2010–2019
Naan in Ikkilōk ko
Oktoba 2019 kweilo̧k eo eļap
2:3

Naan in Ikkilōk ko

Jān Būreejtōn Russell M. Nelson

Erreo eo an kajjojo armej rej aikuji juon lukkuun oktak in kōļmenļo̧kjeņ im bōro n̄an erom̧ āinwōt Irooj.

Ro jeiū im jatū jitōn bōro, ilo ad itok n̄an jem̧ļo̧kin kweilo̧k in, jej kam̧m̧oolol Irooj kōn ennaan ko rebōkkak im al ko rekar kōketak kōj. Jekar lukkuun lan̄lōn̄ kōn juon kwokwoj in kijoone eo ilo jetōb.

Jejeļā gospel eo an Jisōs Kraist kar kōjepļaaktok enaaj bōktok kōjatdikdik eo im lan̄lōn̄ eo n̄an armej ro renaaj ron̄jake im eo̧ron̄ katak ko An. Jej barāinwōt jeļā bwe kajjojo em̧ emaron̄ erom juon jikin kone em̧ool an tōmak, ijo aenōm̧m̧an, iakwe, im Jetōb eo an Irooj emaron̄ jokwe ie.

Aaet, m̧ōttan eo aorōk tata an Jepļaaktok eo ej tampeļ eo ekwojarjar. Kain̄i ko im bujen ko rekwojarjar rej lukkuun in aorōk tata n̄an kōpooje juon armej eo epojak n̄an karuwaineneiki Rilo̧mo̧o̧r eo ilo Itok eo An Kein Karuo. Kiiō, ewōr ad 166 tampeļ ko em̧ōj aer aje, im elōn̄ rej itok wōt.

Juon iien alooje lowaan enaaj kōm̧m̧an m̧okta jān aje eo an kajjojo tampeļ ekāāl im kar bar kōkāāle. Elōn̄ ro m̧ōttad rejjab jān tōmak in ad renaaj bōk koņaer ilo alooje tampeļ kein im naaj ekkatak jet men ko kōn kōjeraam̧m̧an ko an tampeļ. Im jet iaan rilotok rein renaaj wōnm̧aanļo̧k n̄an jeļā elapļo̧k. Jet renaaj lukkuun in kajjitōk ewi wāween aer karbab n̄an kōjeraam̧m̧an ko an tampeļ eo.

Āinwōt ro uwaan Kabun̄ in, jej aikuj in m̧aanjabpopo n̄an uwaake kajjitōk ko aer. Jemaron̄ kōmeļeļeiki bwe kōjeraam̧m̧an ko an tampeļ eo pojak wōt n̄an jabdewōt im aolep armej ro renaaj kōpooje er. Ak m̧okta jān aer deļo̧n̄e juon tampeļ eo em̧ōj an aje, rej aikuj in karbab. Irooj ekōņaan bwe aolep ajri ro Nejin ren bōk m̧ōttan kōjeraam̧m̧an ko an indeeo im repād ilowaan tampeļ eo An. Ekar kwaļo̧k ta eo kajjojo armej rej aikuj in kōm̧m̧ane n̄an karbab n̄an deļo̧n̄e m̧weo Im̧ōn ekwojarjar.

Juon jikin em̧m̧an n̄an kōj n̄an jinoe juon iien em̧m̧an n̄an katakin ej n̄an leļo̧k ad n̄an naan ko rekar jeje idibin tampeļ eo: “Kwojarjar n̄an Irooj: M̧weo Im̧ōn Irooj.” Ennaan eo an Būreejtōn Henry B Eyring rainin im elōn̄ ro jet rekar im̧we kōj bwe en ļapļo̧k ad kwojarjarļo̧k. Kajjojo tampeļ ej juon jikin ekwojarjar, kajjojo patron an tampeļ eo ej kajjieon̄ erom ekwojarjarļo̧k.

Aolep mennin aikuj ko n̄an deļo̧n̄e tampeļ eo ej iookļo̧k kwojarjar eo an juon make. N̄an kwaļo̧k karbab in pojak eo, kajjojo armej rej kōņaan m̧ōņōņō kōn kōjeraam̧m̧an ko an tampeļ enaaj wōr ruo an intōrpiu ko: kein kajuon ippān juon bisop, rikakpilōklōk ro ilo bisoprik eo, ak branch būreejtōn eo, kein karuo ippān juon stake ak mijen būreejtōn ak juon iaan rikakpilōklōk ro an. Ilo intōrpiu kein, jet kajjitōk ko renaaj kajjitōk.

