1 Iŋ, koro ntem ke Jehovah ɔdɔhɔ: Ndi ami mmesio mbufo ndɔ, mme ndi ami mmebin mbufo nsio ke nsinsi? Koro ntem ke Jehovah ɔdɔhɔ: Enye ŋwed usio ndɔ eka mbufo? Anie ke ami nsio mbufo ndɔ nnɔ, mme anie ke otu mmɔ emi ŋkamade isɔn ke ami nkenyam mbufo nnɔ? Iŋ, anie ke ami nyam mbufo nnɔ? Sese, ke ntak ukwaŋ-ŋkpɔ mbufo ke mbufo enyam idem mbufo, ndien ke ntak ndudue mbufo ke esio eka mbufo ndɔ.

2 Ke ntre, ke ini nkedide, eren owo ikiduhe; ke ini ŋkokotde, iŋ, owo ndomokiet ikiduhe ndibɔrɔ. O ufɔk Israel, ndi ubɔk mi ɔmuhɔ tutu ete enye ikanke ifak, mme ndi ami nyeneke odudu ndinam ebɔhɔ? Sese, ke edisua nnɔ mi ami nnam inyaŋ asat, ami nnam akpa mmɔ edi ikɔt ndien iyak mmɔ etebe koro mme mmɔŋ esat, ndien mmɔ ekpa ke ntak nsatitɔŋ.

3 Ami mfuk mme heaven ye ekim, ndien ami nnam ɔfɔŋikpo edi ɔfɔŋ mmɔ.

4 Jehovah ɔnɔ mi edeme mmɔ ekekpepde ŋkpɔ, man ami mfiɔk nte ntiŋde ikɔ ke ini nnɔ mbufo, O ufɔk Israel. Ke ini ekpade mba enye edemede ke usenubɔk ye usenubɔk. Enye edemede utɔŋ mi ete ŋkop nte mmɔ emi ekpepde ŋkpɔ.

5 Jehovah Abasi ama atat mi utɔŋ, ndien ami nkesɔŋke ibuot, ndien mfiakke edem.

6 Ami mmayak edem mi nnɔ andimia, ye mfuk mi nnɔ mmɔ emi ediwubede idet. Ami ndipke iso mi mfehe but ye etap.

7 Koro Jehovah Abasi ayanyaŋa mi, ke ntre but idinamke mi. Ke ntre ami nnim iso mi nte itiat, ndien ami mmefiɔk nte ke but idinamke mi.

8 Ndien Jehovah ekpere, ndien enye anam ikpe etebe mi. Anie owo edineni eneni ye ami? Yak nnyin ida otokiet. Anie owo idi asua mi? Yak enye edi ekpere mi, ndien ami nyemia enye ye odudu inua mi.

9 Koro Jehovah Abasi ayanyaŋa mi. Ndien kpukpru mmɔ emi edinamde ikpe etip mi, sese, kpukpru mmɔ eyekori esɔŋ nte ɔfɔŋ, ndien uta-ŋkpɔ ayata mmɔ.

10 Anie owo ke otu mbufo abak Jehovah, okop uyo owo esie, asaŋa ke ekim inyuŋ inyeneke uŋwana?

11 Sese kpukpru mbufo emi ebarade ikaŋ, emi ekanare idem mbufo ye mbubek ikaŋ, esaŋa ke uŋwana ikaŋ mbufo ye ke mbubek emi mbufo ebarade. Ŋkpɔ emi ke mbufo edibɔ mi ke ubɔk—mbufo eyesuhɔde ena ke mfuhɔ.