Nakomai ao Kaaina
Ti kaoia ni kabane natin te Atua ni katobibia te aonaaba bwa a na raoniira n te bwai ae korakora are ti uaiakinna aio.
Tariu ao mwaaneu, raou aika tangiraki, ni katoa wiiki, kaain Ana Ekaretia Iesu Kristo ibukiia Aika Itiaki ni Boong aika Kaitira ni katobibia te aonaaba a neboa Tamara are i Karawa, Atuan ao Uean te aonaaba, ao Natina ae Tangiraki, Iesu Kristo. Ti iangoa maiun ao ana reirei Iesu Kristo—te tamnei are tii ngaia ae akea ana bure ni maiuna, ana tiibu te teei te Atua ae akea barekana. N taainako n aron ae ti kona, ti anaa te toa ni kauringa iai Ana anga karea ao n ataia bwa Ngaia bon boton maiura.
Ti tangiria ao ti karinea. Ibukin korakoran ana tangira ae akea tokina, E karawawataaki Iesu Kristo ao ni mate ibukim ao ibukiu. E urua ni kauka mataroan te mate, urua te roki are e kaokoroira ma raoraora ao ake ti tangiriia1 ao n uota te kantaninga nakoia ake a bwara nanoia, kamaiu nakoia ake a aoraki, ao ni kainaomataia ake a tautoronaki.2
Ti anga nanora Nakoina, maiura, ao ara nebo ni katoa bong. Ao ibukin aio, “ti kakarabakauakina Kristo, ao ti kimwareirei iroun Kristo, [ao] ti tataekina Kristo … bwa natira a na ataia bwa antai ae a na kawaria ibukin kamaunan bure.”3
Kataneiai n Riki bwa Ana Reirei
Ma, te riki bwa ana reirei Iesu Kristo e anaa riki ae mwaiti nakon ae tii te taetae ao kabwarabwaraan Kristo. Bon te Tia Kamaiu ae Ngaia ae e kaoka Ana Ekaretia ni buokiira iaon te kawai bwa ti na riki n ai Arona. Ana Ekaretia Iesu Kristo ibukiia Aika Itiaki ni Boong aika Kaitira e kateaki bwa e na katauraoi aanga aika a kakawaki ni kataneiai n riki bwa Ana reirei Kristo. Rinanon iriirakin ana waaki te Ekaretia, ti reiakinna n ataa ao ni mwakuri iaon ana wirikiriki te Tamnei ae Raoiroi. Ti karikirakea te anua n taben nanoia tabeman n nanoanga ao n akoakoi nakoia tabeman.
Aio bon te mwakuri rinanon nako maiura, ao e tangira te kataneiai.
Taan takakaro ake a mwatai a kabanei aoa aika mwaiti ni kataneiai ni baike a kakawaki n aia takakaro. Neeti, taan mwakuri iaon kaombiuta, naake a karaoi bwaai aika a mwakaroiroi, ao n arou naba ni kaiangatoa ma mamaten nanou te kuka n ana tabo ni kuka Harriet e karekea te konabwai ni kataneiai n ara wanikiba.
Ngke te kaben ngai n te wanikiba, I aki toki ni karaoa te kataneiai nakoia bwairati ni kabonganai bwaai ni mwakuri are kanga ko bon kiba iai—te mitiin ae e rianako arona are e anga te namakin ae ngkoa ko bon kiba n te wanikiba. The aeka ni mitiin aei e aki tii buokiia bwairati n reiakin baika a kakawaki ibukin te kibakiba; e anganiia naba te taneiai ao aron kaitaraan baika aki kantaningaaki bwa ana riki ake a na kaitarai ngkana a kabuta raoi ae bon te wanikiba.
Aei titebo ma reirei ake a iria taan kakoaua Iesu Kristo.
Irirakin nako te waaki n ana Ekaretia Iesu Kristo ao aekakin nako baike a na reke iai e na buokiira bwa ti na tauraoi riki ibukin bibitakin baika a riki n te maiu, bwa aekakira ao kakaiakira aroia. Ngkai kaain te Ekaretia ngaira, ti kaungaki bwa ti na kabanei nanora n ana taeka te Uea rinanon Ana burabeti, ake ngkoa ao aika ngkai. Rinanon te tataro ae mangori ae e nako mai nanom nakon Tamara are i Karawa, ti reiakinna ni kinaa bwanaan te Tamnei ae Raoiroi. Ti butimwaai wewete ni mwakuri, n anga reirei, ni beku, ao n anga te ibuobuoki. Waaki aikai a karikiira bwa ti na rikirake n te tamnei, n ara iango, ao n anuara.
