Mwaakan Ana Boki Moomon n te Rairaki

Iroun Unimwaane Benjamin M. Z. Tai

Man te Itingaun

Ana Boki Moomon e katauraoa kanan te tamnei, e anga te babaire ni mwakuri, ao e reitiira ma te Tamnei ae Raoiroi.

Imwiin rinanoakin ribootin au tutuo ni marurungiu, I noria bwa I riai ni karaoi tabeua bitaki nakon aron maiu. Ni buokai, au taokita e anga te babaire ibukin tein kanau ao au kakammwakuri, are, ngkana I rineia bwa n na iria, e na bitai nakon te aomata ae marurung riki.

Ngkana ngaira n tatabemaniira ti karaoa te ukenano n te maiu n tamnei, tera ae ti na reiakinna n aron maiura? Tera bitaki are e na anganira ara taokita n te maiu n tamnei? Bwa ti aonga n riki nakon are ti riai nako iai, e kakaawaki bwa ti ataa te bwai are ti na karaoia ao ti karaoa are ti ataia.

Iesu Kristo bon te Mataniwi n Tia Kuakua.¹ Rinanon Ana Mwakuri ni Kamaiu, E kabaei ikoakira, e uota Iaona mamaarara, ao e kamaoi nanora aika uruaki.² Rinanon Mwaakana a kona ni kakorakoraaki maamaarara.³ E kaoira bwa ti na Iriiria⁴ man reiakinan Rongorongona, ongoraeakinan Ana taeka, ao te nakonako inanon te nimamannei n Tamneina.⁵ E a tia ni berita bwa e na buokiira⁶ n te waaki n rairaki n te maiu aei, are e bitiira man uota nakoira te kimwareirei ae akea tokina.⁷

E a tia te Tia Kamaiu n anganiira Ana Boki Moomon bwa te bwai ni mwakuri ae oomwaka are e na ibuobuoki n te rairaki. Ana Boki Moomon e katauraoa kanan te tamnei, e anga te babaire ni mwakuri, ao e reitiira ma te Tamnei ae Raoiroi. E koreaki ibukira,⁸ iai inanona ana taeka te Atua n ae bebete⁹ ao e tuangiira bwa antai ngaira, oin maiura, ao arora n taai aika a na roko.¹⁰ Ma te Baibara, Ana Boki Moomon e kakoaua Iesu Kristo¹¹ ao e reirei bwa ti na kanga n ataa te koaua ao n riki n ai Arona.

Te Tari Saw Polo bon 58 ana ririki ngke e moan kaotaki nakoina ana euangkerio Iesu Kristo ae kaokaki. Ngke I kaitibo ma ngaia, e a tia ni beku bwa te beretitenti n te mwaanga inanon tabeua ririki, ma I reiakinna bwa e bon tuai man wareka Ana Boki Moomon ibukina bwa e tuai rairaki n ana taetae are te Burmese. Ngke I titirakinna bwa e kanga n ataia ae e koaua te boki aei ngkai e tuai warekia, e kaeka bwa e a tia ni kamatebwaia Karakin Ana Boki Moomon boki n tamnei ni katoa bong man taraan korobonna, kabonganaan te rikitinare n rairii taeka ni Imatang, ao karauan raoi korean baike e a tia n reiakin. E kabwarabwara, “Ni katoa tai are I kamatebwai, I tataroakin baike I reiakin, ao I namakina te rau ao te kimwareirei, e itiaki au iango, ao e marau nanou. I namakina te Tamnei ae Raoiroi ni kakoaua nakoiu bwa e bon koaua. I ataia bwa Ana Boki Moomon bon ana taeka te Atua.”

N aron te Tari Saw Polo, ngaira n tatabemaniira ti kona ni kamatebwaia Ana Boki Moomon ni kaeineti ma aron ara waaki. Ngkana ti tangiria ni kakoaua ao n iangoi ana reirei i nanora, ti kona ni butiia te Atua ma te onimaki koauan reirei akanne.¹² Ngkana ti koaua raoi n nanora ni kan ataia ao iai iroura te nano ni mwakuriia, E na kaekaira i nanora rinanon te Tamnei ae Raoiroi. Bon man mwaakan te Tamnei ae Raoiroi are ti na atai koauan bwaai ni kabane.¹³ N te tai are ti karekea iai te kakoaua ae tabu n Ana Boki Moomon, ti na bon ataia naba man te mwaaka naba anne bwa Iesu Kristo bon te Tia Kamaiu n te aonaba, Iotebwa Timiti bon Ana burabeti, ao Ana Ekaretia Iesu Kristo ibukiia Aika Itiaki ni Boong aika Kaitira bon Ana Ekaretia ae Kaokaki.¹⁴

Ngke I ataeinimwaane ni moan waakinan au mwakuri ni mitinare, I tokara te wanikiba are e na kaea Aotiteria. I namakina te maroa, te raraoma, ao te aki tau ma iai au motinnano ni beku, e korakora irou kainnanoan te kaungaaki bwa te bwai are I kakoaua e bon koaua. I tataro ao ni wareware n au boki aika tabu ma nanou, ma ngke e waakinako te mwananga, e korakora au nanokokoraki ao e bwaka marurungin rabwatau. Imwiin rawawatau inanon tabeua te aoa, te tia mwakuri n te wanikiba e mwananga n te tabo n nakonako n te wanikiba ao e tei irarikin au kaintekateka. E anaa mai baiu Ana Boki Moomon are I wareware mai iai. E taraa moan te boki ao e taku, E rang tamaroa te boki anne!” ao imwiina e kaoka te boki nakoiu ao e reitanako mwanangana. I aki manga noria imwiin anne.