Jet iaan kajjitōk kein ej kab m̧ōj kajim̧wi n̄an kalikkariļo̧k. Ikōņaan etale ippemi n̄an kom̧ kiiō:

  1. Ewōr ke am̧ tōmak ilo im juon naan in kam̧ool kōn Anij, Jemād Indeeo, Nejin, Jisōs Kraist; im Jetōb Kwojarjar?

  2. Ewōr ke juon am̧ naan in kam̧ool kōn Pinmuur eo an Jisōs Kraist im kōn jerbal eo An āinwōt am̧ Rilo̧mo̧o̧r im Ripinmuur?

  3. Ewōr ke juon am̧ naan in kam̧ool kōn Jepļaaktok eo an gospel eo an Jisōs Kraist?

  4. Kwoj ke rejtake Būreejtōn eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata āinwōt rikanaan eo, rilolo eo, im rikwaļo̧k revelesōn eo im āinwōt armej eo de eo ioon laļ in kar kōmālimi n̄an kōjerbal aolep kii ko an priesthood eo?

    Kwoj ke rejtake ro uwaan Būreejtōnji eo Kein Kajuon im Doulul eo an Jon̄oulruo Rijilōk ro āinwōt rikanaan ro, rilolo ro, im ribōk revelesōn ro?

    Kwoj ke rejtake Ritōl ro Routiej jet an Kabun̄ in im ritōl ro an Kabun̄ in ijo kwoj jokwe ie?

  5. Irooj ekar ba bwe men otemjej rej aikuj “kōm̧m̧an ilo erreo” Im̧aan Mejān (Katak im Bujen Ko 42:41).

    Kwoj ke kajjieon̄ n̄an erreo ilo m̧wil ilo ļōmņak im m̧antim̧?

    Kwoj ke pokake kien erreo?

  6. Kwoj ke ļoore katak ko an Kabun̄ eo an Jisōs Kraist ilo kōm̧m̧an ko am̧ make im iilo lobwilej ippān ro uwaan baam̧le eo am̧ im ro jet?

  7. Kwoj ke rie ak jutak likin jabdewōt katak ko, kōm̧m̧an ko, ak katakin ko roktak n̄an ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata?

  8. Kwoj ke kajjieon̄ n̄an kōjparok im kōkwojarjar raan in Jabōt, jim̧or ilo m̧weo im ilo m̧ōnjar eo; pād ilo kweilo̧k ko am̧, m̧aanjabpopo n̄an im bōk m̧ōttan kwojkwoj eo ilo erreo; im mour ekakr n̄an kakien ko im kien ko an gospel eo?

  9. Kwoj ke kajjieon̄ n̄an m̧ool ilo aolep kōm̧m̧an ko am̧?

  10. Kwoj ke juon eo ej kōļļā juon m̧ōttan jon̄oul aolep iien?

  11. Kwoj ke meļeļe im pokake Naan in Mālōtlōt?

  12. Ewōr ke am̧ lokjak ak eddo ko jet kōn jāān n̄an eo kar peleem̧ m̧okta ak n̄an ajri ro nejūm̧?

    Eļan̄n̄e aaet, kwōj ke kiiō kōtōprak eddo ko?

  13. Kwoj ke kōjparok bujen ko me kwar kōm̧m̧ani ilo tampeļ eo, ekoba kōņak karmen in tampeļ ko āinwōt kar kōmeļeļeiki ilo iien bōk mennin letok kwojarjar (endowment) eo?

  14. Ewōr ke jerawiwi ko reļļap ilo mour eo am̧ me rej aikuj in ņamejļaer ippān priesthood ro ewōr mālim eo ippāer ejja m̧ōttan wōt ukweļo̧k eo am̧?

  15. Kwoj ke watōk eok make erreo n̄an deļo̧n̄e m̧weo im̧ōn Irooj im bōk koņaan ilo kain̄i ko an tampeļ?

Ilju, kajjitōk kein an peba in mālim eo n̄an deļo̧n̄e tampeļ kar bar kōkāāli renaaj maron̄ ajije n̄an ritōl ro an Kabun̄ in ipeļaakin laļ in.

