Maungatabu ni Kabuta
Ni Matoa iNanora
Eberi 2020 Maungatabu ni Kabuta

Ni Matoa iNanora

Iroun Douglas D. Holmes

E a tiba kamotirawaaki man te Moan Kauntira n te Beretitentii ni Kabuta n te Bootaki n Ataeinimwaane

Ti na ataia bwa e kanga e Uea ni kataia ni buokiira—ni kabane ngaira—ni karekea Ana euangkerio ni matoa inanora.

Mwaaneu ao tariu, ai tamaroara te boong ae ti maeka inanona. Ngkai ti bukamarua moan Kaokakin Bwaai, e bon riai naba ni bukamaruaki reitinakon Kaokakin Bwaai are ti bon kakoaua iai ngkai. I reitai ma ngkami ni maeka inanon te bong aei. 1 Te Uea e teimatoa ni katauraoi, rinanoiia Ana burabeti, bwaai ni kabane ake ti kainanoi ni buokiira ni katauraoi ni Butimwaeia. 2

Teuana man bwaai aika a kainanoaki bon te mwakuri ae boou ni karikirakeia Ataei ao Kairake. A mwaiti iroumi aika taneiai ma te buroukuraam ake a katereterei katian taian kouru, kainikina aika boou ni bwaibwai, ao te maunhatabu Ibukin Karikirakeaia te Roronrikirake. Ma ti riai n aki karooi ara taratara man taian reirei are e kateaki iaona te buroukuraam aio ao te kantaninga iai: ni buoka karekean ana euangkerio Iesu Kristo ni matoa inanoia ara ataei ao kairake. 3

I kakoaua bwa ngkana ti karekea te noraaba n reirei aikai, ti na noria bwa e riaon riki ae tii te buroukuraam ibukiia aika n te ririki 8 nakon 18. Ti na ataia bwa e kanga e Uea ni kataia ni buokiira—ni kabane ngaira—ni karekea Ana euangkerio ni matoa inanora. I tataro bwa te Tamnei ae Raoiroi e na buokiira ngkai ti reiakinira n ikotaki.

Iraorao—“Mena i Rarikiia” 4

Te moan reirei bon te iraorao. Ibukina bwa bon aron mwakoron rikin ana Ekaretia Iesu Kristo, ngaira n tabetai ti mwaninga kakawakin te iraorao inanon waakin mwanangara nakon Kristo. Ti aki kantaningaaki ni kakae ke n nakonako n tii ngaira iaon kawain te berita. Ti kainanoa te tangira ao te boutoka mairouiia kaaro, tabeman kaain te utu, raoraora, ao taan kairiiri ake a nakonako naba n te kawai anne.

Aekan iraorao aikai e kainanoa te tai. Te tai n tiku n ikotaki. Te tai ni ngarengare, takakaro, ao beku n ikotaki. Te tai ni butimwaea ungan nanoia ao aia kaangaanga n tatabeman. Te tai ni kaokaota te kokoaua i marenamii ngkai ti kataia n riki n tamaroa n ikotaki. Iraorao aika bon teuana moan oin te kantaninga n ikoikotaki n aron te utu, kooram, kiraati, ao taromauri. Bon ngaiia aan kanakoraoan bukin te mwakuri n ibuobuoki. 5

Unimwaane Dale G. Renlund e anganiira te kiing ni karikirakei aekan iraorao aikai ngke e taku: “Ni kanakoraoan buokaia tabeman ti riai n nooriia … rinanon ana taratara Tamara are i Karawa. Ao man anne ti na ataa koauan kakawakin te aomata imatan te Atua. Ti konaa ngkanne n tii namakinna bwa ana tangira Tamara are i Karawa ibukiia Natina.” 6

