Kien eo Eļap Kein Karuo
Lan̄lōn̄ eo ad eļaptata ej itok ilo ad jipan̄ ro jeiū im jatū.
Ro jeiū im jatū rejitōn bōro, kom̧m̧ol kōn aolep men ko komi ej kōm̧m̧ani n̄an jipan̄ aiintok Israel ilo jim̧or turājet in ran̄ōļ eo, n̄an kōkajoorļo̧k baam̧le eo ami, im n̄an kōjeraam̧m̧an mour ko an ro jet rej aikuj. Kom̧m̧ol kōn ami mour āinwōt rikam̧ool ro rem̧ool an Jisōs Kraist.1 Komi jeļā im komi ej m̧ōņōņō in pokake kien eo eļap kien karuo, n̄an iakwe Anij im n̄an iakwe ro rūturim.2
Ilo allōn̄ ko jiljino rem̧ootļo̧k, Sister Nelson im N̄a kom̧ro kar ioon taujin Rikwojarjar ro ke kom̧ro kar ekkāke n̄an Central im South America, āne ko an Pacific, im elōn̄ jikin ko ilo United States. Ke kōm kar ekkāke, kōjatdikdik eo am ej n̄an kaļōk tōmak eo ami. Aaet aolep iien kom̧ro ej jepļaak ilo an kajoorļo̧k tōmak eo am̧ro kōn membōr ro im ro m̧ōttam̧ kōm kar ioon er. Imaron̄ ke kwaļo̧k jilu iien ko me eļap meļeļeier jān en̄jake eo am kiiō?
Ilo Māe, Sister Nelson im N̄a kom̧ro kar ekkāke ippān Elder Gerrit W. im Sister Susan Gong n̄an South Pacific. Ke kōm kar pād ilo Auckland, New Zealand, ekar juon menin utiej n̄an kōm ilo am kar ioon ritōl jar eo an muslim ilo Christchurch, New Zealand, ijo me ej kab ruo allōn̄ rem̧ootļo̧k, rikabun̄ jar ro ilo ad jab jeļā kar m̧an er ilo juon iien kakkure an rinana ro.
Kōm kar kwaļo̧k am būromōj n̄an em̧m̧aan rein jān bar juon tōmak im kapen jemjerā in ippān doon ikkijeen anemkwoj an kabun̄.
Jej barāinwōt baļōntier ikkijeen jerbal im jipan̄ ikkijeen jāān n̄an bar kaļōk mōn jar ko aer. Kweilo̧k in am ippān ritōl rein an Muslim ekar obrak kōn iakwe an em̧m̧aan ro rej jeim jen jeim jati.
Ilo O̧kwōj eo, ippān ļo̧k Elder Quentin L. im Sister Mary Cook, Sister Nelson im N̄a kōm kar ioon kajjojo armej ilo Buenos Aires, Argentina—elōn̄ iaer rejjab jān tōmak eo ad—ro me mour ko aer rekar oktak jān aer kar leļo̧k aer wiiljea jān Charity ko an Armej ro Rekwojar ilo Raan Ko Āliktata. Kōm kar en̄jake im̧we ilo aer kar kwaļo̧k lan̄lōn̄ obrak kōn kam̧m̧oolol kōn wiiljea ko aer rekāāl.
Iien eo kein kajilu ekar bōk jikin jejjo wiik rem̧ootļo̧k ijin ilo Salt Lake City. Ej itok jān juon leta eo ejeņoļo̧k kar bōke ilo iien kemeem eo aō jān juon jiron̄ eo inaaj an̄inn̄ini Mary—14 an iiō.
Mary ekar jeje kōn men ko me e im n̄an ewōr ippāmro jim̧or: “Ewōr 10 nejūm̧ ajri.: Ewōr 10 nejimim ajri. Kwojeļā kajin Mandarin. Jiljilimjuon iaan ajri ilo baam̧le eo aō, ekoba n̄a, kar kajiririik kōm jān China, kōn menin Mandarin ej kajin eo am jinointata. Kwoj juon rimwijmwij menono. Sister eo aō ruo kōttan aer mwijit menono [mwijmwij]. Em̧m̧an ippam̧ ruo-awa in jar. Em̧m̧an ippāmim ruo-awa in jar. Kwojeļā ekkōņ no̧o̧t in al. Brother eo aō ebar jeļā ekkōņ no̧o̧t in al. Ebilo āinwōt n̄a.”
