1 Ndien idahaemi ami, Nephi, ntre nditiŋ nte prophet nnɔ mbufo, ndima nditɔ eka mi. Ndien ami nkemeke ndiwet ibɔhɔke esisit ŋkpɔ, emi ami mfiɔkde ke akpanikɔ nte ke ana osu; ndien ami nkemeke ndiwet ibɔhɔke esisit mme ikɔ Jacob eyen eka mi.

2 Ke ntre, mme ŋkpɔ emi ami ŋwetde ekem mi, ibɔhɔke edi mme ikɔ ifaŋ emi anade nte ami ntiŋ kabaŋa ukpep-ŋkpɔ Christ; ke ntre, ami nyetiŋ ye mbufo iŋwaŋ-iŋwaŋ; nte aŋwaŋade ke ami nditiŋ nte prophet.

3 Koro ukpɔŋ mi enemde esit ke ndinam edi iŋwaŋ-iŋwaŋ; koro ke ntem ke Jehovah Abasi anam utom ke ufɔt nditɔ owo. Koro Jehovah Abasi ɔnɔ ifiɔk uŋwana; koro enye etiŋ ikɔ ɔnɔ mme owo ke usem mmɔ, man aŋwaŋa mmɔ.

4 Ke ntre, ami nyom nte mbufo eti ete ke ami metiŋ nnɔ mbufo kabaŋa prophet oro emi Jehovah okowutde mi, emi anade nte enim Eyen-erɔŋ Abasi uduɔkmmɔŋ, emi anade nte emen mme idiɔk ŋkpɔ ererimbot efep.

5 Ndien idahaemi, edieke Eyen-erɔŋ Abasi, enye emi edide edisana, anade enyene ntak ndina uduɔkmmɔŋ ke mmɔŋ, man anam kpukpru edinen ido, O ndien, nsutɔ ntak ke nnyin inyene, emi idide se misanake, ndina uduɔkmmɔŋ, iŋ, kpa ke mmɔŋ!

6 Ndien idahaemi, ami nyebup mbufo, ndima nditɔ eka mi, didie ke Eyen-erɔŋ Abasi akanam kpukpru edinen ido ke ndina uduɔkmmɔŋ ke mmɔŋ?

7 Nte mbufo ifiɔkke ite ke enye ekedi edisana? Edi ke misehe nte ke enye edi edisana, enye owut nditɔ owo ete, ke obukidem enye ɔsuhɔre idem esie ke iso Ete, onyuŋ edi ntiense ɔnɔ Ete ete ke imɔ iyisuk ibuot inɔ enye ke ndinim ibet esie.

8 Ke ntre, ke ini ema ekenim enye uduɔkmmɔŋ ye mmɔŋ Edisana Spirit ɔsuhɔre edidoro enye ke idem ke mbiet ibiom.

9 Ndien, enye ɔtɔŋɔ ntak owut nditɔ owo mfafaha usuŋ, ye inua otop emi esirede, emi anade nte mmɔ eduk, ndien enye ama ebemiso enim uwut-ŋkpɔ ɔnɔ mmɔ.

10 Ndien enye ɔdɔhɔ nditɔ owo ete: Mbufo etiene mi. Ke ntre, ndima nditɔ eka mi, ndi nte nnyin imikeme nditiene Jesus ke mibɔhɔke nnyin iminyime ndinim ibet Ete?

11 Ndien Ete ɔdɔhɔ ete: Mbufo ekabare esit, mbufo ekabare esit, enyuŋ ena uduɔkmmɔŋ ke enyiŋ Edima Eyen mi.

12 Ndien ŋko, uyo Eyen edi etiene mi, ete: Enye emi enimde uduɔkmmɔŋ ke enyiŋ mi, enye ke Ete edinɔ Edisana Spirit, nte ɔnɔde mi; ke ntre, etiene mi, enyuŋ enam mme ŋkpɔ emi mbufo ekutde nte ami nnamde.

13 Ke ntre, ndima nditɔ eka mi, ami mɔfiɔk nte ke etienede Eyen, ye ɔyɔhɔ uduak ke esit, inamke ŋkari ye nsu ke iso Abasi, edi ye esit akpanikɔ, ekabare esit ebaŋa mme idiɔk ŋkpɔ mbufo, etie ntiense enɔ Ete ete ke mbufo emenyime ndida nnɔ idem mbufo enyiŋ Christ, ke uduɔkmmɔŋ—iŋ, ke nditiene Jehovah mbufo ye Andifak mbufo nsuhɔre nduk ke mmɔŋ, nte asaŋade ye ikɔ esie, sese, idaha oro ke mbufo edibɔ Edisana Spirit; iŋ, idaha oro ke uduɔkmmɔŋ eke ikaŋ ye eke Edisana Spirit edidi; ndien idaha oro ke mbufo editiŋ ikɔ ye usem mme angel, enyuŋ ekwɔ mme itoro enɔ Edisana Owo Israel.