Ilo kakkobaba n̄an uwaak kein ilo lukkuun m̧ool, ej meļeļe bwe kajjojo tampeļ patron ro rerūtto renaaj kōņake karmen ko rekwojarjar an priesthood eo ium̧win nuknuk ko aer. Menin ej kakōļļe eo an kallim̧ur eo ad itulowa n̄an kajjieon̄ kajjojo raan n̄an eromļo̧k āinwōt Irooj. Ej barāinwōt kakeememej kōj bwe jen tiljek wōt kajjojo raan n̄an bujen ko jekar kōm̧m̧ani im n̄an etetal ilo iaļ in bujen eo kajjojo raan ilo juon wāween eutiejļo̧k im ekwojarjarļo̧k.

Kiiō, Ium̧win jidik wōt iien, ikōņaan n̄an kōnono n̄an jodikdik ro ad. Kōmij rōjan̄ kom̧ n̄an kōkarbabe kom̧ n̄an peba in mālim ko n̄an deļo̧n̄e tampeļ eo ekadu kitien kōjerbale. Naaj kajjitōk ippam̧ kajjitōk ko me reiookwaj eok ilo m̧aanjabpopo eo am̧ n̄an kaini ko an peptaij im kapen ilo etan juon armej emej im jerbal kake (proxy). Kōmij lukkuun kam̧m̧oolol kōn erreo eo im m̧ōņōņō eo ami n̄an bōk koņaami ilo jerbal in ekwojarjar an tampeļ. Kōmij kam̧m̧oolol kom̧!

Erreo eo an kajjojo armej n̄an deļo̧n̄e m̧weo im̧ōn Irooj ej aikuji eļap m̧aanjabpopo eo ilo jetōb an kajjojo armej. Ak kōn jipan̄ eo an Irooj, ejjeļo̧k men epen. Ilo jet naan in kautiej ko, epidodo n̄an kalōke juon tampeļ jān kalōke juon armej ej m̧aanjabpopo n̄an juon tampeļ. Erreo eo an kajjojo armej ej aikuj juon oktak em̧ool an ļōmņak im bōro n̄an erom āinwōt Irooj, n̄an erom juon citizen em̧ool, n̄an erom juon waanjon̄ak em̧m̧anļo̧k, im n̄an erom juon armej ekwojarjarļo̧k.

Ij kam̧ool bwe kain jerbal in m̧aanjabpopo in ej bōktok kōjeraam̧m̧an ko rellōn̄ n̄an mour in im kōjeraam̧m̧an ko ban maron̄ meļeļe kaki n̄an mour eo ej itok, ekoba jekjek eo ejjeļo̧k jem̧ļo̧kin an baam̧le eo am̧ ilo aolep indeeo im indeeo ilo juon mejatoto “ejjeļo̧k jem̧ļo̧kin m̧ōņōņō.”1

Kiiō ikōņaan oktakļo̧k n̄an bar juon unin kōnono: karōk ko n̄an iiō itok. Ilo iien jibriin̄ in iiō 2020, enaaj jejjet 200 iiō jān tōre eo Josep Smith ekar en̄jake waļo̧ktok eo ilo nememein armej me jej jeļā kake āinwōt Visōn eo M̧oktata. Anij Jemād im Nejin Jitōn Bōro, Jisōs Kraist, rekar waļo̧kļo̧k n̄an Josep, juon jodikdik 14 iiō rūttoin. Iien jab in ekar kwaļo̧k kakōļļeik eo an jinoin Jepļaaktok eo an gospel eo an Jisōs Kraist ilo tarlep in, jejjet āinwōt kar kanaan kake ilo Baibōļ eo Ekwojarjar.2

Innām ekar itok lotok ko an armej ro jān rikwoj meļa in lan̄ ro, ekoba Moronai, John Peptaij, im Rijilōk ro m̧oktata Piter, James, Jon. Ko jet rekar itok tokālik, ekoba Moses, Elias, im Ilaija. Kajjojo rekar bōktok mālim eo ekwojarjar n̄an kōjeraam̧m̧an ajri ro nejin Anij ioon laļ in bar juon alen.

