Maungatabu ni Kabuta
Kakororaoan te Motikitaeka ae Raoiroi
Eberi 2020 Maungatabu ni Kabuta

Kakororaoan te Motikitaeka ae Raoiroi

Iroun Unimwaane James R. Rasband

Man te Itingaun

Ni kakoauaa bwa e reke te motikitaeka ae koaua, ana mwakuri ni kamaeu te Tia Kamaiu e na kaitiaki ni kabane bwebwen te aki atatai ao te kabwaka n te maiu n tamnei ae kammaraki are e karikaki irouia tabeman.

Ana Boki Moomon e Reirei ana Reirei Kristo

Okitobwa ae e nako, Beretitenti Russell M. Nelson e kaewenakoira bwa tina iangoia bwa e na kanga maiura ni bitaki ngkana ara “atatai are ti karekea man Ana Boki Moomon e waekoa n anaaki.”1 I a tia n iangoa ana titiraki, n aron are I kakoaua bwa angiina iroumi kam a tia. Teuana te iango ae e okioki—n akean ana Boki Moomon ao ana kabwarabwara iaon ana reirei Kristo ao ana anganano n Ana mwakuri ni kamaiu, N na rairaki nakea ibukin karekean te rau?

Ana reirei Kristo—are kanoana reirei ni kamaiu ao otenanti n onimakinan Kristo, te rairannano, bwabetito, ana bwaintangira te Tamnei ae Raoiroi, ao n teimatoa ni karokoa te toki—e reiakinaki n te tai ae mwaiti inanon koroboki aika a tabu ni kabane ni Kaokan Bwai ma riki mwaakan Ana Boki Moomon.2 Te reirei e moan waaki man onimakinan Kristo, ao bwaai ni kabane ake inanona a katan iaon onimakinan ana anganano n Ana mwakuri ni kamaiu.

N aron are e reirei Beretitenti Nelson, “Ana Boki Moomon e katauraoi atatai aika bwanin ao ni kakaawaki n ana Mwakuri ni Kamaiu Iesu Kristo ae e kona n reke n taabo nako.”3 Mwaitin ara atatai iaon ana bwaintangira te Tia Kamaiu are mai karawa, mwaitin riki are tina ataia, n ara iango ao inanora,4 koauan ana kakoaua Beretitenti Nelson bwa “koauan Ana Boki Moomon iai mwaakana ni kamarurung, karaunano, kaokani bwaai, ibuobuoki, kakorakorara, kabebete, ao kakukureian nanora.”5

Ana Mwakuri ni Kamaiu te Tia Kamaiu E Na Kakoroa Nanon Ni Kabane te Motiraoi

Te bwai ae kakawaki ao n anga te karaunano ae reke n ana Ana Boki Moomon nakon otara n ana Mwakuri ni Kamaiu te Tia Kamaiu bon te reirei mai iai bwa ana anganano n nanoanga Kristo e kakoroa nanon te kairoro n te motikitaeka. N aron are e kabwarabwara Aramwa, “Te Atua i bon irouna e karaoa te mwakuri ni kamaiu ibukin buren te aonaba, bwa e aonga n reke te babaire n nanoanga, e na rau te nano n tangiran te motiraoi, bwa e aonga ni kororaoi te Atua, e na etieti te Atua, ao te Atua ae nanoanga naba.”6 Ana baire te Atua n nanoanga7—are e aranaki naba n koroboki aika a tabu bwa te baire ni kakukurei8 ke te baire ni kamaiu9—e aki kona ni katiaki ni karokoa kairoro ni kabane n te motikitaeka a kakoroaki nanoia.

Ma tera raoi “kakoroan bukin te moti”? Iangoa are e rinanona Aramwa. Uringnga bwa ngke te kairake ni mwane, Aramwa e nako n ukoukora “kamaunaan te ekaretia.”10 Ni koauana, Aramwa e tuanga natina Ereman bwa e “kammarakaki iai ni kammarakin moone” ibukina bwa e a tia n tokanikai “n tiringiia natin [te Atua]” ma “ni kairia nako nanon te tiringaki.”11

Aramwa e kabwarabwara nakon Ereman bwa te rau e roko irouna ngke “karawawataki n uringa” n ana reirei tamana “ibukin rokon … Iesu Kristo… e na karaoa te mwakuri ni kamaiu ibukin buren te aonaba.”12 Te tia rairannano ae Aramwa e bubuti ana nanoanga Kristo13 ao imwina e namakina te kimwareirei ao te raunnano ngke e a ataia bwa Kristo e a tia ni mate ibukin ana bure ao ni kabooi ni kabane moti ake a kainnanoaki. Riki, tera te moti are e na kainnanoia Aramwa? N aron are e reiakinna imwina Aramwa, “Akea te bwai ae e baareka ae kona n rin n uean te Atua.”14 N aron anne, mwakoron kabebetean Aramwa bon man, tii ngkana e bubuti te nanoanga, te motikitaeka e na totokoia man okiran Tamara are i Karawa.15

