1 Ndien, ikɔ Jehovah ɔdɔhɔ mi ete: Afo da akamba ikpa ŋwed, nyuŋ da eto ŋwet owo wet ke enye, kabaŋa Maher-shalal-hash-baz.

2 Ndien ami nda mme ntiense ebuɔtde idem ndian idem man ŋwet, Uriah oku, ye Zechariah eyen Jeberechiah.

3 Ndien ami nka mbine prophet aŋwan; ndien enye oyomo onyuŋ aman eyen-eren. Ndien Jehovah ɔdɔhɔ mi ete: kot enye enyiŋ, Maher-shalal-hash-baz.

4 Koro sese, eyen emi idifiɔkke nte okotde ete, Ete mi, ye eka mi, mbemiso etaŋ mme inyene Damascus ye mbume Samaria ewɔrɔ ke iso edidem Assyria.

5 Jehovah afiak ɔdɔhɔ mi ŋko, ete:

6 Ke ntak emi mbio emi esinde mme mmɔŋ Shiloah emi asaŋade suŋ-suŋ, enyuŋ edatde esit ebaŋa Rezin ye eyen Remaliah;

7 Idahaemi ke ntre, sese, Jehovah kada ɔdɔk etiene mmɔ mme mmɔŋ akpa, enyenede odudu enyuŋ ewakde, kpa edidem Assyria ye ofuri ubɔŋ esie; ndien enye ɔyɔdɔk ɔyɔhɔ kpukpru akpa esie, onyuŋ emen ofuri mben esie.

8 Ndien enye eyebe oduk ke Judah; enye ɔyɔtɔ onyuŋ asaŋa ebe, enye eyesim kpa itɔŋ; ndien editara mba esie ɔyɔyɔhɔ ubom isɔŋ fo, O Immanuel.

9 Mbufo ediana kiet, O mbufo mme owo, ndien eyebuŋ mbufo mbio-mbio; enyuŋ ekpaŋutɔŋ kpukpru mbufo emi edude ke mme anyan obio; mbufo ebɔbɔ ŋkpɔ, ndien eyebuŋ mbufo mbio-mbio; mbufo ebɔbɔ ŋkpɔ, ndien eyebuŋ mbufo mbio-mbio.

10 Mbufo eduak uduak kiet, ndien enye eyedi ikpikpu; etiŋ ikɔ, ndien enye ididaha; koro Abasi odude ye nnyin.

11 Koro ntem ke Jehovah ɔkɔdɔhɔ mi ye ɔkpɔsɔŋ ubɔk, onyuŋ eteme mi ete yak ami ŋkusaŋa ke usuŋ mbio obio emi, ete:

12 Mbufo ekudɔhɔ, Odu, ye kpukpru ŋkpɔ emi mbio emi edidɔhɔde ete, Odu; ŋko mbufo ekufehe ndik mmɔ, ndien ekufehe ndik.

13 Mbufo enam Jehovah mme Udim ke idem esie asana, enyuŋ eyak enye edi se mbufo efehede, enyuŋ eyak enye edi se mbufo ebakde.

14 Ndien enye eyedi edisana ebiet; edi edi itiat utuaha, ye itiat akanamde ufɔk Israel mbiba eduɔŋɔ, ye afia ye mfine ɔnɔ mme andiduŋ ke Jerusalem.

15 Ndien ediwak owo ke otu mmɔ eyetuak ukot enyuŋ eduɔŋɔ, enyuŋ enuaha, enyuŋ eyire ke afia, ndien emum mmɔ.

16 Bɔp ikɔ ntiense, dian mbet ke otu mbet mi.

17 Ndien ami nyodori enyin ke Jehovah, emi edipde ufɔk Jacob iso esie, ndien ami nyedori enyin ke enye.

18 Sese, ami ye nditɔ emi Jehovah ɔnɔde mi idi inɔ mme idiɔŋɔ ye mme utibe ŋkpɔ ke Israel ito Jehovah mme Udim, emi oduŋde ke Obot Zion.

19 Ndien ke ini mmɔ edidɔhɔde mbufo ete: Mbufo ebup ndem, ye mbia-idiɔŋ emi enyuŋɔde enyuŋ ekunide ikɔ—nte mme owo ikpibupke Abasi mmɔ ibaŋa mme odu uwem man ekop eto mme akpa mkpa?

20 Ebup mbet ye ikɔ ntiense; ndien edieke mmɔ mitiŋke ikɔ nte asaŋade ye ikɔ esie, edi koro uŋwana miduhe ke mmɔ.

21 Ndien mmɔ eyesaŋa ebe enye ke nnanenyin ye biɔŋ; ndien eyedikem ete ke ini biɔŋ edidɔŋde mmɔ, mmɔ eyeyat esit mmɔ, enyuŋ esuŋi edidem mmɔ ye Abasi mmɔ, enyuŋ emenede iso mmɔ ke enyɔŋ.

22 Ndien mmɔ eyese isɔŋ ndien sese nnanenyin, ye ekim, nkim-nkim ndutuhɔ, enyuŋ ebin esin ke ekim.