Odu Uwem Ntiense eke Odu Uwem Christ

Eke Bishop Caussé

Adaibuot eke mme Bishop

Akpan etop ke Nwed Mormon edi ndifiak mmen ifiok abangade idaha Jesus Christ ke erinyanga ye edimenere owo ke enyong.

Ke usen kiet ke 2017, ke ini edinam ediberede Paris France Temple eke akade iso owo kiet emi ekedide mfuho-mfuho ama asanga ebine ada usung kiet do. Enye ama odoho ke imo imidung ikpere temple oro ndien ke imo ikiyomke ete ebop enye. Enye ama odoho ete ke usen kiet nte imo ikisede ke window imo, imo ima ikut nte akamba machine osukde mbiet Jesus oto ke heaven esin ke temple oro. Enye ama odoho ete ke mkpo emi ama okpuho ekikere esie abanga Ufok Abasi ofuri-ofuri. Enye ama edikut ete ke nnyin idi ikot Jesus Christ onyung ekpe nnyin ubok abanga ndudue emi enye akanamde ke edem.

Mbiet Christus, emi oyohode Temple Paris ye mme inyene Ufok Abasi efen, etie ntiense ebanga ima emi nnyin inyenede ino Andinyanga. Akpa itiat emi emi ekebotde edi ubok utom Bertel Thorvaldsen eke Denmark, emi ekebotde enye ke 1820—ukem isua ye akpa nkukut. Itiat emi idighe ukem-ukem ye ediwak se ekebotde ke ini oro, emi mmo ewutde ufen Christ ke cross. Utom Thorvaldsen owut odu uwem Christ, emi eke akande mkpa ndien, ye ntatubok, okot kpukpru owo ete edi etiene Enye. Ndo mme ukwak ke mme ubok ye ukot Esie ye unan ke nkang Esie ikpong ewut ufen emi Enye okobode man anyanga ubon owo.

Ntak kiet emi nnyin nte mbon The Church of Jesus Christ of Latter-day Saints imade itiat emi edi koro enye eti nnyin abanga se etingde ke Nwed Mormon ebanga nte Andinyanga eke akade obio America.

“Ndien sese, mmo ekut nte Owo otode heaven osuhore; ndien enye ekesine afia ofong; ndien enye osuhore edi edida ke ufot mmo; …

“Ndien edikem ete enye anyan ubok esie onyung odoho mme owo, ete:

“Sese, ami ndi Jesus Christ, …

“…Ndien ami menwong ke ndodot cup emi Ete onode mi, ndien metoro Ete ke ndimen mme idiok mkpo ererimbot ndori ke idem mi.”¹

Ndien enye okot mme owo kiet kiet, eren, nwan, ye enyen onwong ete edisin ubok mmo ke nkang Esie enyung etuk mme ndo ukwak ke mme ubok ye ukot Esie, man otode mmo enyene iko ntiense ke idem mmo ete ke akpaniko ke Enye edi Andinyanga emi ekebetde.²

Ediye ndise emi eketing abanga odudu eke Nwed Mormon. Ofuri “eti mbuk” gospel esine ke ndise Andinyanga, nte Enye anyande “ubok mbom” Esie”³ okot mme owo kiet kiet ete edi etiene Enye ebo ebo mme edidiong eke Usio-isop Esie.

Akpan etop ke Nwed Mormon edi ndifiak mmen ifiok abangade idaha Jesus Christ ke erinyanga ye edimenere owo ke enyong. Etop emi otongo ke akpa tutu esim akpatre iko ke akpatre ibuot ke nwed emi. Ke otode ediwak isua ke ekim ye mfina ke spirit, se Christ akanamde ke Gethsemane ye ke Golgotha ema ebiara enyung esop. Esit ama enem Joseph Smith eti eti ke ini, enye eke akabare 1 Nephi, enye ama okut enwongo emi: “Mme akpatre nwed emi [Nwed Mormon] … eye esongo akpaniko emi edude ke akpa [Bible] … ndien eyenam efiok mme nti mkpo emi esiode ke mmo efep; ndien eyenam ofuri iman, usem, ye mme owo, efiok ete ke Eyen Erong Abasi edi Eyen Nsinsi Ete, ye Andiyanga ererimbot; ndien ete yak ofuri owo edi etiene Enye, midighe ntre mmo idibohoke.”⁴

