Kere-banga Mfonido ye nte Abasi Okponde
Ami nkot mbufo nte eti kwa usen nte Ete Heaven ye Jesus Christ ekopnde ye se Mmo ekenamde eno mbufo.
Ke ofuri ini, kpa ye akpan-akpan ke mkposong ini, mme prophet esidoho ete nnyin iti nte Abasi okponde inyung ikere-ibanga se Enye akanamde ono nnyin nte owo kiet-kiet, nte ufokemana, ye nte mme owo.1 Ndausung emi odu ke ofuri nwed Abasi edi enehede awak ke Nwed Mormon. Ibuot iko anam anwanga ete ke ntak kiet emi Nwed Mormon odude edi “man owut nsuho ufok Isreal mme akwa nkpo emi Jehovah akanamde ono mme ete mmo.”2 Nwed Mormon etre ye ebenge Moroni ete: “Sese, ami nsongo mkpe mbufo ubok nte ke ini mbufo edikotde nkpo emi … man mbufo eti nte mfon Abasi ekedide ono ndito owo … enyung ekere enye ke esit mbufo.”3
Ediwak mkpe-ubok emi otode mme prophet ke ndiwut mfon Abasi okpon eti-eti.4 Ete nnyin ke Heaven oyom ete nnyin iti mfon Esie ye eke Edima Eyen Esie, idige ke utip Mmo, edi edike ntak oruk editi ntat-ubok oro enyenede ono nnyin. Ke ndikere mbanga mfonido Mmo, ekikere ye ifiok nnyin okpon. Ke ndikere mbanga esit-mbom Mmo, nnyin inehede isuhore-idem, iyoho-ye-akam, inyung iisongo-ida.
Akpan ifiok-ukpeb kiet ye akani owo-udongo kiet owut danga esit-ekom kabanga ntat-ubok ye esit-mbom ekemede ndikpuhu nnyin. Ke 1987, ami mma mehe ye Thomas Nelson, eti erenowo kiet emi okoyomde heart transplant. Enye ekedi owo-isua Ata-ye-ita onyung odung ke Logan, Utah, ke Unted States. Ke okurede utom ekong kini World War II, enye adian-ndo Donna Wilkes ke Logan Utah Temple. Enye ama akabare edi okop-idem ye nworo-nda owo okok-ufok. Ke isua akade-iso enye enehede okop-inem ndinam utom ye mkpon-nkan eyeyen esie, Jonathan, kini ufoknwed etrede. Mmo mbiba ema enyene ata ima, koro ke ubak Tom ama okut ata mbiet esie ke idem Jonathan.
Tom ikesopke ikut owo emi edinode enye heart transplant. Enye ikedige owo emi esinehede enyene ime. Enye esidi esinamde uduak esie oworo-osu ke utom ye akpan ubiere. Sia ekenyenede udongo iduo esit, diana ye uwem miwakke aba, ubakini Tom esibup mme nso ke ami nam man udongo esie edisop ikure. Ke mbubru, enye asiak mme nkpo se mkpenamde man edisop ekut owo emi edinode enye heart transplant.
Ke usen idaraesit kap ye ndik kiet, ukem donor heart kiet ama odu ono Tom Idaha ye oruk iyip ekedi ukem, ndien andino ekedi eyenowong, kpaisua Efurekiet kpot. Jonathan, edima eyeyen-eren Tom ekenyene esit oro. Ke mbak usen oro, Jonathan ama enyene unomo kini train emi awatde ebe okotode moto emi enyen akawatde.
Kini ami nkesede Tom ye Donna ke ufokibok, mmo ema efuho. Osong ndikere-mbanga se ikesimde mmo, ndidiongo ete ke uwemTom ekeme ndibighe oto ke ndibo esit eyeyen-eren esie. Ke akpa ini, mmo ema esin ekikere edibo-esit emi ete ye eka Jonathan, eyen-anwan ye ebe eyen mmo ekenode. Tom ye Donna ema ediongo, okposuk, ke Jonathan ama akpa ke mfre, enyug edifiok ete ke akam mmo ndiyom donor heart nno Tom ikedige ntak unomo Jonathan. Ihn-ihn, esit Jonatha ekedi eno emi ekemede ndidiong Tom kini unana esie. Mmo edifiok ete ke eti nkpo ekeme ndiworo nto ke unomo emi ndien mmo ebiere ndinam oro.