Naan ko an Mary rekar lukkuun un̄ūr eō, ekar jab kwaļo̧k wōt jetōb eo an em̧m̧an ak ekar barāinwōt tōmak eo an ro jinen im jemān.
Rikwojarjar ro ilo Raan Ko Āliktata, āinwōt ippān rikaļoor ro jet an Jisōs Kraist, rej aolep iien reim̧aanļo̧k n̄an wāween ko n̄an jipan̄, kōketak, im iakwe ro jet. Ro me rej kōņaan bwe ren ān̄inn̄in er armej ro an Irooj “m̧ōņōņō n̄an ineek eddo ko an ro jet, … jan̄ ippān ro rej jan̄; … im [n̄an] im kaenōm̧m̧an ro rej pād ilo aikuj in aenōm̧m̧an.”3
Rej m̧ool ilo aer kappukot n̄an mour kōn kein eo eļap kein karuo. N̄e jej iakwe Anij kōn aolepān būruwōd, E ej jipan̄ kōj en̄jake im ļōmņak kōn mour an ro jet ilo juon doulul eaibojooj, im erreo.
Enaaj kar pen n̄an bwini jon̄an jerbal eo me Rikwojarjar ro ilo Raan Ko Āliktata rej kōm̧m̧ani ipeļaakin laļ in aolep iien ilo aolep iiō, ak ej maron̄ bwini em̧m̧an ko an Kabun̄ in āinwōt juon doulul eo ej kōjeram̧m̧an em̧m̧aan im kōrā ro—ļaddik im leddik ro—ro me rej pād ilo aikuj n̄an jipan̄ er.
Būrokūraam ikkijeen menin jipan̄ ko an Kabun̄ in rekar ijjino ilo 1984. Innām juon jitlo̧k an Kabun̄ in ilo aolepān laļ in ekar kōm̧m̧an n̄an kōm̧m̧an jeen n̄an jipan̄ ro kar jelōt er kōn din̄din̄ in mejlep ilo eastern Africa. Membōr ro an Kabun̄ in rekar leļo̧k $6.4 milien ilo ejja raan raan in jitlo̧k eo wōt.
Innem Elder M. Russell Ballard im Brother Glenn L. Pace kar jilkinļo̧k er n̄an Ethiopia n̄an loloorjake kilen an jeen ko rekwojarjar maron̄ nej kar jerbal. Kijejeto in ekar tokālik ijjino kōn ta eo me kar tokālik ņa etan Charity ko an Rikwojarjar ro ilo Raan Ko Āliktata.
Jān iien eo, Charity ko an Rikwojarjar ilo Raan ko Āliktata kar leļo̧k eļapļo̧k jān ruo bilien tala n̄an jipan̄ ro rej aikuj ipeļaakin laļ in. Jipan̄ in ej rej leļo̧k n̄an ro rej aikuji jekdoon jem̧jerā ko aer n̄an Kabun̄ in, ria, kil ta, pālele an leddik leddik ak laddik laddik, leddik ke ļaddik, ak jeļā eo aer kōn kien eo ioļap.
Ejjab aolepān ne. N̄an jipan̄ member ro ilo Kabun̄ eo an Irooj rej en̄taan, jej iakwe im mour kien eo etto kien an jitlo̧k.4 Kōj jejjab m̧ōn̄ā bwe jen maron̄ jipan̄ ro jet rej kwo̧le. Juon raan kajjojo allōn̄, jejjab m̧ōn̄ā im jej leļo̧k tarin wōņeen m̧ōn̄ā ko kijed (im eļapļo̧k) n̄an jipan̄ ro jet rej aikuj.
Ijamin meļo̧kļo̧k jinoin aō kar loļo̧k West Africa ilo 1986. Rikwojarjar ro rekar itok n̄an kweilo̧k ko ilo oran eo eļap. Men̄e elōn̄ rekar jab lukkun m̧weie, eiten aolepāer rekar itok im jar kōn nuknuk mouj ko ejjeļo̧k jidik ettoon ie.
