Mennin Aorōk ko ilo Jetōb
Ilo am̧ kōjerbale tōmak ilo Irooj im kajoor in priesthood eo An, maron̄ eo am̧ n̄an bōk ioom̧ mennin aorōk ko an jetōb me Irooj ekar kōpooji renaaj ļapļo̧k.
Kom̧ em̧ool kōn al eo eaiboojoj. Ke kōj wōj aolep kar jutak im al al in kakkije eo, “Kimij Kamolol Yuk, O Anij, Kin Juōn Dri Kanaan,” ekar wōr aō ļōmņak ko rekajoor rekar itok n̄an n̄a. Juon ej kōn Rikanaan Josep Smith āinwōt rikanaan an tōre in bōk eddo in āliktata. Aō iakwe im kautiej n̄an e ej eddōkļo̧k ilo an kajjojo raan eļļāļo̧k. Ļōmņak eo kein karuo ekar waļo̧k ke ij kalimjōke kōrā eo pāleeō, leddik ro nejū, leddik ro jibū, im leddik ro jibū jubū. Ikar en̄jake ke ikōņaan bōk kom̧ kajjojo āinwōt m̧ōttan wōt baam̧le eo aō.
Jet allōn̄ remootļo̧k, ilo kar jem̧ļo̧kin juon temple endownment session, ikar ba n̄an kōrā eo pāleeō Wendy, “Ij kōjatdikdik bwe sister ro rej meļeļe mennin aorōk ko ilo jetōb im rej aer ilo tampeļ in. Sister raņ, ekkā aō loe aō make kōļmenļo̧kjeņ kōn kom̧, ekoba ruo allōn̄ ko remootļo̧k ke Wendy im n̄a kom̧ro kar loļo̧k Harmony, Pennsylvania.
Tūreep in ekar kein karuo am̧ro n̄an ijeņ. Iien kein jim̧or, rekar lukkuun kōm̧akūt kōm̧ro ke kōmij etetal ioon peļaakin jikin eo ekwojarjar. Ekar ilo iturin Harmony, ijo Jon Ripeptaij ekar waļo̧kļo̧k n̄an Josep Smith im kōjepļaaktok Priesthood eo an Aron.
Ekar ijo in me Rijilōk Piter, Jemes, im Jon rekar waļo̧kļo̧k im kōjepļaaktok Melkisdek Priesthood eo.
Ekar ilo Harmony, ijo Emma Hale Smith ekar jerbal āinwōt rijeje eo kein kajuon an ļeo pāleen ilo an Rikanaan eo kar ukōte Bok in Mormon eo.
Ekar barāinwōt ilo Harmony, ijo Josep ekar bōk juon revelesōn kwaļo̧kļo̧k ankilaan Irooj n̄an Emma. Irooj ekar katakin Emma n̄an kōmeļeļeiki jeje ko rekwojarjar, n̄an kōketak Kabun̄ eo, n̄an bōk Jetōb Kwojarjar eo, im n̄an joļo̧k an iien ekkatak eļapļo̧k.” Emma ekar barāinwōt bōk ko̧o̧njeļ eo n̄an “likūt iturejet men ko an laļ in im pukōt men ko rem̧m̧anļo̧k” im n̄an jirōk likatōttōt n̄an bujen ko an ippān Anij. Irooj ekar kōjem̧ļo̧k katak eo An kōn naan in rōjan̄ kein: “en̄in ej Ainikiō n̄an aolep.”1
Men otemjej ko me rekar waļo̧k ilo jikin in ewōr jenok ko raorōk n̄an mour ko ami. Jepļaaktok eo an priesthood eo, ippānļo̧k ko̧o̧njeļ eo an Irooj n̄an Emma, maron̄ unin tōl im kōjeraam̧m̧an kom̧ kajjojo. Ewi wāween aō jan̄uwade n̄an ami maron̄ meļeļe bwe jepļaaktok eo an priesthood eo jetjet in wōt n̄an kom̧ āinwōt juon kōrā ejja āinwōt n̄an jabdewōt em̧m̧aan. Kōnke Melkisedek Priesthood eo em̧ōj an jepļaaktok, jim̧or kōrā im em̧m̧aan in bujen ro elōn̄ aer maron̄ deļo̧n̄e “aolep kōjeraam̧m̧an ko an jetōb ilo kabun̄ in”2 ak, jemaron̄ ba, n̄an aolep mennin aorōk ko ilo jetōb ewōr ippān Irooj n̄an ajri ro Nejin.