N te tai are I ongo iango akanne, I ongo raoi ao n namakinna i nanou, “I mena ikai, ao I ataia bwa ko mena ia. Boni karaoa am kabanea n tamaroa, bwa I a bwaina are imwina.” Iaon te wanikiba anne iaon Marawan te Betebeke, I karekea te kakoaua ae onoti rinanon au kamatebwai n Ana Boki Moomon ao ana wirikiriki te Tamnei ae Raoiroi bwa e kinaai au Tia Kamaiu ao e koaua ana euangkerio.

E reirei Unimwaane David A. Bednar: “Ataakin te euangkerio bwa e koaua bon aan te koaua. Te teimatoa ni koaua nakon te euangkerio bon aan te rairaki.”¹⁵ Te rairaki e kabaeira bwa ti na riki bwa “taan toua mwiin ana taeka, ao tiaki tii taan ongora.”¹⁶ Ana babaire ni mwakuri te Uea ibukira—ana reirei Kristo—e taekinaki n ae bwarabwara raoi inanon Ana Boki Moomon.¹⁷ Aikai kanoana:

• Te moan, kammwakuran te onimaki iroun Iesu Kristo man Onimakinana, kawakinan Ana tua nako, ao ataakina bwa E na buokiira.¹⁸

• Te kauoua, te rairannano n te bong koraki mani kabwakara ao karekean te kimwareirei ao te rau n te tai are e kabwarai burera.¹⁹ Te rairannano e kabaeira bwa ti na kabwarai bureia tabeman²⁰ ao e buokiira ni waaki nako. E a tia ni berita te Tia Kamaiu bwa e na kabwarai burera ni katoaa te tai are ti rairannano iai.²¹

• Te kateniua, karaoan ao kawakinan berita aika tabu ma te Atua rinanon otenanti n aron te bwabetito. Aio e na kateimatoaira iaon kawain te berita are e kairiira nako Ina.²²

• Te kaaua, karekean ana bwaintituaraoi te Tamnei ae Raoiroi. Te bwaintituaraoi aei e anganira te reitaki ae teimatoa nakon teuare e katabu, e anga te rau, ao e kairiira.²³

• Te kanimaua, te teimatoa ni karokoa te toki man n te waaki nako ma te botumwaaka ao ni kanuaira n te bong koraki n ana taeka Kristo.²⁴ Man kanuaakira man Ana Boki Moomon ao maiuakinan ana reirei, ti kona n tokanikai iaon kariiri ao ni karekea te kairi ao kamanoara inanon maiura.²⁵

Man te reitinako ni kauaei ana reirei Kristo inanon maiura, ti na tokanikai iaon te totoko are e tuuka te bitaki ao te maaku are totokoa te mwakuri. Ti na karekea te kaotioti ibon iroura, bwa te Tamnei ae Raoiroi “e na kaotii nakoira bwaai ni kabane are ti na karaoi,”²⁶ ao “ana taeka Kristo e na tuangiira bwaai ni kabane are ti na karaoi.”²⁷

Inanon 20 te ririki, te Tari Huang Juncong iai ana kaangaanga n te arekoro, tikareti, ao te kemboro ae korakora. Ngke e uotaki nakon Iesu Kristo ao Ana euangkerio ae kaokaki, te Tari Huang e tangiria ni bitaki ibukin ana utu ae uarereke. Ana kakaewenako ae matoatoa bon te moko. E bon rang korakora-mokona, e kataia ni kaaki n te tai ae mwaiti ma e aki koro nanona. N te bong teuana, taeka aikai man Ana Boki Moomon a roko nakon ana iango: “ma te nano ae koaua ao nanomi raoi.”²⁸ E ngae ngke a aki koro bukin ana kekeiaki are mai mwaina, e namakinna bwa tao e kona ni bitaki n ana ibuobuoki Tamara are i Karawa ao Iesu Kristo.

Mitinare ake a bwanin aia tai a boota aia onimaki ma ngaia ao a karaoa te babaire are e na buokia ni kaka te moko, n reitaki ma te tataro ae bati ao kamatebwaian ana taeka te Atua. Ma te nano ae koaua ao nanora raoi, te Tari Huang e waaki ma te motinnano ae kakaonimaki ao e kunea bwa ngke e katuaa ana iango iaon anua aika boou ake e tangiria ni karikirakei, n aron kamatebwaian Ana Boki Moomon, e aaki bati ni katuua ana iango n anua ake e tangiri ni kaki.

