Prophecy Ediworo-nsu
Mme prophecy emi okoworode osu oto ke Edifiak-nda oyoho iko Abasi Jesus Christ ndi awak.
Ndima ndito-eka mi iren ye iban, ami mekop ukpono ke nditing iko ke inem akwa mbono emi itide Akpa Nkukut Joseph Smith eke Abasi ye Eyen Esie, Jesus Christ, ke se idide, emi eyighe miduhe, Sacred Groove kiet. Nkukut oro ekedi akwa ntongo ono Edifiak-nda iko Abasi ndi ye kpukpru se ikeyarare, tongo ke Nwed Mormon kesim ndifiak nyak unen ye ukpohode itie-oku, nditongo Ufok Abasi akpaniko Christ, mme temple Abasi , ye prophet ye apostle emi edade-usung ke utom ke ekpere edem usen emi.
Otode edisana ubono-mkpo, nkani prophet Abasi, kini Edisana Spirit etemede mmo ema eting prophecy ebanga Edifiak-nda-ndi ye se idiworode idi ke ini nnyin emi, akpatre eyo ye uyoho ini. Ata utom oro “ekebumere ukpong” eke mme akpa asiak-uduak.1 Ke ofuri emana, mmo ebemiso eting, edaba-ndap, ekut-nkukut, enyung eting prophecy ebanga ini-iso eke Obio-ubong Abasi ke isong, se Isaiah okotde nte “utibe-nkpo ye ido eke edide utibe.”2
Mme prophecy emi okoworode osu oto ke Edifiak-nda oyoho iko Abasi Jesus Christ ndi, ke esit edide Ufok Abasi Jesus Christ eke mme Latter-day Saint, edi ediwak. Mfin emi, nte ededi, ami nyemen esisit eke ami nehede mma kpot nwut. Nkekpeb mme nkpo emi nto mme ndima andikpeb mi ke Primary ye ke edong edima eka mi.
Daniel, emi akawakde mme ekpe inua oto ke mbuotidem esie ke Jesus Christ ye edibuana eke mme isungutom angel Abasi, edi owo emi okokutde eyo nnyin ke nkukut. Ke ndikabare ndap nno Edidem Nebuchadnezzar eke Babylon, Daniel eting prophecy ke Ufok Abasi Christ eyedemere ke mme ekpere edem usen nte ekpri itiat “emi midige ubokowo asiak ke akamba-obot osio.”3 “Midige ubokowo,” oworode ke oto edisana ubono-nkpo, ke Ufok Abasi Christ eyekpon ke ubom tutu oyoho ofuri isong eke “[midi] soboke ke nsinsi … [edi eye] songo ada ke nsinsi.”4
Edi inem ntiense ete ke mme iko Daniel ke oworo-osu ke nte mbon Ufok Abasi, ke ofuri ererimbot, esede enyung ekpangde-utong mfin eno mbono emi.
Esinifik Apostle Peter emen “ini emi edinamde kpukpru nkpo etongo ntak efon ema … tongo nte ererimbot okotongo” owut.5 Apostle Paul ewet ete ke edikem ini, ke Abasi eye “tang … kpukpru nkpo odong ke Christ,”6 “Jesus Christ ke ke idemesie edide akpan itiat-inuk.”7 Ami nkenehede nkut nte mme prophecy osude kini ami nkebuanade ke edidiong eke Rome Italy Temple. Ofuri mme prophet ye apostle ema edu do eting iko ntiense mmo ebanga Jesus Christ, Andifak ererimbot, nte Peter ye Paul ekenamde. Ufok Abasi edi odu-uwem uwutnkpo eke edifon-mma oro, ndito-eka iren ye iban, ye mbon Ufok Abasi nnyin edi mme ntiense eke ndisana prophecy oro ke anyan ini ko.
Joseph eke Egypt ama eting prophecy ete ke ekpere edem usen ete: “Jehovah Abasi mi eyeno owo nkukut, emi edide edimek owo nkukut ono mmo emi etode ubon mi.”8 “Ndien enye eyenam utom [Abasi].”9 Joesph Smith, prophet eke Edifiak-nda-ndi, ekedi owo nkukut oro.
John Andiyarare eting prophecy abanga angel eke Andikpon-nkan kiet adade nti nkpo eke Edifiak-nda-ndi obon otokiet ye mme iko emi ete: “Ekemnkut angel enwen efede ke ufot enyong, emi enyenede nsinsi gospel ete ikworo ino mmo emi edungde ke isong ye kpukpru idut ye esien ye usem ye obio.”10 Moroni ekedi angel oro. Enye ama okut usen nnyin nte ewetde ke Nwed Mormon. Ke afiakde edi awak, enye ebenge Joseph Smith idem ono utom esie, ke esit edide, edikabare Nwed Mormon: Testament Jesus Christ Efen.
