Usun Chok I
Nupwen sia achocho ne iamwir usun chok I, sipwe weri tufichin monuki pwisin i me ekieta ekkoch.
Usun 18 maram ano, non atun ras non 2017, pwii we Mike a 64 ierin a ureniei pwe a semwenin pancreatic cancer. A ereniei pwe a efeiochun pristut seni noun we chon iamwiri me a pwan apasa pwe a chufengen me noun we pisop. A pwan tinato text ngeniei ren sasingin ewe Tempel non Oakland California minne a fichi seni ewe pioing minne a tutumun me ia, ren kapas “Nengeni met ua kuna seni rumwei non pioing.”
Ua mairu ren an kapas usun chon iamwiri, efeiochun pristut, pisop, me tempel usun ua mairu usun ewe cancer. Iwe, Mike, emon pris non ewe Pristut seni Aaron, ese fiti fan iteitan ren ukukun 50 ier.
Ai famini, aua kon sani fefeitan non pekin ngun usun chok fefeitan ne chikar seni ewe cancer, pokiten iei a wor chommong an kapas eis usun ewe Puken Mormon, ewe manamanen riri, me manau mwirin mano. Mwirin fitu maram ewe cancer a paras fetan, mi namwot pwan ekkoch safei mi auchea iwe Mike a feito Utah me ewe Huntsman Nenien Cancer.
Mwirin a war, John Holbrook a churi Mike, i ewe souemwenin misineri non ewe wart minne ewe nenien tumun a nom non. John a apasa pwe “mi pwa ngeniei pwe Mike emon noun Kot” me repwene chiechi fengen, minne a fis pwe John a winiti noun Mike chon iamwiri. A muttir tingorei pwe ekkewe misineri repwe churi i, nge pwii we ese mochen, nge ukukun eu maram non ar pwipwi fengen, John a eisini sefan, me a awewei ngeni Mike, “Ai nuku pwe kopwe sani ne rongorong porausen ewe kapas allim.” Non ei fansoun a etiwa, me ekkewe misineri ra churi fan chommong, pwan ewe Pisop Jon Sharp, minne ar poporaus fengen a emweni Mike an epwe weri an efeiochun patriark, ukukun 57 ier mwirin a papatais.
Non December non ewe ier a no, mwirin a reirei fan fitu maram, Mike a fini pwe ekkewe safein cancer, minne a efisata chommong niwiningaw, repwe kouno. Ekkewe chon safei ra erenikem pwe Mike epwe manau ren ukukun unungat maram. Non ena fansoun, kapas eis usun kapas allim a sopweno—usun chok ekkewe mwich me apochokuna seni noun kewe souemwenin pristut. Non am chufengen me Mike, aua kuna ewe Puken Mormon mi suk won ewe chepen nupwen aua poraus usun ewe Aniwinsefaniton ewe kapas allim, kiien pristut, angangepinen tempel me napanapan aramas non fansoun ese much.
Nukanapen December, fiti an efeiochun patriark, Mike a pwan pochokun, me ita usun pwe epwene manau ren pwan unungat maram taman. Aua fori kokkot an epwe fitikem ren Kirisimas, New year, me pwan ekkoch. Won December 6, Pisop Sharp a koriei, a ereniei pwe ir me ewe presetenin steik ra interfiuini Mike, me a nimenimoch an epwe angei ewe Pristut seni Melkisetek, me a eis inet upwe tongeni fitir. Ewe angangepin akokkot ngeni Enimu, December 21.
Nupwen a war ewe ran, am me punuwei we, Carol, aua wareno non ewe nenien tumun me emon a churikem me nukun rumwan me a erenikem pwe ese pichipichin chaan. Aua tonong non ewe rumw me aua kuna ewe petriark, pisop, me presetenin steik ra witiwit---me Mike a suki mesan. A esinnaei me a esinesin pwe a tongeni rongorong mongungui me a monota an epwe weri feiochun pristut. Nime ier mwirin a feioch ngeni pris non ewe Pristut seni Aaron, am me noun kewe souemwen, aua tufichin efeiochu i ren ewe Pristut seni Melkisetek me efeiochu ngeni ofesin elter. Nimu awa mwirin, Mike a mano, a feiniu seni ewe eppet ne churi semem me inem we pwe emon chon ewe Pristut seni Melkisetek.