Noorakiia tabeman n aron are e nooria iai te Atua bon te bwaintangira. I kaoi ngkami ni kabane ni ukora te bwaintangira aei. Ngkana ti kaurei matara n taratara, 7 ti na kona naba ni buokiia tabeman ni bon noriia n aron are e noriia iai te Atua. 8 Beretitenti Henry B. Eyring e katuruturua te mwaaka aei ngke e taku: “Tera ae e kakawaki riki bon te bwai ae a reiakinna [tabeman] mai [iroum] bwa antai raoi ngaiia ao tera are a na kona n riki iai. Au kantaninga bwa a bon aki konaa n reiakina ae mwaiti man ti te anga reirei. A na karekea man namakinana bwa antai ngkoe, antai ngaiia are ko iangoia, ao tera am iango are a na kona n riki iai.” 9 Buokakiia tabeman a na atai kinakiia ni koaua ao kantaningaiia bwa bon teuana korakoran te bwaintangira are ti kona n anga 10 Taraakiia tabeman ao bon ngaira ngkai e karaoia te Atua ni kabaei nanora “n ikoti ni katiteuanaaki ao n tangira.” 11

Ma bwain te aonaaba ae a rikirake n kakairira nako, ti kainanoa te korakora are e roko man te iraorao ae tatangira. Ngaia ngkana ti bairei waaki ni kakukurei, bootaki, ao tabeua ikoikotaki, ti na uringnga boton te kantaninga n te ikoikotaki aikai bwa bon katean te tangira ni iraorao bwa e na katiteuanaira, ao ni buokiira n karekea ana euangkerio Iesu Kristo ni matoa inanora. 12

Kaotioti, Rinerine, ao Rairannano—“Katomaiia Ma Karawa” 13

E koaua, e bon aki tau tii te riki ni kabaeaki n ikotaki. A mwaiti kurubu ao bootaki ni mwakuri are a karaoa te katiteuanaaki n aroia aika a mwaiti. Ma te katiteuanaaki are ti ukoukoria bon tii temanna ngaira inanon Kristo, ni katomaira ma Ngaia. 14 Ni katomai nanora ma karawa, ti kainanoa te taneiai n tamnei n tatabemaniira, n aron are e a tia n taekina n rangi ni kamataata Unimwaane Andersen nakoira. 15 Ngkai e taetae raoi Unimwaane Anderson nakoira n taekana. Taneiai akanne a roko ngkai te Tamnei ae Raoiroi e uoti ana taeka ao ana tangira te Atua nakon aia iango ao nanoia. 16

Te kaotioti e roko nakoira rinanon koroboki aika tabu, riki man Ana Boki Moomon: rinanon taeka aika kairaki mairouia burabeti aika maiu ao tabeman abotoro aika kakaonimaki, ao rinanon te bwanaa ae beebete man maraara. 17 Taeka aikai a bon riaon riki te ingke iaon te iteraniba, te karongoaa inanon taningara, ara kantaninga inanon ara iango ke, namakin i nanora. Ana taeka te Atua bon te mwaaka n tamnei. 18 Bon te koaua ao te oota. 19 Bon aei aron are ti ongo Irouna! E karika ao ni karikirakea ara onimaki iroun Kristo ao n anganiira te nano n tangiria n riki n ai aron te Tia Kamaiu, are bon te rairannano ao nakonako ni kawakin berita. 20

Eberi ae nako, Beretitenti Russell M. Nelson e buokiira ni kamataata boton taben te rairannano inanon kaotiotan te mwananga aei. 21 E taku: “Ngkana ti rineia bwa ti na rairi nanora, ti rineia bwa ti na bitaki! Ti kariaia te Tia Kamaiu bwa e na bitiira nakon te kabanea n tamaroara. … Ti rineia n riki n ai aron Iesu Kristo!” 22 Te waaki ni bitaki aei, are e riki man ana taeka te Atua, bon ngaia are ti na katomaaki iai ma karawa.