Nti akpaniko emi ebangade Erisio-isop Andinyanga edu ke ofuri Nwed Mormon. Nte mbatde ediwak akpaniko emi, medoho yak ekere abanga nte mmo etukde uwem fo.

1. Erisio-isop eke Jesus edi eno mfon emi enode kpukpru owo emi edude uwem, emi esuk edude uwem, ye emi edidude uwem ke ererimbot.⁵

2. Ke ediande mbiomo idiok mkpo, Christ ama emen mme ukut nnyin, mmem-idem, ufen, mme udongo, ye kpukpru afanikong emi edude ke uwem owo ono idem esie. Ukut ndomo kiet, ubiak, mme mfuho iduhe emi Enye mike-menke ifep ino nnyin.⁶

3. Uwa usio-isop eke Andinyanga ayak nnyin ikan Iduo Adam, ye mkpa obuk idem. Ke ntak Christ, kpukpru ndito Abasi emi emanade ke ererimbot emi, owo isehe ido mmo, spirit mmo eyefiak ediana ye obuk idem mmo oto ke odudu Eriset ke mkpa⁷ enyung enyong etiene Enye “man ekpe ikpe nte mme utom mmo edide.”⁸

4. Ke misangake ye oro, ndibo oyoho edidiong eke Usio-isop Andinyanga okongo ke nsinifik nnyin⁹ “ke ndinam ukpep mkpo Christ.”¹⁰ Ke ndap esie, Lehi ama okut “nnen nnen ye mfafaha usung”¹¹ emi adade owo aka eto uwem. Mfri esie, emi adade ono ima Abasi nte ewutde ke edidiong eke Mkpa usio-isop Christ, “ofon akan onyung edi se eyomde … [ndien] edi mkpon-nkan ima Abasi.”¹² Man inyene mfri emi, ana nte nnyin ibuotidem ke Jesus Christ, ikabare esit, “ikop iko Abasi,”¹³ inam mme akpan edinam, inyung inim mme edisana ewuho tutu utit uwem nnyin.¹⁴

5. Oto ke Erisio-isop Esie, Jesus Christ ama eyet mme idioknkpo nnyin efep, Enye nko onyung ono odudu emi eyomde man ikot Esie “[ekan] owo nte obot edide,”¹⁵ eka iso “udim ke udim,”¹⁶ ekori ke edisana¹⁷ man mmo efon ema ke usen kiet ke mbiet Christ,¹⁸ edot ndifiak ndu ye Abasi¹⁹ ndien enyene kpukpru mme edidiong emi otode obio-ubong heaven.²⁰

Akpaniko efen emi esinede ke Nwed Mormon edi, okposuk edi ofukde kpukpru mkpo, Usio-isop Abasi edi eno ono nnyin, emi enode nnyin kiet kiet.²¹ Kpa nte Jesus ekekotde ikot Nephite kiet kiet ete etuk unan Esie, Enye eke akpa ono nnyin kiet kiet, ke idem nnyin, nte afo mme ami ikidi nkukure owo ke ererimbot. Enye okot nnyin kiet kiet ete idi itiene Enye inyung ida ito utibe edidiong eke Erifak Esie.²²

Se Usio-isop Christ edide ono nnyin etim owut idem nte nnyin isede mme uwut mkpo iren ye iban ke Nwed Mormon. Ke otu mmo edi Enos, Alma, Zeezrom, Edidem Lamoni ye nwan esie, ye ikot Edidem Benjamin. Mbuk ukabare esit mmo ye mme iko ntiense mmo edi odu uwem ntiese nte nnyin ikemede ndikabare esit ndien uwem nnyin okpuhore oto ke mfon ye mbom Abasi.²³