Te Tia Kamaiu e Kamaoi Maneka Ake Ti Aki Kona ni Kamaoi

Ma tao kukurein Aramwa e boboto bon tii iaona—n ana anga n totokoa tuaana ao n arona n okira te Tama? Ti ataia bwa Aramwa e bon nanokawaki irouia tabeman ake e a tia ni kairia nako man te koaua.16 Ma Aramwa e aki kona ni kamaiuia ao ni kaokiia ni kabane naake e kairiia nako. E aki kona ngaia ni kakoaua raoi bwa a na anganaki aia tai n reiakina ana reirei Kristo ao ni kakabwaiaki man maiuakinan ana tua aika a kakukurei. E aki kona ni manga kaokiia naake a tia ni mate ake a kamatakiaki man ana reirei aika a kairua.

N te taina e reirei Beretitenti Boyd K. Packer: “Te iango are e kamaiua Aramwa … bon aio: Kaokan bwaai ake ko aki kona ni kaoki, kamarurungan maneka ake ko aki kona ni kamaoi, karaoan bwaai ake ko urui ao ko aki kona ni karaoi bon te kantaninga n ana mwakuri ni kamaiu Kristo.”17 Te koaua ae kakukurei n ana iango Aramwa “karawawataki n uringa” bon tiaki tii anne ae ti ngaia ae e na kaitiakaki ma naake e a tia ni kamarakiia a na kona naba ni kamaoaki ao ni kamarurungaki.

Ana Anga Karea te Tia Kamaiu E Karekea te Motikitaeka ae Raoiroi

Ririki imwain kamaiuan Aramwa n te reirei ae karaunano aei, te Uea Beniamina e a tia n reirei taekan rababan te kamaiu are e anga n ana anganano ni kamaiu te Tia Kamaiu. Te Uea Beniamina e taekinna bwa “rongorongo aika raraoi aika uota te kimwareirei ae korakora” e anganaki “iroun ana anera te Atua.”18 Ibuakon rongorongo aika raraoi akanne bon te koaua bwa Kristo e na korakai ao e mate ibukin ara bure ao ara kairua ni kakoaua raoi bwa “te motikitaeka ae raoiroi e na reke nakoia natiia aomata.”19

Tera raoi te “motikitaeka ae raoiroi” ae kainnanoia? N te kibu are imwina, te Uea Beniamina e kabwarabwara bwa ni kakoaua raoi te motikitaeka ae raoiroi, n raraan te Tia Kamaiu e karaoa te mwakuri ni kamaiu “ibukin aia bure aomata ni kabane ake a tia ni bwaka n riaon te tua iroun Atam” ao naake “a tia ni mate n aki ataa ana babaire te Atua ibukiia, ke ake a tia ni bure ao a aki ataia.”20 Te motikitaeka ae raoiroi e kainnanoa naba, e reirei, bwa “raraan Kristo e karaoa te mwakuri ni kamaiu ibukin” aia bure ataei aika a uarereke.21

Koroboki aika a tabu aikai a reirei te tua ae mimitong: ana anganano te Tia Kamaiu ni kamaiu e kamaoi, n aron te bwaintangira ae akea boona, naake a tia ni bure ao aki ataia—nakoia naake, are e koreia Iakobwa, “ike akea te tua are e taekinaki.”22 Arora ni bukinaki e boboto iaon te atatai are ti a tia n anganaki ao e katine iaon arora ni kammwakura ara rinerine23 Ti ata te koaua n te kamaiu ao te karaunano ti ibukin Ana Boki Moomon ao koroboki aika a tabu tabeua ni Kaokan Bwai.24

Te koaua, ngkana iai te tua ae e anga, ngkana ti baka ao ti bon ata ana kantaninga te Atua, ti na bukintaeka. N aron are e kabwarabwara te Uea Beniamina: “Ma e na reke kain, e na reke kain ane e ataia bwa e kaitaraa te Atua! Bwa e na aki reke te kamaiuaki nakoina ma ti ngkana e rairananona ao n onimakina te Uea ae Iesu Kristo.”25