Taraakin ana kakao Beretitenti Nelson nakon te rairi nanona bon te reirei man te rinerine. Ti riai rinea rairannano i bon ibukira. Te euangkerio e aki konaa n imanonoaki nakon maiura. Ngkai Unimwaane Renlund e taku, “Ana kouru Tamara arei i Karawa n te nakoa ni karo tiaki kairaia Natina bwa a na karaoa ae eti; bon kairaia Natina bwa a na rineia ni karaoa ae eti.” 23

Inanon buroukuraam ake a oneaki mwina irouia Ataei ao Kairake, e riaon 500 te bwai ae kakaokoro are a na katiaaki bwa e aonga n reke kinakim ni bwaai aika bati. 24 Ngkai, ai bon tii teuana. Bon te kakao nakon rineia n riki n ai aron te Tia Kamaiu. Ti karaoa aei man karekean ana taeka te Atua n rinanon te Tamnei ae Raoiroi ni kariaia Kristo ni bitiira nakon “rikira ae te kabanea n tamaroa.”

Aio e bon raroa riki nakon kamwakuran katean te kouru ke bon karikirakeam i bon iroum. Te kouru bon aron te bwai ni mwakuri are e buokiira ni katomaira ma karawa rinanon kaotioti, rinerine, ao rairannano—n roko nakon Kristo ao ni karekea Ana euangkerio ni matoa inanora.

Katabeaki ao Anganano—“Anganiia bwa A na Kairiri” 25

N tokina, ni karekean ana euangkerio Iesu Kristo ni matoa inanora, ti kainanoa te katabeaki inanona—n anga ara tai ao tarena nako iai, n anganano ibukina. 26 Ngaira ni kabane ti tangiria ni maeka ni maiu ni iai nanona, ao aio e koaua ni kaineti naba man te roro ae rikirake. A tangiria n riki bwa mwakoron te mwakuri ae karaoaki.

Ana euangkerio Iesu Kristo bon te mwakuri ae korakora n te aonaaba. Beretitenti Ezra Taft Benson e taku: “Ti tuangaki iroun te Atua ni uota te euangkerio aei nakon te aonaaba ni kabane. Anne bon te mwakuri are e riai katiteuanaakira n te bong aei. Tii te euangkerio ae e na kamaiua te aonaaba man taian kabuanibwai ma oin ana urubwai. Tii te euangkerio e na katiteuanaia mwaane [ao aine] ma reeti ni kabane ao aomata n aaba inanon te rau. Tii te euangkerio e na uota te kimwareirei, kukurei, ao te kamaiu nakon te utu n aomata.” 27

Unimwaane David A. Bednar e berita, “Ngkai ti kakorakoraia kairake man kaoakiia ao kariaiakaia ni mwakuri, te Ekaretia e na waaki rake ni kawai aika kamiimi.” 28 Ni mwaitin te tai ti tuai ni kaoiia ao kariaia kairake bwa a na anganano n aei ibukin korakoran te mwakuri ibukin Kristo. Unimwaane Neal A. Maxwell e noria, “Ngkana [ara] kairake aki rootaki [man ana mwakuri te Atua] a na bon kai rootaki man te aonaaba.” 29

Aia buroukuraam Ataei ao Kairake e katuruturuaki kakorakorakiia kairake. A rinea oin aia kouru. Kooram ao Beretitentii n te kiraati a katukaki n oin raoi katabeaia. Te kauntira n te uoote ibukiia kairake, n aron te kauntira n te uoote, e katuruturuaki iai te mwakuri ni kamaiu ao te karietataaki. 30 Ao te kooram ao kiraati a moana aia bootaki ni marooroakinna bwa a na kanga ni karaoan te mwakuri are e a tia te Atua n anganiia. 31

Beretitenti Nelson e taku nakoia kairake n te Ekaretia: “Ngkana kam rineia, ngkana kam tangiria, … kam konaa n riki bwa mwakoron te bwai ae bubura, te bwai ae tamaroa, te bwai ae mimitong! … Ngkami bon mai buakoia aika tamaroa are e a tia te Uea ni kanakomaiia nakon te aonaaba aio. Ngkami iai te kona n riki n rangi ni konabwai ao ni wanawana ao e korakora riki ami kairoro iaon te aonaaba nakoia rooro ake mai mwaina. 32 N teuana te tai, Beretitenti Nelson e tuangiia kairake: “Iai au koaua inanou ibukimi ae bwanin. I tangiri ngkami ao te Uea naba. Bon Ana aomata ngaira, ti bane ni katabeaki n Ana mwakuri ae tabu.” 33 Aomata aika kam kairake, kam kona n namakina te onimakinaki are e karekea Beretitenti Nelson iroumi ao bwa e kanga kakawakimi nakon te mwakuri aei?

