Nimenimoch seni Aier
Pokiten an Kot we kokkot me ewe Achasefanin Jises Kraist, sia tongeni nimenimochuno me ren ewe angangen aier.
Non ei manau sia nom fan annukun mwan me annukun Kot. Ua pwisin tufichin apungu fofforungaw fan ir me ru ekkei annuk—non wisei chon ewe Mwichen Soukopung non Utah me iei pwe chon ewe Aewin Presetensi. Sokofesenin ua fen sinei usun annukun mwan me annukun Kot a awatteno ai kinisou ren ennetin me manamanan ewe Achasefanin Jises Kraist. Fan annukun mwan, emon a fakkun tipis mwan a tongeni weri niwinin epwe nom non kanapus ren unusen manauan me esap tufichin tou. Nge mi sokono fan ewe kokkoten chen an Semach won Nang mi tong. Ua kuna pwe ekkei sokkun tipis mi tongeni museno non ei manau pokiten an ach Chon Amanau we asoren achasefanni ekkewe tipisin “meinisin ekkewe mi wor ar netipechou me netip niemam” (2 Nifai 2:7). Kraist a angasa, me An Achasefan mi ennet.
Ewe tongen ach Chon Amanau mi pwa non ewe kon fel minne ekkewe chon kon ra keran konu.
Ewe asoren achasefanin Jises Kraist a suki ewe asam fan iten” aramas meinisin pwe repwe aier me feito ngeni i (Doctrine and Covenants 18:11; nengeni pwan Mark 3:28; 1 Nifai 10:18; Alma 34:8, 16). Ewe puken Alma a porausen aier me omusomusen tipis ngeni ekkewe ir ra chon ingaw me chon nii aramas (nengeni Alma 25:16; 27:27, 30). Ai poraus ikenai mi kapasen epinukunuk ngenikich meinisin, pwan ekkewe ir rese chuen choni ewe Mwichefen me ren napanapan tou seni are tonano it seni rekot. Kich meinisin chon tipis sia tongeni nimenimoch me ren aier. “Ne aier seni tipis ese mecheres,” Elter Russell M. Nelson a aiti non mwichenapen mwichefen me nom akkom. “Nge niwinin fakkun niwinoch.”
I. Aier
Aier a poputa ren ach Chon Amanau, mi apwapwa, esap minen achou. Non ewe Mwichen Kirisimas, Preseten Nelson a aiti: “Aier esap eu mettoch a fis fan eu. Mi eu tufich ese mucheno. Mi namwot ngeni fefeita me nonnomun kinamwen ekiek, me pwapwa.”
Ekkoch nein ekkewe afanafanan aier mi napanap a nom non an Alma afanafan non ewe Puken Mormon ngeni chon ewe Mwichefen minne a awewe pwe ir ra “watten nukunukumang,” “namanam tekian netip,” me ra wata netiper “won pisekisek me ekkewe namotmwanin mettochun fonufan”(Alma 7:6). Emon me emon chon ei Mwichefen mi niwinsefanito epwene kaeo chommong seni an Alma afanafan.
Sia poputa ren nuku non Jises Kraist, pokien “i ewe epwe feito pwe epwe angeiano tipisin ewe fonufan” (Alma 5:48). Mi namwot sipwe aier pokiten, usun Alma a aiti, “tiwenon chok ika oupwe aier ouse tongeni muuni ewe muun nang” (Alma 5:51). Aier iei eu kinikinin an Kot kokkot mi namot. Pokiten aramas meinisin won ei fonufan mi tipis me sipwe touaueno seni fan mesen Kot, aramas resap “manau” ika esap punun aier (Alma 5:31; pwan nengeni Ilaman 12:22).