Aio naaba rongorongo aika raraoi n ana reirei Kristo. E aki tii kamaiu te Tia Kamaiu ao ni kabwarai aia bure ake a bure ao aki ataia, ma naake a bure naba ao a bon ataia, te Tia Kamaiu e anga te kamaiu ma ti i mwiin te rainnano ao Onimakinana.26

Aramwa e a bae n tia n “iangoi raoi” koaua aika uoua aikai. E na kona Aramwa n namakina ni koaua te bwai are e kabwarabwara ae “rianako … kimwareirei”27 ngke e iangoia bwa Kristo e kamaiua ma e katuka n aki toki te kammaraki irouia ake e a tia ni kairiianako man te koaua? Koauana raoi e bon aki. Ibukin Aramwa bwa e na namakina te rau, naake e kammarakiia a kainnanoa naba te tai ni kamaiuaki.

Ma e na kanga raoi aroia—ke naake ti kammarakiia—bwa a na kamaiuaki? E ngae ngke e aki tau ara atatai n ae bwanin iaon te kawai ae tabu man ana anganano ni kamaiu te Tia Kamaiu ni kamarurung ao ni kaoki bwai, ti ataia bwa karekean raoi te motikitaeka ae koaua, te Tia Kamaiu e na kaitiaki ni kabane bwebwen te aki atatai ao te kabwaka n te maiu n tamnei ae kammaraki are e karikaki irouia tabeman.28 Man aei E kakoaua raoi bwa natin te Atua ni kabane bwa a na anganaki aia tai, ma nonori aika matata, n rineia bwa a na iriiria ao ni butimwaea te babaire ni kakukurei ae korakora.29

Te Tia Kamaiu E Na Karaoa Mwiin Are Tia Tia Ni Urua

Bon man koaua aikai are e uota iai te rau nakon Aramwa. Ao bon koaua naba aikai ake a riai ni uota te rau naba nakoira ae korakora. Ngkai bon ngaira mwane ao aine, ti bane ni kaitibo, ke n tabetai ti kauntaba imarenara ao ni karika te kabuanibwai. N aroia karo nako, te maraki are e irekereke ma ara kairua bon tiaki ti te bwai ae ti makua ibukin katuaeara ma te maaku are e na kona n tuka kukureia natira ni kawai tabeua man tukakiia man nooran ao ataakin te koaua. Te berita ae mimitong n ana anganano n ana mwakuri ni kamaiu te Tia Kamaiu bon, ngkana e kaineti ma ara kairua ni karo, E aki anganiia natira te bukintaeka ao e berita bwa a na kamaiuaki.30 Ao riki ngkana a bon tia ni bure n te bwai are a bon ataia—n aron are ti bane ni karaoia—e tangaina baina n akoi,31 ao E na kamaiuia ngkana a tara natin te Atua ma te onimaki ao a kamaiuaki.32

E ngae ngke te Tia Kamaiu iai mwaakana ni kaetii bwaai ake ti aki kona ni kaokii, E tuangiira bwa tina karaoi ni kabane ake ti kona ni karaoi man ara itera n ara rairannano.33 Burera ao ara kairua aki kamwaingiira n ara reitaki ma te Atua ma aron naba ara reitaki ma tabeman. N tabetai ara mwakuri ni kamaoa ao ni kamaiu e kona n tii te kabwarabure, ma n tai tabetai te kabomwi e kona ni kainnanoaki e kona ni kainnanoa tabeua te ririki n te mwakuri n nanorinano.34 Ma, angiin burera ma ara kairua, ti bon aki kona ni kamarurungiia raoi naake ti a tia ni kamarakia. Te berita ae moan te tamaroa, are e anga ana Boki Moomon ao te euangkerio are e kaokaki bwa te Tia Kamaiu e na karaoi bwai ni kabane ake a tia n uruaki.35 Ao E na kamaiura ngkana ti rairaki nakoina n te onimaki ao te rairannano man te kaikuaki are ti a tia ni karikii.36 E anga ni kauoua bwaintangira aikai ibukina bwa E tangiriira ni kabane n te tangira ae kororaoi37 ao ibukina E a tia ni kabaeaki bwa e na kakororaoa te motikitaeka ae raoiroi are e karineia te motikitaeka ao te nanoanga. I kakoaua bwa e bon koaua n aran Iesu Kristo, amen.

Bwaai aika a na taraaki

  1. Russell M. Nelson, “Taeka ni Kainiin,” Riaona, Nobembwa 2019, 122.

  2. Taraa 2 Nibwaai 31; 3 Nibwaai 11:28, 32, 35, 39–40; Reirei ao Berita aika Tabu 10:62–63, 67–70; 68:25; Mote 6:52–54; 8:24; Taekan te Onimaki 1:4.