Kaaro ao taan kairiiri ikawai, I kaoi ngkami n nooriia kairake n aron are karaoia Beretitenti Nelson. Ngkana te kairake e namakina am tangira ao onimaki, ngkai ko kaungaiia ao reireiniia bwa a na kanga ni kairi—ao ngkanne ni katikuiia bwa a na karaoa te kairiiri ibon irouia—a na kakubako ma aia atatai ae nano, wanawanaia, ao aia motinnano nakon te euangkerio. 34 A na namakina te kimwareirei n rineia ni katabeaki ao n anganano ibukin korakoran ana mwakuri Kristo. Ana euangkerio e na matoa inanoia, ao te mwakuri e na waakirake n te kawai ae kamiimi.

Te berita ao te Kakoaua

I berita, bwa ngkai ti katurui ara iango iaon reirei aikai—iraorao, kaotioti, rinerine, rairannano, ao anganano—ana euangkerio Iesu Kristo e na tiku ni matoa inanora ni kabane. Ti na noora Kaokan Bwaai ni waaki rake nakon are bon bukin te kantaninga raoi iai, kamaeuan Iteraera ao manga katean Tion. 35 te tabo are E na tautaeka ia Kristo bwa aia Uea ueea.

I kakoaua bwa te Atua e reitinako ni karaoi bwaai aika riai ni katauraoiia Ana aomata ibukin te bong anne. Ti bia noora Baina inanon te mwakuri aei ngkai ti kataia ni kabane n “nakomai nakon Kristo, ma ni kakoroaki raoi Irouna.” 35 N aran Iesu Kristo, amen.

Bwaai aika a na taraaki

  1. Taraa Reirei ao Berita aika Tabu 45:57. Beretitenti Nelson e taku: “Tii iangoa te kakukurei ao kawaekoan baikai ni kabane: ni kabane burabeti ma Atam a tia n noori ara bong. Ao ni kabane burabeti a tia n tataekina taekan ara bong, ngkanne Iteraera a na ikotaki ao te aonaaba e na tauraoi ibukin Kauaokin Rokon te Tia Kamaiu. Iangoa anne! Mai buakoia ni kabane aomata ake a maeka iaon te buraneti ae aon te aba, ngaira are ti riki bwa taan ira waakin te ikoikoti n te kabanea, n tai ae kakannato aei. Ai kakukureira anne!” (“Hope of Israel” [worldwide youth devotional, Tuun 3, 2018], HopeofIsrael.ChurchofJesusChrist.org).

    Unimwaane Jeffrey R. Holland e reirei:

    “Ai tera te tai ni maiu ae kakamaaku!

    “Ana euangkerio Iesu Kristo bon te koaua, e karekea te mwano, e karekea te onimakinaki, ao te kabanea ni koaua iaon te aba ao i karawa, n te tai aei ao n akea tokina. Akea—akea te bwai teuana, akea temanna, akea te kairoro—e na totokoa te Ekaretia aei man kakoroan ana mition ao n ataakin tokin kawaina n tataekinaki mai imwain karikan te aonaaba. … Bon akea kainanoan te maaku ke te kakatai n taekan taai aika na roko.

    “Tiaki aron tabeua taai ake imwaira, koron te bong aei e na aki rinanon te reirei ni kitanakin te koaua; e na aki noora buan te kiing n te nakoanibonga; e na aki karawawataaki n tokin te kaotioti man bwanaan te Atua ae Korakora. … Ai bon tera te bong ae ti maiu inanona aei!