Prophet Alma obup ikot esie akpan mbume emi. Enye ete, “Edieke mbufo enyenede ukpuhore ke esit, ndien edieke mbufo eyomde ndikwo ikwo erifak ima, ami ndoho nte, ndi emekop ntre idaha emi?²⁴ Mbume emi edi akpan-akpan mfin emi, koro nte ikot Abasi, odudu erifak Esie ana asanga ye nnyin, anwam nnyin, onyun okpuho nnyin kiet kiet ke usen ke usen

Ekeme ndinwongore mbume Alma nko ebup ete: Ini ewe ke afo ekekop inem Erisio-isop eke Andinyanga ke uwem fo akpatre? Emi etibe nte afo okopde “oyoho edinem idaresit”²⁵ esimde fi emi etiede ntiense ono ukpong fo ete ke efen mme idiok mkpo fo; mme ke ini mme okosong idomo fo eferede ndibiom; mme ke ini esit fo ememde ndien afo akan efen ono owo efen emi eduede fi. Mme ke ini afo okutde ete ke ukeme fo ndima nyung nnam mkpo nno mbon efen okori mme ke ini ndinam asana anamde fi edi owo efen, etiene uwut mkpo Andinyanga.²⁶

Ami ntie ntiense nte ke kpukpru emi edi akpaniko enyung edi idiongo ete ke ekeme ndikpuho mme uwem nto mbuotidem ke Jesus Christ ye Usio-isop Esie. Nwed Mormon anam anwanga onyung atat ifiok nnyin abanga akamba eno emi. Nte afo ekpepde nwed emi, afo eyekop uyo odu uwem Christ nte okotde fi ete edi etiene Enye. Ami menwongo nte ke edieke okopde ikot emi onyung odude uwem fo ke uwut mkpo Esie, edinyanga Esie eyeduk uwem fo. Oto ke odudu Edisana Spirit, Andinyanga eyekpuho fi ke usen ke usen “tutu mfon mma usen oro”²⁷ emi afo edikutde nte Enye odohode, “se iso mi nyung fiok ete ke ami ndodu.”²⁸ Ke enying Jesus Christ, amen.

Mkpri nwed

1. 3 Nephi 11:8–11.

2. Kese 3 Nephi 11:14–15.

3. Alma 5:33.

4. 1 Nephi 13:40.

5. Se 2 Nephi 9:21; 26:24–27; Mosiah 3:13.

6. Se Alma 7:11–12.

7. Se 3 Nephi 2:25.

8. Mosiah 3:24; see also 2 Nephi 2:4, 10, 26; 9:6–7, 12–13, 15, 22; Mosiah 3:12; 16:7–8; Alma 11:41–44; 42:6–8, 23; Helaman 14:16; Mormon 9:12.

9. Se 2 Nephi 9:21; Mosiah 3:12; Helaman 5:11; 14:18.

10. 2 Nephi 31:21; se nko 3 Nephi 27:20–21.

11. 1 Nephi 8:20.

12. 1 Nephi 15:36.

13. 1 Nephi 15:24.

14. Se 2 Nephi 31.

15. Mosiah 3:119.

16. 2 Nephi 28:30.

17. Se Mosiah 3:19.

18. Se 3 Nephi 27:27; Moroni 10:32–33.

19. Se 2 Nephi 2:8; Mosiah 2:41.

20. Se Alma 7:12.

21. Se 2 Nephi 9:21.

22. Se Omni 1:26; Alma 5:33; Moroni 10:32–33.

23. Se Enos 1; Mosiah 5; Alma 12; 18–19; 36.

24. Alma 5:26; median mkpo.

25. Alma 36:21.

26. Se Mosiah 3:19.

27. Doctrine ye Covenants 50:24.

28. Doctrine ye Covenants 93:1.