Ndutim edisio oro ama ofon. Ke oro ebede, Tom ekedi isio-isio owo. Edikpuhu emi ama akan nsong-idem ye esit-ekom. Enye eting ono mi ke imo isikere ofuri usenubok ibanga Jonathan, eyen-anwan ye ebe eyen esie, eno emi imo ikebode, ye se eno oro oworode. Okposuk nte ido mbubru ye osongo esie osuk odude, ami ndikut ke Tom akabare osuhore-idem, ekere-nkpo, onyung enyene esit-mbom.
Tom edibighe uwem ke isua Duopeta adiana ke ekurede transplant oro, mme isua emi enye mikpikeduhe. Nwed mkpa esie eting ete ke mme isua oro ama anam enye otuuk uwem mbon ufokemana esie ye eke mbon efen ke ntat-ubok ye ima. Enye ekedi ndidibe owo-unwam ye uwutnkpo idorenyin ye ubiere.
Ukem nte Tom, nnyin owo kiet-kiet ima ibo mme eno emi nnyin mikpikemeke ndino idem nnyin, mme eno otode Ete nnyin ke Heaven ye Edima Eyen Esie, ke esit edide ufak otode nwaidem usio-isop Jesus Christ.5 Nnyin imebo uwem ke ererimbot emi, nnyin iyebo uwem ikpokidem ke emi ebede, ye nsinsi erinyanga ye ubong—edieke nnyin imekde oro—ofuri otode Ete Heaven ye Jesus Christ.
Ofuri ini eke nnyin idade inam nkpo, ibode ufon ito, mme ke ikerede ibanga mme eno emi, ana nnyin ikere-ibanga nwaidem, ntat-ubok, ye esit-mbom eke mme andino. Ndinyene utenge nno mme andino ofon akan nnyin ndikop inemesit mbanga. Ndikere mbanga eno Mmo ekeme ndien eyekpuhu nnyin.
Kotu ata nworo-nda ukpuhore ekedi eke Ekpri Alma. Nte Alma “ekekade kabanga ndisong-ibuot ye Abasi,”6 angel oworo owut idem. Ye “uyo eke obuma,”7 angel asua-ono Alma ke ndikobo Ufok Abasi ye “ndibiat mme owo esit.”8 Angel adian item emi ete: “Ka, yung ti idiok-itie eke mme ete mbufo …; yung ti adanga akwa nkpo emi [Abasi] akanamde ono mmo.”9 Ke kpukpru usung ekemede nditin, oro edi se angel eketing.
Alma akabare esit onyung eti. Ekem enye abuana item angel ye eyen esie Heleman. Alma eteme ete, “Ami nyom man mbufo enam nte nkenamde, ke nditi itie ufin mme ete nnyin; koro mmo ekedu ke ufin, edi iduhe owo emi ekenyangade mmo ke mibehe Abasi Abraham, … Isaac, ye … Jacob; ndien ama osio mmo ke ukut mmo.”10 Alma eting mmem-mmem ete, “Ami nsin mbuotidem mi ke enye.”11 Alma ama ofiok ete ke nditi eriyanga nsio ke ufin ye iberedem kini “idomo ye mfina kiet ekededi,” nnyin idifiok Abasi ye akpaniko emi odude ke enwongo Esie.12
Ndusuk nnyin iminyene ifiok nte Alma ekewutde, edi edikpuhore nnyin ekeme ndidi ukem. Andiyanga onwongo ke eset:
“Obufa esit nko ke ndino mbufo, nnyung nda obufa spirit nsin mbufo ke idem, nnyung nsio mbufo esit itiat … , nnyung nno mbufo esit enyene obuk.