    “… Ngkana ko tuai n ataia, Ngai I kan ataa taekan boong ni kaitira. … Kakoaua. Tei rake. Bwaina te Kakaonimaki. Ao n anganaki moan tamaroa ara bong are ti maeka inanona!Facebook postMeei 27, 2015; taraa naba “Be Not Afraid, Only Believe” [address to Church Educational System religious educators, Beb. 6, 2015), broadcasts.ChurchofJesusChrist.org).

  2. Taraa Ioane 1:12.

  3. Tabeua te tai imwin weteara bwa te Beretitentii n te Bootaki n Ataeinimwaane, Beretitenti Henry B. Eyring e marooro ma ngaira iaon kakaewenako aika akea n ai aroia ao taai ake ana kaaitarai kairake n te Ekaretia n te bonga aei. E reireiniira ni katuruturu iaon bwaai akanne are e na buoka ana euangkerio Iesu Kristo ni matoa inanoia. Te reirei anne e a tia n riki bwa kairakira n te Beretitentii n te Bootaki n Ataeinimwaane.

  4. Taraa “Tiiku Ma Ngaiia,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them.

  5. Taraa Mosiah 18:25; Moroni 6:5.

  6. Dale G. Renlund, “Through God’s Eyes,” Riaona, Nob. 2015, 94; see also Mote 1:4–6.

    E reirei Beretitenti Thomas S. Monson: “Iai katabeara n taraiia n tatabemaniia n tiaki n aron tarakiia ae ngkai ma n taraiia bwa tera are a na konaa n riki iai. N na bubuti ngkami n iangoiia n te kawai aei” (“See Others as They May Become,” Riaona, Nob. 2012, 70).

    Unimwaane Neal A. Maxwell e reirei: “N taai nako, taraakin te kairake mai itinanikuna a aki tau nakon are e kantaningaaki ma ana kainibaire te Ekaretia, ke n taraan ana titiraki ni kaitara, ke kaotakin ana nanououa e anga waekoan taraakina iai. Te reke are e nako e kona n riki bwa te kararoaaki ao, n tabetai, kakeaaki mairouiia tabeman n te kurubu. Te tangira ae koaua e aki tangira kanikinaeana!” (“Unto the Rising Generation,” Ensign, Eberi. 1985, 9).

  7. Taraa 2 Uea 2:17.

  8. Stephen L. Richards, ngkai te membwa n te Moan Beretitentii, e taku: “Retaatan aekan te wanawana ni karaoan te motiraoi bon karekean te atatai irouia tabeman ao karaoan te bwai are e karabaaki ibukin aron tamaroan rikiia, are bon tein aroia” (in Conference Report, Apr. 1950, 162; in David A. Bednar, “Quick to Observe,” Ensign, Dec. 2006, 35). Liahona, Dec. 2006, 19). Taraa naba 2 Uea 6:17.

  9. Henry B. Eyring, “Teaching Is a Moral Act” (e taetae n te Brigham Young University, Aok. 27, 1991), 3, speeches.byu.edu; kairaki ma katuruturuana; taraa naba Henry B. Eyring, ”Help Them Aim High,” Liahona, Nov. 2012, 60–67.

  10. Taraa Mote 1:3–6.

  11. Motiaea 18:21; taraa naba Mote 7:18.

  12. “Kairake n Ataeinimwaane ake a matoa, iraoraoia ma utu aika kakaonimaki [Aomata aika Itiaki], raraoia, ao taan kairiiri, ake a buokiia ni karikirakea te iraorao ma Tamaia are i Karawa, a taraa n rang tiku ni kakaonimaki. Bwaai aika onoti n te buroukuraam—n aron te karikiram n te Tabati, aia waaki ni kakukurei [Kairake n Ataeinimwaane] kantaninga aika tia ni karaoaki i bon iroum … a na kona ni iai teutana rootakin inaomatan iraorao akanne. … Te titiraki ae kakawaki bon tiaki bwa e kanga bwaai aika onoti ni karikirakeaki, ma a kanga n tibwatibwa nakon iraorao aika raraoi are e kakorakora kinaakin te aro n [Aika Itiaki Boong aika Kaitira] kairake ni mwaane” (“Tiiku Ma NgaiiaChurchofJesusChrist.org/callings/aaronic-priesthood-quorums/my-calling/leader-instruction/be-with-them).