Aolep kōrā ro im aolep em̧m̧aan ro me rej kōm̧m̧ani bujen ko ippān Anij im kōjparok bujen kein, im ro rej bōk ilo aer koņaer ilo aer erreo ilo kain̄i ko rekwojarjar an priesthood eo, ewōr aer maron̄ in deļo̧n̄e kajoor eo an Anij. Ro otemjej rej bōk mennin letok kwojarjar eo ilo m̧weo im̧ōn Irooj rej bōk juon mennin letok eo an Anij an kajoor in priesthood eo jān wānōk eo an bujen ko aer, ippānļo̧k juon mennin letok an jeļāļo̧kjeņ n̄an jeļā ekōjkan bōk kajoor ioer.
Lan̄ ko rej peļļo̧k n̄an kōrā ro rej bōk mennin letok kwojarjar eo kōn kajoor an Anij ej ibebtok jān bujen ko an priesthood ko aer āinļo̧k wōt em̧m̧aan ro rej kabwijere priesthood eo. Ij jar bwe m̧ool in enaaj jeje ioon būruom̧i kōnke ij tōmak enaaj ukōte mour eo ami. Sister raņ, ewōr ippāmi jim̧we eo n̄an kōmakijkij ami kōjerbal kajoor eo an Rilo̧mo̧o̧r eo āinwōt kein jipan̄ n̄an jipan̄ baam̧le eo ami im ro jet kwoj iakwe er.
Kiiō, komaron̄ in ba n̄an eok make, “Em̧m̧an menin, ak ewi wāween aō kōm̧m̧ane? Ewi wāween aō bōk kajoor eo an Rilo̧mo̧o̧r eo n̄an mour eo aō?”
Kom̧ij jab maron̄ lo jekjek in ilo tipdik in ilo jabdewōt bok in katakin. Jetōb Kwojarjar eo enaaj rūkatakin eo am̧ make ilo am̧ pukot n̄an meļeļe ta eo Irooj ekōņaan bwe kwon jeļā im kōm̧m̧ane. Jerbal in ejjab m̧ōkaj ak pidodo, ak ej kairujruj ilo jetōb. Ta eo emaron̄ ļapļo̧k an kalimomo jān n̄an jerbal kōn Jetōb eo n̄an meļeļe kajoor eo an Anij—kajoor in priesthood eo?
Ta eo imaron̄ jiron̄ eok ej bwe bōk kajoor eo an Anij ilo mour eo am̧ ej aikuj ejja men ko wōt me Irooj ekar kōmeļeļeiki Emma im kom̧ kajjojo n̄an kōm̧m̧ani.
Kōn menin, ij karuwainene kom̧ n̄an lukkuun ekkatak jākjen 25 in Katak im Bujen Ko im pukote ta eo Jetōb Kwojarjar eo enaaj katakin kom̧. Kijejeto eo am̧ make ilo jetōb enaaj bōkwaj n̄an eok lan̄lōn̄ ilo am̧ bōk, meļeļe, im kōjerbale kajoor eo me kwaar bōke.
M̧ōttan wōt kijejeto in enaaj aikuji am̧ naaj likūt iturajet elōn̄ iaan men ko an laļ in. Jet iien, jej kōnono bajjōk kōn ad etal im elļo̧k jān laļ in kōn iakweleel ko an, kapo ko rejetmatmat n̄an kōj, im katak ko rebōd. Ak ilo m̧ool kōm̧m̧ane āindein ej aikuj am̧ etale mour eo am̧ ilo tiljek im aolep iien. Ilo am̧ kōm̧m̧an āindein, Jetōb Kwojarjar eo enaaj kōjjeļļāik eok kōn ta eo ejako an menin aikuj, ta eo ejako an aorōk n̄an iien eo am̧ im kajoor eo.