“Nyenyung nda spirit mi nsin mbufo ke idem. …
“… Ndien mbufo eyedi ikot mi, ami nyenyung ndi Abasi mbufo.”13
Andinyanga emi ekesetde ama eting ono mbon Nephi danga ukpuhore emi editongo. Enye owut akpan nkpo ke uduak eke Ete heaven kini Enye odohode ete:
“Ete mi okono mi ndi man emenere mi ke cross, man nte mme owo ema ekemeneremi ke cross, man ami mkpekeme ndida kpukpru owo nno idem mi. …
“Ndien ke ntak emi em ekemenere mike enyong; mmodo, nte asanagde ye odudu Ete, Ami nyeda kpukpru owo nno idem mi.”14
Nso ke oyom man eda mbufo eno Andinyanga? Kere-banga nte Jesus Christ akayakde-idem ono uduak Ete Esie, Enye edikan mkpa, Enye edida mme idioknkpo ye ndudue mbufo ndori ke idem, Enye ndibo odudu nto Ete man ekpe-ubok ono mbufo, ye akpatre ufak Esie nno mbufo.15 Nte mme nkpoemi ikemeke ndida mbufo nsok Enye? Mmo edu eno mi. Jesus Christ “ada ye ntara-ubok, oyom onyung aduak ndikok, mfen, nyet, nsongo, nnyung nam [afo ye ami] isana.”16
Akpana mme akan iko emi ono mbufo obufa esit onyung anam mbufo emek nditiene Ete Heaven ye Jesus Christ. Edi kpa obufa esit ekeme “nditun usung, … ekeme ndikpong Abasi emi [nnyin] imade.”17 Man ikan udong emi, kpukpru usen ana nnyin ikere-ibanga mme eno emi nnyin ikebode ye se mmo eworode. Edidem Benjamin eketeme ete, “Mkpama mbufo eti ebanga, ndien kpukpru ini eti, nte Abasi okponde … ye mfonido ye anyan-ime esie kabanga mbufo.”18 Adieke nnyin inamde ntre, nnyin idot ke mme nworo-nda edidiong eke heaven.
Ndikere mbanga mfonido ye mbom Abasi eyenwam nnyin ndikabare nnyene ido Abasi nnyung mbo item. Nte ufon, editara ifiok Abasi anam nnyin idi man ididiongo akpaniko kabanga ofuri nkpo oto ke odudu Edisana Spirit.19 Emi esine iko ntiense eke akpaniko Nwed Mormon, ndidiongo ke Jesus edi Christ, Andinyanga ye Andifak nnyin, nnyung nnyime ke ema efiak-eda iko Abasi Esie edi ke ekpere edem usen emi.20
Ini emi nnyin itide nte Ete nnyin ke Heaven ye Jesus Christ ekopnde ye se Mmo ekenamde eno nyin, nnyin ididaha nkpo mmo ke mbubru, ukem nte Tom mikedaha esit Jonathan ke mbubru. Ke oyoho usung idaraesit ye utenge, Tom editi kpukpru usen unomo emi akanamde uwem esie afiak ebighe. Ke inemesit edidiongo ke ekeme edinyanga enyung emenere nnyin, ana nnyin iti ete ke erinyanga ye ubong edi ye akwa ekom-urua.21 Nnyin imekeme ndidara ye utenge kini nnyin idifiokde ete kesioho Jesus Christ, ke nnyin ikpetak, edi ye Enye ke nnyin imekeme ndibo mkpon-nkan eno emi Ete Heaven ekemede ndiino.22 Ke akpaniko, utenge emi anam nnyin ibo enwongo “eke nsinsi uwem ke ererimbot emi” ndien ke akpatre “nsinsi uwem … kpa ubong unana-mkpa” ke ererimbot emi edidide.23
Ini emi nnyin ikerede-ibanga mfonido eke Ete Heaven ye Jesus Christ, mbuotidem nnyin ke idem Mmo okpon. Akam nnyin okpuho koro nnyin imediongo ke Abasi edi Ete nnyin ndien nnyin idi ndito Esie. Nnyin iyomke ndikpuho uduak Esie edi iyom uduak nnyin asanga ye eke Esie inyung ibo edidiong emi Enye oyomde ndino inim ino idem nnyin, emi okongode ke nnyin ndibenge nyom mmo.24 Nnyin iyom ndnehede ndi sung-sung, nsana, ntuak-nda, mbiet Christ.25 Mme edikpuho emi anam nnyin idot ke ndibo mme ndadiana edidiong efen.