  13. Taraa “Katomaia ma Karawa,” ChurchofJesusChrist.org/callings/aaronic-priesthood-quorums/my-calling/leader-instruction/connect-them-with-heaven.

  14. Taraa Ioane 15:1–5; Ioane 17:11; I-Biribi 4:13; 1 Ioane 2:6; Iakobwa 1:7; Ominai 1:26; Moronaai 10:32.

  15. Koroboki aika tabu a on ni katooton n aei; aika tii uoua: 1 Nibwaai 2:16; Enoti 1:1–4.

  16. Taraa Ruka 24:32; 2 Nibwaai 33:2; Iakobwa 3:2; Moronaai 8:26; Reirei ao Berita aika Tabu 8:2–3.

  17. Taraa 2 Timoteo 3:15–16; Reirei ao Berita aika Tabu 68:3–4; 88:66; 113:10.

  18. Taraa 1 I-Tetaronike 1:5; Aramwa 26:13; 31:5; Ereman 3:29; 5:17; Reirei ao Berita aika Tabu 21:4–6; 42:61; 43:8–10; 50:17–22; 68:4.

  19. Taraa Ioane 6:63; 17:17; Aramwa 5:7; Reirei ao Berita aika Tabu 84:43–45; 88:66; 93:36.

  20. Taraa Ioane 15:3; 1 Betero 1:23; Motiaea 1:5; Aramwa 5:7, 11–13; 32:28, 41–42; 36:26; 62:45; Ereman 14:13.

  21. Taraa 2 Nibwaai 31:19–21; 32:3, 5.

  22. Russell M. Nelson, “We Can Do Better and Be Better,” Liahona, Meei 2019, 67.

  23. Dale G. Renlund “Rineiko n te Bong Aei,” Riaona, Nobembwa 2018, 104.

  24. Te ware aei e ikotaki ma te buroukuraam n te Tikauti, ni karokoa te tai aei bon mwakoron ana buroukuram te Ekaretia n te waaki ni kakukurei ibukiia ataeinimwaane ao kairake ni mwaane, ni moanaki n te United States ao Canada. N aono are aki ira te Tikauti, mwaitin kainanoana e bon riaon 200. N reitana, mwaitin buroukuraam n te waaki ni kakukurei ibukiia ataeinimwaane, ataeinnaine, kairake ni mwaane, ao kairake n ataeinnaine a kairaki raoi ni kakaokoro, ni karaoa bwaninin riki te taneiai ae kaangaanga ibukiia utu.

  25. Taraa “Anganiia Ni Kairiiri,” ChurchofJesusChrist.org/callings/aaronic-priesthood-quorums/my-calling/leader-instruction/let-them-lead.

  26. Taraa Ominai 1:26; 3 Nibwaai 9:20; 12:19; Reirei ao Berita aika Tabu 64:34. “Te aro are e aki kainanoa te anga karea n bwaai ni kabane bwa e aki tau korakorana ni karika te onimaki ae riai nakon te maiu ao te kamaiuaki” (Lectures on Faith [1985], 69).

  27. Ezra Taft Benson, The Teachings of Ezra Taft Benson (1988), 167; in Preach My Gospel: A Guide to Missionary Service (2019), 13; taraa naba Russell M. Nelson, “Hope of Israel,” HopeofIsrael.ChurchofJesusChrist.org.

  28. Boowi ma David A. Bednar; taraa naba “2020 Te Tembora ao Rongorongon te Utu Kaetieti ni KairiiriBeb. 27, 2020, broadcasts.ChurchofJesusChrist.org.