Mme prophet efen ema eting ebanga ini nnyin. Malachi eketing abanga Elijah edkabare “esit mme ete nno ndito, ye edikabare esit ndito nno mme ete mmo.”11 Elijah ama edi,ndien nte iboro,mfin emi, nnyin inyene temple 168 oyohode isong. Temple kiet-kiet anwam nti mbon Ufok Abasi emi enamde ndisana ediomi enyung ebode nti edinam eno idem mmo ye mbon ntongo-ubon mmo emi ema ekekpa. Malachi emen edisana utom emi owut nte kedi “akpan-nkpo ono uduak Andibot kabanga nsinsi akanga eke ndito Esie.”12
Nnyin idu ke ini eketingde prophecy oro ebanga; nnyin idi mbon emi enode ubiong ke ndiwut-usung Edidi Jesus Christ Oyoho Ikaba; nnyin inyene nditang ndito mbok, mbon emi edikpode enyung enyime mme akpaniko, ediomi, ye enwongo eke nsinsi gospel. President Nelson okot emi “mkpon-nkan ubiong, mkpon-nkan ntak, ye mkpon-nkan utom ke isong mfin emi.”13 Kabanga utibe-nkpo ke ami nno ntiense mi.
Nte ubiong otode President Russell M. Nelson, ke February isua emi ami mma nkediong Durban South Africa Temple. Edi usen eke ami nditide ke ofuri eyo uwem mi. Ami nkodu ye mbon Ufok Abasi emi enyenede gospel ke nte Jeremiah etingde prophecy ete ke anyan ini ko nte—“kiet ke obio, ye iba ke oruk.”14 Ukpebnkpo Jesus Christ adian kpukpru nnyin kiet—ke ofuri ererimbot—nte ndito iren ye iban eke Abasi,nte ndito-eka iren ye iban ke iko Abasi. Isehe nte nnyin ibietde mme ofong eke isinede, nnyin idi ubonowo kiet ye Ete ke Heaven emi uduak Esie tongo ke ntongo ekedide onyung edide ono ufokemana Esie ndifiak ndiana-kiet ke ndinam nyung nim ndisana ediomi eke temple.
Etingde ono ekpri eboho eke mme akama itie-oku ke ufoknwed ke Kirtland, Ohio, ke 1834,Prophet Joseph ete, “Mbufo ekut esisit Itie-okumikeokoneyo emi, edi Ufok Abasi emi eyeyoho Edere ye Usuk America—enye eyeyoho ererimbot.”15
Ke mme isua mmi-mmi ami manam isang nkanare man nsobo mbon Ufok Abasi. Ndito-ete mi eke Eboho Duopeba esinyene mbiet ubiong-utom oro. Edi, anie ekeme ndinam ukem nte edima prophet nnyin, President Nelson emi uka-isang ke akpa isua iba esie nte President Ufok Abasi akadade enye man osobo ye mbon Ufok Abasi ke mme idut Edip-ye-duopeta ye mme isong U.S.16 man edi ntiense abanga odu-uwem Christ.
Ami mmeti kini ami nkebode ikoot mission mi nte akparawa. Ami nkoyom ndika mission ke Germany, ukem nte ete, eyen-eka eren, ye ebe eyen-eka mi. Mbetke nte owo ndomokiet edisim ufok, ami nsop nka mailbox nyung nkubore ikoot mi. Ami nkot nte ke edoho mi ete nka Eastern States Mission, emi itie-ukara odude ke New York City. Ama okpu mi, ntem ami nduk ufok nyung nkubore nwed Abasi mi nyom ndongesit. Ami ntongo ndikot ke Doctrine ye Covenant: “Sese, nyung se, ami mmenyene ediwakowo ke ebiet emi, ke nkanare obio oro; ndien eyeberede nti usung ke nkanare obio oro ke isong usiaha-utin emi.”17 Prophecy oro, emi ekenode Prophet Joseph Smith ke 1833 ekedi eryarare ono mi. Ami ndidiongo ndien ke ekekot mi ke ata mission emi Abasi okoyomde ami nkanam utom. Ami nkekpeb Edifiak-nda-ndi ye inem ntongo esie kini Ete nnyin ke Heaven eketingde ono Joseph Smith ndien ete, “Emi edi Edima Eyen Mi. Ekpang utom eno Enye!”18
Kabanga akwa ufon eke ofuri Ufok Abasi edi prophecy eke Isaiah, emi akande ke isua Ikie-Itiaba ekeno mbemiso Jesus Christ edimamana ete: “Ama ekem ke utit eyo, obot ufok Jehovah eyewuho ke enyong ikpo obo, … ndien kpukpru mme idut eyebungo eduk ke esit.”19
Ke ekikere mi mfin emi, ami nkut nte ata ediwak mbon Ufok Abasi ye mme ufan nnyin esede nka-iso mbono ke ekebe-ndise, intanet, mme ke usung efen Nnyin ke itie nte kedi otokiet ke “enyong ikpo obot.”20 Edi Brigham Young eketing mme iko prophecy emi ete “Nnen-nnen ebiet edi emi.”21 Ikot Abasi, ubak mmo mme ebemiso ntongo-ubon mi, ekenam utom man esiak Zion ke Rocky Mountains “ke uduak ye inemesit enye emi ekebotde mme idut ke isong.”22
Ami nda mfin emi ke edisana isong emi adade mme ata-ediwak isenowo edi. Ke 2002, ekenam Winter Olympic Games ke Obio Salt Lake. Nkaikwo Tabarnacle ekekwo ikwo editongo usoro, ndien Ufok Abasi enam mme mbre ye edinam eno isenowo ye mbon-mbuba emi eketode ediwak idut. Ami nyewak nditi nte nkutde temple ke edem-isong eke usuanetop okoneyo nno ererimbot.