  3. Russell M. Nelson, “Ana Boki Moomon: Tera Aron Maium Ngkana Arona bwa Akea?” Riaona, Nobembwa 2017, 62.

  4. Taraa Reirei ao Berita aika Tabu 8:2–3.

  5. Russell M. Nelson, “Ana Boki Moomon: Tera Aron Maium Ngkana Arona bwa Akea?” 62.

  6. Aramwa 42:15.

  7. Taraa Aramwa 42:15.

  8. Taraa Aramwa 42:8.

  9. Taraa Aramwa 24:14; Mote 6:62.

  10. Tara Motiaea 27:8–10.

  11. Aramwa 36:13–14.

  12. Aramwa 36:17–18.

  13. Taraa Aramwa 36:18.

  14. Aramwa 40:26; taraa naba 1 Nibwaai 15:34; Aramwa 7:21; 11:37; Ereman 8:25.

  15. Taraa 3 Nibwaai 27:19; taraa naba Mote 6:57.

  16. Taraa Aramwa 36:14–17.

  17. Boyd K. Packer, “The Brilliant Morning of Forgiveness,” Ensign, Nobembwa 1995, 19–20.

  18. Motiaea 3:2–3.

  19. Motiaea 3:10; kairaki katuruturuana.

  20. Motiaea 3:11; taraa naba 2 Nibwaai 9:26.

  21. Motiaea 3:16; taraa naba Motiaea 15:25; Moronaai 8:11–12, 22.

  22. 2 Nibwaaii 9:25.

  23. Taraa 2 Nibwaai 2:26–27; Ereman 14:29–30.

  24. Taraa Taekan te Onimaki 1:2; taraa naba Reirei ao Berita aika Tabu 45:54. Ni kabwaranakoan te reirei iaon bwabetitoakiia maate, e taku te Burabeti Iotebwa: “Ngkai teuana mwakoron aekaia aomata bon motikan taekaia ao kabuakakaiia temanna te aomata n akea te nanoanga, Tamaia are i Karawa kain aonaaba e tararuaia utu ni kabane ma te tararua n tama ao aia tangira kaaro; E taraia kanga ai aroia Natina. … Bon ngaia te tia anga te tua ae wanawana, ao e na motiki taekaia aomata ni kabane, tiaki nakon te iango n aomata ae eireme. … E na motikitaekaia,‘tiaki ni kaineti ma te bwai ae aki ataia, ma ni kaineti nakon te bwai ae a tia ni karekea’; naake a tia ni maiu n akea te tua irouia ao a na mate naba n akea te Tua: ao akana bure I an te Tua ao a na motikaki taekaia n te tua anne. Ti riai n aki nanououa ni wanawanan ao n ana tatai te Atua ae Mwaaka; E na anga te motikitaeka ke te nanoanga nakoia aba ni kabane ni kaineti ma tamaroaia, aroia ni karekea te wanawana, te tua are a tautaekanaki iai, bwaai ni mwakuri ake a karekeaki ibukiia ibukin karekean rongorongo aika eti, ao … ao tina bane ngaia n tokin te tai ni karekea te kakoaua bwa te Motikitaeka nakon te aonaaba ni kabane e karaoaki inanon te eti” (Teachings of Presidents of the Church: Joseph Smith [2007], 404).

  25. Motiaea 3:12; taraa naba 2 Nibwaai 9:27.

  26. Taraa Motiaea 3:12; Ereman 14:30; Moronaai 8:10; Reirei ao Berita aika Tabu 101:78. Aomata nako a kona n aki atai tua tabeua ao berita ke n aki kona ni kabongana inaomataia n aro tabeua ma a bon bukintaeka naba n aro tabeua ibukina bwa iai Otan Kristo ae a karekea. (taraa 2 Nibwaai 9:25; Moronaai 7:16–19). Te Tia Kamaiu, are bon ara Tia Motikitaeka ao are e a tia ni kakororaoa te motikitaeka ae raoiroi, e na kaokoroi aro aikai (taraa Moomon 3:20; Mote 6:53–57). Ao e a tia ni kabooi ni kauoua—are mai imwaina akea tuana ao are imwiina iaon aron te rairannano.