Ke ndinyime ke ofuri eti nkpo oto ke Jesus Christ, nnyin iyenehede ineme edu-ukpono nnyin ino mbon efen.26 Nnyin iyenyene uko kini okposong utom ye idiok ndaha osimde nnyin.27 Nnyin iyesongo ubiere nnyin ke ndinim mme ediomi emi nnyin ikenamde ke nditiene Andinyanga.28 Nnyin iyeyoho ye ima Abasi, iyom ndinwam mbon unana ke misehe ndaha, ima ndito nnyin inyung ikama mmo ke edinen-ido, ibo erifen ke idioknkpo nnyin, inyung idaresit ke ofuri ini.29 Mme nkpo emi edi idiongo mfri eke editi mfonido ye mbom eke Abasi.
Ke usung efen Andinyanaga ono ikpan ete, “Iduhe nkpo efen emi owo ayatde Abasi esit, mme ke ndidibede ifiop-esit esie, ke mibohoke mbon emi etrede ndino ekom ke ofuri nkpo.”30 Ami nkereke ke Abasi obo usong-enyin kini nnyin ifreke Enye. Edi, ami nkere ofon ke Enye enehede ofuho. Enye odiongo ke nnyin imetabi idem nnyin ufang ke ndisanga mkpere Enye ke nditi Enye ye mfonido Esie. Nnyin ndien itip ke Enye ndisanga mkpere nnyin ye asanga-asanga edidiong emi Enye okonwongode.31
Ami nkot mbufo nte eti kwa usen nte Ete Heaven ye Jesus Christ ekopnde ye se Mmo ekenamde eno mbufo. Yak ekikere mbufo kabanga mfonido Mmo enehede obop mfum-mfum esit mbufo ono Mmo.32 Kere ke esit banga esit-mbom Mmo, ndien mbufo eyebo edidiong ye ndadian ifiok Abasi enyung ekabare ebiet Christ. Ndikere-mbanga mbom Mmo eyenwam mbufo “enyene mbuotidem tutu osim utit,” tutu “ebo mbufo esin ke heaven” man “ekpedung ye Abasi ke ebiet emi utit inemesit miduhe.”33
Ete nnyin ke Heaven, ke etingde abanga Edima Eyen Esie, ete, “Ekop uyo Esie!”34 Nte mbufo enamde iko oro enyung ekpang-utong eno Enye, eti, ke oyohoidaresit ye utenge, ete ke Andinyanga ama mbufo man afiak-ada se mbufo mikemeke ndifiak-nda ndi edi, Enye ama ndikok unan emi mbufo mikemeke ndikok, Enye ama man odiong se ima ikenehede ibiara,35 Enye ono-usiene ke idioknkpo ekededi emi ekanamde mbufo,36 ndien Enye ke ofuri ini ama ndidiong mbon mbungo esit.37
Nte ami nkereke mbanga mme eno emi otode Ete nnyin ke Heaven ye eke Jesus Christ, ami mmedidiongo mbanga anana-utit ima Mmo ye ayanga-ifiok esit-mbom Mmo kabanga ofuri ndito Abasi.38 Ifiok emi anam mi mkpuho, ndien oro eyekpuho mbufo nko. Ke enying Jesus Chrst, amen.