![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F1e%2F90%2F1e90b090c3c808cbb2b14558c442d503280148c3%2F1e90b090c3c808cbb2b14558c442d503280148c3.jpeg/full/!250,/0/default)
Afanafanen Nesoponon
Amo ita sipwe epinano me epinanosefani manauach ach sipwe angang ngeni Kot me Noun kewe—ekkewe mi manau me ekkewe mi mano.
Pwi me fefninei mi acheingicheing, ren ach sia tori nesoponon ei mwichenap mi amwarar, sia kinisou ngeni ewe Samon ren An pwarata me tumun. Ekkewe afanafan ra aitikich me apochokuna kich.
Ekkewe chon afanafan rese angei itenapen ar kewe afanafan. Ra pwisin iotek pwe repwe angei pwarata non ar ammonata ar kewe afanafan. Me rei, a fokkun amwarar ifa usun ekkewe itenap ra angang fengen. Nupwen oua anneaniir, oupwe achocho ne kaeo met ewe Samon a achocho an epwe aiti kemi me ren Noun kewe chon angang.
Ekkewe kon mi ningoch. Sia ennetin kinisou ren ekkewe chommong chon kon ra aea fengen ar nipwakoch ne etiwa Ngunun ewe Samon non ekkewe mwich. Me A fen efeiochu ekkewe iotek me ekkewe chon fiti ekkewe mwich. Ennet, ei mwichenap mi eu kamatip non pekin ngun fan iten kich meinisin.
Sia apinukunuk me iotek pwe imwen chon ewe Mwichefen repwe winiti eu nenien nuku, ikewe Ngunun ewe Samon a tongeni nom ia. Ina mwo pwe mi wor osukosuk unukuch, imwen emon a tongeni winiti eu nenien kinamwei, ian kaeo, iotek me nuku mi tongeni chufengen ren tong. Sia tongeni winiti chon kunon ewe Samon, ren ach uta me kapas fan itan ian chok sia nom ia.
An Kot mochen ita epwe ach mochen. A mochen pwe Noun kewe repwe finata ar repwe niwin ngeni I, pwe repwe fen ammon, nimenimoch, angei ar feioch, ririfengen, me anneasochisi ar kewe pwon mi pin mi for non ekkewe tempel mi pin.
Iei mi wor 162 tempel mi fen epinipin. Ekkewe akkom ra eu esinesin ewe nuku me kokkotun ekkewe pioneer minne sia tongei. Meinisin ekkewe tempel ra kauta a fis ren ar pwisin fangafangoch me angang weires. Eu me eu a uta pwe eu mettoch mi aucheanap ren met ekkewe pioneer mi fori.
Wisach mi pin ach sipwe tumunur. Iwe, ekkei tempel seni fansoun ekkewe pioneer repwe pwan for sefan me, ren ekkoch, epwe eu wate for sefan. Sipwe achocho ach sipwe tumunu ekkewe mettochun nom mi auchea non ekkewe tempel ren met mi tufich, sipwe tumunu ekkewe mettoch mi ningoch me ewe angangochun ekkewe tapin aramas mi fen mano.
Kokkotun ewe St. George Utah Tempel a fen pwarata. Kokkotun ewe forsefanin ewe Salt Lake Tempel, Temple Square, me ewe imw mi nom unukun ewe Church Office Building epwe pwarata won Enimu, April 19, 2019.
Ewe Manti me Logan Utah Tempel repwe pwan for sefan non ekkewe ier. Nupwen ekkewe kokkot mi wes, repwe pwan esinesin.
Epwe namowt pwe ekkewe tempel repwe kesip ren och fansoun pwe ei angang mi tongeni fis. Chon ewe Mwichefen mi tongeni sopweno ar repwe feino angang me pin non ekkewe tempel mi pwan karap. Nupwen ewe angang a wes, ekkewe tempel repwe epinipin sefan.
Pwi me fefinei, sia esina ekkewe tempel pwe eu imw mi napanapan auchea non ewe Mwichefen. Nupwen aua pwarata kokkotun ach sipwe kauta eu tempel mi fo, a winiti eu kinikinen ach uruo mi pin. Iei, ouse mochen auseningoch me oupwe mosonoson. Ika ua pwarata eu tempel non eu neni mi auchea ngonuk, amo upwe tingor om kopwe pwenitiw mokurom me iotekin kinisou non netipemi. Ause mochen oupwe puchor ren oupwe osukosuka pinin ei mwichenap me an ewe Samon kewe tempel mi pin.
Ikenai sia kinisou ren ach pwarata kokkot ach sipwe kauta pwan ekkoch tempel, repwe fori non ekkei neni:
Pago Pago, American Samoa; Okinawa City, Okinawa; Neiafu, Tonga; Tooele Valley, Utah; Moses Lake, Washington; San Pedro Sula, Honduras; Antofagasta, Chile; Budapest, Hungary.
Kinisou, pwi me fefinei mi acheingicheing.
Nupwen sia kapas usun ach kewe tempel minen nom me mi fo, amo kich meinisin sipwe pwarata ren ach fofor pwe kich ennetin chon kunon ewe Samon Jises Kraist. Amo ita sipwe forsefani manauach ren ach nuku me apinukunuk non I. Amo ita sipwe angei pochokunen An Achesefan ren ach aier iteiten ran. Me amo ita sipwe epinano me epinanosefani manauach ach sipwe angang ngeni Kot me Noun kewe—ekkewe mi manau me ekkewe mi mano.
Ua ngenikemi ai tong me feioch, ua apasa ngenikemi pwe pwarata a soposopono non ei Mwichefen, ewe Mwichefenin ewe Samon. Epwe sopweno tori ekkewe popunen Kot repwe ponueta, me ewe Siowa mi Nap epwe apasa pwe ewe angang a wes.1
Ua efeiochukemi me apasa ai kapasen pwarata pwe Kot mi manau! Jises ii ewe Kraist! Iei An we Mwichefen. Kich Noun kewe aramas. Non iten Jises Kraist mi pin, amen.