Ei mi akkafanafana seni nepoputan. Ewe Samon a annuku ngeni Adam, “Aiti ngeni noum kewe semirit, pwe aramas meinisin, ekkis meinsin, repwe aier, are rese tongeni muuni ewe muun Kot, pun ese wor och mettoch mi nimengaw epwe tongeni nom ikkewe ia, are nom fan mesan we” (Moses 6:57). Mi namwot pwe sipwe aier seni meinisin tipisisch kewe—meinisni ach foffor are met sise fori ese fich ngeni annukun Kot. Ese wor emon epwe tiweno. Nepwinewe Preseten Nelson a pesei ngenikich: “Pwii kana, mi namwot kich meinisn sipwe aier.”
Ren ach sipwe nimenimochuno ren aier, sipwe nikitano ach tipis me pwarata ngeni ewe Samon me ngeni noun ewe soukopung won fonufan nupwen mi namwot (nengeni Doctrine and Covenants 58:43). Alma a aiti pwe mi namwot pwe sipwe pwan “uweiato angangen wenechar” (Alma 5:35). Ekkei mettoch meinisin mi eu kinikinen ewe tingor seni ekkewe pukfel ach sipwe feito ren Kraist.
Mi namwot sipwe angei ewe sakrament iteitan Raninifel. Non ena angangepin sia fori pwon me weri feioch mi anisikich ne pworacho ngeni meinisin ekkewe foffor me mochen minne a eppetikich ach sipwe unusochuno minne ach Chon Amanau a tingoreikich sipwe achocho ngeni (nengeni Matthew 5:48; 3 Nifai 12:48). Nupwen sia “amam [inisich] seni fofforungaw meinisin, me tongei Kot ren unusen [ach] tongeni, ekiek me pochokun,” iwe, sipwe “unusochuno non Kraist” me sipwe “nimenimochuno” me ren chaan pwe sipwe “winiti aramas mi fel, esap wor nimengaw” (Moronai 10:32–33). Mi amwarar ena pwon! Mi amwarar ena manaman! Mi amwarar ena feioch!
II. Wisach me Kopungun Fonufan
Eu popun an Kot kokkot fan itach non ei manau ina pwe sipwe “pwar” “ne pii ika [sipwe] fori mettoch meinisin minne ewe Samon [ach] Kot epwe annuku ngenikcih” (Abraham 3:25). Eu kinikinen ei kokkot, a wor wisach ngeni Kot me ngeni noun kewe chon angang, me kopung non pekin inis me ngun mi eu kinikinin ekkena wis.
Non an ewe Samon we Mwichefen, kopung won fonufan fan iten chon mwichefen are ir repwene choni ewe mwichefen mi fis seni souemwen minne ra kutta pwarata. Wiser ar repwe kopung ika aramas ra kuta ar repwe feito ren Kraist ar repwe angei manamanen An Achesefan won ewe won ewe an ngeni manau ese much. Kopung won fonufan a finata ika emon aramas mi monota ngeni an epwe papatais. . Ei aramas mi nimenimoch pwe epwe wor an taropwen mumutan fiti tempel? Ei aramas minne itan a tonu seni rekotun ewe Mwichefen a aier me ren ewe Achasefanin Jises Kraist pwe epwene papatais sefan?
Nupwen emon soukopung mi kokko me ren Kot a atipeu ngeni emon epwe sopweno an fefeita, usun feiochun tempel, ese esisinnata pwe ena emon mi unusoch, me i ese pwisin omusano tipisin. Elter Spencer W. Kimball a aiti pwe mwirin “kisikisinon feingaw,” non ei manau ewe emon “epwe pwan kutta me weri saingonon aier chok seni ewe Kotun nang, me i chok a tongeni museno” Me ika emon ese aier seni tipis me mochenin netip tori ewe Saingon Kopung, iwe emon aramas ese mo aier epwene chuen nimengaw. Ewe amuchunon wis, mi pachenong ewe amuchunon nimenimochun aier mi napanap, a nom nefinen emon me emon pwisin me Kot.
