1 Ndien idahaemi sese, nditɔ eka mi, ami nyetiŋ ikɔ nnɔ mbufo; koro ami, Nephi, ndiyakke nte mbufo ekere ete ke mbufo emedi nnen nnen ekan nte mme Gentile edidide. Koro sese, ibɔhɔke mbufo enim ibet Abasi kpukpru mbufo ke akpanikɔ eyetak; ndien ke ntak mme ikɔ emi eketiŋde inaha nte mbufo ekere ete ke esobo mme Gentile ofuri ofuri.

2 Koro sese, ami ndɔhɔ mbufo nte ke nte ediwak mme Gentile emi edikabare esit edi mbio ediomi Jehovah; ndien nte ediwak mme Jew emi midikabakere esit eyebin esio; koro Jehovah inamke ediomi ye owo ndomo kiet ibɔhɔke mmɔ emi ekabare esit enyuŋ ebuɔtde idem ke Eyen esie, emi edide Edisana Owo Israel.

3 Ndien idahaemi, ami nyetiŋ nte prophet esisit kabaŋa mme Jew ye mme Gentile. Koro ke ini ŋwed oro emi ami ntiŋde mbaŋa edidide, enyuŋ ewetde enɔ mme Gentile, enyuŋ efiak ekɔbi enɔ Jehovah, ediwak eyedu emi edibuɔtde idem ke mme ikɔ emi ewetde; ndien mmɔ eyemen mmɔ esɔk nsuhɔ ubon nnyin.

4 Ndien ke ini oro nsuhɔ ubon nnyin edifiɔkde ibaŋa nnyin, nte nnyin ikiwɔrɔde ke Jerusalem, ndien ete ke mmɔ edi ubon mme Jew.

5 Ndien eyekwɔrɔ gospel Jesus Christ enɔ mmɔ; ke ntre, eyefiak enim mmɔ ke itie ebaŋa ifiɔk mme ete mmɔ, ŋko ye eke ifiɔk Jesus Christ, emi okodude ye mme ete mmɔ.

6 Ndien ke ini oro ke mmɔ edi-daresit; koro mmɔ eyefiɔk ete ke edi edidiɔŋ emi otode ke ubɔk Abasi ɔnɔ mmɔ; ndien mme ikpɔk ekim mmɔ eyetɔŋɔ ndidiaŋare nduɔ ke mme enyin mmɔ; ndien ediwak emana idibehe ifep ke ufɔt mmɔ, ibɔhɔke mmɔ eyedi mme ndisana ye mbon inemesit.

7 Ndien eyedikem ete mme Jew emi ekesuande ŋko eyetɔŋɔ ndibuɔt idem ke Christ; ndien mmɔ eyetɔŋɔ ndiboho ke iso isɔŋ; ndien ediwak emi edibuɔtde idem ke Christ ŋko eyekabare edi mbon inemesit.

8 Ndien eyedikem ete Jehovah Abasi ɔyɔtɔŋɔ utom esie ke ufɔt kpukpru idut, mme iman, mme usem, ye mme owo, man efiak enim ikɔt esie ke itie ke isɔŋ.

9 Ndien ke nnen nnen ke Jehovah Abasi edibiere ikpe inɔ ubuene, onyuŋ asua nte enende ɔnɔ suŋ-suŋ mbio ererimbot. Ndien enye ayamia ererimbot ye esaŋ inua esie; ŋko ye ibifik mkpɔk-inua esie ke enye ediwot idiɔk owo.

10 Koro ini ke ɔsɔp edi emi Jehovah Abasi edinamde akamba ubahare ke ufɔt ikɔt esie, ndien idiɔk owo ke enye edisobo; ndien enye ayatua ikɔt esie mbɔm, iŋ, tutu edieke edide ete ke ana nte esobo idiɔk owo ye ikaŋ.

11 Ndien nnen nnen ido eyedi ubɔp-ŋkpɔ isin esie, ndien akpanikɔ edi ubɔp-ŋkpɔ idem esie.

12 Ndien ke ini oro ke wolf ediduŋ ye eyen-erɔŋ; ndien nawuri-ekpe ɔyɔsuhɔre ana ye eyen ebot, ye eyen-enaŋ, ye eyen ekpe, ye enaŋ ubom, ɔtɔkiet; ndien ekpri eyenɔwɔŋ ayada mmɔ usuŋ.

13 Ndien enaŋ ye bear eyeta mbiet; nditɔ mmɔ eyesuhɔre ena kiet; ndien lion ayata nnyanyaŋa nte enaŋ.

14 Ndien eyen-nsek eyebre mbre ke enyɔŋ odudu okuŋ, ndien eyen emi adahade ke eba oyodori ubɔk esie ke odudu ibɔm.

15 Mmɔ idinamke idiɔk inyuŋ isoboke ke kpukpru edisana obot mi; koro ererimbot ɔyɔyɔhɔ ye ifiɔk Jehovah nte mme mmɔŋ ofukde inyaŋ.

16 Ke ntre, eyeyarare mme ŋkpɔ kpukpru idut; iŋ, eyeyarare kpukpru ŋkpɔ enɔ nditɔ owo.

17 Ŋkpɔ ndomo kiet idihe edibe edi ke eyeyarare enye; utom ekim iduhe edi ke eyeyarare ke uŋwana; ndien ŋkpɔ ndomo kiet emi ediande iduhe ke ererimbot edi ke eyetat enye.

18 Ke ntre, kpukpru ŋkpɔ emi ekeyarare enɔ nditɔ owo ke usen oro ke eriyarare; ndien Satan idinyeneke odudu aba ke mme esit nditɔ owo, ke anyan ini. Ndien idahaemi, ndima nditɔ eka mi, ami metre mme utiŋ ikɔ mi.