Ni manga taraa are rinanona 15 te ririki n nako, e taku, “I aki uringnga raoi bwa ningai raoi are I kaki te moko, ma ngke I kataia n ae korakora n te bong koraki ni karaoi bwaai ake I atai bwa I riai ni karaoi ni kaoa Tamnein te Uea inanon maiu ao n reitinako ni kakaraoi, I aikoa bwarua te tikareti man te tai anne.” Rinanon maiuakinan ana reirei Ana Boki Moomon, maiun te Tari Huang e a tia ni bitaki, ao e a tia n riki bwa te kainnaba ao te karo ae tamaroa riki.

E a tia ni berita Beretitenti Russell M. Nelson: “Ngkai kam kamatebwaia ana Boki Moomon ma te tataromwaaka ni katoa bong, kam na karaoi babaire aika tamaroa—ni katoa bong. I berita bwa ngkae kam iangoa te bwai ae kam kamatebwaia, a na uki wintoon karawa, ao kam na karekea kaekaan ami titiraki ao kairan maium. I berita bwa ngkae kam kamatebwaia ana Boki Moomon n te bong koraki, kam na kamanoaki man buakakan kanoan te bong, n ikotaki ma kaorakin tamnei n tangako ao tabeua anua aika kareke are kamatuua te iango.”²⁹

Raao aika tangiraki, ana Boki Moomon bon ana taeka te Atua, ao ti na kaniaaki riki nako Ina ngkana ti kamatebwaia.³⁰ Ngkai ti karaoi nanon ana taeka, ti na karekea te kakoaua n ibwaninina.³¹ Ngkai ti teimatoa ni maiu ni kaeineti ma ana reirei, e na “akea iroura tangiran karaon te buakaka.”³² Nanora, moara, ao arora a na bitaki n riki n ai aron te Tia Kamaiui³³ I anga au kakoaua ae aki nanokokoraki bwa Iesu bon te Kristo, ara Tia Kamaiu, te Tia Kabooira, ao Raoraora. N aran Iesu Kristo, amen.

Bwaai aika a na taraaki

1. Taraa Mareko 2:17.

2. Taraa Taian Areru 147:3; Itaia 53:4; Mataio 8:17.

3. Taraa 2 Nibwaai 25:23; Iakobwa 4:7; Ita 12:27.

4. Taraa Mataio 19:21; Mareko 10:21; Ruka 18:22; 2 Nibwaai 31:10.

5. Taraa Reirei ao Berita aika Tabu 19:23.

6. Taraa Itaia 41:10.

7. Taraa Motiaea 2:41; 3:19; 5:2.

8. Taraa 2 Nibwaai 25:8, 21–22; Moomon 7:1; 8:35.

9. Taraa 2 Nibwaai 25:7; 31:2–3.

10. Taraa 2 Nibwaai 2:25; Aramwa 40.

11. Taraa Itaia 29:4, 11–18; Etekiera 37:16–21; 2 I–Korinto 13:1; 1 Nibwaai 13:38–42; 2 Nibwaai 3:12; 25:26.

12. Taraa Aramwa 32:41–43.

13. Taraa Moronaai 10:3–5.

14. Taraa kabwarabwaraa nakon Ana Boki Moomon.

15. David A. Bednar, “Rairaki nakon te Uea,” Riaona Nobembwa. 2012, 109.

16. Iakobo 1:22.

17. Taraa 2 Nibwaai 31; 3 Nibwaai 11:31–40; 27:13–22.

18. Taraa 1 Nibwaai 3:7; Moronaai 7:33.

19. Taraa Motiaea 4:3.

20. Taraa Mataio 18:21–35; Mareko 11:25–26; Ruka 6:37; 3 Nibwaai 13:14–15; Reirei ao Berita aika Tabu 64:10; 82:1.

21. Taraa Motiaea 26:30; Moronaai 6:8.

22. Taraa 2 Nibwaai 31:17–18.

23. Taraa 1 Nibwaai 10:19; 2 Nibwaai 33:1; 3 Nibwaai 11:32; 28:11; Moronaai 6:4.

24. Taraa 2 Nibwaai 31:20.

25. Taraa 1 Nibwaai 15:24.

26. 2 Nibwaai 32:5; e kairaki ma katuruturuana.

27. 2 Nibwaai 32:3; e kairaki ma katuruturuana.

28. Moronaai 10:4.

29. Russell M. Nelson, “Ana Boki Moomon; Tera Aron Maiu Ngkana Arona bwa akea?” Riaona, Nobembwa. 2017, 62–63.

30. E taku te Burabeti Iotebwa Timiti ibukin Ana Boki Moomon, “E na kaania riki te Atua te aomata man irirakin reirei ake i nanona, nakon taian boki riki tabeua” (kabwarabwara nakon Ana Boki Moomon).

31. Taraa Iakobwa 6:7; Aramwa 32:26–43.

32. Aramwa 19:33.

33. Taraa 2 I–Korinto 5:17; Motiaea 3:19; 5:2; Aramwa 5:14, 19.