usun ir nouch chon angang pwe ete osukosuka kich are, ngauan pwan, nemeni kich. Ewe maun fan itan ngunuch meinisin, nge wesewesen fan itan semerit, mi fis non ewe imw. Pun kich sam me in mi namwot sipwe fat pwe met sia katon mi pungoch, mi fich ngeni ierin nouch, me mi fich ngeni ewe nenian tong minne sia achocho ne aueta.
Mi namwot pwe ach aiti nouch non imwach epwe fat me pung31 nge epwe pwan minen souleng, pwapwa, me uren tong.
Ua pwon pwe nupwen sia nennengeni ach tong ngeni ewe Chon Amanau me An Achasefan, anomu I nukanapan ach achocho ne ochufengeni Israel won ir me rue pekin ewe mangak, iamwir ngeni aramas, me pwisin ammonakicheta ne churi Kot, manamanen ewe chon koum epwe kukunutiw, me ewe pwapwa, saram, me kinamwein ewe kapas allim epwe apechekuna ewe tongen Kraist non imwach.32 Ua pwarata usun ekkei pwonen nongonong me ua pwan apasata ai kapasen pwarata usun Jises Kraist me An asorun achasefan fanesengesich, non itan Jises Kraist, amen.