Ilo am̧ kōm̧akūti jibadbad eo am̧ jān kareel ko an laļ in, jet men ko me remaron̄ āinwōt aorōk n̄an kwe kiiō naaj makunļo̧k ilo aorōk ko aer. Kwonaaj aikuj in ba jaab n̄an jet men ko, men̄e remaron̄ āinwōt rejjab kakkure eok. Ilo am̧ jino em̧m̧akūt ilo im wōnm̧aanļo̧k ilo mour in eaitok ilo jerbal in kokwojarjar e mour eo am̧ n̄an Irooj, oktak ko ilo kōļmenļo̧kjeņ eo am̧, en̄jake ko, im kajoor ilo jetōb renaaj kabwilōn̄ eok!
Kiiō juon naan in kakkōļ edik. Ewōr ro renaaj pere maron̄ eo am̧ n̄an kūr ioon kajoor eo an Anij. Ewōr jet ro me renaaj kōm̧m̧an bwe kwon pere eok make im kadikļo̧k ekeke eo ilo jetōb eo am̧ ekanooj em̧m̧an āinwōt juon kōrā ewāppen.
Lukkuun m̧ool eo, rikapo eo ejjab kōņaan bwe kwon meļeļe bujen eo kwaar kōm̧m̧ane ilo iien peptaij eo ak mennin letok eo eļap an jeļāļo̧kjeņ im kajoor eo kwaar bōke ak naaj bōke ilo tampeļ eo—m̧weo im̧ōn Irooj. Im Setan aaet ejjab kōņaan bwe kwon meļeļe bwe aolep iien kwoj erreo im jerbal im kabun̄jar ilo tampeļ eo, kwoj bōk kallim̧ur eo kōn kōjparok an kajoor an Anij im enjeļ ro An ewōr “aer eddo” ioomi.3
Setan im ro rikarejaran renaaj aolep iien ejake kapan̄pan̄ ko n̄an bōbrae eok jān am̧ meļeļe mennin letok ko ilo jetōb me em̧ōj am̧ kar im maron̄ jeraam̧m̧aan. Jerata, jet iaan kapan̄pan̄ ko remaron̄ waļo̧k itok jān jaje m̧anit an bar juon armej. Ej kōm̧m̧an aō ļōmņak bwe jabdewōt iami me ekar en̄jake diktokjeņ ak jab lōke jān juon ritōl an priesthood ak kar kowaane ak kakkure jān ļeo pāleen, jemān, ak juon eo watōke m̧ōttam̧. Ij lukkuun būrom̧ōj bwe elōn̄ iami rekar en̄jake kowaane, jab kautieje, ak bōd ekajete. Kain kakkure rōt kein ejjeļo̧k jikier ilo aelōn̄ in kiin̄ eo an Anij.
Oktak eo ilo lale menin, ej ļujir eō n̄e ij ekkatak kōn ritōl ro an priesthood ro rej lo̧udin̄din̄ ilo pukot ijo koņaan kōrā ro ilo ward ak stake ko̧o̧njeļ ko. Ij bōk im̧we jān kajjojo em̧m̧aan ro rej kwaļo̧k bwe eddo eo aorōktata an priesthood eo ej n̄an kea kake kōrā eo pāleen.4 Ij kautiej em̧m̧aan eo me ej lukkuun kautiej maron̄ eo an kōrā eo pāleen n̄an bōk revelesōn im kaorōk e āinwōt juon m̧ōttan jokin wōt juon ippān ilo m̧are eo aerro.
N̄e juon em̧m̧aan ej meļeļe kōn wōj eo im kajoor eo an juon kōrā in Rikwojarjar ewāppen, meļeļe, em̧ōj an bōk mennin letok kwojarjar eo, ej ke jabdewōt un me ej en̄jake āinwōt aikuj jutak n̄e lio ej deļo̧n̄e ruum̧ eo?
Jān jinoin iien, kōrā ro rekar jeraam̧m̧an kōn juon kam̧bōj em̧m̧an—maron̄ eo n̄an jeļā jim̧we jān bōd. Mennin letok in kōkm̧anm̧anļo̧k in ippān ro rej kōm̧m̧an im kōjparok bujen ko. Im ej makunļo̧k ippān ro me renaa jkōwaan kien ko an Anij.
