1 Ndien ke ini oro ke ami ndikwɔ nnɔ edima ufan mi ikwɔ ufan mi, kabaŋa iŋwaŋ-vine esie. Edima ufan mi ekenyene iŋwaŋ-vine ke obot mbiri.

2 Ndien enye ɔbɔp ɔkpɔsɔŋ ibibene, onyuŋ ataŋ mme itiat ke esit efep, onyuŋ ɔtɔ enye ye akpan vine, onyuŋ ɔbɔp tower ke ufɔt esie, ŋko onyuŋ etibi obube wine ke enye; ndien enye enim enye ete ke oyoŋwum mme grape, edi enye oŋwum ɔbɔruduk.

3 Ndien idahaemi, O mme andiduŋ Jerusalem, ye mbio Judah, ebiere ikpe, mbɔk, enɔ mi ye iŋwaŋ-vine mi.

4 Nso ŋkpɔ isuhɔ eke mkpanamde ke iŋwaŋ-vine mi emi ami mme nnamke ke enye? Ke ntre, ke ini ami nnimde enye nte ke oyoŋwum mme grape enye oŋwum ɔbɔruduk.

5 Ndien idahaemi sese, ami nyɔdɔhɔ mbufo se ami ndinamde ye iŋwaŋ-vine mi—Ami nyemen ɔkɔ oro mfep, ndien eyeta enye; ndien ami nyewuri ibibene oro, ndien eyedigi enye.

6 Ndien ami nyebiat enye; owo idisepke inyuŋ idiɔŋke enye; edi mme akpap ye mme ŋkukim eyetibe; ami nyɔnɔ obubit enyɔŋ uyo nte mmɔ ekudep edim eduɔk enye.

7 Koro iŋwaŋ-vine Jehovah mme Udim edi ufɔk Israel, ndien mbio Judah edi ediye iŋwaŋ esie; ndien enye ebet ubiere ikpe, edi sese, ufik; enye enim enyiŋ ke nnen nnen ido, edi sese, eseme.

8 Ɔyɔdiɔk ɔnɔ mmɔ emi ediande ufɔk ke ufɔk, tutu ebiet iduhe, man mmɔ enim idem mmɔ ikpɔŋ ke ufɔt isɔŋ!

9 Ke mme utɔŋ mi, ke Jehovah mme Udim ɔdɔhɔ, ete ke akpanikɔ ediwak ufɔk eyena ukpɔk, ndien ikpɔ ye ndiye obio andiduŋ ididuhe.

10 Iŋ, iŋwaŋ-vine eke enaŋ iba-iba ke itie duop efuŋde eyewɔrɔ abaŋ kiet, ndien mkpasip homer kiet eyenam ephah kiet.

11 Ɔyɔdiɔk ɔnɔ mmɔ emi ebakde edaha eda ke usenubɔk, man mmɔ ebine ɔkpɔsɔŋ mmin, enyuŋ ekade iso tutu okoneyo, ndien mmin obubede mmɔ ibuot!

12 Ndien harp, ye viol, ekɔmɔ, ye ifiom, ye mmin edu ke ikpɔ udia mmɔ; edi mmɔ itiŋke enyin ke utom Jehovah, inyuŋ isehe se mme ubɔk esie anamde.

13 Ke ntak oro, ikɔt mi eduk ke ŋkpɔkɔbi, koro mmɔ inyeneke ifiɔk; ndien biɔŋ ɔdɔŋ mbɔŋ mmɔ, ndien itɔŋ asat mbio obio mmɔ.

14 Ke ntak oro, hell atara ke idem esie, onyuŋ atat inua esie esim akpatre; ndien ubɔŋ mmɔ, ye uwak mmɔ, ye ŋwutidem mmɔ, ye owo emi adarade-esit, eyesuhɔde eduk ke enye.