Ukukun eu ier a no, Preseten Russell M. Nelson a kokkori emon me emon kich ne tumunu pwiich me fefinach kewe non “napanap tekia, me pin.” Non porausen ewe Chon Amanau, Preseten Nelson a ereni pwe “pokiten iei An Mwichefen, kich noun kewe chon angang sipwe iamwiri ngeni ewe emon chok, usun chok I. Sipwe iamwiri non Itan, ren An manaman me mutata, me ren an kirokiroch me tong.”
Ren pwonuen ewe tingor seni emon soufosun Kot, chommong angang napanap ne iamwiri ngeni ewe emon chok mi fis ekkis meinisin won fonufan, non sokkopaten napanap, nupwen chon mwichefen ra apwonueta wiser, pwan met upwene iteni iamwiri “ese mo monota,” usun chommong ra pwarano tongen Kraist non sokkopaten tufich. Non pwisin ai famini, aua kuna, ei sokkun iamwir.
John, emon presetenin misin me nom, chienan me chon iamwirin Mike, a ereni ekkewe misineri pwe “ika iten emon a nom won tettenin ‘ese mochen,’ ousap fangeta. Aramas ra siwin.” Mwirin a erenikem, “Mike a siwin napanap.” Akkomwan John a emon chiechi, a awora pesepes me pochokun—nge ese kouno an iamwiri me nukun chiechi fengen. Jon a sinei pwe emon chon iamwiri mi nap seni emon chiechi me a napano chiechi nupwen sia iamwiri.
Ese namwot pwe emon epwe riaffou seni semwenin pwe epwe weri aninisin chon iamwiri. Mi sokkopat napanap, watte are kukkun, me nonnomun ekkena sokkun mettoch mi namwot. Emon sam are in mi anaemon, ew pea pupunu rese pochokun non fan, emon serafo a weires, emon in a osukosuk, sossotun nuku, osukosuken moni, inis, are pupunu—mi chommong tettenin. Iwe nge, usun chok pwii we Mike, emon ese touaueno, me ese kon mangano fan iten ewe tongen ewe Chon Amanau.
Sia kaeo won an ewe Mwichefen website ren Iamwiri pwe, “ina mo a wor chommong popun iamwiri, sipwe emwen me ren ewe mochenin anisi ekkoch ar repwe ekkesiwin napanap me repwe winiti pwan usun chok ewe Chon Amanau.” Elter Neil L. Andersen a apasa:
“Emon aramas a fokkun netipoch a tongeni anisi emon ne fori taia a mok, uweiano chon non imwan ngeni tokter, mongo ngeni emon a netipengaw, ika emenimen me kapong ngeni io ren an eepwe fori met repwe pwapwa ren.
Nge ewe chon tapweno mwirin ewe aewin annuk epwe pachengeni ekkei auchean mokutukutun angang.”
Non napanapen ach angangen iamwiri usun Jises Kriast, a fokkun auchea ach sipwe chechemeni pwe An angang ne tongei, eki, anisi, me efeiochu a fen fisina popun mi tekia me esap chok ren ach awesano ewe angang. A ennetin sinei usun namwoter ran me ran me a pwarano tong won ar riaffou nupwen a echikara, amongoni, omusano, me aiti. Nge A mochen fori nap seni tumunu ikenai chok. A mochen ekkewe ir unukun I repwe tapweno mwirin I, sinei I, me tori ar tufich napanap.
Nupwen sia achocho ne iamwir “usun chok I, sipwe weri tufichin monuki pwisin i me ekieta ekkoch. Fan chommong ekkei tufich mi tawengaw, mi sotuni ach mochen winiti usun chok ewe Masta, minne an angang napanap, an Achasefan, mi pwan tawengaw. Non Matthew sopun 25, sia chechemeni ifa usun ewe Samon a mefi usuch, nupwen, usun chok I, sia weri osukosuk, sossot, me weires nge fan chommong sise nengenochur:
“Oupwe feito, ami mi feioch me ren Semei. Oupwe feito o choni ewe muu a fen monnota ngenikemi seni chon nepoputan fonufan:
“Pun uwa echik, nge ouwa amongoniei: Uwa kaka, nge ouwa aunuei: Uwa emon wasona, nge ouwa etiwaei. …
“Iwe ekkewe aramas mi pung repwe ponuweni, Samon, inet am oua kunok ka echik nge am oua amongonuk, are kaka, nge am oua aunuk?