III. Amanausefanita me ewe Saingon Kopung
Ewe kopung mi awewe non pukfel mi ewe Saingon Kopung mi tapweno mwirin ewe Amanausefan (nengeni 2 Nifai 9:15). Chommong wokisin mi mak pwe “kich meinisin sipwe uta mwen mesen Kraist pwe sipwe kopung me ren”(Rome 14:10; nengeni pwan 2 Nifai 9:15; Mosaia 27:31)“pwe repwe kapung anongonong won ekkewe foffor minne ra fen fis me non ewe inis mi tongeni mano” (Alma 5:15; nengeni pwan Pwarata 20:12; Alma 41:3; 3 Nifai 26:4). Meinisin repwe kopung “anongonong won ar kewe angang” (3 Nifai 27:15) me “anongonong won mochenin netiper” (Doctrine and Covenants 137:9; nengeni pwan Alma 41:6).
Popun ei Saingon Kopung ina ne pii ika sia weri met Alma a awewei pwe “anonnonun siwin non netip” (nengeni Alma 5:14, 26), ina minne sia winiti minefo, minne “ese chiwen wor am mochenin fori mi ngaw, nge am aupwe sopweno ne fori mi öch”(Mosaia 5:2). Ewe soukopung ina ach Chon Amanau, Jises Kraist (nengeni John 5:22; 2 Nifai 9:41). Mwirin an kapung, aramas meinisin repwe pwarata “pwe an kewe kapung mi pung” (Mosaia 16:1; pwan nengeni Mosiah 27:31; Alma 12:15), pokiten a sinei meinisin (nengeni 2 Nephi 9:15, 20) a sineinapan meinisin fofforuch kewe me mochenin netipach, ekkewe ir mi wenechar are fen aier me ekkewe ir rese aier are siwinno.
Ekkewe pukfel ra awewei ewe napanapan ei Saingon Kopung. Alma a aiti pwe pungochun emon Kot mi anamwota pwe non ewe Manausefan “mettoch meinisin repwe niwin ngeni pwisin wesewesen tettenir” (Alma 41:2). Wewen pwe “Ika ar kewe angang repwe öch non ei manau, me mochenin netiper mi öch, … atun ewe ranin soponon, [repwe] niwin ngeni met minne mi öch” (Alma 41:3). Pwan usun chok, “ika ar kewe angang [ika ar mochen] mi ngaw repwe niwin [ngeni] ir pwe repwe ngaw” (Alma 41:4–5; nengeni pwan Ilaman 14:31). Pwan usun chok, ewe soufos Jacob a pwan aiti pwe non ewe Saingon Kopung “ir ekkewe mi tupwon repwe chok pwan tupwon, iwe ir ekkewe mi nimengaw repwe chok pwan nimengaw” (2 Nifai 9:16; nengeni pwan Mormon 9:14; 1 Nifai 15:33). Iei met epwe fis me mwen met Moronai a kokkori “nenien kapung an ewe Jehovah mi napanap, Ewe Sou apung Esemuch ren ir ekkewe mi manau me pwan mano” (Moronai 10:34; nengeni pwan 3 Nifai 27:16).
Ren ach sipwe nimenimoch fan mesen Kot, mi auchea sipwe aier me mwen ewe Saingon Kopung(nengeni Mormon 3:22). Usun Alma a ereni noun we at mi tipis, sise tongeni aopano ach tipis seni Kot, “me tiwenon chok ika kopwe aier repwe uta pwe pisekin pwarata ngonuk non ewe ranin soponon” (Alma 39:8; auchean mi kapacheta). Ewe Achasefanin Jises Kraist a ngenikich ewe chok an pwe sipwe weri nimenimoch me ren aier, me ei manau mi ewe fansoun sipwe fori. I Ina mo sia kaeo pwe ekkoch sokkun aier mi tongeni fis non ewe nenien ngun (nengeni Doctrine and Covenants 138:31, 33, 58), ese fakkun fatoch. Elter Melvin J. Ballard a aiti: “Mi fen mecheres ne pworacho me angang ngeni ewe Samon nupwen inis me ngun mi chufengen pwe eu chok. Iei ewe fansoun nupwen aramas mi tongeni siwin me ra kon tufich. … Ei manau mi ewe fansoun sipwe aier.”