Ikar kajjitōk ippān stae eo ewi wāween an jipan̄ membōr ro me ejabwe ippāer. Ekar uwaak bwe bisop eo aer ekar lukkuun jeļā kōn armej ro an. Eļan̄n̄e membōr ro remaron̄ kabwe ruo iien m̧ōn̄a ilo juon raan, ejjeļo̧k jipan̄ rej aikuji. Ak eļan̄n̄e rejjab maron̄ kabwe juon iien m̧ōn̄ā ak edikļo̧k—jekdoon kōn jipan̄ an baam̧le eo make—bisop ej leļo̧k m̧ōn̄ā, kar kōļļāiki jān jeen in joortak ko. Innem ekar bar kakobaik m̧ool in ekabwilōn̄lōn̄: joortak ko aer ekkā an ļapļo̧k jān jon̄an aikuj ko aer. Ram̧o̧ļo̧k in joortak ko kar jilkinļo̧k n̄an armej ro aolep jikin ro me rej aikuj eļapļo̧k. Rikwojarjar ro redim ilo Africa rekar katakin eō juon ekkatak em̧m̧an kōn kajoor in kien im jetōbōn jitļo̧k.
Ilo eddo eo ad āinwōt membōr ro ilo Kabun̄ in, jej en̄jake ad epaake ro rej en̄tan ilo jabdewōt wāween.5 Āinwōt ļaddik im leddik ro nejin Anij, jej aolep jeim jen jeim jati. “Jej eo̧ron̄ kapilōk eo an Kallim̧ur M̧okta: “Kwōn erļo̧ke wōt peim̧ n̄an eo jeōm̧ im jatūm̧, n̄an am̧ riaikuj, im n̄an am̧ rijeram̧ōl.”6
Jej barāinwōt kajeo̧n̄ mour kōn katak ko an Irooj Jisōs Kraist me kar rekooti ilo Matu 25:
“Bwe I ar kwōle kom̧ ar naajdik Eō: I ar maro, im kom̧ ar kaidaak Eō: I ar ruwamāejet, im kom̧ ar kadeļo̧n̄ Eō:
“Ejjeļo̧k Aō nuknuk, im kom̧ ar kanuknuk Eō: I ar nan̄inmej, im kom̧ ar itōm lale Eō. …
“… Ilo ami kōm̧anm̧an jabdewōt n̄an juon iaan rein ro jatū ediktata, kom̧ ar kōm̧anm̧an n̄an Eō.”7
Kōtļo̧k bwe in kōnono kōn jejjo waanjon̄ak ko kōn wāween an Kabun̄ in ļoor katak kein an Rilo̧mo̧o̧r.
N̄an jipan̄ kōmeraik ro rej kwo̧le, Kabun̄ in ej loloorjake 124 jikin kakkoņ m̧ōn̄ā rej ņa etan bishops’ storehouse ipeļaakin laļ in. Kōn bishops’ storehouse kein, tarin 400,000 ortōr ikkijen m̧ōn̄ā rej kōm̧m̧an aolep iiō n̄an kajjojo ro rej aikuj. Ilo joko me ejjeļo̧k storehouse ie, bisop im branch būreejtōn ro rej kōjerbal jāān in joortak ko an Kabun̄ in n̄an leļo̧k m̧ōn̄ā im mweik ko n̄an ro membōr ro me rej aikuj.
Ijoke, apan̄ in ikkijeen kwo̧le ejelōt elōn̄ armej rej jokwe itulikin bautōre ko an Kabun̄ in. Ej ļapļo̧k ipeļaakin laļ in. Juon riboot ekāāl an United Nations ekar kwaļo̧k bwe oran ro rej kwo̧le ilo laļ in kiiō ele jān 820 milien—ak emaron̄ epaake juon m̧ōttan ruatimjuon armej ro remour ilo laļ in.8
Ej juon bwinbwin eo em̧ool! Eļap ad kam̧m̧oolol kōn jāān in jipan̄ ko ami. Kōn buruōmi ejouj, milien armej ipeļaakin laļ in remaron̄ ebbōk eļap m̧ōn̄ā, nuknuk, m̧ōko m̧ōer, wiiljea ko, uno ko, dān ko reerreo, im ko jet, n̄an milien armej ro rej aikuj.