A na buokiira ni katauraoira ni karaoi ao ni kawakin berita aika a tabu ake a na kakabwaiaira n te maiu aei ao n te maiu ae e na roko.
Nakomai, Raoniira!
Ti kaoia ni kabane natin te Atua ni katobibia te aonaaba bwa a na raoniira n te bwai ae korakora are ti uaiakinna aio. Nakomai ao Nooria! E ngae ngke inanon te kangaanga n tain te COVID-19, reitaki ma ngaira iaonrain. Reitaki ma ara mitinare iaonrain. Kakaea i bon iroum bwa teraa raoi te Ekaretia aei! Ngkana e a toki te tai ni kangaanga aei, reitaki ma ngaira inanon mweengara ao n ara tabo n taromauri!
Ti kaoko bwa ko na roko ao n ibuobuoki! Nakomai ao beku ma ngaira, ni mwakuri n ibuobuoki nakoia natin te Atua, ni iriira mwanekan te Tia Kamaiu, ao ni karika te aonaaba aei bwa te tabo ae tamaroa.
Nakomai ao Kaaina! Ko na karaoira bwa ti na korakora. Ao are ko na riki n tamaroa, n akoakoi, ao ni kukurei naba. E na matoa am onimaki ao n rikirake n aki kona n uruakaki—ni kona n totokoi reimauruan taian kakatai ake aki kantaningaaki n te maiu aei.
Ao kam na kanga ni moanna? A mwaiti aekakin nako kawaina.
Ti kaoko bwa ko na wareka Ana Boki Moomon. Ngkana akea am boki, ko kona ni warekia iaon ChurchofJesusChrist.org4 ke anaia man te intanete te Book of Mormon app. Ana Boki Moomon bon teuana naba te kakoaua ibukin Iesu Kristo ao raon te O-Tetemanti ao te Nu-Tetemanti. Ti tangirii booki aika tabu aikai ao ti reiakinaki mai iai.
Ti kaoiko bwa ko na kabanea am tai tabeua n ComeuntoChrist.org ni kakaea bwa tera ae a reiakinna ao ni kakoauaa kaain te Ekaretia.
Kaoiia mitinare bwa a na reitaki ma ngkoe iaonrain ke ni bon mweengam ngkana e kona—iai aia rongorongo ae e karekea te kantaninga ao te kamaiuaki. Mitinare aikai bon natira mwaane ao aine aika a kakawaki ake a beku n taabo aika mwaiti ni katobibia te aonaaba ni bon oin aia tai ao aia mwane.
N ana Ekaretia Iesu Kristo, ko na kuneia utu aika aomata ae aki kaokoro ma ngkoe. Ko na kuneia aomata aika a kainnanoa am ibuobuoki ao a tangiria naba ni buokiko ngkai ko kataia ni riki bwa te kabanea n tamaroa ngkoe—temanna are e karikia te Atua bwa ko na riki ni bon arom anne.
E Mwaneia Aomata Nako te Tia Kamaiu
Ko na bae ni iango, “I a tia ni karaoa te kairua inanon maiu. I aki koaua ngkana I kona n namakinna ae Ngai kaain ana Ekareitia Iesu Kristo. E bon aki kona ni kabanea ana tai te Atua ma te aomata ae ai arou.”
Iesu ae te Kristo, e ngae ngke Ngaia “Aia Uea uea,”5 te Metia, “Natin te Atua ae maiu,”6 e tangiriia ni kabane n tatabemaniia nako Natin te Atua. E tangiriia n aki tabe bwa tera nakoan te aomata—bwa tao e kainano ke e kaubwai, aekakira aki kororaoina ke ni kakoaua bwa e bon kororaoi. Inanon Maiuna n Rabwata, e ibuobuoki te Tia Kamaiu nakoia aomata ni kabane, nakoia ake a kukurei ao n ataibwai, nakoia ake a rawawata ao ni bua, ao nakoia naake akea te kantaninga irouia. N angiin te tai, aomata ake e beku ao ni buokiia bon tiaki aomata aika a rietata nakoaia, a tara raoi, ke ni kaubwai. N angiin te tai, aomata ake E tabekiiarake e bon karako are a kona n anga ni kaokia ma tii te kakaitau, te nano ae e nanorinano, ao te nano ni kan karekea te onimaki.
Ngkana Iesu e kabanea Maiuna n te maiu aei ni buoka ake “moan te mangori,”7 tao E na aki tangiriia naba n te bong aei? E koaua bwa tao a na akea te tabo n Ana Ekaretia ibukiia ni kabane natin te Atua? Tao ibukiia naba naake a namakinna bwa a aki kororaoi, mwanuokinaki, ke ni maroa?