Ikar kōkairir in kobaiki menin bwe ikar jab joļo̧k em̧m̧aan ro ilo jabdewōt wāween jān mennin aikuj ko jān Anij n̄an er barāinwōt n̄an jeļā ikōtaan jim̧we im bōd. Ak sister ro aō rejitōn bōro, maron̄ eo am̧ n̄an kile m̧ool jān bōd, n̄an erom̧ rilale jukjukin pād an mour in, elukkuun aorōk ilo raan kein āliktata. Im jej pedped ioomi n̄an katakin ro jet kōm̧m̧ane ejja āinwōt. In lukkuun kalikkar menin: eļan̄n̄e laļ ej luuji m̧wil eo erreo an kōrā ro, laļ in ejjāmin naaj mour jāne.
Kōj Armej ro Rekwojarjar jejjab jān laļ in, kōj jej armej in bujen in Israel. Kar kūr kōj n̄an kōpooje juon armej n̄an Itok eo Kein Karuo an Irooj.
Kiiō imaron̄ ke kalikkare jet bar meļeļe ko kōn kautiej n̄an kōrā ro im priesthood ro. N̄e kōjenoļok eok n̄an jerbal ilo juon kūr ium̧win tōl eo an juon eo ej kabwijer kii ko an priesthood eo—āinwōt bisop eo am̧ ak stake būreejtōn eo—kar lewaj n̄an eok mālim in priesthood eo n̄an m̧akūtkūt ilo kūr eo.
Ilo jekjek in wōt, ilo tampeļ eo ekwojarjar kwoj bōk mālim n̄an kōm̧m̧ane im jerbale eddo in kain̄i ko an priesthood eo aolep iien kwoj etal. Mennin letok kwojarjar eo am̧ ej kōpooje eok n̄an kōm̧m̧ane āindein.
N̄e kwoj bōk mennin letok kwojarjar eo ak kiiō kwojjab m̧areiki juon em̧m̧aan eo ej kabwijer priesthood eo im juon emaron̄ ba n̄an eok, “Joļo̧k bōd ejjeļo̧k priesthood ilo m̧weo im̧ōm̧,” jouj im meļeļe bwe ennaan in ejjab jim̧we. Emaron̄ ejjeļo̧k ippam̧ juon eo ej kabwijer- priesthood eo ilo m̧weo im̧ōm̧, ak kwaar bōke im kōm̧m̧an bujen ko rekwojarjar ippān Anij ilo tampeļ eo An. Jān bujen kein ej ibebwaj juon mennin letok kwojarjar an kajoor in priesthood ioomi. Im keememej, eļan̄n̄e ļeo pāļeem̧ eaikuj mej, kwe kwonaaj tōl m̧weo im̧ōm̧.
Āinwōt juon eo ejim̧we, juon kōrā in Rikwojarjar ewāppen kar bōk m enin letok kwojarjar eo, kwoj kōnono im katakin kōn kajoor im mālim eo jān Anij. Mekarta kōn kōketak ak bwebwenato, jej aikuji ainikien katakin eo an katak eo an Kraist. Jej aikuji kakkobaba ko am̧ ilo baam̧le eo, ward, im stake ko̧o̧njeļ ko. Am̧ bōk koņaam̧ elukkuun aorōk im ejjāmin naaj jej tokjān!
Sister ro aō rejitōn bōro, kajoor eo am̧ enaaj ļapļo̧k ilo am̧ jerbal n̄an ro jet. Jar ko am̧, jitlo̧k, iien ilo jeje ko rekwojarjar, jerbal in jipan̄ ilowaan tampeļ eo im menmenbwij an baam̧le naaj kōppeļļok lan̄ ko n̄an eok.
