Taeka ni Kaukuki
Ti na ukoukora, ni kawai nako are ti kona, n ongo iroun Iesu Kristo, are e taetae nakoira rinanon mwaakan ao ana ibuobuoki te Tamnei ae Raoiroi.
Tariu ao mwaaneu, ti butimwai ngkami nakon ana maungatabu ni kabuta Ana Ekaretia Iesu Kristo ibukiia Aika Itiaki ni Boong aika Kaitira Eberi 2020, iaan bukina ake kam atai, I tei imatami inanon te auti ni maungatabu ae akea kaaina!
I aki koaua raoi, ngke I berita nakoimi n te maungatabu n Okitobwa 2019 bwa te maungatabu ni kabuta n Eberi aei e na “ururingaki” ao n “aki mwanuokinaki,” bwa te taetae nakoia kain te taromauri ae kee mwaitiia iaan 10 are e karika te maungatabu aei bwa e na aki kona ni mwanuokinaki ibuku! E ngae n anne n atakina ae kam ongora rinanon te kanakobwana ni bwaai aika maiu man te iti, ao aron tamaroan anaan te anene iroun te kuaea ae “It Is Well with My Soul,” e uota te rau ae korakora nakon tamneiu.
N aron ae kam ataia, te mwaiti n te maungatabu ni kabuta aei e tianaki bwa mwakoron ara kekeiaki n riki bwa kaain te aonaba aika raoiroi ao ni karaoa are ti kona ni kauarerekea butanakon te COVID-19. Te aoraki aei iai mwiina ae korakora ni kabuta te aonaaba. E a tia naba ni bitii ara bootaki n Taromauri, mwakuri ni mitinare, ao te mwakuri n te tembora naba n te tai aei.
E ngae ngke kaetieti aikai a irekereke ma te man aoraki ae tiritiri, katakira ni maiura e raka riki nakon te aoraki are butanako aei. Kataaki n taai aika ana roko e kona n riki man te kabuanibwai, te urubekebeke n te aba, ke te uruaki n nano ae aki kantaningaki.
Ti na kanga ni kaitarai taian kataaki aikanne? E a tia te Uea n tuangiira bwa “ngkana kam a tauraoi ao kam na aki maaku.”1 Eng, ti kona ni kawakin ara tania n amwarake, n ran, ao ni mwane. Ma ae ti tebo kakawakiia bon kainnanora ni kanoa oin ara autinikaikobwai n tamnein te onimaki, te koaua, ao te kakoaua.
Te bwai ae kakawaki n te maiu aei bon ara katauraoi ni kaitibo ma te Atua. Ti karaoa aei man ara kekeiaki ni katoabong n riki n ai aron ara Tia Kamaiu, Iesu Kristo.2 Ao ti karaoa anne ngkae ti rairinanora ni katoabong ao ni karekea Mwaakana ni kaitiaki, ni kamaiu, ao ni kakorakora. Ngkanne ti namakina te rau ao te kimwareirei ae teimatoa, ao inanon taai aika karina aikanne. Aio raoi bukina ngkai e a tia te Uea n tuangira bwa ti na tei n taabo aika tabu ao “n aki kamwaingaki.”3
Te ririki aei, ti kauringa te ka 200 n ririki n te bwai ae riki ae rangi ni kakawaki n rongorongon te aonaaba—are bon, kaotin te Atua te Tama ao Natina ae Tangiraki, Iesu Kristo, nakon Iotebwa Timiti. N tain kaotina are tii teuana anne, te Atua te Tama e kotea Iesu Kristo ao e taku: “Natiu ae Tangiraki te Uaei. Ongo Irouna!”4
Te kaumaki are e anganaki Iotebwa bon ibukira n tatabemanira. Ti na ukoukora, ni kawai nako are ti kona, n ongo iroun Iesu Kristo, are e taetae nakoira rinanon mwaakan ao ana ibuobuoki te Tamnei ae Raoiroi.
Te kantaninga ibukin te maungatabu aei ao ni kabane maungatabu ni kabuta bwa a na buokira n ongo Irouna. Ti a tia n tataro, ao ni kaoi ngkami bwa kam na tataro, bwa e aonga Tamnein te Uea ni korakora namakinana bwa ko aonga ni kona n ongo rongorongo ake e a tia ni kataui ibukimi te Uea—rongorongo ake a na uota te rau nakon tamneim. Rongorongo ake a na kamaiua nanom ae uruaki. Rongorongo ake a na buokiko ni kamatata am iango. Rongorongo ake a na buokiko n ata te bwai ae ko na karaoia ngkai ko waaki n taai ni kangaanga ao ni kataak aikai ao aika ana roko.
Ti tataro bwa te maungatabu aei e na ururingaki ao n aki kona ni mwanuokinaki man rongorongo ake kam na ongoraei, katanoata aika onoti ake a na karaoaki, ao te taneiai are ko na kaoaki iai bwa ko na iria.
Te katooto, n tokin te tetere ni moaningabongin te Tabati, ti na kanakoa te nebonebo ni kabuta te aonaaba ngke n na kairia n te Takarua n Otanna ae Tabu. Ti tataro bwa e na riki aei bwa te kamataata n tamnei ibukimi ngkai ti katiteuanaki n te aonaaba n ara kakaitau nakon te Atua te Tama ao Natina ae Tangiraki man neboakiia n te kawai ae onoti aei.
Ibukin te taneiai ae onoti aei, ti kabonganai kawere aika mainaina man itiaki. Ma ngkana akea am kawere, ko kona n tii katiotioa baim. N tokin Takaruaean Otanna, kaain te taromauri ana raoniia kaain te kuaea n anenea “Tamnein te Atua.”5
Tariu ao mwaneu, te maungatabu aei e na bon rangin n tamaroa. Te ririki aei e na bon rianako tamaroana ngkai ti kabanea ara iango ma nanora ni koaua iaon te Tia Kamaiu ao Ana euangkerio ae kaokaki. Mwiin te maungatabu ae moan te kakawaki man teimatoa n te maungabu aei e na riki ngkana a bitaki nanora ao ni kabanea ara tai n ongo Irouna.
Kam butimwaeaki nakon te maungatabu ni kabuta n Eberi 2020! I ataia bwa te Atua, ae Tamara i Karawa ao Natina, Iesu Kristo, a tabe ibukira. A na raonira rinanon tetere inanon uoua te bong aika mimitong aikai ngkae ti kekeiaki ni kaniira riki Nakoia ao ni Karineia. N aran Iesu Kristo ae tabu, amen.