  27. Aramwa 36:21.

  28. Taraa Motiaea 3:11; taraa naba D. Todd Christofferson, “Redemption,” Riaona, Meei 2013, 110; Aramwa 7:11–12 (“E na uota i aona marakiia ao aorakiia ana aomata. … Ao e na uota i aona mamaaia”); Itaia 53:3–5 (“E anai rawawatara, ao e uouoti nanokawakira”); 61:1–3 (“E kabirai Iehova bwa … N na bautia akana a uruaki nanoia, … ma ni motiki bukiia akana tang i Tion, n anganiia te bau ae tamaroa n onea mwiin te mannang, ao te bwaa ni kukurei n onea mwiin te kunnikai n tang”). E rang ibuobuoki bwa te Tia Kamaiu e taetae man kiibu aikai n ana boki Itaia ngke e katanoata iai nakoana n riki bwa te Metia: “N te bong aei e a kakoroaki bukin ana taeka te Baibara aei i nanon taningami” (taraa Ruka 4:16–21).

  29. N te aonaaba n tamnei “te euangkerio e tibwauaaki nakoia ake a ribaaki, taan aki rairannano, ao taan aki ongotaeka bwa a aonga ni kamaiuaki man te tautoronaki ao n teimatoa nakon taian kakabwaia ake e a tia ni katauraoi Tamara are I Karawa ibukiia” (Dallin H. Oaks, “Onimaki iroun te Uea,” Riaona, Nobembwa 2019, 27). Taraa 1 Betero 4:6; 2 Nibwaai 2:11–16; Reirei ao Berita aika Tabu 128:19; 137: 7–9; 138: 31–35.

  30. Taraa Mote 6:54. Beretitenti M. Russell Ballard e reirei te koaua aei ma te karinerine nakon te bakabure: “Bon tii te Uea ae e atai ni kabane kabwarabwaraia, ao bon ngaia are e na motiki mwiin ara mwakuri ikai iaon te aba. Ngkana e motiki taekara, I namakinna e na barongai bwaai n iangoi: rikira ma kateira,ao karikara are ti riki inanona, aron mwakurin ara iango, korakoran ara atatai, taian reirei ake ti karekei, aia katei ara bakatibu, marurungira, ao a bati riki. Ti a tia n reiakinna man koroboki aika a tabu bwa raraan Kristo e karaoa te mwakuri ni kamaiu naba ibukin aia bure aomata ni kabane naake a tia ni mate n aki ataa ana babaire te Atua ibukiia, ke ake a tia ni bure ao a aki ataia’ (Motiaea 3:11)” (“Suicide: Some Things We Know, and Some We Do Not,” Ensign, Okitobwa 1987, 8; Tambuli, Mar. 1988, 18).

  31. Tara Iakobo 6:5; Motiaea 29:20; 3 Nibwaai 9:14; Reirei ao Berita aika Tabu 29:1.

  32. Taraa Ereman 8:15.

  33. Taraa Nakoaia Ibonga 6:4–5; Etekiera 33:15–16; Ereman 5:17; Reirei ao Berita aika Tabu 58:42–43.

  34. Bon te aekaki ni mwakuri aei are e kabaeaki inanona Aramwa.(taraa Aramwa 36:24).

  35. Beretitenti Boyd K. Packer e reirei te tua aei ma te mwaaka:

    “Iai taai ake ko aki kona ni karaoi iai bwaai ake ko a tia urui. Tao te bure ngkoa ngkoa, ke te aomata are e ikoaki e aki butimwaea am kabwarabure. Tao te urubwai e rang kakaiaki n te aro are ko aki kona ni karaoia e ngae ngke ko rang n tangiria ni kan karaoia.

    “Am rairannano e aki kona ni butimwaeaki ni karokoa iai te kabomwi. Ngkana ko aki kona ni manga karaoa are ko a tia ni karaoia, koa mwane. E beebete otam iai n aron akean am konabwai ke akean am kataninga are ko namakinna ao bukin tera ko na tangiria n taenikai, n aron are e riki iroun Aramwa. …

    “A na kanga ni manga karaoaki ni kabane, ti aki ataia. E kona ni bane n aki koro nanona n te maiu aei. Ti ataia man mii ao kakawari bwa ana toro te Uea a reitanako te mwakuri ni kamaiu riaon te rabuna.

    “Te atatai aei e riai ni karaunano nakoia ake akea aia bure ao ai arona naba nakoia ake a bure. I iangoia karo ake a korakai n uotakin aia kairua natiia ake a tionako ao ake a bua aia kantaninga” (“The Brilliant Morning of Forgiveness,” 19–20).

  36. Taraa 3 Nibwaai 12:19; taraa naba Mataio 6:12; 3 Nibwaai 13:11.

  37. Taraa Ioane 15:12–13; 1 Ioane 4:18; Dieter F. Uchtdorf, “Perfect Love Casteth Out Fear,” Liahona, May 2017, 107.