Ij kajjitōk ippāmi n̄an jar lukkuun ekkatak kōn kaolep m̧ool ko komaron̄ loi kōn kajoor eo an priesthood. Komaron̄ jino kōn Katak im Bujen Ko Jākjen 84 im 107. Jākjen kein renaaj tōl eok n̄an bar jet eoon ko. Jeje ko rekwojarjar im katak ko an rikanaan ro raan kein, rilolo ro, im rikwaļok revelesōn ro rej obrak kōn m̧ool kein. Ilo an meļeļe ko am̧ ļapļo̧k im ilo am̧ kōjerbal tōmak ilo Irooj im kajoor in priesthood eo An, maron̄ eo am̧ n̄an bōk ioom̧ mennin aorōk ko an jetōb me Irooj ekar kōpooji renaaj ļapļo̧k. Ilo am̧ kōm̧m̧an āindein, kwonaaj lo eok make maron̄ em̧m̧anļo̧k n̄an jipan̄ ejaake baam̧le ko n̄an indeeo me rej ippān doon, liāp ilo tampeļ eo an Irooj, im obrak kōn iakwe n̄an Jemedwōj Ilan̄ im n̄an Jisōs Kraist.
Aolep kijejeto ko ad n̄an jerbal in karejar n̄an doon, kwaļo̧k gospel eo, kōwāppenļo̧k Rikwojarjar ro, im lo̧mo̧ren ro remej kōkkejeli im kobaiki er ilo tampeļ eo ekwojarjar. Kiiō ewōr 166 tampeļ ko ipeļaakin laļ in, im elōn̄ rej itok wōt.
Ilo am̧ jeļā, Salt Lake Tampeļ eo, Tampeļ Square, im plaza eo ej atartar turin Church Office Building eo renaaj kōkāāli ilo juon būrojāāk eo enaaj ijjino ilo jem̧ļo̧kin iiō in. Tampeļ in ekwojarjar aikuj kōjparoke im kōpooje n̄an im̧we epepen ko ilju im jekļaj, āinwōt an kar im̧we kōj ilo epepen in.
Ilo an Kabun̄ in eddōkļo̧k, elōn̄ļo̧k tampeļ ko renaaj ekkaļ bwe en lōn̄ļo̧k baam̧le ko rej maron̄ deļo̧n̄e kōjeraam̧m̧an ko reļļap tata, eo ej an mour indeeo.5 Jej kile juon tampeļ āinwōt m̧weo ekwojarjartata an ilo Kabun̄ in. Jabdewōt karōk ko kar kōjjeļā kaki n̄an kalōke juon tampeļ ekāāl, ej erom juon m̧ōttan eaorōk an bwebwenato eo ad. Ilo ad ekōnono ijin joteen in, kom̧ sister raņ rej aorōk n̄an jerbal eo an tampeļ eo, im tampeļ eo ej ijo kwonaaj bōk mennin aorōk eo am̧ eutiejtata.
Jouj im ron̄jake ilo tiljek im kautiej ilo aō naaj kiiō kōjjeļļā kiiō kōn karōk ko n̄an kalōk ralitōk tampeļ ko. Eļan̄n̄e juon ej kōjjeļļā ilo juon jikin emenin eaorōk n̄an eok, im imaron̄ in ba bwe komaron̄ in jillo̧k im jar kōn kam̧m̧oolol ilo būruwōm̧. Jej m̧ōņōņō in kōjjeļļā karōk ko n̄an kalōk tampeļ ko ilo laajrak in jikin kein: Freetown, Sierra Leone; Orem, Utah; Porth Moresby, Papua New Guinea, Bentonville, Arkansas; Becolod, Philppines; McAllen, Texas; Coban, Guatemala; im Taylorsville, Utah. Kom̧ em̧ool, sister raņ rejitōn bōro. Jej lukkuun kam̧m̧oolol ilo ami bōk karōk kein im uwaak ilo kautiej.
Kiiō, ilo kilōke, ikōņaan likūt ioomi juon kōjeraam̧m̧an eo me komaron̄ meļeļe kajoor in priesthood eo kwaar bōke im bwe kwonaaj kōļapļo̧k kajoor in jān kōjerbale tōmak eo am̧ iloIrooj im ilo kajoor eo An.
Sister ro rejitōn bōro, kōn kautiej em̧wilaļ im kam̧oolol, ij kwaļo̧k aō iakwe n̄an kom̧. Ilo ettā, ij kam̧ool bwe Anij ej mour! Jisōs ej RiKraist eo. En̄in ej Kabun̄ eo An. Ij kam̧ool ilo etan ekwojarjar Jisōs Kraist, amen.