Eļapļo̧k nan̄inmej ipeļaakin laļ in ej waļo̧k kōn an ettonoon dān ko. N̄an kiiō, ijjino in kein jipan̄ ko an Kabun̄ in ekar jipan̄ leļo̧k dān ko rerreeo n̄an jibuki jukjuk in pād ko ilo 76 laļ ko.
Juon būrajāāk ilo Luputa, ilo Democratic Republic ilo Congo, ej juon waanjon̄ak. Kōn juon bwinbwin in armej eo ele jān 100,000, taun ekar ejjeļo̧k dān ie. Rilaļ eo rekar etetal ettoļo̧k n̄an tōpar dān in daak ko rerreeo. Dān ko jān iumin laļ kar loi 18 m̧ael (29 km) ettoļo̧k, ak armej ro ilo taun eo rekar jab maron̄ tōpar dān ko ilo kajjojo raan.
Ke mijeinede ro ad ikkijeen kein jipan̄ rekar ekkatak kōn apan̄ in, rekar jerbal ippān ritōl ro ilo Luputa kōn kein jerbal ko im kilen kōjerbal baib in dān ko n̄an jikin eo. Armej in Luputa rekar joļo̧k jilu iiō n̄an kōbwij juon mita m̧wūlaļ depļo̧ki dōkā kilep ko im mar ko. Ilo aer jerbal ippān doon, raan eo ekam̧ōņōņō āliktata ke dān ko reerreo im rekāāl rekar maron̄ tōparļo̧k aolep ilo taun ko.
Kabun̄ in ekar bar jipan̄ rijipokwe ro, men̄e jān jorrāān in tariņae, jorrāān in mejatoto, ak kakkure kōn kabun̄. Elōn̄ ļo̧k jān 70 milien armej rej kiiō em̧m̧akūt jān m̧ōko m̧ōer.9
Ilo iiō eo 2018, Kabun̄ in ekar leļo̧k kein jipan̄ ikkijeen idin̄ ko n̄an rijipokwe ilo 56 laļ ko. N̄an kakobaba, elōn̄ membōr ro ilo Kabun̄ in rej baļōntōōr iien ko aer n̄an jipan̄ rijipokwe koņ ilo jukjuk in pād eo aer ekāāl. Jej kam̧m̧oolol kajjojo iaami ro rej kōm̧m̧an kijejeto n̄an jipan̄ ro rej kajjieon̄ n̄an ejaake m̧ōko m̧ōer rekāāl.
Kōn jāān in jipan̄ kein n̄an Deseret Industries outlets ilo United States, milien baun in nuknuk ko kar aini im kajem̧ooje kajjojo iiō. Ke bisop eo ilo jikin eo ej kōjerbal vast inventory n̄an jipan̄ membōr ro rej aikuj, m̧ōttan eo eļaptata rej leļo̧k n̄an doulul in jipan̄ ko jet ro me rej ajeeji m̧weik ko ipeļaakin laļ in.
Im ej kab iiō eo ļo̧k, Kabun̄ in ekar leļo̧k juon vison n̄an kea kōn elōn̄ļo̧k jān 300,000 armej ilo 35 laļ ko, kea kōn nin̄nin̄ ko rej kab ļotak n̄an taujin mam ro im nin̄nin̄ ro ilo 39 laļ in, im wiiljea ko kōn eļapļo̧k jān 50,000 armej ro rej jokwe ilo laļ ko rellōn̄.
Kabun̄ in kar jeļā kake kōn aer pād ilubwiljin armej ro me rej kab itaakļo̧k n̄e ej kakkure ko renana rej waļo̧k. Aeet m̧okta jān an kar hurricane eo kakkure juon jikin, ritōl ro an Kabun̄ in im rijerbal ro ilo jikin eo in ejorrāān rekar ejaake juon pepe kōn wāween aer naaj ajeeji kein jerbal ko im rijipan̄ ro rej bōk koņaer n̄an jipan̄ ro me naaj kar jelōt er.