Nupwen sia aier, ewe Samon a pwon ngenikich pwe tipisich kewe, fiti ach foffor me mochenin netip, repwe nimenimoch me ach we soukopung mi uren chen “esap chuen chemenir” (Doctrine and Covenants 58:42; nengeni pwan Isaiah 1:18; Jeremiah 31:34; Hebrew 8:12; Alma 41:6; Ilaman 14:18–19). Nimenimochuno ren aier, sia tongeni angei manau ese much, minne King Benjamin a awewei pwe “nonnom ren Kot non ew nikinikin pwapwa ese tongeni much” (Mosaia 2:41; nengeni pwan Doctrine and Covenants 14:7).
Pwan eu kinikinen an Kot “kokkotun niwinsefan” (Alma 41:2), ewe Amanausefan epwe aniwinsefanito “mettoch meinisin repwe … ngeni wesewesen me unusochun napanaper” (Alma 40:23). Pwan fiti ach kewe apwangapwang non pekin inis nipwakingaw me mweningaw ach sia weri non ei manau, fiti ekkewe ir mi nom mwirin uputiw are seni feingaw are samau.
Ei niwinsefanito a aunusa ochueno meinisin ach mochen are mocheningaw non pekin ngun? Ese tufich. Sia kaeo seni pwarata non ei fansoun soponon pwe sipwe kopung ren ach mochen me pwan ach foffor (nengeni Alma 41:5; Doctrine and Covenants 137:9) me pwan ach ekiek repwe apungu kich (nengeni Alma 12:14). Sisap “ammangano ewe ranin [ach] aier” tori mano, Amulek a aitikich (Alma 34:33), pokiten ewe ngun mi nom non inisich non ei manau—ina mo ika seni ewe Samon are ewe tefin—“epwe wor an manaman ne nemenano [inisich] non ena fonufan esemuch” (Alma 34:34). A wor ach Chon Amanau manaman me mochen anisikich ach sipwe nimenimoch seni ngau. Iei ewe fansoun sipwe kutta An aninis ach sipwe aier seni ach ngaw ika ach kewe mochen me ekiek repwe nimenimoch me monnota fan mesen Kot non ewe Saingon Kopung.
IV. Ekkewe Pau mi Umoumoch
Nap seni an Kot kokkot me meinisin An kewe annuk ina An tong fan iten emon me emon kich, minne mi “a fokkun anno seni mettoch meinisin … me ewe mi fokkun apwapwa ngeni ewe ngun” (1 Nifai 11:22–23). Ewe soufos Isaiah a pwan ereni ekkewe aramas mi ngaw pwe nupwen ra “niwiniti ewe Samon … epwe tongeasinir … [me] omusano tipis” (Isaiah 55:7). Alma a aitir, “Nengeni, a fen tinano ew tingor ngeni aramas meinisin, pun ekkewe poun umoumoch ra fen keitiuu ngeni ir”(Alma 5:33; ngeni pwan 2 Nifai 26:25–33). Ewe Samon mi manausefanita a ereni ekkewe chon Nifai, “Nengeni, pei mi umoumoch a keitiuu ngenikemi, iwe ion chok epwe feito, i upwe etiwa; me efeioch ir ekkewe ra feito rei.” (3 Nifai 9:14). Seni ekkei wokisin pwan ekkoch, sia sinei pwe ach Chon Amanau mi tong a suki poun kewe ne etiwa meinisin mwan me fefin angonong won tettenin tong minne a kefinita ne apwapwaiti ekkewe feiochun Kot mi napanap fan iten noun kewe semirit.
Pokiten an Kot we kokkot me ewe Achasefanin Jises Kraist, ua pwarata ren “epinukunuk mi unusoch” pwe Kot a tongeikich me sia tongeni nimenimochuno me ren ewe angangen aier. Sia angei pwon pwe “ika [sia] feino mwach, kametip won ewe kapasen Kraist, me nikitu tori nesoponon, nengeni, iei usun anon ewe Sam: Oupwe weri ewe manau ese much” (2 Nifai 31:20). Amo ita kich meinisin sipwe fori ena, ua tingor me iotek, non iten Jises Kraist, amen.