Bon akea te tia n te kororaoi are ko na karekea bwa ko aonga n tau ibukin ana tangira te Atua. Am tataro a aki riai n takaruaaki ke ni katamaroaki ke n eti aron taekinaia bwa e aonga n roko i karawa.
Ni koauana, te Atua e aki inanonano8—bwaai ake a rangi ni bongana n te aonaaba akea manenaia Irouna. E ataa nanom, ao E tangiriko n aki tabe bwa tera nakoam, mwaitin am mwane, ke iraman kain am mwaneaba ni marooro n te intanete.
Ngkana ko kaeta nanom nakon Tamara are i Karawa ao ni kaniiko ma Ngaia, ti na namakina ae E kaniira ma ngaira.9
Bon ngaira Natina aika tangiraki.
Ao tekoraki naba ake a Kakeaa.
Ao naake, a bon tangiria ni karaoa oin nanoia, ataei ake aki kan kairaki, naake a un iroun te Atua ao n Ana Ekaretia, a bootii aia bwai, ao ni waekoa n otinako man te mataroa n taekinna bwa a nako ao n aki kan manga oki.
Ngkana e birinako te ataei man mweengana, teuaane ke neiene e na bae n aki ataia ae ana karo ake a rang raraoma a taratara man te wintoo. Ma nanoia ae e nanoanga, a taraa natiia te mwaane ke te aine n nako—ma te kantaninga bwa natiia e na reiakina te bwai teuana man te taneiai ae e kananokawaki aei ao tao a na nora te maiu aei ma te taratara ae e boou—ao n tokina a na oki nakon mweengaia.
Ao ai bon aron naba ma Tamara are i Karawa ae e tangiriira. E tataningaa okira.
Am Tia Kamaiu, ma ranimatana n tangira ao te nanoanga ni Matana, e tataningaa okim. E ngae ngke ko namakinna bwa ko a rang n raroanako ma te Atua, E na bon noriko; E na iai irouna te nanoanga ibukim ao e na biri n rabwatiko.10
Nakomai ao Kaaina.
Te Atua E kariaia bwa Ti na Reiakinaki man Ara Kairua
Bon ngaira taan mwamwananga iaon te kawai n te maiu ae e mamate aei ni kakaeakin nanon ao tokin te koaua. Ni katoa tai, baika ti nori bon bwaai ake a mena imwaira—ti aki kona n noria bwa e nakea te kawai are i mwiin te kabao. Tamara are i Karawa ae tatangira E tuai anganiira kaekaan taian titiraki ni kabane. E kantaningaira bwa ti na ukori bwaai aika bati i bon iroura. E kantaningaira bwa ti na kakoaua—e ngae ngke e kangaanga karaoana.
E kantaningaira bwa ti na kaeti ikara ao ni karikirakei baike ti tangiri ni karaoi—teutana korakorara—ao n reitinako ni karaoa te rikirake ae uarereke.
Aio te kawai ae ti reirei ao n rikirake mai iai.
Ko bon koaua raoi bwa ko tangirii bwaai ni kabane bwa a na bane ni kamataataaki? Ko bon koaua raoi bwa ko tangiria bwa a na kaekaaki titiraki ni kabane? Ni kabane mwanangam a barongaaki?
I kakoaua bwa angiina mai ibuakora a na waekoa ni kua n aron te aekaki ni kairiiri mai karawa aei. Ti reiakina reirei aika kakawaki ibukin te maiu aei rinanon taneiai n te maiu. Rinanon reiakinara man ara kairua. Rinanon te rairanano ao ataakina i bon iroura ae te aro ae “buakaka e bon aki kona ni karekea te kakukurei.”11
Iesu Kristo, Natin te Atua, e mate bwa ara kairua a na aki kabuakakaira ao e na aki katoka rikirakera ae akea tokina. Bon Ngaia bukina, ae ti kona n rairanano, ao ara kairua a kona n riki bwa bwaai aika a na boukiira ni karekea te mimitong ae korakora.
Ko riai n aki mwananga n te kawai aei n tii ngkoe. Tamara are i Karawa E aki katikuira bwa ti na bua inanon te rotongitong.
Aio bukina, bwa n tain te tiburing n 1820, E kaoti ma Natina, Iesu Kristo, nakon te kairake n ataeinimwane, Iotebwa Timiti.
Iangoa anne teutana te tai! Atuan te aonaaba e kaoti nakon te aomata!