  29. Neal A. Maxwell, “Unto the Rising Generation,” 11. Elder Maxwell e reitinako: “Mwakuriana, mwaitira riikan ao taan reirei n te kooram beretitentii ni kaainaki n te aro ae ti wetean temanna ni karaoa te tataro ke ni kabuta te toa? Tariu, aikai bon tamnei aika onoti ni koaua, ao a konaa ni karaoi bwaai aika kakawaki ngkana a katauraoaki ma taina!”

  30. Taraa Aeniboki ni Kabuta: Te Beku n Ana Ekaretia Iesu Kristo Ibukiia Aika Itiaki ni Boong Aika Kaitira, 2.2, ChurchofJesusChrist.org.

  31. Tabeua bwaai n ibuobuoki a na reke n te Gospel Library ni buokiia kairake ni kairi, n ikotaki “Bwaai ni Ibuobuoki ibukiia Kooram ao Kiraati Beretitentii,” “Kabongana Nakomai, Iriirai—Ibukin te Kooram n te Nakoanibonga ae te Aaron ao aia Kiraati Kairake n Ataennaineung, ” ao inanon bwaai n ibuobuoki ibukin aia kiraati Ataeinnaine ao kooram n te Nakoanibonga ae te Aaron inanon “Wewete n te Uoote.”

  32. Russell M. Nelson, “Hope of Israel,” HopeofIsrael.ChurchofJesusChrist.org. Inanon naba te taromauri aei, Beretitenti Nelson e taku: “Tamara are i Karawa e a tia kataninia mwaitiia Ana tamnei aika rine—tao, N na kangai, Ana kabanea n tamaroa n tiim—ibukin te kabanea n tai. Tamnei aika rine akanne—taan takakaro aika kabanea n nakoraoi aikanne, booto aikanne—bon ngkami!”

  33. Russell M. Nelson, taeka ni kaukuuki irouia “Children and Youth: A Face to Face Event with Elder Gerrit W. Gong,” Nob. 17, 2019, broadcasts.ChurchofJesusChrist.org.

  34. Beretitenti Nelson e taku: “Ti riai n angania kairake bwa a na kairiiri, riki naake a tia ni weteaki ao ni kamatoaki ni beku n beretitentii n te kiraati ao te kooram. Te kariaia ibukin te nakoanibonga a anganaki te mwiokoaki iai. A na reiakina aron karekean ana kairi te tamnei ni kairan aia kiraati ke aia kooram” (inanon “Children and Youth Introductory Video Presentation,” Tebetembwa. 29, 2019, ChurchofJesusChrist.org).

    Elder Quentin L. Cook e taku, “A tia ara kairake n tuangaki bwa ana kabatia tabeia n roroia ni kairake—n akea te bwai ae ana karaoia kaaro ao taan kairiiri ibukiia n te bwai ae a kona kairake ni karaoia ibukiia” (“Adjustments to Strengthen Youth,” Riaona, Nov. 2019, 40).

  35. E reirei Beretitenti George Q. Cannon: Te Atua e a kaman katauraoiia tamnei ibukin koron boong aikai ake iai irouia te ninikoria ao te nanon ni kaitara te aonaaba, ao ni kabane mwaakan teuare e buakaka, ake a noraki ao ake aki noraki, n tataekina te euangkerio ao ni kateimatoa the koaua ao ni barongaa ao ni katea Ana Tion Atuara n aki mamaku ni baike a na riki. E a tia ni kanakoia tamnei aikai n te tai aei ni kawenea aan Tion are e na aki manga uruakaki, ao ni karikirakea te botanaomata ae e itiaki, ao anne e na karinea te Atua, ao ni Karinea n ae rine, ao n ongotaeka nakoina rinanon bwaai nako ake a rinanoi” (“Remarks,” Deseret News, May 31, 1866, 203); see also Teachings of Presidents of the Church: Joseph Smith (2007), 186.

  36. Moronaai 10:32.