14 Edi, sese, ndima nditɔ eka mi, ntem ke uyo Eyen ekedi ɔnɔ mi, ete: Ke ini mbufo ema ekabare esit ebaŋa mme idiɔk ŋkpɔ mbufo, enyuŋ etie ntiense enɔ Ete ete ke mbufo emenyime ndinim ibet, ke uduɔkmmɔŋ, enyuŋ ebɔ uduɔkmmɔŋ ikaŋ ye eke Edisana Spirit, enyuŋ ekan etiŋ ikɔ ye obufa usem, iŋ, kpa usem mme angel, ndien ke emi ama ebe ekaŋ mi, ɔkpɔkɔfɔn ye mbufo akan edieke mbufo mikpefiɔkke mi.

15 Ndien ami ŋkop uyo otode Ete, ete: Iŋ, mme ikɔ Edima mi edi akpanikɔ ye se ebuɔtde idem. Enye emi emede tutu esim utit, ukem oro ke erinyaŋa.

16 Ndien idahaemi, ndima nditɔ eka mi, ami mɔfiɔk nte ke ibɔhɔke owo eme tutu esim utit, ke nditiene uwut-ŋkpɔ Eyen odu uwem Abasi, enye ikemeke ndibɔ erinyaŋa.

17 Ke ntre, enam mme ŋkpɔ emi ami ndɔhɔde mbufo emi ami ŋkutde nte Jehovah mbufo ye Andifak mbufo edinamde; koro, ke ntak emi ke emen mmɔ ewut mi, man mbufo efiɔk inua otop emi anade mbufo eduk. Koro inua otop emi anade mbufo eduk edi erikabere esit ye uduɔkmmɔŋ ke mmɔŋ; ndien ke erifen nnɔ mme idiɔk ŋkpɔ mbufo editiene do ito ikaŋ ye Edisana Spirit.

18 Ndien ke ini oro ke mbufo edu ke nnen nnen ye mfafaha usuŋ emi adade aka nsinsi uwem; iŋ, mbufo emeduk ke inua otop; mbufo emenam nte asaŋade ye ibet Ete ye Eyen; ndien mbufo emebɔ Edisana Spirit, emi etiede ntiense abaŋa Ete ye Eyen, man eŋwɔŋɔ emi enye akanamde osu, ete edieke mbufo edukde ke usuŋ ke mbufo eyebɔ.

19 Ndien idahaemi, ndima nditɔ eka mi, ke ini mbufo ema eduk ke nnen nnen ye mfafaha usuŋ emi, ami nyobup mme enam kpukpru emi? Sese, ami ndɔhɔ mbufo nte, iŋ iŋ; koro mbufo isimke ebiet emi ibɔhɔke ekedi ke ikɔ Christ ye ɔkpɔsɔŋ mbuɔtidem ke enye, eberedem ofuri ofuri ke mme ufɔn enye emi enyenede odudu ke ndinyaŋa.

20 Ke ntre, ana mbufo eka iso ye ntiŋ enyin ke Christ, enyene idorenyin uŋwana emi ɔfɔnde ama, ye ima enɔ Abasi ye kpukpru owo. Ke ntre, edieke mbufo edikade iso, edia usɔrɔ ke ikɔ Christ, enyuŋ eme tutu esim utit, sese, ntem ke Ete ɔdɔhɔ: Mbufo eyenyene nsinsi uwem.

21 Ndien idahaemi, sese, ndima nditɔ eka mi, emi edi usuŋ; ndien usuŋ ndomo kiet efen iduhe mme enyiŋ emi enɔde ke idak ikpa enyɔŋ emi erinyaŋade owo ke obio ubɔŋ Abasi. Ndien idahaemi, sese, emi edi ukpep-ŋkpɔ Christ, ye ŋkukure ye ukpep-ŋkpɔ akpanikɔ eke Ete, ye Eyen, ye Edisana Spirit, emi edide Abasi kiet, emi minyeneke utit. Amen.