Aio te moan mai ibuakon taian kaoti aika mwaiti are e riki nakon Iotebwa ma te Atua ao tabeman ake a roko mai karawa. Agniin taian taeka ake a taekinaki nakoina mai irouia aomata mai ikarawa a tauaki mwiia inanon koroboki aika tabu n Ana Ekaretia Iesu Kristo ibukiia Aika Itiaki ni Boong aika Kaitira. A baitii aron karekeaia. A bane ni kona aomata ni warekii ao n reiakin i bon irouia te rongorongo mai iroun te Atua ibukira n ara bong aikai.
Ti kaoko bwa ko na reiakin i bon iroum.
E bon rangi ni uarereke Iotebwa Timiti ngke e karekei kaotioti aikai. Angiia a roko imwaain ae e koro 30 ana ririki.12 Akea rabakauna, ao irouia tabeman, e bon aki taraa n tau n riki bwa ana burabeti te Uea.
Ao irarikina e weteia te Uea—rimwian te banna are ti kunea rinanon booki aika tabu.
Te Atua e aki tataninga ni kakaea te aomata ae e kororaoi bwa e na kaoka Ana euangkerio.
Ngke arona bwa E karaoa anne, ae E na bon bae naba ngkai ni kakaae.
Iotebwa bon titebo aekakina ma ngkoe ao ngai. E ngae ngke e karaoi kairua Iotebwqa, te Uea e kabongana ni kakoroa bukin Ana kantaninga ae korakora.
Beretitenti Thomas S. Monson e aki toki ni kaokiokii taeka n reirei aikai “Ane e weteia te Uea, e konabwai imatan te Uea.”13
Te Abotoro Bauro e karaua ni kaotia nakoia Aika Itiaki i Korinto: “Bwa kam na atai weteami, tari ao tititati, ngkai a aki bati ni weteaki aika rabakau n te rabwata, ao a aki naba aika korakora; ao a aki bati aika tooka.”14
Te Uea e kabonganaia aika mamaara ao ake akea aia reirei ni kakoroa nanon Ana mwakuri. Te koaua aio e tei bwa te kakoaua bwa bon mwaakan te Atua, tiaki aomata, ae e katiai Ana mwakuri iaon te aba.15
Ongo irouna, Iriiria
Ngke e kaoti te Atua nakon Iotebwa Timiti, E kabwarabwara Natina, Iesu Kristo, ao e taku “Ongo Irouna!”16
E kabanea nikiran maiuna Iotebwa n ongo Irouna ao n Rrimwina.
N aron Iotebwa, rikira bwa ana reirei Kristo e moa man te baire n ongo nakon te Tia Kamaiu Iesu Kristo.
Ngkana iai nanom ni kan Iriiria, uota am onimaki ao katokaa iaom Ana kaibangaki.
Ko na kunea ae ko kaaina Ana Ekaretia—te tabo ae rau ao ni bubutimwaai are ko kona n ira iai aron ukoukoran te riki bwa ana reirei Kristo ao te kukurei.
Bon au kantaninga bwa, inanon kauringan te ka uabubua n ririki ibukin te Moan Kaotioti, ngkai ti iangoia ao n reiakina Kaokan Ana Ekaretia Iesu Kristo, ti na ataia ae bon tiaki tii te bwai ae e riki n rongorongon rimoa. Ngkoe ao Ngai iai bukinara ae e kakawaki, n te rongorongo ae e reitinako aei.
Tera ngkanne ngkoe ao ngai tabera?
Bon reiakinan Iesu Kristo. Ni kamatebwaia Ana taeka. N ongo Irouna ao n Iriiria ni kabatiaan iran buakon te waaki inanon te mwakuri ae korakora aei. I kaoko bwa ko na roko ao ni kaaina!
Ko aki kainnanoia bwa ko na kororaoi. E na tii iai iroum te nano ni kan karikirakea am onimaki ao ni kaaniiko ma Ngaia ni katoa bong.
Tabera bwa ti na tangiria ao ni beku ibukin te Atua ao n tangiria ao ni beku ibukiia natin te Atua.
Ngkana ko karaoa anne, e na mwaneiko te Atua n Ana tangira, te kimwareirei, ao tabeua kairiiri n te maiu aei, inanon naba taai aika moan te kaangaanga, ao riki ake imwiina.
Man aio ao I taekina koauana, ao ni katuka au kakabwaia n rangi ni kakaitau ao au tangira ibukimi ni kabane, n aran ara Tia Kamaiu ae tabu, ara Mataniwi—n aran Iesu Kristo, amen.