Kar iiō eo ļo̧k, Kabun̄ in ekar kadedeļo̧k eļapļo̧k jān 100 būrajāāk n̄an kōkm̧anm̧an jorrāān ko ipeļaakin laļ in, jipan̄ ro rekar jorrāān kōn lan̄ ko, kijeek, ibwijleplp, im m̧akūtkūt an laļ, im jorrāān in mejatoto ko jet. N̄e ekkar, membōr ro ilo Kabun̄ in ad rej kaņōk nuknuk iaļo̧ rej kuk ilo elōn̄ oraer n̄an jipan̄ ro em̧ōj jelōt er kōn jorrāān in mejatoto. Kain jipan̄ rōt in, letok jān elōn̄ iaami, ej juon jerbal in karejar eļap.
Ro jeiū im jatū rejitōn bōro, m̧akūtkūt ko ikar kōmeļeļeik rej jet m̧ōttan ko reddik ilo an eddōkļo̧k būrokūraam ikkijeen menin jipan̄ ko an Kabun̄ eo an Jisōs Kraist im Armej ro Rekwojarjar ilo Raan Ko Āliktata.10 Im kom̧ ro me kom̧ ej karkūrm̧ool aolep men kein. Kōn waanjon̄ak in mour eo ami, buruōmi ejouj, im pein jipan̄ ko peimi, ejjeļo̧k kajjitōk bwe elōn̄ jukjuk in pād ko im ritōl ro an kien rej ņōbar kom̧ kōn kijejeto ko ami.11
Jān jinoin aō erom̧ Būreejtōn an Kabun̄ in, eļap an lokjeņaō kōn elōn̄ būreejtōn ro, prime minister ro, im ambassador ro rej m̧ool ilo aer kam̧m̧oolol kōn jipan̄ kein ad n̄an armej ro aer. Ilo aer bar kwaļo̧k aer kam̧m̧oolol kōn kajoor eo me member ro ad rej bōktok n̄an aelōn̄ eo aer āinwōt jet riaelōn̄ eo me eļap rie im jipan̄ ippāer.
Ikar bar bwōlōn ilo an ritōl ro an laļ in kar loļo̧k Būreejtōn eo Kein kajuon im kwaļo̧k aer kōjatdikdik kōn Kabun̄ in n̄an ejaake ilo joko jikier. Etke? Kōnke rejeļā bwe Rikwojarjar ro ilo Raan Ko Āliktata renaaj jipan̄ kalōk baam̧le ko rekajoor im jukjukin pād ko, kōm̧m̧an bwe mour ko aer ren em̧m̧anļo̧k jekdoon ia eo rej jokwe ie.
Jekdoon ia eo ijo jej likūt lāmoren, membōr ro ilo Kabun̄ in rej en̄jake kajoor kōn jipan̄ an Anij im aolep āinwōt ro rej jeim jen jeim jati. Em̧ool, lan̄lōn̄ eo eļaptata ad ej itok n̄e jej jipan̄ brother im sister ro ad, jekdoon ijo jej jokwe ie ilo laļ in me eaibojooj.
Leļo̧k n̄an ro jet—kōm̧m̧an kijejeto ko rem̧ool n̄an kea kōn ro jet jon̄an wōt an ļapļo̧k n̄e jej keā kōn kōj make—ej ad lan̄lōn̄. Eļaptata, imaron̄ bar kakobaik, n̄e eapan̄ im n̄e ej bōk kōj jān joko ekoņ ad pād ie.. Lour kōn kein eo eļap kein karuo ej juon kii n̄an erom̧ juon rikam̧ool an Jisōs Kraist.
Ro jeiū im jatū rejitōnbōro, kom̧ ro rej waanjon̄ak ro rem̧m̧an kōn leen ko me rej itok jān ad ļoor katak ko an Jisōs Kraist. Ij kam̧m̧oolol kom̧! Ij iakwe kom̧!
Ijeļā bwe Anij emour. Jisōs ej RiKraist eo. Kabun̄ eo an em̧ōj an jepļaaktok ilo raan ko āliktata n̄an kakūrm̧ool kōttōpar ko an rekwojarjar. Ij kam̧ool ilo etan Jisōs Kraist, amen.