Kabwilōn̄lōn̄, jekar barāinwōt bōk Bok in Mormon eo: Bar juon Kallim̧ur kōn Jisōs Kraist, juon m̧ōttan jeje ko rekwojarjar n̄an Baibōļ eo Ekwojarjar. Revelesōn ko kar jeje ilo Katak im Bujen Ko im Bōōr eo Eļap Wōņāān rekar bar lukkuun kam̧weieiki meļeļe ko ad kōn kien ko an Anij im m̧ool eo an indeeo.

Kii ko im opiij ko an priesthood eo rekar bar jepļaaktok, ekoba opiij ko an Rijilōk, Jiljilimjuonn̄oul, Petriak, pris eo eutiej, elder, bisop, pris, rūkaki, im tikōn. Im kōrā ro rej iakwe Irooj rej jerbal ilo peran ilo Doulul eo an Kōrā ro, Būraimere, Doulul eo an Jiron̄ ro, Jabōt Jikuuļ, im kūr ko jet an Kabun̄ in—aolep m̧ōttan ko raorōk an Jepļaaktok eo an gospel eo an Jisōs Kraist ilo tarlep in.

Kōn menin, ilo iiō i2020 enaaj kāālete āinwōt 200 iiō. Kweilo̧k eo Eļap ilo Eprōļ in tok enaaj oktak jān jabdewōt kweilo̧k ko m̧oktaļo̧k. Ilo allōn̄ kein jiljino rej pedotok, ij kōjatdikdik bwe aolep membōr ro im aolep baam̧le ko renaaj m̧aanjabpopo n̄an juon kweilo̧k eo ejenolo̧k me enaaj kōjeraam̧m̧an aolep pedped ko an jepļaaktok eo an gospel eo.

Komaron̄ kōņan jino m̧aanjabpopo eo am̧ kōn riiti ilo juon wāween oktakļo̧k bwebwenato eo an Josep Smith kōn Visōn eo M̧oktata āinwōt kar je ilo Bōōr eo Eļap Wōņāān Kooj in ekkatak eo ad n̄an iiō in tok ilo Itok, Ļoor Eō ej Bok in Mormon. Komaron̄ kōņaan in kōļmenļo̧kjeņ kōn kajjitōk ko raorōk āinwōt, “Ewi wāween an naaj mour eo aō oktak eļan̄n̄e jeļāļo̧kjeņ eo aō bōk jān Bok in Mormon eo kar kajjojo jako?” ak “Ewi wāween an m̧akūtkūt eo rekar itok ālkin Visōn eo Kein Kajuon kar kōm̧m̧an oktak n̄an n̄a im ro ij iakwe er?” Barāinwōt, kōn Bok in Mormon pija ko kiiō rej pojak, komaron̄ kōņaan kobaik er ilo ekkatak eo an juon make ak baam̧le.

Kāālet kajjitōk ko am̧ make. Ejake karōk eo am̧ make. Ajeļo̧k eok make ilo aiboojoj in meram eo an Jepļaaktok eo. Ilo am̧ kōm̧m̧ane, kweilo̧k eo eļap ilo Aprōļ in tok eban kein kakeememej wōt; naaj jamin meļo̧kļo̧ke.

Kiiō ilo kiili, ij likūt aō iakwe ippemi im aō kōjeraam̧m̧an, bwe kom̧ kajjojo en maron̄ m̧ōņōņōļo̧k im ekwojarjarļo̧k ilo kajjoj raan rej eļļāļo̧k. Ilo tōre in, jouj im jeļā bwe revelesōn ej wōnm̧aanļo̧k wōt ilo Kabun̄ in im enaaj wōnm̧aanļo̧k ium̧win tōl eo an Irooj m̧ae “jibadbad ko an Anij renaaj tōprak, im Jeova eo Eļap enaaj ba jerbal in ededeļo̧k.”3

Ij kōjeraam̧m̧an kom̧ , bar kapenļo̧k iakwe eo aō n̄an kom̧, kōn naan in kam̧ool eo aō bwe Anij ej mour! Jisōs ej RiKraist eo! En̄in ej Kabun̄ eo An im jej armej ro An. Ilo et eo ekwojarjar etan Jisōs Kraist, amen.