“Pwan inet am aua kunok pwe en emon wasona nge am aua etiwok? …
“Iwe ewe King epwe ponueni, Upwe apasa ngenikemi, pwe fansoun meinisin ouwa fori ei napanap ngeni emon pwi kei mi kisifochofoch, ouwa pwan fori ngeniei.”
Ina mo ika sia angang pwe chon iamwiri pwi me fefin, are nupwen a esinesin pwe mi namwot aninis ngeni emon, sipwe kutta emwen seni ewe Ngun mi Fel—me sipwe foffor. Meni sipwe ekieki won ifa usun sipwe angang, nge ewe Samon a sinei, me ren Ngunun we sipwe weri emwen non ach angang. Usun chok Nifai minne a “emmwen me ren ewe Ngun, use sinei met me mwen ekkewe mettoch minne ngang [epwe] fori,”sipwe pwan emwen me ren ewe Ngun mi Fel nupwen sia achocho ne winiti pisekin angang noun poun ewe Samon ne efeiochu noun kewe semirit. Nupwen sia kutta emwenin ewe Ngun mi Fel me epinukunuku ewe Samon, sipwe nom non neni me fansoun minne sia tongeni angang me efeiochu---non pwan och kapas, iamwiri.
Eni epwe wor pwan ekkoch fansoun sipwe esinna met mi namwot nge sia mefi pwe sise tongeni angang, sia ekieki pwe ese naf met sipwe awora. Ne fori “usun chok I a fori, ina pwe sipwe iamwiri me ren ach awora met sia tufich me sipwe epinukunuku pwe ewe Samon epwe anapano ach tufichin efeiochu “chienach kewe chon sai.” Ren ekkoch, meni mi awora ewe niffangen fansoun me nipwakoch; ren ekkoch, meni epwe kapas kirokiroch are apochokuna. Ina mo sipwe mefi pwe ach angang ese naf, Preseten Dallin H. Oaks a aporausa eu nongonong usun “kukkun me mecheres.” A aiti pwe foffor mi kukkun me mecheres mi manaman pokiten ra tingorei “chiechian ewe Ngun mi Fel,”emon chiechi a efeiochu ewe chon awora me chon angei.
A sinei pwe epwene mano, pwii we Mike a apasa, “Mi amwarar pwe pancreatis cancer a tongeni echimwok om kopwe nenengeni met mi aucheanap.” Kinisou ngeni ekkewe mwan me fefin ra kuna met mi namwot, rese apungu, me ra iamwiri usun ewe Chon Amanau, ese kon mang fan iten Mike. Ren ekkoch, ekkesiwin a muttir feito; ren ekkoch epwe fis won epekin ewe eppet. Iwe nge, sipwe chechemeni pwe ese kon mang me ese wor emon a rikino seni ewe an minne resap weri ewe Achasefanin Jises Kraist ese much, minne ese mucheno non fansoun are napanapan.
Non mwichenapen mwichefen non October, Elter Dale G. Renlund a aiti pwe “ese nifinifin ifa taman fansoun sise fiti ewe an … , ewe fansoun sia finata ne siwin, Kot a anisikich ne niwinsefan.” Iwe nge, ena fini ne siwin, mi niwinin an emon a tingorei, usun chok “Ai nuku kopwe sani ne rongorong porausen ewe kapas allim.” Usun chok ese mang fan iten ewe Chon Amanau, ese kon mang ne tingorei.
Ei fansoun Easter a awora, sefan, eu tufichin ekieki won ewe asoren Achasefanin ach Chon Amanau Jises Kraist me met A fori fan iten emon me emon kich non niwinin watte, niwinin A pwisin pwarano pwe a chechech pokiten metek, ngeni i, ewe mi napanap. “Iwe nge,” A apasa, “Ua angei me aweseno ai ammonata ngeni ekkewe noun aramas.”
Ua pwarata pwa pokiten I “a aweseno,” fansoun meinisin a wor apinukunuk. Non iten Jises Kraist, amen.