Ke ediwak isua ko, mme president eke United States, ndidem, ebiere-ikpe, ada-ukara, isung-utom idut, ye ikpo-owo eketode ediwak obio esidi Obio Salt Lake enyung esobo ye mme adausung nnyin. President Nelson ama osobo ye mme adausung National Association for the Advancement of Colored People, nkok-utom United States emi enyimede ukem unen eke misarike uduot-owo. Ami mmeti nte ndade mkpere mme ufan ye adausung emi kini President Nelson abuanade ye mmo ke ndikot nyom akwa mfonido ye ukem uduot ke ererimbot.23
Ata ediwak owo edi Temple Square enyung eduk esop ye mme adausung ke Ufok Abasi. Nte uwutnkpo, ke isua andikibe, ndisiak esisit, nnyin ima-idara edidi Mbono United Nations 68th Civil Society, eboho ofuri ererimbot ye ke ndisio oruk mbono oro ke akpa ini mkpong Obio New York. Nnyin imesobo ye Mbon Ndutim Edu-ukpono eke Vietnam ye mme isung-utom idut eke Cuba, Phillipines, Argentina, Romania, Sudan, Qatar, ye Saudi Arabia. Nnyin nko imedara edidi eke ewet-nkpo nno Muslim World Leaque.
Nkpo se ami nting-nwut edi ediworo-nsu prophecy eke Isaiahete ke utit eyo, kpukpru mme idut eyebungo eduk ke “obot ufok Jehovah.”24 Akwa Salt Lake Temple ada ke esit utenge ye ubong oro.
Idige ediye-isong oro ada mme owo edi, okposuk nte ke ubono-nkpo nnyin eyede, edi nkpo edisana edu-ukpono ke ewutde spirit, nkori, eti-ido, ye ntat-ubok eke Ufok Abasi Jesus Christ eke Latter-day Saint ye ikot mmo; ima nnyin ke nte Abasi amade, nsinifik nnyin nno akwa ubiong, se Joseph Smith okokotde “ubiong Christ.”25
Nniyn idiongoke ini emi Andinynaga edifiakde idi, edi imediongo ke eyedi Ana nnyin ibenge-idem ke esit ye ke ekikere, idotn dibo Enye, inyung inyene ukpono ke ndibuana ke ofuri se eketingde prophecy ebanga ke anyan ini ko
Ami ntie ntiense nte ke President Russell M.Nelson edi prophet Abasi ke isong, ndien ke nkang esie edi mme Apostle emi Abasi okokotde,,enyime nte mme prophet, okut-nkukut, ye andiyarare. Ndien, ndima ndito-eka mi iren ye iban, Edifiak-nda-ndi oro ke akaka-iso.
Ami nyetre ye prophecy Joseph Smith, iko eke ami ntingde iko ntiense edi akpaniko: “Iduhe ubok ekeeditrede utom emi ndikori, ukobo ekeme nditongo, ndioi-nka ekeme ndidiana-kiet, mbon-ekong ekeme ndiboho, mbiari ekeme ndibiat-enyin, edi akpaniko Abasi eyesongo, odot, onyung ada-ke-idem aka iso, tutu oduk ofuri idut, aka ke ofuri ererimbot, oduk ofuri idung, onyung oyomo ke ofuri utong, tutu enam uduak Abasi ekure, ndien Akwa Jehovah eyedoho ete ke enam utom oro ekure.”26 Ami nting iko ntiense nte ke mme prophecy Joseph Smith ke oworo osu.
Ami nnwongo ke nte mbufo etienede nti item eke edima prophet nnyin, President Russell M. Nelson, mme onoitem esie, mme Apostle, ye adausung Ufok Abassi eken, ndien ke nte mbufo ekopde eno mme prophet eset emi ekebemde iso eting ebanga eyo nnyin, ke spirit ye utom Edifiak-nda-ndi eyeyoho, ke ntutungo esit ye ukpong mbufo. Ami nnwongo ke mbufo eyekut ubok Abasi ke uwem mbufo, ekop ntuuk Esie, enyung ekut ima Esie. Keenying Jesus Christ, ye ekom nno Edifak-nda-ndi iko Abasi ye Ufok Abasi Esie, edi idiongo anana-ukem ima Esie, amen.