15 Ndien eyeda owo usuhɔde itie esuhɔre, enyuŋ esuhɔre ɔkpɔsɔŋ owo, ndien mme enyin ataŋidem eyesuhɔde.

16 Edi eyemenede Jehovah mme Udim ke ubiere ikpe, ndien ayanam Abasi emi edide edisana asana ke nnen nnen ido.

17 Ke ini oro ke nditɔ-erɔŋ edita mbiet nte ɔtɔ mbiet mmɔ, ndien mme ndon mmɔ eke ekponde ke isen owo edidia.

18 Ɔyɔdiɔk ɔnɔ mmɔ emi eduride ukwaŋ-ŋkpɔ ye mme uruk ikpikpu ŋkpɔ, ndien eda idut ukpat-ŋkpɔ eduri idiɔk ŋkpɔ;

19 Emi edɔhɔde ete: Yak enye awara, ɔsɔp ubɔk anam utom esie, man nnyin ikut; ndien yak item Edisana Owo Israel asaŋa ekpere onyuŋ edi, man nnyin ifiɔk enye.

20 Ɔyɔdiɔk ɔnɔ mmɔ emi ekotde idiɔk eti, ye eti idiɔk, emi enimde ekim ke uŋwana, ye uŋwana ke ekim, emi enimde idot ke iniŋe, ye iniŋe ke idot.

21 Ɔyɔdiɔk ɔnɔ mmɔ emi esede idem mmɔ nte mbon eti ibuot ye mbon ɔniɔŋ ke enyin mmɔ!

22 Ɔyɔdiɔk ɔnɔ mmɔ emi enamde uko ke ediŋwɔŋ wine, enyuŋ edide mkpɔsɔŋ owo ke edibuak mmin;

23 Emi enamde ikpe asana idiɔk owo abaŋa enɔ, enyuŋ ebɔde nnen nnen owo nnen nnen ido esie!

24 Ke ntak oro, nte ikaŋ atade etak nnyanyaŋa, ndien edeme ikaŋ ata mbio, oruŋ mmɔ edidi mbumbu eto, mme ikɔŋ mmɔ eyenyuŋ ɔdɔk nte obu; koro mmɔ emende ibet Jehovah mme Udim eduɔk, enyuŋ esinde ikɔ Edisana Owo Israel.

25 Ke ntak oro, ke iyaresit Jehovah obumede ye ikɔt esie, ndien enye anyan ubɔk esie odori mmɔ ke idem, onyuŋ amia mmɔ; ndien mme obot enyek idem, ndien mme okpo mmɔ ena nte ifum ke mme efak. Koro inamke ofuri iyaresit esie afiak edem, edi ubɔk esie osuk anyanyan.

26 Ndien enye eyemenede banner ɔnɔ mme idut ke anyan ebiet, onyuŋ esi okot mmɔ ke utit ererimbot; ndien sese, mmɔ eyewara edi itɔk-itɔk; baba owo kiet ke otu mmɔ idikpaha mba inyuŋ ituakke ukot iduɔ.

27 Baba owo kiet idiyetke idap inyuŋ idehe; ndien ubɔp-isin mmɔ itarake, ŋko uruk ikpa-ukot mmɔ ikibeke;

28 Emi idaŋ mmɔ edisɔpde, ndien kpukpru mme utiha mmɔ enuhɔ, ndien eyebat mme mbara ukot mme horse mmɔ nte afransi, ndien mme wheel mmɔ ebiet oyobio, mfiori mmɔ ebiet unam lion.

29 Mmɔ eyefiori nte nditɔ lion; iŋ, mmɔ eyefiori, enyuŋ emum unam man eta, enyuŋ emen enyɔŋ ke ifure, ndien owo ndomo kiet idinamke ɔbɔhɔ.

30 Ndien ke usen oro mmɔ eyefiori ye mmɔ nte uyom inyaŋ; ndien edieke mmɔ esede obot, sese, ekim ye mfuhɔ, ndien uŋwana ekim ke mme enyɔŋ.